1. Tro sa nyitipune tune kaa la Keme së ka tru ihnimin?

ATRAQATRE la ihnimi Iehova koi së. (Ioane 3:16) Easa ajane troa hane nyitipune la Keme së ka tru ihnimin. Easa tupathe troa “ce akötr, me ihnimikeu tune la itre trejin, me iutipinekeun” memine la nöjei atr asë. Ngo ka nyipiewekë catr troa amamane lai kowe “la itre trejin ngöne la lapaun.” (1 Pet. 3:8; Gal. 6:10) Ame ngöne la kola kucakuca me akötr la itre trejin, nyipiewekë tro sa xatua angatr.

2. Nemene la hne së hna troa ce wang ngöne la tane mekun celë?

² Ame la itre ka ajane troa hane sine la lapa i Iehova, tre, tro fe angatr a cile kowe la itre jol ka tru. (Mar. 10:29, 30) Nge tro palakö a ngazo catr me traqa koi së la itre akötr ka tru, pine laka easenyi hë la pune la fene celë ka ngazo. Nemene la aqane tro sa caasi ngöne la itre ijine cili? Tro sa xomi ini qa ngöne la tulu i Lota me Iobu me Naomi. Tro fe sa ce wang la itre jol hna cile kowe hnene la itre trejin, me aqane tro sa xatua angatr troa atreine xomihnine itre ej.

3. Nemene la mekune ka ngazo hna xome hnei Lota ngöne 2 Peteru 2:7, 8, nge nemene hë la pun?

³ Ka ngazo la aqane axecië mekune i Lota, pine laka, hnei angeice hna iëne troa mel e Sodroma, ketre nöj hna haöthe hnene la itre huliwa ka sis. (E jë la 2 Peteru 2:7, 8.) Ame Sodroma, tre, ketre nöje lai gaa lolo nge ka mana la xen. Ngo hnei Lota hna cile kowe la nöjei pengöne jol, pine la hnei angeice hna fek a tro cili. (Gen. 13:8-13; 14:12) Tha hnene kö la föe i  Lota hna drei Iehova. Hnei eahlo hna hnime la nöj memine la itre atren. Meci la pun koi eahlo, ngöne lo Iehova a amalane qaa hnengödrai la eë me itre wene etë ka mel kösë mani. Pane mekune jë lo lue nekö i Lota. Nyidroti a troa faipoipo memine la lue trahmanyi ka meci e Sodroma. Pëhë hnalapa i Lota me itre mo angeic. Nge ame la ketre akötr ka tru, tre, meci fe hë la föe i angeic. (Gen. 19:12-14, 17, 26) Hapeu hnei Iehova kö hna nuaxöji Lota ngöne la itre ijine akötr? Ohea.

4. Tune kaa aqane xomihni Lota hnei Iehova? (Wange ju la pane iatr.)

⁴ Ngacama hnei Lota hna mekun troa mel e Sodroma, ngo hnei Iehova palahi hna utipi angeic. Hnei Nyidrëti hna upe la itre angela i Nyidrë, matre troa kötre sai Lota memine la hnepe lapa i angeic. Ngo tha hnei angatre kö hna canga kötr. Celë hi matre, hnene la lue angela hna ea la ime i angeic me ifënekö i angeic, memine la lue nekö i angeice jajiny. (Gen. 19:15, 16) Hnene la lue angela hna qaja koi Lota troa kötr kowe la itre wetr. Ngo tha hnei angeice kö hna canga drei Iehova, hnei angeice pe hna sipone troa kötr a tro Zoara, ketre nöj ezin. (Gen. 19:17-20) Hnei Iehova hna xomihni ahoeany me drei Lota me nue angeic troa tro cili e Zoara. Ame hë e thupen, hnei Lota hna xou me tro qa Zoara me elë hune la wetr. Angeice hmaca a kötr kowe lo götrane hnei Iehova hna qaja koi angeic ngöne lo xötrei. (Gen. 19:30) Eje hi laka, easa haine la aqane xomihni ahoeanyi Iehova! Nemene la aqane tro sa nyitipu Nyidrë e cili?

5-6. Thenge la hna qaja ngöne 1 Thesalonika 5:14, tro sa nyitipu Iehova tune kaa?

⁵ Maine jë, troa tria la aqane axecië mekun hnene la ketre sinee së ka nyihlue i Iehova, tui Lota ekö. Nge tro hë lai a hetre ethane koi angeic. Nemene la nyine tro sa kuca? Maine jë, easa pi qaja koi angeic, ka hape: ‘Eö kö a xeni pune la aqane axecië mekune i eö.’ (Gal. 6:7) Ngo tha aqane tro kö së lai a ujë. Loi e tro sa xatua angeic tune lo aqane xatua Lota ekö hnei Iehova. Tune kaa?

