1. Pine nemene matre nyipiewekë tro sa wangatrune la aqane hmekë së hnei Iesu?

AME ngöne lo hna perofetan hnei Iesu, göne la itre drai hnapin, hnei nyidrëti hna qaja ka hape: “Wange kö nyipunie, wanga hacepi la ite hni nyipunie hnene . . . la hna hnehengazone la itre ewekë thatraqane la mel.” (Luka 21:34) Nyipiewekë tro sa wangatrune enehila la aqane hmekë së hnei Iesu. Pine nemen? Pine laka, caasi hi la itre pengöne jol hne së hna cile kow.

2. Nemene la itre jol hna cile kow hnene la itre trejin nge ka akötrë angatr?

² Ame itre xaa ijin, tre, kola traqa itrai la itre jol. Hanawang la itre xaa hna melën. John * la ketre atre Anyipici Iehova, nge hna tithi angeic hnene la ketre meci ka ketr la itre non, hna hape, sclérose en plaques. Ketre, hna trotriji angeic hnene la föi angeic, ngacama 19 lao macatre ne faipoipo nyidro. Thupene lai, tha kolo hmaca kö a nyihlue i Iehova hnene la lue nekö i angeice jajiny. Ame pena göi Bob me Linda, tre, tha ka ceitu kö la jol ka traqa koi nyidroti me John. Hna upi nyidroti asë qa ngöne la hna huliwa, matre kösë pëhë uma i nyidro. Nge kolo fe a thuemacanyi Linda hnene la droketre ka hape, ka meci fë wenethëhmi eahlo, nge tro hë eahlo a mec. Nge kolo fe a qaja koi eahlo, ka hape, troa ngazo trootro la madra i eahlo, matre tro ha tithi eahlo hnei mec.

3. Nemene la hna qaja ngöne Filipi 4:6, 7 göi Iehova?

³ Tha sihngödri kö koi Iehova la itre akötre së, pine laka, Nyidrëti la Atre Xupi së, me Keme së ka tru ihnimin. Nyidrëti a ajane troa xatua së troa xomihnin me cile kowe la nöjei jole së. (E jë la Filipi 4:6, 7.) Ame e hnine la Wesi Ula i Akötresie, kola qaja  la itre jol hna cile kow hnene la hlue i Akötresie. Kolo fe a qaja la aqane xatua angatr hnei Iehova, matre troa catre xomihnine la itre akötre cili. Tro sa pane ce wang la itre xan.

4. Nemene la itre jol hna cile kow hnei Elia, nge nemene la hnei nyidrëti hna kuca?

⁴ Ame ngöne la itre ijine akötr, hnei Elia hna catre xomihni me nyihlue i Iehova. Ame Ahaba, ketre joxu ne Isaraela, ke, tha ka mele nyipici kö koi Iehova. Hnei angeice hna ikötresai me Iezebela, föe ka ngazo thiina me ka thili koi Baala. Hnei nyidroti hna upe la nöj troa thili koi Baala, me humuthe la itre perofeta i Iehova. Ngo hnei Elia hna kötre mel. Ketre, mele ju kö Elia, lo kola jiin atraqatr ngöne la nöj, pine laka, hnei nyidrëti palahi hna catre lapa qale koi Iehova. (1 Ite jo. 17:2-4, 14-16) Hnei Elia palahi hna mejiune koi Iehova ngöne la kola icilekeu me nyidrë, hnene la itre perofeta me itre ka nyihlue i Baala. Hnei Elia fe hna ithuecatre koi angetre Isaraela, troa bëeke koi Iehova. (1 Ite jo. 18:21-24, 36-38) Eje hi, hnei Elia hna öhne la aqane thupë nyidrë, me xatua nyidrëti hnei Iehova, ngöne la itre ijine jol me akötr.

5-6. Thenge la hna qaja ngöne 1 Ite Joxu 19:1-4, nemene la ka ej e kuhu hni Elia, nge nemene la aqane amamane Iehova la etrune la ihnimi Nyidrëti koi Elia?

