HNEI angetre Isaraela ekö hna majemine kuië ahnahna göne la nyipi hmi. Ngo ame ngöne la hneijine i Iesu, nyimutre la itre hotr hna athip, matre jole catre la mele i angatr.

Itre trahmanyi ne la nöje Iudra a kuiën e nöjei macatre la lue drakeri, matre troa sajuëne la hmi e hnine la uma mano, me uma ne hmi e thupen. Ame ngöne la hneijine la itre pane Keresiano, hna huliwane la manie cili, matre troa nyidrawane la uma ne hmi hna xupe hnei Herodra, me thatraqane la itre huuj. Hnene la itre xaa atre Iudra hna hnyingë Peteru la mekuna i Iesu göi troa hotr. Tha hnei Iesu kö hna icilekeu göi troa hotr. Hnei nyidrëti pe lo hna upi Peteru troa nyithupene la hotr.—Mat. 17:24-27.

Ame ekö, hna amekötine fe kowe la itre hlue i Iehova troa hamëne la hnaatrenene lao ewekë hna xom qa ngöne la hnei angatr hna eëny, maine manie pena. (Lev. 27:30-32; Num. 18:26-28) Önine la itre hene ne hmi ka hape, loi e troa hamëne la hnaatrenene qa ngöne la itre feja hna traan, tune la itre “minet, me aneto, me komina.” Tha hnei Iesu kö hna qaja angazone la hotr, ngo hnei nyidrëti pe hna qaja la aqane huliwa thoi me qenatrekënö ne la itre Faresaio me angetre cinyihan.—Mat. 23:23.

Ketre, angetre Iudra a mel fene la musi Roma, matre nyimutre la itre hotr. Ame la itre ka trenadro, tro angatr a hamëne la 20 maine 25 % ne la itre hna menuën ngöne la itre zi angatr maine kuië manie pena. Nyipiewekë tro la itre atre Iudra a isa hamëne lai hotr. Celë hi lo hnei itre Faresaio hna hnyingën koi Iesu. Öni Iesu koi angatr: “Hamëne pi koi Kaisara la ewekë i Kaisara, nge koi Akötresie la ewekë i Akötresie.”—Mat. 22:15-22.

Ketre, kolo fe a kuiëne la hotr ngöne la kola traqa fë maine iupi fë pena la itre xen me itre xaa ewekë jëne he. Qëmekene troa qathë, hetre nyine troa nyithupene ngöne la itre hna xepe hnei he, itre hna ijejea, itre traon, me ngöne hna maketr.

Nyimutre la itre hotr hna athipe hnei angetre Roma, matre hace catre kowe la nöj. Hanawang la hna qaja hnei Tacite, ketre atre inamacan qa Roma. Hnei angeic hna mel fene la musi Tiberio, ngöne lo Iesu palakö e celë fen. Öni angeic: “Hnene la itre nöj Suria me Iudra hna sipone troa acone la thupene hotr ke, tru palaha koi angatr.”

Ketre, tha ka meköti kö la aqane huliwa ne la itre ka hle manie. Angatr a upe la itre ka huliwa koi angatr troa hlem atrune la manie ngo tha celë kö la hna athip. Angatr a kuca tune lai, göi troa kepe thupen. Tui Zakaio ekö, nyimutre la itre ka huliwa koi angeic. (Luka 19:1, 2) Eje hi, alanyimu la itre atr ka methinën la itre ka hle manie.