⁶ Hnei Iehova hna upe la lue angela i Nyidrë, matre troa thuemacanyi Lota me xatua angeic troa kötr qa Sodroma. Ka ceitu hi lai me easë enehila. Nyipiewekë tro sa canga thuemacane lai trejin ka hape, troa hetre ethane koi angeic e ka ngazo la aqane axecië mekune i angeic. Loi e tro mina fe sa xatua angeic. Ngo maine tha canga drenge kö angeic la eamo qa hnine la Tusi Hmitrötr, loi e tro sa xomihni ahoeany, tune lo lue angela. Tha tro pi kö sa kucakuca me canga nuetrije lai trejine me easë. Loi e tro sa catre xatua angeic, jëne la itre hne së hna qaja me kuca. (1 Ioane 3:18) Maine jë, tro sa ee angeic, matre troa xatua angeic troa trongëne la itre eamo hna hamën qa hnine la Tusi Hmitrötr.—E jë 1 Thesalonika 5:14.

7. Tro sa nyitipune tune kaa la aqane goeë Lota hnei Iehova?

⁷ Maine ju, tro hmekuje hi Iehova a goeëne la itre tria i Lota. Ngo, hnei Nyidrëti pe hna qeje Lota, jëne Peteru aposetolo, ka hape, ketre atr ka meköt. Ketre madrine fe ka tru koi së, ngöne la Iehova a nue la itre ngazo së! (Sal. 130:3) Hapeu, ijije hi tro sa nyitipune la aqane goeë Lota hnei Iehova? Maine tro hi sa goeëne la itre thiina ka lolo ne la itre trejin, tro hë së lai a atreine xomihni. Nge e cili, tro ha hmaloi koi angatr troa kapa la ixatua së.

8. Nemene la thangane la utipin?

⁸ Ame Iobu, tre, isapengö i angeice kö me Lota, pine laka, tha hnei Iobu kö hna akötr qa ngöne la hna axecië mekune menu. Akötre catre Iobu hnene laka, hetre ewekë ka traqa koi angeic. Hna thapa la itre mo i angeic, me götrane qa i angeic ngöne la nöj, nge hna tithi  angeic hnene la ketre mec. Hace me jole koi Iobu me ifënekö i angeic, ngöne lo kola meci asë lo treen lao nekö i nyidro. Ketre, hna upezö angeic hnene la köni sinee i angeic ka thoi. Pine nemene matre pëkö hni ne utipine la köni sinee i Iobu? Pine laka, tha hnei angatre kö hna pane thele troa trotrohnine la ewekë ka traqa koi Iobu. Ame hë la pun, ngazo la aqane axecië mekune i angatr, matre hnei angatr hna upezö Iobu me jelengazo angeic. Nemene la nyine troa kuca matre tha tro kö sa nyitipu angatr? Loi e tro sa atre laka, öhne asë hi Iehova la nöjei ewekë ka traqa kowe la ketre atr. Loi e tro fe sa drenge hnyawa la ketre atr ka akötr, ngöne la angeic a fe la hni angeic. Tha tro kö sa dreng hmekuje hi la itre hnaewekë, ngo tro fe sa thele troa atre la itre akötre i angeic. Celë hi lai, aqane tro sa amamane la utipin me ihnimi së kowe la itre trejin ka akötr.

9. Nemene la hne së hna troa kuca e hetrenyi së la hni ne utipin, nge pine nemen?

⁹ Maine hetre hni ne utipine së, tha tro hë sa kötre fë ithanata me qaja angazone la itre xan. Ame la ka ixöjetrij ke, ka thë la caas me thapa la tingeting e hnine la ekalesia. (Ite edomë 20:19; Rom. 14:19) Tha aqane tro kö lai a ujë. Ame la itre trengewekë hna qaja ke, kola nyixane la akötr ne lai atr. (Ite edomë 12:18; Efe. 4:31, 32) Eje hi, loi e tro sa thele la itre thiina ka loi thene la itre atr, me thele la aqane tro sa xatua angeic, matre troa cile kowe la itre jol!

