AME lo angetre Isaraela a hnëkë troa sasaithe la Hneopegejë ne Ioridano utihë la Nöj hnei Akötresieti hna thingehnaean, hna traqa hnene la itre atr troa wai angatr. Kolo itre föe trenyiwa, tha itretre Isaraela kö angatr. Angatr a traqa troa könëne la itre trahmany troa xen. Kolo petre hi a hane traqa la ewekë cili. Ketre ijine tro angatre lai a nyi sinee me itre trenyiwa, me fia me xen. Eje hi laka, tha ka trongëne kö la itre föe cili la Wathebo hnei Akötresieti hna hamëne koi angetre Isaraela. Celë hi matre, isapengöne kö la aqane mel me itre thiina i angatr. Ngo maine jë, hnene la itre trahmany ne Isaraela hna mekun, ka hape: ‘Tha tro jë kö angatr a huli hun. Atre hi eahuni la ka loi me ka ngazo. Loi e tro huni a hmek.’

 Nemene hë la pun? Öni Tusi Hmitrötr: “Ame hna qane kuci ngazo la nöje memine la ite föe ne Moaba.” Aja ne la itre föe, tro la itre trahmanyi ne Isaraela a thil kowe la itre haze i angatr. Nge celë hi la ka traqa! Celë hi matre, “hna palulu la elëhni Iehova koi angete Isaraela.”—Num. 25:1-3.

Hnei angetre Isaraela hna ena la lue götrane la Wathebo i Akötresie: Hnei angatr hna thil koi idola, me kuci ngazo. Alanyimu la itre ka mec ke, tha hna drei Akötresieti kö. (Eso. 20:4, 5, 14; Deu. 13:6-9) Ketre, maine tha ena ju angatr la Wathebo i Akötresie, tro hë angatr a sasaithe la Hneopegë e Ioridano, me lö kowe la Nöj Hna Thingehnaean.—Num. 25:5, 9.

Öni Paulo aposetolo, göne lai ka hape: “hna cinyihane la itre ewekë ka traqa koi angatr nyine hmekë së, easë itre ka mele ngöne la pune la fene celë.” (1 Kor. 10:7-11) Eje hi, madrine catre Satana la angetre Isaraela a kei kowe la ngazo, me triane la Nöj Hna Thingehnaean. Nyipiewekë tro sa xomi ini qa ngöne la ka traqa ekö koi angetre Isaraela. Atre hi së laka, tha Satana kö a ajane tro sa lö kowe la fene ka hnyipixe!

Satana a tupathe hi la itre Keresiano. Caasi palahi la itre aqane tupathe angeic la itre atr. Hnei angeic ekö hna tupath la angetre Isaraela jëne la kuci ngazo. Nge ketre tune fe enehila. Satana a thel tro sa kei kowe la kuci ngazo, matre angeic a jëne la itre iatr ka sis.

Ame enehila, ijije hë tro la ketre atr a goeëne juetrëne la itre iatr ka sis. Ame ekö, angatr a goeëne lai ngöne cinéma. Ame itre xan, tha tro kö angatr pine laka, angatr a hmahma e traqa ju öhnyi angatr. Ngo ame hë enehila jëne Ëternet, ijije hi tro la itre atr a goeëne la itre iatr ka sis ngöne la hna huliwa, maine ngöne la ketre hnë ami loto. Ame ngöne la itre xaa nöj, kola goeën ngöne la hnalapa.

Ketre, tha jole hë troa goeëne la itre iatr ka sis ngöne la itre mobilis me itre tablet, ngöne la kola ti kar.

Eje hi, hmaloi hë enehila troa goeëne juetrë la itre iatr ka sis. Celë hi matre, tru catre enehila la itre ethan ej. Ame itre xan, kola thë la faipoipo i angatr. Angatr a sipu wangaconyi angatre kö. Tha huliwa ha la mekuthetheu i angatr. Ketre, kola thë la aqane imelekeu i angatr me Akötresie. Eje hi, hetre ethane e tro sa goeëne la itre iatr ka sis. Tha ka hmaloi kö troa canga nue la huliwa cili.

