“Ame ngöne la ketre drai, kola pi inyiengë hnene la ketre trejin me eni. Hnei nyio hna isi, nge hnenge hna öje la nyinawa i angeic. Kösë eni a pi humuthi angeic.”—Paul.

“Ame ngöne la hnalapa, ka canga elëhni palahi ni. Eni a thë la nöjei ewekë e hnine la uma, tune la itre nyimo.”—Marco.

Maine jë, tha ceitu së kö me Paul me Marco. Ngo ame itre ijin, thatreine kö së xomehnöth. Eje hi, itre matra i Adramu asë hi së matre tha itre atr ka pexeje kö së. (Rom. 5:12) Ame koi itre xan, tui Paul me Marco, jole catre troa xomehnöthe la elëhni. Ame pena koi itre xan, jole troa xomehnöth la itre mekuna i angatr. Angatr a mekun la itre ewekë ka ajolë angatr, matre ngazo palahi la itre mekuna i angatr. Ame itre xan, angatr a nue trengecatr matre troa xomehnöth la aja troa kuci ngazo, me iji kahaitr, me xomi dorog.

Maine thatreine kö la ketre atr troa xomehnöth la itre mekun, me itre aja, me itre huliwa i angeic, tro ha luz la mele i angeic. Ngo ijije hi matre tha tro kö a traqa kowe la ewekë cili. Tune kaa? Troa atreine xomehnöth. Tro sa pane sa la köni hnying celë matre xatua së: (1) Kola hapeu la troa xomehnöth? (2) Pine nemene matre ka nyipiewekë catr la thiina cili? (3) Nemene la aqane tro sa eënyine la thiina celë ka ce tro memine la “wene ne la ua”? (Gal. 5:22, 23) Thupene lai, tro sa ce wang la nyine troa kuca e traqa ju së thatreine xomehnöth.

Ame la atr ka atreine xomehnöth, tre, tha ka canga elëhni kö. Tha angeice kö a canga qaja maine kuca la ketre ewekë ka troa akötrë Akötresie.

Hnei Iesu hna amamai tulu göne la aqane troa atreine xomehnöth. Öni Tusi Hmitrötr: “Ame lo kola qaqa nyidrë, tha hane kö nyidrëti iqaqa, nge ame lo nyidrëti a akötr, tha hane kö nyidrë iköja, ngo hnei nyidrëti pe hna mejiune kowe la Atre Iameköti ka meköt.” (1 Pet. 2:23) Hnei Iesu hna xomehnöth ngöne la kola hnyimasai nyidrë lo nyidrëti a thip hune la sinöe ne iaxösisi. (Mat. 27:39-44) Nge qëmekene lai, hnei nyidrëti hna xomehnöth ngöne lo itre hene ne hmi a thel troa iaö nyidrë. (Mat. 22:15-22) Nge hnei nyidrëti hna amamai tulu ka loi ngöne lo angetre Iudra a elëhni me thele troa tranyi nyidrë. Tha hnei Iesu kö hna thele troa itëkeun, ngo hnei nyidrëti pe hna “canga zae, me kötre lö pi qa hnine la uma ne hmi.”—Ioane 8:57-59.

Ijije kö tro sa hane nyitipu Iesu? Eje hi. Öni Peteru aposetolo: “Hnei Keriso fe hna hane akötre pi nyipunie, nge nyidrëti lai a amamai tulu koi nyipunie matre trongëne hnyawa la itre thupa ca i nyidrë.” (1 Pet. 2:21) Haawe, ngacama itre atr ka tha pexeje kö së, ngo ijije hi tro sa xötrethenge hnyawa la tulu i nyidrë. Pine nemene matre ka nyipiewekë catre lai?

Nyipiewekë tro sa atreine xomehnöth matre troa kepe së hnei Akötresie. Ngacama ekö hë së nyihlue i Nyidrë, ngo ijije hi tro sa aluzine la aqane imelekeu së me Nyidrë, e thatreine kö së xomehnöth la aqane ithanata së me itre huliwa së.

Tro sa pane qeje Mose. “Ate ka nyipi menyike Mose hune la nöjei ate asë e celë fen.” (Num. 12:3) Hnei Mose hna xomihnine la angetre Isaraela koi nyimu macatre. Ngo ame la ketre drai, hnei nyidrëti hna thatreine xomehnöth. Ame la angatre hmaca a eetr pine pë tim, hna elëhni hnei Mose nge hnei nyidrëti hna ithanata akökötrenyi koi angatr. Öni nyidrë: “Dengeju nyupun, xötete ena; tro nyiho a axulune la timi thatraqai nyipunie qa ngöne la giti celë?”—Num. 20:2-11.

Hnei Mose hna thatreine xomehnöth. Tha hnei nyidrëti kö hna atrunyi Iehova. Tha hnei Mose kö hna amamane laka, hnene la mene i Iehova hna hamëne la tim. (Sal. 106:32, 33) Celë hi matre, tha hnei Akötresieti kö hna nue Mose troa hane lö kowe la Nöje Hna Thingehnaean. (Num. 20:12) Uti hë la pune la mele i nyidrë, hnei Mose hna akötre fë lo ijine nyidrëti a thatreine xomehnöth.—Deu. 3:23-27.