⁵ E jë la 1 Ite Joxu 19:1-4. Nyipici laka, hnei Elia hna xou ngöne lo nyidrëti a drenge ka hape, kola troa humuthi nyidrë hnei Iezebela. Hnei nyidrëti hna kötr a tro Bere-seba e Iudra. Kucakuca catre Elia, matre hnei nyidrëti hna ‘sipone matre tro nyidrëti a mec.’ Pine nemene matre traqa pi nyidrëti kowe la mekun cili? Pine laka, tha ka pexeje kö Elia, nge ketre “atr ka tu së hi.” (Iako. 5:17) Maine jë, thatreine hë Elia  xomihnine la itre jol ka traqa koi nyidrë, nge kucakuca catre nyidrë. Maine jë, hnei nyidrëti fe hna mekun laka, pëkö thangane la hnei nyidrëti hna cainöj, pine laka, nyidrëti caasi hi la ka nyihlue i Iehova. Ketre, tha saze kö angetre Isaraela qa ngöne la itre thiina i angatr ka ngazo. (1 Ite jo. 18:3, 4, 13; 19:10, 14) Eje hi laka, thatreine kö tro sa mekune ka hape, troa hetrenyi thei Elia, perofeta i Iehova ka mele nyipici, la itre mekune cili. Ngo trotrohni Elia hi hnei Iehova, nge öhne hi Nyidrëti la hni angeic.

⁶ Tha hnei Iehova kö hna wesitr me ameköti Elia, pine la itre trengewekë i angeic. Hnei Iehova pe hna xatua Elia, me aegöcatrenyi angeic hmaca. (1 Ite jo. 19:5-7) Thupene lai, hnei Iehova hna amekötine la itre mekuna i Elia, me amamane la mene i Nyidrë. Hnei Iehova hna qaja koi Elia, ka hape, 7000 la etrune la itretre Isaraela ka tha hane kö thili koi Baala. (1 Ite jo. 19:11-18) Jëne la nöjei ewekë hnei Iehova hna kuca, hnei Nyidrëti hna amamane la etrune la ihnimi Nyidrëti koi Elia.

7. Pine nemene matre kola akeukawanyi së, hnene la aqane xatua Elia hnei Iehova?

⁷ Hapeu, epuni kö a hnehengazo me akötr? Drei la ketre madrine ka tru troa atre laka, hna trotrohni Elia ekö hnei Iehova, memine la itre ewekë ka ej e kuhu hni angeic! Kola akeukawanyi së, pine laka, trotrohni së fe hi hnei Iehova. Atre hnyawa hi Iehova laka, ijije hi tro sa kuca la ketre ewekë maine pena thatreine kö së. Ketre, atre hi Nyidrëti la itre mekuna së memine la itre aliene hni së. (Sal. 103:14; 139:3, 4) Eje hi, maine tro sa catre mejiune koi Iehova tui Elia, tro hë Nyidrëti a xatua së troa nyinyine la nöjei jole ka ahacenyi së me akötrë së.—Sal. 55:22.

8. Troa xatua së tune kaa hnei Iehova, matre tha tro kö sa hnehengazo?

⁸ Maine tro palahi sa hnehengazo, tro hë sa mekun laka, pëkö nyin la itre jole së. Maine tro fe a traqa tune lai koi së, tha tro pi kö sa thëthëhmine laka, Iehova hi la ka troa xatua së troa atreine xomihnine la itre akötre së. Tro Iehova a xatua së tune kaa? Nyidrëti a ajane tro sa qaja la itre akötre së me itre aliene hni së. Tha sihngödri kö koi Iehova la itre trenge timidra së. Tro kö Nyidrëti a dreng la itre xëwe së. (Sal. 5:3; 1 Pet. 5:7) Celë hi matre, nyipiewekë tro sa catre thith, matre troa qaja koi Iehova la itre hne së hna hnehengazon. Eje hi laka, tha tro jë kö Iehova a ithanata meköti koi së tui Elia. Tro pe Nyidrëti a ithanata koi së jëne la Tusi Hmitrötr memine la organizasio i Nyidrë. Tro ha aegöcatrenyi së me hamë mejiune koi së. Ketre, kola ithuecatre koi së, hnene la itre trejin me easë, trahmanyi me föe.—Rom. 15:4; Heb. 10:24, 25.