10. Nemene la ini hne së hna xom qa ngöne Iobu 6:2, 3?

¹⁰ E jë la Iobu 6:2, 3. Hnei Iobu hna qaja ka hape, ame itre xaa ijin, “menu hë la ite tenge ewekë” i angeic. Hnene la hnei angeic hna elëhni, matre tha hnei angeice kö hna xomehnöthe la ukeineqë i angeic. Celë hi matre, hnei angeic hna qaja e thupen ka hape, hnei angeic hna ithanata menu. (Iobu 42:6) Ijije hi troa  ithanata menu tui Iobu, hnene la ketre atr ka akötr. Nge e thupen, kola traqa troa qeje menu pine la itre trengewekë hna qaja. Nemene la aqane tro sa ujë? Tha tro kö sa qaja angazo angeic, ngo loi e tro pe sa utipi angeic. Nyipici, tha Iehova kö a ajane tro sa cile kowe la itre jole ka tru me itre akötr ne la mele së. Celë hi matre, trotrohnine hi së la kola ithanata menu hnene la ketre trejin ka akötr. Ngacama angeic a silitrengathoi Iehova maine easë pena, ngo tha tro pi kö sa canga elëhni me ameköti angeic.—Ite edomë 19:11.

11. Troa nyitipu Elihu tune kaa hnene la itre qatre thup, ngöne la angatr a hamë eamo?

¹¹ Ame itre xaa ijin, ame la itre atr ka hnehengazo me akötr, ke, angatr a aja ixatua me eamo. (Gal. 6:1) Nemene la aqane troa xatua angatr hnene la itre qatre thup? Loi e tro angatr a nyitipu Elihu. Hnei nyidrëti hna drei Iobu cememine la hni ka utipin. (Iobu 33:6, 7) Thupene lai, hnei nyidrëti hna hamë eamo koi Iobu. Loi e troa tui Elihu hnene la itre qatre thup. Tro angatr a pane drenge hnyawa la itre trejin, me thele troa trotrohnine la jol ka eje thei angatr. Maine troa tune lai hnene la itre qatre thup, tro ha kapa hnyawa hnene la itre trejin la itre eamo.

12. Nemene la hnei Naomi hna kuca ngöne la kola meci la föi eahlo me lue nekö i eahlo?

¹² Ame Naomi, tre, ketre föe ka mele nyipici me ka hnimi Iehova. Ngo thupene la kola meci la föi Naomi memine la lue nekö i eahlo trahmany, hnei eahlo hna qaja ka hape, troa saze la ëje i eahlo, matre tro pena a hë eahlo ka hape, “Mara,” kola hape “haite atraqate.” (Rutha 1:3, 5, 20, 21) Hnei Rutha, tresi Naomi, hna ce lapa me eahlo, ngöne la kola traqa la itre akötre cili. Hnei Rutha hna xatua eahlo troa hetrenyi la ka ijij, me qaja la itre trengewekë ka akeukawane la hni Naomi. Hna amamane palahi hnei Rutha la ihnimi angeic koi Naomi.—Rutha 1:16, 17.

13. Pine nemene matre kola aja ixatua hnene la itre hna mecitrij?

¹³ Nyipici laka, ame la kola mecitrije la ketre trejin e hnine la ekalesia, tro angeice lai a aja ixatua. Hna aceitunëne la lue ka faipoipo memine la lue sinöe ka ce cia. Thupene la itre macatre, kola ilöthe la itre waan. Ngo ame la kola fejetrij me meci la sinöe, ke, hetre ethane koi ketre. Ceitune hi lai memine la lue ka faipoipo. Maine troa meci hnei ketre e nyidro, tro pë hë lai a hace me jol kowe la ketre. Celë hi la ka traqa koi Pauline. * Hna meci triji Pauline, matre öni eahlo: “Hna saze la meleng, nge pëhë trengecatreng. Patre hë la sineeng. Hnenge palahi memine la föeng hna ithanatane la nöjei ewekë. Hnei nyidrëti hna ce madrine me eni, me xatua ni ngöne la itre ijine akötr. Hnei nyidrëti palahi hna drei ni, ngöne la eni a qaja la itre jol ka traqa koi ni. Ame hë enehila, kösë hna thupa luë ni.”

14-15. Nemene la aqane tro sa xatuane la ketre trejin ka meci sineen?

¹⁴ Haawe, tro sa xatuane tune kaa la ketre atr hna mecitrije hnei föe hmunë? Ame la nyine troa pane kuca, tre, troa ithanata me angeic, ngacama jole koi së, maine thatre kö së la nyine troa qaja. Hnei Pauline hna qaja ka hape: “Atre hnyawa hi ni laka, tha ka hmaloi kö troa ithanatane la mec. Easa xou, wanga akötrë angeice jë maine ajolë angeic pena. Ngo ame pe, ka ngazo catr e pëkö hna qaja.” Ngo eje hi laka, tha kolo kö a treqene hnene la ka meci sineen, tro sa qaja la ketre trengewekë ka inamacan. Öni Pauline: “Eni a olen me madrin kowe la itre sineeng, ngöne la angatr a qaja ka hape, ‘Tru catre la hnenge hna meku nyipo.’ ”

