Hna hnaho ni lo 19 Mei 1940 e Amioun e Liban. Itre macatre thupen, eahuni a fek a tro Tripoli. Eni a madrin ke, ka hnimi Iehova me caasi la hnepe lapang. Faifi eahun laka, köni jajinyi nge lue nekötrahmany. Eni la ka co. Ame koi kaka me nenë, tha nyipiewekë kö troa tru hnei mo me manie. Sisitria catre kö koi nyidro troa inine la Tusi Hmitrötr me sine la itre icasikeu me cainöj.

Nyimutre la itre trejin hna iën ngöne la ekalesia hun. Michel Aboud la ëje ne la ketre, nge nyidrëti la ka xomiujine la Ini Tusi Hmitrötr Ne La Ekalesia. Hnei nyidrëti hna atre la nyipici e Neweyok, nge nyidrëti la ka pane nyiqaane cainöj e Liban lo itre macatre 1920. Ngo tha thëthëhmine kö ni la aqane metrötr me nyihnyawane nyidrëti la lue trejine jajinyi ka sine la Ini Ne Gileada, Anne me Gwen Beavor. Ketre, lue sinee i eahuni nyidro. Thupene la 10 lao macatre, eni a madrine troa iöhnyi hmaca me Anne e Etazini. Thupene lai, eni a iöhnyi me Gwen. Hnei angeic hna faipoipo me Wilfried Gooch, nge nyidroti a huliwa ngöne la Bethela e Agele.

Ame lo eni a co, xalaithe hi la Itretre Anyipici Iehova. Ngacama kola icilekeu hnene la  itre hene ne hmi, ngo eahuni a madrin troa cainöjëne la maca ne la Tusi Hmitrötr. Thatreine kö ni troa thëthëhmine la itre ewekë ka traqa ekö.

Ame la ketre ijin, hnenge hna ce cainöj me Sana, mama i eni, ngöne la ketre uma ka tru. Traqa pi hi la ketre peenë. Maine jë, hna hë nyidrë hnene la atrene lai uma. Kola elëhni la peenë nge nyidrëti a qaqa Sana. Hnei nyidrëti hna uku Sana matre eatre pi angeic. Hnene la ketre atrene la uma hna hë polis, me upe la ketre atr troa nyihnyawane la mamang. Hnei itre polis hna othe la peenë me öhne laka, hetre kuqa i nyidrë. Hnene la tane la itre polis hna hnyingë nyidrë ka hape: “Nyipëti a inine la itre atr troa atre Akötresie maine troa isi me ihumuth?”

Eni fe a mekun lo ijine kola xomi babikar hnene la ekalesia hun, matre troa cainöj ngöne la ketre traon gaa nany. Lolo catre la huliwa ne cainöje hun, uti hë la kola traqa hnene la ketre peenë memine la itre xan. Hnei angatr hna ee hun me tranyi huni hnei etë. Hna eatre la he i kaka. Eni palakö a goeëne la iqëmeke i nyidrë ka si madra. Hnei nenë hna bëeke sai kaka kowe la babikar. Eahuni a hnehengazo matre hne huni hna xötrethenge nyidro. Mekune palahi ni lo hna qaja hnei nenë. Öni eahlo: “Iehova, nue pi la ngazo i angatr. Thatre kö angatr la hnei angatre hna kuca.”

Ame la ketre ijin, hne huni hna tro e Amioun, lo traon hna hnaho ni, matre troa wang la itre sinee hun. Traqa eahuni a öhne la ketre hene ne hmi ngöne la hnalapa i qaaqaa. Atre hi nyidrë laka, ka nyihlue i Iehova kaka me nenë, matre hnei nyidrëti hna ithanata koi ni, nge kolo petre hi a sikisi lao macatreng. Öni nyidrë: “Hnauëne laka, tha hna bapataiso hmunë kö?” Hnenge hna sa ka hape, nekönatre palakö ni. Loi e tro ni a pane atre hnyawa la Tusi Hmitrötr me acatrene la lapauneng. Tha madrine kö nyidrëti la aqane sang, matre öni nyidrëti koi qaaqaa ka hape, pëkö metrötre ni koi nyidrë.

Eloine pe, tha hna traqa kö la itre jol cili e nöjei drai. Eje hi, ka lolo thiina la angetre Liban, nge ka ikep angatr. Hnei angatr hna kapa la maca qa hnine la Tusi Hmitrötr, nge hetre ka ini tusi me eahun.

