Xecie koi së laka, Iehova a eatrongëne la nöje i Nyidrë. Nyidrëti a sajuën ej, matre troa cile catr “ngöne la itre drai ne la pun.” (2 Tim. 3:1) Eje hi, loi e tro së isa ala caasi a trongëne la itre hnei Iehova hna amekötin. Pane mekune jë së lo angetre Isaraela ngöne la hnapapa. Angatr a kuca la ketre ewekë ngöne la kola ufe la trutru.

Hnei Iehova hna upi Mose troa kuca la lue trutru sileva matre troa “hëne la icasikeu, me eatrongëne la ite lapa.” (Num. 10:2) Nyimu aqane troa ufe la trutru hnene la itretre huuj. Kola troa amamane kowe la nöj la nyine tro angatr a kuca. (Num. 10:3-8) Ketre tune fe enehila, nyimu aqane eatrongëne la nöje i Akötresie. Tro sa ce wange la köni kepin matre kola uf ekö la trutru. Kola hëne la itre hlue i Akötresie troa sine la itre icasikeu ka tru, me inine la itre qatr ne la nöj, nge kolo fe a hamëne la itre hna amekötin ka hnyipixe.

Maine Iehova a ajane troa “icasikeu asë” hnene la nöj ngöne la qëhnelö ne la uma ne heta ne icasikeu, kola ufe la lue trutru. (Num. 10:3) Ame la itre ka lapa xötreithi ne la uma ne heta, laka, hna thawa koi foa lao götran, ke canga drenge hi angatr la kola ufe la trutru, nge angatr a canga traqa kowe la icasikeu. Ngo ame la itre ka lapa ananyine la uma ne heta, ke hmitre troa canga traqa nge loi e tro fe a nue trengecatr. Ame pe, Iehova a ajane tro angatr asë a drenge la itre hnei Nyidrëti hna amekötin.

Ame enehila, tha easë hmaca kö a icasikeu qëmekene la uma ne heta. Ngo kola könë së asë troa sine la itre icasikeu me itre asabele ka tru. Easa kapa la itre ini me itre eamo ka lolo. Nge maine easa tro kowe la ketre nöj, ka ceitu asë hi la porogaram. Ketre, madrine catre la itre ka kapa la ihë cili, ke angatr a caasi me itre xan, matre troa nyihlue i Iehova. Eje hi, ame itre xan, nanyi la hnalapa i angatr. Ngo tru la madrine i angatr troa sine la itre icasikeu.

Nge tune kaa la itre ka mel ngöne la itre nöj gaa nany, nge jole koi angatr troa hane sine la itre icasikeu ka tru? Jëne la itre jiane huliwa ka hnyipixe tune la ëternet, ijije hi tro angatr a goeëne la itre porogaram hna hnëkën. Madrine catre angatr troa hane ce kapa me easë la itre göxene qaathei Iehova. Hanawange la ka traqa ngöne la filial e Bénin, ngöne lo kola iwai hnene la ketre atrene la hnalapa ne xomi meköt. Hnene lai filial hna hnëkëne la ketre icasikeu ka ketrepengön me hane iupi fë e Arlit e Niger. Ame ngöne la traone cili ke, ej ngöne la hnapapa hna hape, Sahara nge nyimutre la itre mines. 21 lao Itretre Anyipici Iehova nge hetre itre xan ka hetre hni ne aja kowe la nyipici. Angatr fe a hane sine la icasikeu ka ketrepengöne hna hnëkën. Ngacama nanyi  catre angatr qaathene la 44 131 lao atrene la hna icasikeu e Bénin, ngo kösë ce angatr hi. Önine a ketre trejin: “Eahuni a olene koi nyipunie la hna aijijë huni troa hane goeën me sine la icasikeu ka ketrepengön. Kola mama hnyawa koi hun la etrune la ihnimi nyipunieti koi hun.”

Ame la kola ufe la caa trutru hnene la itretre huuj e Isaraela, ke kolo hmekuje hi a traqa kowe la uma mano “hnene la nöjei joxu, ite tane la nöjei thausane i angete Isaraela.” (Num. 10:4) E cili, Mose a qaja la itre hna amekötin me ini angatr troa xome hnyawa la hnëqa i angatr ngöne la tribu. Maine easë ju la ketre tane la nöj ngöne la ijine cili, tro hë sa canga kuca la hne së hna atrein matre troa hane sine lai icasikeu.