Ngo tha tro kö sa thëthëhmin laka, Iehova a thupë së qa ngöne la hnö i Satana cili. Maine easa ajane tro Iehova a thupë së, tha tro pi kö sa nyitipune la angetre Isaraela ekö. Loi e tro sa drengethenge Iehova hnyawa. (Eso. 19:5) Loi e troa xecie koi së laka, methi Akötresieti la itre iatr ka sis. Pine nemen?

The thëthëhmine kö laka, ka isapengöne catr la Wathebo hnei Akötresieti hna hamën koi angetre Isaraela memine la itre xaa nöj. Ame la itre wathebo i Akötresie, tre, kösë itre giti ka thupëne la angetre Isaraela qa ngöne la itre xaa nöj. Kola thupë angatr qa ngöne la itre hna majemine ka ngazo ne la itre xaa nöj. (Deu. 4:6-8) Kola amamane hnyawa hnene la itre wathebo cili laka, methi Iehova la kuci ngazo.

Hnei Iehova hna qaja la itre huliwa ka sis hna kuca hnene la itre nöj ka lapa easenyine la nöj e Isaraela. Thupene lai, öni Nyidrë koi angetre Isaraela: “The tro fe kö nyipunie a kuca thenge la ite thina ne la nöje Kanana, la hnenge hna troa tro sai nyipunie kow. . . . Ngazo hë la nöj; nge tro ni a nyi thupene kow’ eje la hulö ne ej.” Iehova la Akötresieti ka meköt me ka hmitrötr, Akötresi angetre Isaraela. Pine laka, ngazo catre la aqane mele i angetre Kanana, matre methi Iehova la nöje cili.—Lev. 18:3, 25.

 Ngacama hnei Iehova hna amekötine la angetre Kanana, ngo hetre itre xan palakö ka kuci ngazo. Thupene la 1 500 lao macatre, öni Paulo göne la itre nöj hna lapa hnene la itre Keresiano, ka hape, “pë hë wangatrehmekune i angatr.” Eje hi, “angatr a nue angatr kowe la itre huliwa nyine hmahman, me thele catrëne troa kuca lapane la nöjei huliwa ka sis.” (Efe. 4:17-19) Ame fe enehila, pëhë xou thene la itre atr troa kuca la itre huliwa ka sis. Ngo tha tro pi kö la itre hlue i Akötresieti a ixomithiina.

Ame la itre iatr ka sis, tre, kola ahmahmanyi Akötresie. Hnei Iehova hna xup la itre atr hnaiji Nyidrë me tui Nyidrë. Hnei Nyidrëti hna xupi së cememine la atreine troa wangatrehmekune la loi qa ngöne la ngazo. Ka inamacane Akötresie, celë hi matre hnei Nyidrëti hna acili wathebo, göne la troa ce meköle trefën. Ame la troa ce meköl, tre, ketre ahnahna lai qaathei Akötresieti kowe la lue trefën. Aja i Nyidrëti tro nyidroti a mele madrin. (Gen. 1:26-28; Ite edomë 5:18, 19) Ngo nemene la hna kuca hnene la itre ka kuca la itre iatr ka sis? Tha trongëne kö angatre la itre trepene meköti Akötresie. Eje hi, pëkö metrötre i angatr koi Iehova. Tro kö Iehova a amekötine la itre ka tha nyipiewekëne kö la itre trepene meköti Nyidrë, me ka kuca me tro fë la itre ewekë ka sis.—Rom. 1:24-27.

