1. Thenge la hna qaja ngöne Kolose 2:4, 8, nemene la aqane thele Satana troa ajojezine la itre mekuna së?

SATANA a ajane troa sewe së troa hnimi Iehova. Celë hi matre, angeic a thele troa ajojezine la itre mekuna së. Angeic a ajane troa musinë së, matre angeic a thele troa saze la aqane waiewekë së. Angeic a ajane tro sa xome la aqane waiewekë i angeic. Satana palahi a iaö së, jëne la itre ewekë hne së hna ajane catrën.—E jë la Kolose 2:4, 8.

2-3. (a) Pine nemene matre nyipiewekë tro sa wangatrune la hna qaja ngöne Kolose 2:8? (b) Nemene la hne së hna troa ce wang ngöne la tane mekun celë?

² Maine troa nue Satana troa iaö së, tro hë lai a hetre ethane koi së. Ame ngöne Kolose 2:8, tha Paulo kö a cinyanyi kowe la itre atr ka tha hmi kö. Kolo pe a cinyanyi kowe la itre Keresiano hna iën. (Kol. 1:2, 5) Maine hna iaö angatre ju ekö, tro ha hetre ethane koi angatr. Nge ka tu së fe enehila. (1 Kor. 10:12) Pine nemen? Pine laka, hna ukapië Satana a tro celë fen. Angeic palahi a thele troa tra thethine la itre hlue i Akötresie ka mele nyipici. (Hna ama. 12:9, 12, 17) Ketre, easa ce mel memine la itre atr ka ngazo nge ka huliwa thoi. Eje hi, troa “ngazo catre hmaca kö” la itre atr.—2 Tim. 3:1, 13.

³ Easa troa ce ithanatane la aqane huliwane Satana la “itre mekune ka pë alien,” matre troa ajojezine la itre mekuna së. Tro fe sa ce wang la köni aqane “nyinyithiina” i angeic. (Efe. 6:11) Tro pë hë sa ce wang ngöne la ketre tane mekun,  la aqane tro sa neëne la itre nyinyithiina i angeic, memine la aqane tro sa lepetrije la itre mekun ka ngazo. Ngo tro sa pane ce wang la itre aqane iaö angetre Isaraela ekö hnei Satana. Tro fe sa xomi ini qa ngöne la itre ewekë ka traqa koi angatr.

4-6. Thenge la hna qaja ngöne Deuteronomi 11:10-15, nemene la ketre aqane eënyi ka hnyipixe hna inin hnei angetre Isaraela, ngöne la Nöje Hna Thingehnaean?

⁴ Hnei Satana hna tupathi angetre Isaraela troa thili koi idrola. Tune kaa? Atre hnyawa hi Satana la itre ewekë hna ajane hnei angetre Isaraela, tune la xen. Celë hi matre, hnei angeic hna tupathi angatr. Ame ngöne la Nöje Hna Thingehnaean, hnei angetre Isaraela hna thele la itre xaa aqane troa eëny. Ame ngöne lo angatre palakö e Aigupito, hnei angatr hna nyi jë i tim qa ngöne la hneopegejë hna hape, Nil, matre troa fie la itre feja. Ngo pë fe kö tim ngöne la Nöje Hna Thingehnaean. Nyipiewekë tro angatr a thia me xome la timi ne xaxapo. (E jë la Deuteronomi 11:10-15; Is. 18:4, 5) Eje hi, troa saze la aqane eënyi angatr. Tha ka hmaloi kö koi angatr pine laka, meci hë ekö lo itre qatr ka atreine eënyi ngöne la itre götrane cili.

⁵ Hnei Iehova hna qaja kowe la nöje i Nyidrë ka hape, troa saze la aqane mele i angatr. Thupene lai, hnei Nyidrëti hna hamëne la ketre eamo ka tha ihmeku kö memine la aqane troa eëny. Nyidrë a hmekë angatr, ka hape: “Wangejë kö nyipunie, wanga iaö la ite hni nyipunie, nge nyipunie a jea, me nyi hluene la ite haze menu me thili kow’ it’ ej.” (Deu. 11:16, 17) Pine nemene matre Nyidrëti a hmekë angatr, göne la itre idrola me itre haze, nge Nyidrëti fe a qaja koi angatr troa saze la aqane troa eëny?

