1. Nemene la aqane hmekëne Paulo aposetolo, la itre Keresiano hna iën?

“LOI ju hë hna mele thenge la itre thiina ne la fene celë.” (Rom. 12:2) Hnei Paulo hna cinyihane la itre hnaewekë celë kowe la itre pane Keresiano ekö. Pine nemene matre hnei Paulo hna hmekëne la itre hna iën?—Rom. 1:7.

2-3. Nemene la itre nyinyithiina i Satana ka troa ananyine la itre Keresiano qaathei Iehova, ngo nemene la ka troa xatua së troa xometrije la itre mekune ka ngazo?

² Kucakuca catre Paulo pine laka, hna ajojezine la itre xaa Keresiano hnene la itre ini ka ngazo ne la fene i Satana. (Efe. 4:17-19) Troa hane traqa tune lai koi së. Satana la atre musinëne la fene celë ka ngazo, nge nyimutre la itre nyinyithiina i angeic. Eje hi, hnei Satana palahi hna thele jëne troa ananyine la itre Keresiano qaathei Iehova. Maine jë, easa piine la ketre göhnë ka draië, maine troa hlemu pena. Tro hë Satana a huliwane la aja cili, matre troa tupathi së. Ijije fe hi tro angeic a tupathi së, jëne la itre hne së hna inine ngöne la hnalapa me hnaini me jëne la itre atr ka lapa xötreithi së. Angeic a ajane tro sa nyitipune la aqane mekune i angeic.

³ Hapeu, ijije hi tro sa ‘atreine akeine’ me xometrije qa hnine la he së, la itre ini hna kapa ekö? (2 Kor. 10:4) Hanawang la aqane sa i Paulo, lo kola hape: “Easë a lepetrije la nöjei mekun, me nöjei ewekë asë ka draië, nge ka cil kowe la atrehmekune qaathei Akötresie. Nge easë a xomacone la nöjei mekun asë troa drengethenge Keriso.” (2 Kor. 10:5) Nyipici, jëne la ixatua i Iehova, ijije hi tro sa xometrije la itre mekune ka ngazo qa hnine la he së. Troa xometrije itre ej hnene la Wesi Ula i Akötresie, tune la drösinöe ka xometrije la poizin.

4. Nemene la itre ewekë hne së hna saze, ngöne la easa atre la nyipici?

⁴ Ame ngöne lo easa atre hnyawa la nyipici qa hnine la Tusi Hmitrötr, nyimutre la itre ewekë hne së hna saze. Eje hi laka, nyimutre la itre ewekë ka ngazo ekö hne së hna kuca. Ngo pine laka easa ajane troa nyihlue i Iehova, haawe easa nuetrije itre ej. (1 Kor. 6:9-11) Drei la madrine me hni ne ole së koi Iehova, pine laka ase hë së nuetrije la itre ewekë ka ngazo hna kuca ekö!

5. Thenge la hna qaja ngöne Roma 12:2, nemene la lue ewekë nyine tro sa kuca?

⁵ Ngo ame pe, tha tro pi kö sa mekun ka hape, pë hmaca kö ewekë nyine tro sa saze. Ngacama tha easë hmaca kö a kuca la itre ewekë ka ngazo tune ekö, ngo loi e tro palahi sa catre hmek, matre troa atreine neëne la itre nyinyithiina i Satana. Maine tha thupëne kö së, tro hë sa kei hmaca kowe la ngazo. Nemene la nyine tro sa kuca? Öni Paulo aposetolo: “Loi ju hë hna mele thenge la itre thiina ne la fene celë, ngo saze pi hnene la hna ahnyipixene la aqane mekune i nyipunie.” (Rom. 12:2) Eje hi, lue ewekë nyine tro sa kuca. Ame la hnapan, tre, tha tro hmaca kö sa “mele thenge” la itre thiina ne la fene celë ka ngazo. Nge ame la hnaaluen, tre, nyipiewekë tro sa “saze” la itre mekuna së me aqane ujë së.