 ¹⁵ Ame William ke, itre macatre ne meci la föi nyidrë. Öni nyidrë: “Madrine catre ni la kola qaja aloine la föeng. Eni a öhne laka, hna hnim me metrötrëne la föeng. Celë hi lai ka xatua ni me aupune la treijeng. Kola akeukawane la hning hnene la itre trengewekë i angatr, pine laka, ka sisitria catre koi ni la föeng.” Ketre, öni Bianca, ketre sine föe: “Ame ngöne la kola ce thith me ce e me eni la caasi maine lue xötr ne la Tusi Hmitrötr ke, kola thue trengecatreng. Nge eni fe a madrine ngöne la kola qaja aloine la föeng. Eni a madrin ngöne la kola drei ni hnene la itre xan e qeje nyidrë.”

16. (a) Nemene la nyine tro sa kuca, ngöne la kola mecitrije la ketre sinee së? (b) Thenge la hna qaja ngöne Iakobo 1:27, nemene la hnëqa së?

¹⁶ Nyipiewekë tro sa nyitipune la aqane ujë i Rutha, ngöne lo kola meci hnene la itre sinee i Naomi. Loi e tro sa catre xatuane la itre ka meci sineen. Hnei Pauline, hna qaja ka hape: “Ame ngöne lo thupene la kola meci la föeng, alanyimu la ka traqa troa xatua ni me ithuecatre koi ni. Ame hë e thupen, angatr hmaca ha tro troa isa kuci jolen. Ngo ame ni, saze hë la meleng. Ame koi ni, loi e troa xatuane la itre ka meci sineen koi itre treu, me itre macatre thupene la kola meci hnene lai sinee së hna hnim. Ketre ixatua ka tru lai koi angatr.” Nyipici laka, isapengö së kö. Ame itre xan, canga xomihnine hi angatr la meci ne la sinee i angatr. Ngo ame koi itre xan, thatreine kö angatr canga thëthëhmine la sinee i angatr ka meci hë ke, hetre hnei nyidroti hna majemine ce kuca. Tha tro kö sa thëthëhmine laka, ame la hnëqa së qaathei Iehova, tre, ene la troa xatuane la itre föe maine trahmanyi hna mecitrij.—E jë la Iakobo 1:27.

17. Pine nemene matre kolo fe a aja ixatua hnene la itre hna trotrij hnei föe hmunë?

 ¹⁷ Ame la itre xan, tre, angatr a hnehengazo me akötr, pine laka, hna trotriji angatr. Ame Joyce, tre, ketre föe hna trotriji hnei föi eahlo. Öni eahlo: “Ketre akötre ka tru koi ni, nge kösë meci hë la föeng. Maine eatre ju nyidrë ngöne loto, maine tithi nyidrëti pena hnei mec, tro hi ni a atreine xomihni. Ngo ame la, hnei nyidrëti hna iëne troa trotriji ni, matre kösë hna thaipië ni.”

18. Nemene la aqane tro sa xatuane la itre hna trotrij?

¹⁸ Ame la easa loi thiina me nyihnyawane la itre hna trotrij, easë hi lai a amamane la ihnimi së koi angatr. Nyipiewekë tro angatr a thele la itre nyipi sinee, pine laka, angatre caasi pë hë. (Ite edomë 17:17) Nemene la aqane tro sa amamane laka, itre nyipi sinee së? Ijije hi tro sa hë angatr troa ce xen me ce ngenu, maine ce cainöje pena. Ijije fe hi troa hë angatr kowe la hmi ne hnepe lapa së. Eje hi, maine tro sa kuca tune lai, tro hë sa amadrinë Iehova, pine laka, “eashenyi Iehova koi angete thë fë hni,” nge Nyidrëti la ‘atre thupëne la nöjei sine föe.’—Sal. 34:18; 68:5.

19. Ame ngöne 1 Peteru 3:8, nemene la hna upi së troa kuca?

¹⁹ Calemi hë la musi ne la Baselaia i Akötresieti e celë fen. Tro hë sa “thëthëhmine la ite aköte hnapan.” Easa treqene hnyawa la ijin, laka, “tha tro hmaca kö a mekune la hnapan, me xulu e kuhu hni at.” (Is. 65:16, 17) Loi e tro palahi sa xatuane la itre xan me amamane jëne la itre trengewekë së me huliwa së, laka, easa hnime la itre trejin me easë ngöne la u.—E jë la 1 Peteru 3:8.