 ⁶ Iehova a hmekë angetre Isaraela ke, atre hi Nyidrë laka, tro angatr a sipo ixatua kowe la itre nöje trehnyiwa ka atreine eënyi e cili, nge ijije hi tro la itretre Isaraela a inine la itre xaa aqane eëny ka hnyipixe. Ngo ame pe, hetre ejolen. Ame angetre Kanana, tre, ka thili angatr koi Baala me mejiune kowe la itre ini ka thoi. Ame koi angatr, Baala la atre xupe la hnengödrai me ka axulune la manie. Tha ajane kö Iehova troa löthe la mekuna ne la itre hlue i Nyidrë, hnene la itre ini ka thoi cili. Ngo hnei angetre Isaraela hna anyimua atrunyi Baala. (Num. 25:3, 5; A. ame. 2:13; 1 Ite jo. 18:18) Kösë hna othi angatre hë hnei Satana, me ajojezi angatr hnene la itre ini ka thoi.

7. Nemene la aqane tupathe la lapaunene la angetre Isaraela ngöne lo Nöje Hna Thingehnaean?

⁷ Ame la pane nyinyithiina i Satana, tre, ene la troa tupathi së hnene la itre ewekë ka loi kowe la mele së. Ajan asë hi së troa manie, matre troa fie la ihnadro. Ame ngöne la Nöje Hna Thingehnaean, e nöjei macatre, tha tru kö la manie hmekune lo pune treu Eiperem koi Semitrepa. Celë hi matre, loi e tro angetre Isaraela a thia e treu Okotropa ke, kola manie catr e cili. Ngo hnei Satana hna iaö angetre Isaraela me upi angatr troa nyitipune la itre hna majemine kuca hnene la itre nöje trehnyiwa. Ame koi angatr, loi e troa thili kowe la itre haze, matre troa axulune la manie. Tha angatre kö a ajane troa qaqacile la ihnadro.

8. Nemene la hnaaluene nyinyithiina i Satana? Qejepengöne jë.

⁸ Ame la hnaaluene nyinyithiina i Satana tre, ene la itre aja ka sis. Ame ngöne la itre nöje ka tha nyihlue i Iehova kö, ke, kola atrune la itre haze. Angatr a kuca la itre huliwa ka sis, tune la troa nyi föe me trahmanyi ne gojeny. Kolo fe a ce meköl hnene la lue trahmany maine lue föe pena, me itre xaa huliwa ju kö ka sis. Eje hi, ame koi angatr, ka loi hi la itre huliwa cili! (Deu. 23:17, 18; 1 Ite jo. 14:24) Ame koi angatr, troa kuca tune lai matre troa mele la itre zi angatr hnene la itre haze. Alanyimu thene la itretre Isaraela ka hane piine la itre hna majemine cili. Celë hi matre, hnei angatre hna hane thili kowe la itre xaa haze. Ase hë jeli angatr ngöne la thethi Satana.

9. Ame ngöne Hosea 2:16, 17, nemene la hna kuca hnei Satana matre troa thëthëhmi Iehova hnei angetre Isaraela?

⁹ Ame la hnaakönine nyinyithiina i Satana, tre, ene la troa axetine la hni angetre Isaraela. Ame ngöne la hneijine i Ieremia, hnei Iehova hna qaja ka hape, tro la itre perofeta thoi a thele jëne tro la nöje i Iehova a thëthëhmine la ëje i Nyidrë, “göi Baala.” (Iere. 23:27) E cili, tha hnei angatr hmaca kö hna qaja la ëje i Iehova. Ngo angatre pëhë a qaja la ëje i Baala, maine “Maseta.” Thatreine hë angetre Isaraela troa öhne la eisapengöi Iehova me Baala. Hnei angatr hna kuca la itre hna majemine göi Baala, matre troa atrunyi Iehova.—E jë la Hosea 2:16, 17.