6. Nemene la ini hne së hna xom qa ngöne la itre trengewekë i Iesu ngöne Mataio 12:43-45?

⁶ Ame la Paulo a qaja la itre nyine troa saze, tre, tha kolo hmekuje kö a qaja la itre ewekë hne së hna goeën. Kolo fe a qaja la itre ewekë hna tha öhn hnei lue mek. (Wange ju la hna eköhagen hna hape, “Hapeu, Saze Hë Së Maine Ka Lue Iqëmeke Palahi?”) Loi e tro sa saze asë la itre mekuna së me itre aliene hni së, tune la itre ewekë ka ej e kuhu hni së. Celë hi matre, nyipiewekë tro sa isa hnying, ka hape: ‘Hapeu la itre hnenge hna saze ngöne la meleng, eni kö a kuca matre troa pi mama? Eni kö a saze la nöjei mekunang me itre ewekë ka ej e kuhu hning? Hnei  Iesu hna qaja la nyine troa kuca ngöne Mataio 12:43-45. (E jë.) Hetre ini ka tru koi së. Tha tro kö sa xometrije hmekuje hi la itre mekun ka ngazo; ngo nyipiewekë mina fe tro sa nyihnane itre ej, hnene la itre mekuna qaathei Akötresie.

7. Nemene la aqane tro sa saze la itre aliene hni së me itre mekuna së?

⁷ Hapeu ijije kö tro sa saze la itre aliene hni së me itre mekuna së? Tusi Hmitrötr a qaja ka hape, ijije hi. Kola hape: “Qa i nyipunieti enehila troa ahnyipixene pala hi la itre aqane waiewekë i nyipunie, me heetrëne la thiina ka hnyipixe, hna eköth thenge la aja i Akötresie, ngöne la thiina ka nyipi meköt me lapaun.” (Efe. 4:23, 24) Ijije hi troa saze la itre aliene hni së, ngo ame pe, tha ka hmaloi kö. Tha ene hmekuje kö la troa isi memine la itre aja ka ngazo me xometrije la itre mekun ka ngazo. Loi e tro fe sa saze me ahnyipixene “la itre aqane waiewekë së.” Celë hi matre, nyipiewekë troa saze la itre aja së me aqane ujë së. Tro fe a neëne la itre ewekë ka upi së troa kuca la itre ewekë ka ngazo. Tha tro kö aca kuca, ngo loi e tro palahi a kuca lapan.

8-9. Nemene la aqane amamane la ketre trejin, la enyipiewekëne troa saze me lepetrije la itre thiina ka ngazo qa kuhu hni së?

⁸ Hanawange la ketre ceitun. Ka isi catre la ketre trejin trahmanyi ekö. Ngo hnei angeic hna nuetrije la kahaitr me pi isi, pine laka, angeic a ajane troa xomi bapataiso. Canga mama hi la aqane saze hnei angeic kowe la itre atr ka mele xötreithi angeic. Ngo ame ju hi la ketre hej, thupene la hna bapataiso angeic, hna traqa koi angeic la ketre itupath. Hnene la ketre trahmanyi ka ij hna traqa me thele isi me angeic. Ame lo xötrei hnei angeic hna xomihni, ke tha ajane kö angeic troa isi. Ngo ame ngöne la kola qaja angazone la ëje i Iehova hnene lai trahmany, elëhni jë hi lai trejin me lepe lai trahmany. Pine nemene matre kola ujë tune lai hnene la trejin? Nyipici laka, hnei angeice hna catre inine la Tusi Hmitrötr, matre tha tro hmaca kö a isi. Ngo ame pe, tha hnei angeice kö hna ahnyipixene la itre aqane waiewekë i angeic, me canga xometrije qa kuhu hni angeic la itre thiina ka ngazo.

⁹ Ngo tha hna catre thele kö troa saze hnene lai trejin. (Ite edomë 24:16) Hnei angeic hna thele ixatua thene la itre qatre thup, matre ahnyipixene me saze la aqane waiewekë i angeic. Ame hë enehila, ketre qatre thupe hë angeic. Ngo ame la ketre ijin, hna traqa hmaca la ketre itupath ngöne la hna icasikeu. Hnene la ketre trahmanyi ka ij hna thele troa lepe la ketre qatre thup. Nemene hë la hna kuca hnene lai trejin? Hnei angeic hna ithanata amenyikeny kowe lai atr me hni ka ipië. Hnei angeice fe hna thele loto matre troa iami. Nemene la ka xatuane lai trejin troa saze? Hnene lai trejin hna ahnyipixene la aqane waiewekë i angeic. Hnei angeic hna lepetrije la itre thiina ka ngazo qa kuhu hni angeic. Ka thele tingeting angeic me hni ka ipië. Drei la ketre aqane ujë ka lolo xajawa i Iehova!