9. Nemene la aqane troa xatua së hnene la sinee së?

⁹ Hnei Iehova hna upi Elia troa hamë Elisaia la ketre hnëqa i nyidrë. Iehova a ajane troa hamëne koi Elia la ketre sinee ka lolo ka troa xatua angeic, matre cile catre ngöne la itre ijine akötr. Ketre tu së fe, laka, ame la easa fe la hni së kowe la sinee së, tro hë angeic a xatua së troa xomihnine la itre akötre së. (2 Ite jo. 2:2; Ite edomë 17:17) Maine thatreine kö së troa fe la hni së kowe la ketre atr, loi e troa sipo ixatua koi Iehova, matre tro Nyidrëti a aijijëne la ketre Keresiano ka macaj troa ithuecatre koi së.

10. Kola xatua së tune kaa troa catre xomihni hnene la hna melën hnei Elia, nge nemene la aqane xatua së hnene la hna qaja ngöne Isaia 40:28, 29?

¹⁰ Hnei Iehova hna xatua Elia, matre tha tro kö angeic a hnehengazo menu. Hnei Elia hna mele nyipici koi Iehova koi nyimu macatre. Kola hamë mejiune koi së hnene la hna melëne hnei Elia. Ame itre xaa ijin, tru la itre hne së hna hnehengazon, matre kucakuca catre së. Ngo eje hi laka, maine tro sa catre qale koi Iehova me mejiune koi Nyidrë, tro hë Nyidrëti a xatua së tro palahi a catre nyihlue i Nyidrë.—E jë la Isaia 40:28, 29.

11-13. Pine laka kola hnehengazo hnene la köni hlue i Iehova ekö, nemene la ethanyine koi angatr?

¹¹ Hetrenyi e hnine la Tusi Hmitrötr, la itre xaa hlue i Akötresie ka hnehengazo me akötr. Hana la ketre. Akötre catre eahlo pine laka, ka safëj nge nyine hmahmane lai ekö. Ame Penina lo hnaaluene föi Elekana ke, ka hnaho angeic, matre hnei angeice palahi hna hnyimasai Hana. (1 Sam. 1:2, 6) Tru la akötre i Hana, matre eahlo a kucakuca. Tha xeni hë eahlo.—1 Sam. 1:7, 10.

¹² Hnei Davita Joxu hna hane hnehengazo. Nyimutre la itre jol hna cile kow hnei Davita. Hace catre nyidrë, pine la itre ngazo hnei nyidrëti hna kuca. (Sal. 40:12) Hnei Abasaloma, nekö hnimina i Davita, hna icilekeu me nyidrë, nge hna humuthi angeic e thupen. (2 Sam. 15:13, 14; 18:33) Ketre, hnene la sinee i Davita hna methinë nyidrë. (2 Sam. 16:23–17:2; Sal. 55:12-14) Ame ngöne lo Davita a cinyihane la itre xaa tusi Salamo, ke, nyidrëti a qaja la itre aliene hni nyidrë, lo nyidrëti a akötr. Nge hnei nyidrëti fe hna hane qaja la mejiune i nyidrëti ka catr koi Iehova.—Sal. 38:5-10; 94:17-19.

¹³ Thupene lai, hnene la ketre atre cinyihane la tusi Salamo hna piine la mele ne la itre atr ka ngazo. Maine jë ketre matra i Asafa, lo atre Levi ka huliwa e hnine “la ēnē i Akötesie.” Angeice a hnehengazo, matre kucakuca catr angeic. Hnei angeice hna nyiqaane luelu, ngöne la kola qaja lo itre manathithi ka traqa elany e troa huliwa koi Akötresie.—Sal. 73:2-5, 7, 12-14, 16, 17, 21.

14-15. Nemene la ini hne së hna kapa qa ngöne la aqane xatuane Iehova la köni hlue i Nyidrë?

¹⁴ Hnene la köni hlue i Iehova celë hna catre qale me mejiune koi Nyidrë. Hnei angatr hna qaja koi Iehova la itre ewekë hna hnehengazon  memine la itre kepin. Hnei angatr palahi hna catre nyihlue i Iehova me tro kowe la ēnē i Nyidrë.—1 Sam. 1:9, 10; Sal. 55:22; 73:17; 122:1.