10. Nemene la itre aqane nyinyithiina i Satana enehila?

¹⁰ Caasi palahi enehila la itre nyinyithiina i Satana. Angeic a amenune la itre atr troa kuca la itre huliwa ka sis, me thëthëhmi Iehova. Tro sa pane ce wang enehila la aqane kuca i Satana.

11. Nemene la aqane axetine Satana, la hni ne la itre atr göi Iehova?

¹¹ Satana a axetine la hni ne la itre atr göi Iehova. Thupene la kola meci hnene la itre  aposetolo i Iesu, hnene la itre ka iamenumenu hna tro fë me inine la itre ini ka thoi kowe la itre atr. (Itre hu. 20:29, 30; 2 Thes. 2:3) Hnei angatr hna thele troa juetrëne la ëje ne la nyipi Akötresie. Hnei angatr hna xometrije la ëje i Akötresie, ngöne la kola fejane la Tusi Hmitrötr, me nyihnane hnei “Joxu” me itre xaa hnaewekë ju kö. E cili, jole hë kowe la itre ka e Tusi Hmitrötr, troa goeëne la eisapengöi Iehova memine la itre xaa “joxu.” (1 Kor. 8:5) Ketre, hna ce hë Iehova me Iesu ka hape, “Joxu,” matre jole hë kowe la itre atr troa atre ka hape, isapengöi Iehova kö me Iesu. (Ioane 17:3) Hnene fe la itre atr hna mejiune kowe la ini ka thoi hna hape, Trinité. Ketre ini ka ifeketh memine la hna qaja hnene la Wesi Ula i Akötresie. Celë hi matre, jole hë koi angatr troa atrepengöi Akötresieti hnyawa. Drei la ketre trengathoi ka tru!—Itre hu. 17:27.

12. Nemene la itre ewekë hna kapa hnene la hmi ka thoi, nge thenge la hna qaja ngöne Roma 1:28-31, nemene hë la pun?

¹² Satana a amenune la itre atr, jëne la itre huliwa ka sis. Ame ngöne la hneijine i angetre Isaraela ekö, hnei Satana hna acile la ketre hmi ka thoi ka sajuëne la itre huliwa ka sis. Ceitune hi lai enehila. Kolo fe a kapa la itre huliwa ka sis hnene la hmi ka thoi. Ej a qaja kowe la itre atr ka hape, pëkö engazone la itre huliwa cili. Celë hi matre, tha hna trongëne hmaca kö hnene la itre ka hmi, la itre trepene meköti ne la Tusi Hmitrötr. Ame ngöne la tusi Paulo aposetolo kowe la angetre Roma, tre, hnei nyidrëti hna qejepengöne la itre ethanyine la huliwa ka sis hna sajuëne hnene la hmi ka thoi. (E jë la Roma 1:28-31.) Ame la “itre ewekë hna methinën” tre, ene la itre huliwa ka sis asë, tune la lue trahmanyi ka ce meköl maine lue föe pena. (Rom. 1:24-27, 32; Hna ama. 2:20) Eje hi, loi e tro palahi sa drengethenge me trongëne la itre ini qa hnine la Tusi Hmitrötr!

13. Nemene la ketre nyinyithiina i Satana?

¹³ Satana a tupathi së hnene la itre sipu aja së. Eje hi laka, tha ka ngazo kö tro sa thele la itre hne së hna ajan thatraqane la mele së me fami së. Easa kuca la hne së hna atrein, matre troa eatrëne la hnëqa së. (1 Tim. 5:8) Maine jë tro sa kuca la itre ini ka tru, matre tro sa öhnyi huliwa hna nyithupene hnyawa.  Ngo loi e tro sa thupën. Ame ngöne la itre nöj, nyimutre la itre ini ka lolo hna kapa hnene la itre nekönatr, thatraqane la mele i nyudren. Ngo itre ini lai qaathei atr. Kola inine la itre nekönatr ka hape, pëkö Akötresie. Kolo fe a ini nyudren, troa wangacone la itre ini qa hnine la Tusi Hmitrötr. Ketre, kola qaja koi nyudren ka hape, ame la ka inamacan, tre, ka mejiune kowe la ini évolution. (Rom. 1:21-23) Eje hi, itre ini lai ka tha ihmeku kö memine la “inamacane i Akötresie.”—1 Kor. 1:19-21; 3:18-20.