10. Nemene la nyine tro sa kuca matre troa saze la itre aliene hni së?

¹⁰ Nyipici laka, tha ka hmaloi kö troa canga saze. Loi e tro sa catre huliwa, matre troa saze la itre aliene hni së. (2 Pet. 1:5) Ketre, tha hnene kö laka, ekö hë së ngöne la nyipici ke, tro hë sa saze. Nyipiewekë tro sa kuca la hne së hna atrein, matre troa saze la itre aliene hni së. Ngo hetrenyi la itre nyine tro sa kuca matre troa ahnyipixene la aqane waiewekë së. Tro sa ce wang itre ej.

11. Nemene la aqane xatua së hnene la thith, matre troa saze la itre aqane waiewekë së?

¹¹ Ame la nyine troa pane kuca, tre, troa thith. Nyipiewekë tro sa thith, tune la atre cinyihane  la Salamo, lo angeic a hape: “Akötesieti fe, xupejë koi ni la hni ka wië; nge kuca hmaca jë la u ka cile huti e kuhu hning.” (Sal. 51:10) Eje hi, loi e troa pane atrehmekune laka, nyipiewekë tro sa sipo ixatua koi Iehova, matre troa saze la aqane waiewekë së. Pine nemene matre tha luelue kö së laka, tro kö Iehova a xatua së troa saze? Pine laka, kola ithuecatre koi së la hna qaja ekö hnei Iehova koi angetre Isaraela ka tha idrei, ngöne lo hneijine i Ezekiela: “Tro ni a hamë angate la hni ka cas, me amë e kuhu hni angate la u ka hnyipixe . . . me hamë angate pe la hni ijön, [ene la troa hmala troa trongëne la itre eamo qaathei Akötresie].” (Eze. 11:19.) Eje hi, aja i Iehova ekö troa xatua angetre Isaraela troa saze. Ketre tu së fe enehila, aja i Nyidrëti troa xatua së troa saze.

12-13. (a) Thenge la hna qaja ngöne Salamo 119:59, nemene la itre ewekë nyine tro sa lapa mekun? (b) Nemene la itre hnying nyine tro sa isa xom?

¹² Ame la hnaaluene nyine tro sa kuca, tre, troa lapa mekun. Ame ngöne la easa e la Tusi Hmitrötr e nöjei drai, nyipiewekë tro sa xomi ijin, matre troa lapa mekune la itre hne së hna e. Tro hë sa atrehmekune hnyawa la itre mekun memine la itre ewekë ka ej e kuhu hni së nyine troa saze. (E jë la Salamo 119:59; Heb. 4:12; Iako. 1:25) Eje hi, loi e tro sa pane atrehmekun, laka, hna ajojezine la itre mekuna së me itre aliene hni së, hnene la itre mekuna i fen. Celë hi matre, tha canga paatre kö la itre thiina së ka ngazo. Ngo nyipiewekë tro sa catre thele troa xometrije itre ej.

¹³ Haawe, nyipiewekë tro sa isa hnying, ka hape: ‘Hapeu hetrenyi palakö e kuhu hninge la thiina ka ngazo, tune la troa piine la ifekë ewekën, maine pena troa zalu?’ (1 Pet. 2:1) ‘Hapeu, eni kö a mekun ka hape, ka sisitria kö ni hune la itre xan, pine la nöjeng me aqane hetru ni, me itre pepang, maine pena ka trenamo ni?’ (Ite edomë 16:5) ‘Hapeu, pëkö thei itre xan la itre ewekë hnenge hna hetreny, maine pena ka sisitria catre kö la itre atrene la nöjeng?’ (Iako. 2:2-4) ‘Hapeu, eni kö a piine la itre ewekë ngöne la fene i Satana?’ (1 Ioane 2:15-17) ‘Maine pena, eni kö a hniin la itre nyine iamadrinë ka amamane la itre ewekë ka sis me itre isi?’ (Sal. 97:10; 101:3; Amosa 5:15) Ka nyipiewekë catre la itre hnyinge celë, pine laka, kola amamane la itre götrane nyine tro sa saze. Loi e tro palahi sa thele troa xometrije la itre mekune ka ngazo qa kuhu hni së, matre troa ahnyipixene la itre aqane waiewekë së. Tro hë së lai a amadrinëne la hni Iehova, Tretretro së e koho hnengödrai.—Sal. 19:14.