Ngo tune kaa la itre atr ka e me goeëne la itre iatr ka sis? Ame koi itre xan, pëkö engazone la itre iatr ka sis. Ngo angatre lai a sajuëne me nyixölene la itre atr ka tha metrötrëne kö la itre hna amekötin hnei Iehova. Maine jë, tha celë kö lo aja i angatr ngöne la angatr a nyiqane goeëne la itre iatr ka sis. Ngo Tusi Hmitrötr a amamane hnyawa laka, loi e tro la itre hlue i Akötresieti a sisine la itre iatr ka sis. Öni Tusi Hmitrötr: “Angete hnine koi Iehova fe, sisinejë la ngazo.”—Sal. 97:10.

Ame itre xan, angatr a isin matre tha tro kö a goeë iatr ka sis. Ngo tha ka hmaloi kö. Eje hi, tha ka pexeje kö së, nge jole koi së troa isi memine la itre sipu aja së ka ngazo. Ketre, pine laka tha ka pexeje kö së, maine jë tro sa mekun laka, pëkö engazone troa goeë iatr ka sis. (Ie. 17:9) Ngo alanyimu thene la itre Keresiano, la itre ka atreine troa elë hune la jole cili. Haawe, maine easë fe a hane melëne lai ke, kola ithuecatre koi së laka,  ijiji së fe troa elë hune lai jol. Hanawang la aqane tro la Wesi Ula i Akötresieti a xatua së troa thipetrije la hnö i Satana, ene la itre iatr ka sis.

Tune la hna qaja e caha hun, nyimutre thene la angetre Isaraela, la itre ka nue la itre aja ka ngazo troa kökötr e kuhu hni angatr, me kei kowe la itre aja cili. Nge ijije fe troa traqa tune enehila. Hnei Iakobo, ketre trejine me Iesu hna qejepengöne la jol cili: “Kolo pe a isa . . . huli së, me iaö së, hnene la itre sipu aja së. Matre e upune hë la aja, ame hna hnahone pi la ngazo.” (Iako. 1:14, 15) Maine tro la ketre atr a nue la itre aja ka ngazo troa kökötr e kuhu hni angeic, tro hë angeice lai a kei kowe la ngazo. Celë hi kepin matre, loi e tro sa isine troa xometrije la itre mekune ka ngazo qa ngöne he së.

Maine epuni a lapa mekune la itre ewekë ka ngazo, loi e troa canga hmekën. Öni Iesu: “Haawe, maine eö a kei pine la ime i eö me waca i eö, thupatrije pi. . . . Ketre tun, maine eö a kei pine la alameke i eö, seatrije pi.” (Mat. 18:8, 9) Tha hnei Iesu kö hna upi së troa ketre sipu qanangazone la ngönetrei së. Hnei nyidrëti pe hna xome la ketre ceitun, matre troa xatua së troa thele la ewekë ka huli së troa mekun la itre mekune ka ngazo me canga saze. Nemene la aqane tro sa trongëne la eamo celë, göne la itre iatr ka sis?

Maine epuni a öhne la ketre iatr ka sis, the mekune kö ka hape, ‘Ka pëkö thangane lai koi ni.’ Canga saze pi la hna goeën. Canga apine ju la tele, maine ordinatör maine mobilis. Loi e troa mekune la itre ewekë ka loi. Celë hi ka troa thupëne la itre mekuna i epun, me canga thipetrije la itre aja ka ngazo.

Tune kaa e tha goeë iatr ka sis hmaca kö epun, ngo kolo palahi a traqa la itre mekun ka ngazo? Eje hi, ngacama ekö catre hë, ngo tha ka canga lai a paatr. Tro hmaca kö a traqa la itre mekune ka ngazo, ngo tha zö së kö. Maine celë hi ka traqa, maine jë, hnei epuni hna ajane troa kuca la ketre huliwa ka sis, tune la troa nyimone la gaa hmitrötre i epun, maine kuca pena  la ketre ewekë ka ngazo catr. Haawe, thupëne kö la itre mekune cili ka ngazo, nge canga hnëkë jë matre troa thipetrije itre ej.