14. Nemen la hna ini së hnene la inamacane i fen?

¹⁴ Ame la inamacane i atr, tre, tha ka nyipiewekëne kö la itre trepene meköti Iehova. Celë hi matre, patre fe kö la itre thiina i Akötresie, ngo “itre huliwa ne ngönetrei” pe. (Gal. 5:19-23) Kola inine la itre atr troa pi mama me pi draië, matre angatr a “hnimi angatre kö.” (2 Tim. 3:2-4) Celë hi aqane ujë ne la itre ka icilekeu me Akötresie. Ngo ame la itre ka nyihlue i Akötresie, ka hni ka ipië angatr. (2 Sam. 22:28) Ame la itre Keresiano ka sine la itre uma ne ini ka tru, ke, hnei angatre hna xome la itre mekuna i fen, me nuetrije la itre mekuna i Akötresie. Tro sa pane ce wang la ketre ceitun ka troa hmekë së.

15-16. Nemene la ini hne së hna xom, qa ngöne la hna melëne hnene la ketre trejin?

¹⁵ Kola e la 15 lao macatre ne pionie lapa la ketre trejin. Öni angeic: “Ketre temoë Iehova ni, nge hnenge palahi hna e me drenge la kola qaja la itre jole ngöne la itre uma ne ini ka tru. Ngo hnenge hna wangesixane itre ej. Ame koi ni, thatraqai itre xan la  itre eamo cili.” Nemene hë la pune lai? Öni angeic: “Pëhë traemeng me trengecatreng. Tha thithi hë ni. Tha ce thawa hmaca kö ni me itre xan la mekuna i Tusi Hmitrötr, me hnëkëne la itre icasikeu. Eloine pe, ame hë la eni a öhne laka, kola ananyi ni qaathei Iehova, eni ha nue pi la ini.”

¹⁶ Nemene hë la thangane la inamacane i atr kowe lai trejin? Angeic a sa ka hape: “Hmahma catre ni, pine laka kola ini ni troa canga goeëne la tria ne la itre trejin. Ame koi ni, tro la itre trejin a nue trengecatre troa kuca la itre ewekë, ngacama thatreine kö. Eni fe a ajane troa mele cas. Eje hi, tha hnenge kö hna canga xometrije la itre mekune cili ka ngazo. Eni a trotrohnine laka, tha tro pi kö a wangacone la itre eamo hna hamëne hnei Iehova, jëne la organizasio i Nyidrë. Atre ni hnyawa kö hnei Iehova. Maine canga drei Iehova ju kö ni ekö!”

17. (a) Nemene la nyine tro sa catre kuca? (b) Nemene la hne së hna troa ce wang ngöne la ketre tane mekun?

¹⁷ Nyipiewekë tro sa canga lepetrije la “inamacane me tenge iaö nyine amenun” qaathei Satana, ke kola hnöthe la mele së. (1 Kor. 3:18; 2 Kor. 2:11) Tha tro pi kö sa nue Satana troa amenu së. Tro hë së lai a thëthëhmi Iehova, me nue jë i Satana troa musinëne la mele së. Loi e tro palahi sa catre drengethenge me trongëne la itre trepene meköti Iehova. Tha tro kö sa nue Satana troa aciane e kuhu hni së, la aja troa thipetrije la itre eamo qaathei Iehova. Ngo maine kola löthe la itre mekuna i së hnene la itre mekuna i Satana, nemene la nyine tro sa kuca? Tro pë hë sa ce wang ngöne la ketre tane mekun. Kola amamane koi së la aqane xatua së hnene la Wesi Ula i Akötresie troa “akeine la itre itra etë atraqatr,” ene la itre mekun me itre hna majemine ka ngazo.—2 Kor. 10:4, 5.