14. Pine nemene matre nyipiewekë troa iëne hnyawa la itre sinee së?

¹⁴ Ame la hnaakönine nyine tro sa kuca, tre, troa iëne hnyawa la itre sinee së. Ijije hi troa canga ajojezi së hnene la itre sinatronge së. (Ite edomë 13:20) Ame ngöne la hna huliwa me hnaini, ke, easa ce mel memine la itre atr ka wangacone la itre hna amekötin hnei Iehova. Ngo ijije hi tro sa öhne la itre nyipi sinee e hnine la itre ekalesia. Itre götrane lai ka upi së troa amamane la “ihnim me itre huliwa ka loi.”—Heb. 10:24, 25.

15-16. Nemene la hna kuca hnei Satana matre troa ajojezine la itre mekuna së?

¹⁵ Tha tro kö sa thëthëhmine laka, Satana palahi a thele troa saze me ajojezine la itre mekuna së. Angeic a amenu së jëne la itre ini ne la fen. Itre ini ka troa nyihnane la itre mekune ka lolo hna xome qa hnine la Wesi Ula i Akötresie.

¹⁶ Hnei Satana palahi hna amexeje lo hnyinge i angeic ekö koi Eva, lo hna hape: ‘Hapeu, hnei Akötresieti kö hna qaja hnyawa, ka hape, . . . ?’ (Gen. 3:1) Eje hi, ame ngöne la fene celë hna musinëne hnei Satana, tre, kolo palahi a qaja la itre hnying ka troa aciane the së la luelu, tune la kola hape: ‘Hapeu, hnei Akötresieti kö hna  qaja hnyawa, ka hape, tha Nyidrëti kö a kapa la faipoipo ne la lue trahmanyi maine lue föe pena? Hapeu, hnei Akötresieti kö hna qaja hnyawa, ka hape, tha tro kö a atrune la itre feet, tune la Noël me ijine hnaho së? Hapeu, hnei Akötresieti kö hna qaja hnyawa, ka hape, tha tro kö a xomi madra? Hapeu, hnei Akötresieti kö hna qaja hnyawa, ka hape, troa iananyi memine la itre sinee së hna upetröneë?’

17. Maine troa aciane the së la luelu göne la itre ini qaathei Iehova, nemene la nyine tro sa kuca, nge thenge la Kolose 2:6, 7, nemene la thangan e tro palahi sa catre inine la Tusi Hmitrötr?

¹⁷ Nyipiewekë tro sa acatrene la lapaune së kowe la itre ini qaathei Iehova. Maine tha öhne kö së la itre mekune ka sa la itre hnyinge së, tro hë së lai a nyiqaane luelu. Tro lai a amenu së me ananazijëne la lapaune së. Nemene la nyine tro sa kuca? Tusi Hmitrötr a qaja ka hape, loi e troa saze la itre mekuna së, matre tro sa isa anyipicin me tupathe “la aja i Akötresie laka, ka lolo, nge ka iamadrinë, nge ka pexej.” (Rom. 12:2) Haawe, maine tro palahi sa catre inine la Tusi Hmitrötr, tha tro hmaca kö sa luelu. Tro ha xecie koi së laka, ka nyipici la itre ini qa hnine la Tusi Hmitrötr. Nge xecie fe koi së laka, ka meköti la itre trepene meköti Iehova. Haawe, tune la isinöe ka catr hnene la iwan, tro fe hë sa hane ‘catr ngöne la lapaun.’—E jë la Kolose 2:6, 7.

18. Nemene la itre ewekë ka troa thupë së qa ngöne la itre ethanyine la fene i Satana?

¹⁸ Tha qanyine kö la itre xan troa acatrene la lapaune së, ngo isa qanyi së kö. Haawe, loi e tro palahi sa thele troa ahnyipixene la itre aqane waiewekë së. The mano kö së thith me sipone la uati hmitrötre i Iehova. Loi e tro fe sa lapa mekune la itre hne së hna e qa hnine la Tusi Hmitrötr, me saze la itre mekuna së me itre aliene hni së. Nyipiewekë mina fe tro sa iëne la itre sinee ka troa xatua së troa eënyine la itre thiina ka loi. Eje hi lai laka, tro ha thupë së qa ngöne la itre ethanyine la fene i Satana. Nge tro hë sa atreine “lepetrije la nöjei mekun, me nöjei ewekë asë ka draië, nge ka cil kowe la atrehmekune qaathei Akötresie.”—2 Kor. 10:5.