Ame lo eni palakö a ini, hna traqa troa wai huni e Liban hnene la ketre trejin qa Vénézuéla. Angeic a ce icasikeu me eahun me iatre me Wafa, ketre mama i eni. Hnei nyidroti hna faipoipo me fek a tro Vénézuéla. Hnei Wafa hna cinyanyi koi kaka me sipo nyidrëti tro la hnepe lapa huni a fek a tro Vénézuéla. Hnei angeic palahi hna iele kaka uti hë la nyidrëti a hmala!

Eahuni a traqa e Vénézuéla lo 1953, me lapa ngöne la neköi traon hna hape, Caracas, ezine la uma atraqatr ne la Perezida. Pine laka nekönatr palakö ni, matre ajane  catre ni troa goeëne la loto i nyidrë ka tru kola nyenyape qëmekene la hnalapa. Ngo tha ka hmaloi kö koi kaka me nenë troa mel e celë ke, tha majemine kö nyidro kowe la aqane mel, me qene hlapa, me aqane xen, memine fe la hnedrai. Ame e thupen, majemi hë nyidro ngo hna traqa la ketre jol.

Hna traqa la ketre ewekë koi kaka. Eahuni a sesëkötr ke, ka egöcatre palahi nyidrë. Tha hane fe kö huni öhnyi kaka e wezipo. Ngo hna tithi nyidrëti hnene la ketre meci ka pë nyin, nge thupen la caa wiik nyidrëti hi a mec.

Hace me jol la mele hun. Kolo petre hi a 13 lao macatreng. Eje hi, hna asesëkötrë huni. Ketre, tha kapa kö nenë laka, patre hë nyidrë. Atre hi eahun laka, loi e tro huni a cile catr. Jëne la ixatua i Iehova, hne huni hna atreine xomihnine lai jol. Ame la kola 16 lao macatreng, eni a ase ini nge eni a ajane troa huliwa matre xatuane la hnepe lapang.

Ame ngöne la ijine cili, hnei Sana, ketre mamang, hna faipoipo me Rubén Araujo, ketre trejin ka sine la Ini Ne Gileada me bëek e Vénézuéla. Thupene lai, hnei nyidroti hna fek a tro Neweyok. Hnene la itre atrene la hnepe lapang hna mekun laka, tro ni a tro kowe la ketre uma ne ini ka tru me lapa thei Sana me Rubén. Hnei nyidroti hna xatua ni troa acatrene la lapauneng me ihniming koi Iehova. Lolo catre fe la ekalesia huni e Brooklyn ka qene Espagnol. Hetrenyi la itre trejin ka macaj, tui trejin Milton Henschel me Frederick Franz, lue ka huliwa ngöne la Bethela e Brooklyn. Eni a madrine troa atrepengöi nyidroti hnyawa.

Thupene la pane macatreng ngöne la uma ne ini ka tru e Neweyok, eni ha nyiqaane mekun ka hape, ka loi kö la aqane axecië mekunang. Hnenge hna e me lapa mekun la hna qaja ngöne la ketre Ita Ne Thup, göne la troa huliwa catre koi Iehova. Ketre, hnenge hna öhne la itre trejin trahmanyi ka pionie me ka huliwa ngöne Bethela. Ka madrine palahi angatr, nge eni a hane pi madrin tui angatr. Tha ka bapataiso palakö ni. Matre, hnenge hna mekun troa nue la meleng koi Iehova. Nge ame hë lo 30 Maac 1957, eni ha xomi bapataiso.

Hnenge hna eatrëne la ketre hnenge hna mekun, ngo hetre itre xan palakö. Eni a ajane troa huliwa i Akötresie ngöne la drai ka pexej. Eni a ajane troa pionie, ngo atre hi ni laka, tha ka hmaloi kö ke, eni palahi a ini. E cili, hnenge hna mekun troa nue la ining me bëek e Vénézuéla matre troa pionie. Ngo hnenge hna pane cinyanyi koi nenë memine la itre trejin me eni troa qaja koi angatr la kepin matre eni a nue la ining.

Ame hë lo Juun 1957, eni a bëek a tro Caracas. Eni a öhne laka, nyipiewekë troa huliwa  kowe la hnepe lapa. Hna hë ni troa huliwa ngöne baak, ngo eni pe a ajane troa pionie. Celë hi lo lai kepin matre eni a bëek e Vénézuéla. E cili, hnenge hna huliwa ngöne la drai ka pexej me koi itre macatre. Ngo hnenge fe hna xome la huliwa ne pionie. Tru la huliwang ngo tru fe la madrineng!

Thupene lai, hnenge hna faipoipo me Sylvia, jajinyi ka mingöming qa Alema nge ka catre hnimi Iehova. Hnei angeic hna traqa memine la kem me thine i angeic e Vénézuéla. Lue nekö i nyio, Mike me Samira. Hnenge fe hna xomi nenë kowe la hnalapang matre troa thupë eahlo. E cili, hnenge hna nue la huliwa ne pionie thatraqane la hnepe lapang. Ngo hnenge palahi hna catre cainöj. Hnenge me Sylvia hna xome la huliwa ne pionie ka ixatua ngöne la itre ijine mano.