¹⁵ Hnei Iehova hna sa hnyawa la itre thithi angatr. Tingetinge hë la mekuna i Hana, tha hnehengazo hë eahlo. (1 Sam. 1:18) Hnei Davita hna cinyihan, ka hape: “Nyimu aköte ne la ate ka meköt ; ngo hna amele angeice qa ngön’ it’ eje asë hnei Iehova.” (Sal. 34:19) Hnene la atr cinyihane la Salamo hna qaja, ka hape, hnei Iehova ‘hna xölehuje la ime maca i angeic,’ me eatrongë angeice hnene la itre eamo hna nyitrepen hnei ihnim. Hnei angeic hna nyima, ka hape: “Ame ni, loi koi ni troa eashenyi Akötesie ; ase hë ni lapaune koi Joxu Iehova.” (Sal. 73:23, 24, 28) Nemene la ini hne së hna kapa qa ngöne la köni tulu celë? Ame itre xaa ijin, easa cile kowe la itre jole ka tru, matre easa hnehengazo me akötr. Ngo ijije hi tro sa cile kowe la nöjei pengöne jol. Loi e tro palahi sa lapa mekune la aqane ixatua i Iehova, me catre mejiune koi Nyidrë ngöne la thith, me drengethenge la itre hnei Nyidrëti hna amekötin.—Sal. 143:1, 4-8.

16-17. (a) Pine nemene matre tha tro pi kö sa iananyi me Iehova memine la itre trejin?(b) Nemene la ketre aqane tro sa xomi trengecatr?

¹⁶ Hetre ketre ini hne së hna xom qa ngöne la köni tulu celë. Tha tro pi kö sa nue Iehova memine  la nöje i Nyidrë. (Ite edomë 18:1) Ame ngöne la kola trotriji Nancy, hace me jol la mele i angeic. Öni angeic: “Ame itre xaa ijin, xele ni ma ithanata. Ngo hace la meleng, ngöne la eni a iananyi memine la itre trejin.” Ame hë e thupen, hna saze hnei Nancy. Hnei angeice hna thele troa xatuane la itre ka akötr. Öni angeic: “Eni a drei angatr a qejepengöne la itre jol hnei angatr hna cile kow. Eni a öhn laka, ame la eni a lapa mekun la itre jole me akötr ka eje thei angatr, kösë co pëhë koi ni la itre akötreng.”

¹⁷ Ijije fe hi tro sa xomi trengecatr, ngöne la hna icasikeu. Ame la easa traqa e cili, tre, kösë easa qaja koi Iehova ka hape, Cilieti hmekuje hi la ka troa “xatua ni me aupunyi ni .” (Sal. 86:17) E cili, tro hë Iehova a thue trengecatre së jëne la uati hmitrötr, me Wesi Ula, me jëne la itre hlue i Nyidrë. Ame fe e cili, easa ‘ce akeukawanyi së me itre xan.” (Rom. 1:11, 12) Öni Sophia, ketre trejin föe: “Hnei Iehova memine la itre trejin hna xatua ni troa xomihnine la itre akötreng. Nge ka sisitria catre koi ni la itre icasikeu. Eni a öhn laka, ame la eni a catre cainöj me ce memine la itre trejin, kösë atreine hë ni cile kowe la itre jol.”

18. Maine tro sa kucakuca, nemene la hnei Iehova hna troa hamë së?

¹⁸ Tha tro pi kö sa thëthëhmine ngöne la itre ijine easa kucakuca me akötr, laka tro kö Iehova a xatua së troa xomihni. Ketre, tro Nyidrëti a xatua së enehila troa atreine cile kowe la itre jol. Tro Nyidrëti a hamë së la “aja me trengecatr,” matre xometrije la itre mekune ka ngazo ka troa thapa la mejiune së.—Fil. 2:13.

19. Nemene la ithuecatr hna hamëne koi së ngöne Roma 8:37-39?

¹⁹ E jë la Roma 8:37-39. Hnei Paulo aposetolo hna ithuecatre koi së laka, pëkö ewekë ka troa apatrene la ihnimi së koi Iehova. Nemene la aqane tro sa xatuane la itre trejin ka kucakuca? Ame ngöne la tane mekune ka troa xulu, tre, tro sa ce wange la aqane tro sa nyitipu Iehova. Tro sa amamane la hni ne utipine së kowe la itre trejin, me xatua angatr ngöne la angatr a hnehengazo me akötr.