Nemene la ini koi së? Ngacama ekö hë së ngöne la nyipici, ngo tha tro pi kö sa pë metrötr kowe la itre ka aelëhni së me kowe la itre atr hne së hna hajin. (Efe. 4:32; Kol. 3:12) Nyipici, ame la easa uti ipië trootro, jole pi hë koi së troa atreine itreqe. Ngo the thëthëhmine kö së lo ka traqa koi Mose. Tha aja së kö troa aluzine la itre macatre ne nyihlue i Iehova së, hnene hi laka, hne së hna thatreine xomehnöth. Nemene la aqane tro sa eënyine la thiina celë ka nyipiewekë?

Troa thith matre sipo uati hmitrötr. Pine nemen? Pine laka, ame la xomehnöth, tre, ketre igötranene la “wene ne la ua” i Akötresie, nge Nyidrëti a hamën la uati hmitrötr kowe la itre ka sipon. (Luka 11:13) Jëne la uati hmitrötr, Nyidrëti a hamë së la trengecatr ka ijij. (Fil. 4:13) Nyidrëti fe a xatua së troa eënyine la itre xaa götrane la “wene ne la ua,” tune la ihnim ka troa xatua së troa canga xomehnöth.—1 Kor. 13:5.

Troa thipetrije la itre ewekë ka ajolë së troa atreine xomehnöth. Loi e tro sa thipetrije la itre sit Ëternet me itre nyine iamadrinë ka amamane la itre thiina ka ngazo. (Efe. 5:3, 4) Loi e tro sa kötrene la nöjei ewekë ka uku së troa kuca la  ngazo. (Ite edomë 22:3; 1 Kor. 6:12) Ame la ketre atr ka isi memine la itre aja ka ngazo, tre, tha tro kö angeic a e la itre itus maine goeëne la itre film ne ihanyi.

Jole pi hë koi së troa trongëne la eamo celë. Ngo maine tro sa nue trengecatr, tro hë Iehova a hamë së la ka ijij. (2 Pet. 1:5-8) Tro hë Nyidrëti a xatua së troa xomehnöth la itre mekun, me itre ithanata me itre huliwa së. Tui Paul me Marco, hnei nyidroti hna inine troa xomehnöth la elëhni nyidro. Hanawange la tulu ne la ketre trejin ka thatreine xomehnöth ngöne la angeic a xomi loto. Angeice a iwesitrë memine la itre xaa ka xomi loto. Nemene la hnei angeic hna kuca matre atreine xomehnöth? Öni angeic: “Hnenge hna thithi e nöjei drai, me xome la itre tane mekun ka qaja la aqane troa atreine xomehnöth. Hnenge fe hna inine me hnehene la itre xötr ka troa xatua ni ngöne la götrane cili. Nyimu macatre hë ne eni a thel troa eënyine la thiina cili. Ngo nyipiewekë tro palahi ni a atreine xomehnöth. Maine hetre hnenge hna isapui memin, eni a canga tro matre tha tro kö a ajolë ni e cahu gojeny.

Ijije hi tro sa thatreine xomehnöth. Maine jë tro sa hmahma troa thith koi Iehova. Ngo celë hi nyipi ijin matre troa thith. Maine hnei së hna thatreine xomehnöth, loi e tro sa canga thithi koi Iehova. Sipone jë koi Iehova troa nue la itre ngazo së. Loi e tro fe a sipo Nyidrë troa xatua së matre tha tro hmaca kö sa kei kowe la tria cili. (Sal. 51:9-11) Tha tro kö Iehova a thipetrije la itre thithi së. (Sal. 102:17) Ioane aposetolo a amekunë së laka, hnene la madra i Iesu hna “ahmitrötrë së qa ngöne la nöjei ngazo së.” (1 Ioane 1:7; 2:1; Sal. 86:5) Tha tro kö sa thëthëhmine laka, Iehova a ajane tro palahi la itre hlue i Nyidrë a nue la ngazo i itre xan. Nge xecie koi së laka, tro fe Nyidrëti a hane kuca tun koi së.—Mat. 18:21, 22; Kol. 3:13.

Tha madrine kö Iehova ngöne lo Mose a thatreine xomehnöth. Ngo hnei Nyidrëti hna nue la ngazo i angeic. Tusi Hmitrötr a qaja ka hape, Mose la ketre tulu ne lapaun. (Deu. 34:10; Heb. 11:24-28) Tha hnei Iehova kö hna nue Mose troa lö kowe la Nöje Hna Thingehnaean. Ngo hnei Nyidrëti hna aijijë angeic troa mel epine palua ngöne la Paradraiso. Eje hi, maine tro sa catre inine troa atreine xomehnöth, tro fe sa hane tui Mose, troa kapa la manathithi cili.—1 Kor. 9:25.