Ame enehila, tha itre “joxu” kö la itre qatre thup ne la ekalesia. Tha angatre kö a qene joxune la hnëqa i angatr me musinëne la itre mamoe i Akötresie. (1 Pet. 5:1-3) Angatre pe a thele troa thupëne me nyihnyawa la itre mamoe. Celë hi matre, angatr a kapa la itre ini hna hnëkëne thatraqai angatr, tune la Ini Ne Cainöj Qaathei Akötresie. Celë hi ini ka xatua angatr troa xome hnyawa la hnëqa i angatr. Nemene la thangan? Kola caasi la ekalesia nge kola acatrene la lapaunene la ekalesia koi Iehova. Ngacama tha hane kö së sine la ini cili, ngo easa kepe thangane qa ngöne la easa ce huliwa memine la itre qatre thup.

Ame itre xaa ijin, itretre huuj a saze la nyine la trutru. Kola amamane laka, loi e troa fek me saze hnë lapa ngön. (Num. 10:5, 6) Tha ka zikoziko kö la aqane enije i angatr, ngo hna hnëkëne hnyawa. Ngo eje hi, ketre jole ka tru lai kowe la itre hnepe lapa. Maine jë hetre itre xan ka tha drenge la itre hna amekötin. Pine nemen?

Maine jë angatr a mekune ka hape, kolo palahi a ufe la trutru, nge kola asesëkötrë angatr. Kola qaja hnei Tusi Hmitrötr ka hape: “Eje pala kö la iawe hune la uma mano kola të hun’ ej, ite nekö i Isaraela a lapa.” Ngo, “e eje kö la iawe qan’ e heji uti hë e hmakany.” Nge ame itre xaa ijin, angatr a lapa koi “lue drai hi, maine ca teu, maine ca macate.” (Num. 9:21, 22) Ngo aija saze göhnë hnene la nöj? Kola qaja ngöne Numera mekene 33 ka hape, 40 lao götrane hna tro kow me lapa ngön hnene la angetre Isaraela.

Maine jë hetre itre xan ka öhne la itre xaa götrane gaa xapo. Madrine catre angatr troa lapa e cili, pine laka, angatr ngöne la “hnapapa ka tru me hna qouen.” (Deu. 1:19) Easa trotrohnine e celë laka, jole kowe la angetre Isaraela troa enij me saze göhnë.

Ame la kola nyiqaane fek hnene la nöj, itre xan a elëhni ke, angatr a pane itreqe. Eje hi, hnei angatr asë hna drenge la kola ufe la trutru. Ngo tha ijiji angatre kö troa ce mejë me itre xan me feke qa cili. Ame la kola pane ufe la trutru, kola canga feke qa cili hnene la itre tribu ne Iudra me Isakara me Zebulona. (Num. 2:3-7; 10:5, 6) Thupe i angatr, itretre huuj hmaca a ufe la trutru, matre tro la köni tribu a fek qa ngöne la götrane kolojë. Nge kolo hmaca e thupen a ufe uti hë mejë asë hë la itre atrene la nöj qa cili.

Hapeu hetre itre xaa ithuemacanyi ka hnyipixe nge ka jole koi së troa canga kapa? Maine jë hnene laka tru catre palaha la nöjei ithuemacanyi ka hnyipixe, matre easa hnehengazo me kucakuca. Maine pena majemine hë së huliwane la itre ithuemacanyi hnapan, matre tha aja së kö troa canga saze. Ngo tha celë kö lai ka nyipiewekë. Maine jë easa mekun laka, kola tupathe la aqane xomihni së nge tha ka hmaloi kö koi së troa canga saze. Ame pe, maine tro sa saze thenge la itre hna amekötin, tro Iehova a amanathithi së.

Ame ngöne lo hneijine i Mose, hnei Iehova hna eatrongëne la itre milio lao trahmanyi me föe me itre nekönatr ngöne la hnapapa. Maine tha hamëne ju Iehova la itre hna amekötin, tro ha luzi la nöj nge pëkö ka mel. Ame fe enehila, Iehova a hamëne koi së la itre eamo ka xatua së ngöne la götrane u ngöne la itre drai ne la pun. Kola acatrene la aqane imelekeu i easë me Iehova me acatrene la lapaune së. Celë hi matre, loi e tro palahi sa catre nyitipune la angetre Isaraela ka drenge la aqane ufe la trutru nge ka canga fek.