Catre jë drengethenge Akötresie, me kuca la aja i Nyidrëti ngöne la aqane mekun me aqane ujë. Loi e tro sa tui Paulo aposetolo laka, hnei angeic hna “jenge la ngönetrei [i angeic], me xomacon ej kösë hlu.” (1 Kor. 9:27) The kei thenge kö la itre aja ka ngazo. “Saze pi hnene la hna ahnyipixene la aqane mekun i nyipunie, matre tro hë nyipunieti a isa tupathe la aja i Akötresie laka, ka lolo, nge ka iamadrinë, nge ka pexej.” (Rom. 12:2) The thëthëhmine kö laka, pëkö madrin e troa kuca la itre huliwa ka sis. Tro pe sa mele madrin, e hne së hna kuca la aja i Akötresieti me drengethenge Nyidrë.

Thele jë troa atre hnyawa la itre xaa xötr ne la Tusi Hmitrötr. E cili, ame la kola troa traqa la itre mekun ka sis, mekune catrëne jë la itre xötre cili. Ame la itre xötre Salamo 119:37; Isaia 52:11; Mataio 5:28; Efeso 5:3; Kolose 3:5; me 1 Thesalonika 4:4-8, tre, kola troa xatua së troa ce mekun me Iehova me sisine la itre iatr ka sis. E cili, tro fe hë sa atre la aqane tro sa ujë, thenge la aja i Nyidrë.

Nemene la nyine troa kuca e thatreine kö epuni xomehnöthe la itre mekun me itre aja ka ngazo, tune la troa goeë iatr ka sis? Catre jë nyitipu Iesu, Tulu së. (1 Pet. 2:21) Thupene la Iesu a xomi bapataiso, hnei Satana hna anyimua tupathi nyidrë. Nemene la hnei Iesu hna kuca? Hnei nyidrëti hna cile catr. Jëne la itre xötr ne la Tusi Hmitrötr, hnei Iesu hna thipetrije la itre itupathi Satana. Öni nyidrë: “Tro pi Satana!” nge hnei Satana hna drei nyidrë. Tha cile kö Iesu thipetriji Diabolo, nge loi e tro sa tui nyidrë. (Mat. 4:1-11) Satana me fene i angeic palahi a thel matre tro sa mekune lapane la itre ewekë ka sis, ngo the cile kö troa isi. Ijiji epuni hi troa hane elë hune la jole cili, me hmaca troa goeë iatr ka sis. Tro kö Iehova a xatua epuni troa isi me ngaa Satana.

Catre jë thith me sipo ixatua koi Iehova. Öni Paulo: “Qaja jë la itre sipo i nyipunie koi Akötresie. Nge jëne Iesu Keriso, tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.” (Fil. 4:6, 7) Akötresieti a troa hamë së la tingeting me xatua së, matre tha tro kö sa kuca la ngazo. Maine tro sa easenyi koi Iehova, “tro nyidrëti a easenyi koi [së].”—Iako. 4:8.

Maine ka catre palahi la aqane imelekeu së memine la Atre Musi e koho hnengödrai, haawe, tro ha thupë së qa ngöne la itre hnö i Satana. Öni Iesu: “Calemi hë [Satana] la atre musinëne la fen, ngo pëkö mene i angeice theng.” (Ioane 14:30) Hnei Iesu hna atre tune kaa la ithuemacany cili? Öni nyidrë: “Ce eni pala hi memine la Atre upi ni, nge tha hnei nyidrëti kö hna nuaxöji ni, ke eni pala hi a kuca la itre ewekë ka amadrinë nyidrë.” (Ioane 8:29) Maine tro palahi sa kuca la itre ewekë ka amadrinë Iehova, haawe, tha tro jë kö Nyidrëti a nuaxöji së. The goeëne pi kö la itre iatr ka sis, matre pëkö jë i Satana troa tra thethi epun.