AME lo 1970, hnene la itre atre ithel hna öhne la ketre itusi hna ewath hna dreuth. Hna öhne la itusi cili e Ein Gedi e Isaraela, ezine la Hnagejë Ka Palulu. Hnei angatr hna sine thel la ketre sunago hna dreuthetrij ekö, ngöne lo kola apatrene la traon, maine jë, ngöne lo itre macatre 500 M.K. Ngazo catre hë la itus, matre tha ijije kö troa e. Nge göi thatreine fe së seluth, wanga ngazo pi. Ngo ame pe, jëne la ketre masin ka hnyipixe hna hape, Technique de numérisation 3D, hnene la itre ka inamacan hna öhne la aliene la itus. Nge jëne la ordinatör, ijije hë troa e la itus.

Nemene la aliene la itus? Kola qeje Tusi Hmitrötr. Kola mama la itre xaa pane xötr ne la tusi Levitiko. Nge hetrenyi la sipu ëje i Akötresie qene Heberu, ene lo Tétragramme. Ka hekö catre la itusi cili, maine jë ngöne lo itre macatre 50 M.K. koi 400 M.K. Celë hi la itus ne la Itre Hna Cinyihan Qene Heberu hna öhn, nge ka hekö catre kö thupene la itre Rouleaux de la mer Morte (Qumran). Hnei Gil Zohar hna cinyihan ngöne la ketre zonal (The Jerusalem Post) ka hape, “Qëmekene troa öhne la itusi celë, tre, luetre pe hi la lue itusi hna öhn nge ka hekö. Kola qaja la Rouleaux de la mer Morte (maine jë lo 100 M.P.K.), memine la Codex d’Alep (maine jë lo 930 M.K.), hna cinyihan ngöne la 1000 lao macatre thupene la Rouleaux de la mer Morte. Tune la hna qaja hnene la itre ka inamacan, kola amamane hnyawa hnene la itusi celë laka, ame la itre hna cinyihan ngöne la Torah, tre, “ngacama ka hekö catre hë, ngo hna thupëne hnyawa utihë enehila nge ka nyipici asë hi. Ngacama nyimutre la itre xaa ka tria hna cinyihan, ngo ame pe, tha hna saze kö la alien.”