Itre nekönatr palakö a ini ngöne la kola traqa koi ni lo itre ewekë hnenge hna qaja ngöne la qaan. Lolo la mele hun nge kola metrötrë ni hnene la itre ka huliwa ngöne baak. Ngo ame la ka nyipiewekë koi ni ke, tro angatr a goeë ni ceitu me ketre hlue i Iehova. Celë hi lai hnenge hna mekun ngöne la eni a nango tro kowe la hna huliwa. E cili, hnenge me Sylvia hna pane mekun la mele i nyio me e la thupen. Maine tro ni a nue la huliwang, tro ni a kapa la ketre trenge manie ka tru qaathei baak. Ijije hi tro huni a mel memine la manie cili koi itre macatre ke, hne huni hna ahmaloeëne la mele i hun.

Nyipici, tha ka hmaloi kö troa axecië mekun, ngo hnei Sylvia me nenë hna sajuëne lai mekun. Celë hi matre, hnenge hna xome la huliwa ne pionie, me nyihlue i Iehova ngöne la drai ka pexej. Thatreine kö ni qaja la madrineng! Pëkö ewekë ka hnöthe la meleng. Ame pe, hetre ketre ewekë ka traqa.

Önine la droketre ka hape, Sylvia a upune. Nyio a sesëkötr me madrin! Ngo ase hë ni mekun troa pionie. Eje hi, madrine catre nyio troa lapa treqene la nekönatr. Ngo tune kaa la mekunang troa nyihlue i Iehova ngöne la drai ka pexej?

Ame pe, hnei nyio hna pane ithanata me thele troa eatrën la mekuna i nyio. Hna hnaho Gabriel lo Eiperem 1985. Hnenge hna nue la huliwang me xome la huliwa ne pionie lapa lai treu Juun 1985. Thupene lai, hna ië ni troa ketre atrene la filial, matre luetre  maine köni drai ne tro ni a nyinyapëne la 80 km qa Caracas, matre troa tro kowe la Bethela.

Ame la Bethela ke, ej e La Victoria, matre hne huni hna mekun troa lapa ngöne la traon cili matre easenyi koi ni. Ketre ewekë lai ka hnyipixe nge ka saze la mele hun. Ngo eni a olene kowe la itre atrene la faming la hnei angatr hna sajuëne la mekunang. Hnei Baha, lo trejin me eni, hnei angeic hna xomi nenë me thupë eahlo. Ame Mike ke, ka faipoipo hë angeic, ngo Samira me Gabriel palakö thei nyio. Ame pe, hnei nyidroti hna nue la itre sinee i nyidro me ce tro me nyio a tro La Victoria. Ketre tui Sylvia, hnei angeic hna hmala troa fek qa ngöne la traon ka tru kowe la ketre traon ka co. E cili, hne huni hna inine troa mel e hnine la neköi uma ka co. Nyimutre la itre ewekë ka saze ngöne la eahuni a fek qa Caracas koi La Victoria.

Hetre ketre ewekë ka traqa. Hna faipoipo hnei Gabriel nge hetre hnalapa i Samira hë. Matre, ame lo 2007, hna hë ni me Sylvia troa huliwa ngöne la Bethela, nge uti palahi enehila. Ketre qatre thup hë Mike enehila, nge ka pionie me Monica. Ketre tui Gabriel, ketre qatre thupe fe angeic, nge angeic a mel e Italie me Amara. Nge ame Samira, ketre pionie angeic, nge angeic a huliwa kowe la Bethela, ngo jëne video.

Nyimutre la itre mekun ka tru hnenge hna xom thatraqane la meleng. Ngo eni a madrin la aqane axecië mekuneng. Maine kola upi ni troa saze itre ej, tha tro kö ni a kuca. Tru la hni ne oleng koi Iehova, kowe la itre hnëqang qaathei Nyidrë. Ame ngöne la itre macatre, eni a trotrohnine la enyipiewekëne troa acatrene la aqane imelekeu së me Iehova. Ngacama ka tru maine ka co la itre mekun hne së hna troa xom, ngo tro palahi Iehova a hamëne la tingeting “hna thatreine trotrohnine hnei atr.” (Fil. 4:6, 7) Tru la madrineng me Sylvia troa huliwa i Iehova ngöne la Bethela. Öhne hi nyio laka, hnei Iehova hna amanathithine la itre mekun hnei nyio hna axeciën ke, hnei nyio palahi hna amë panëne la aja i Nyidrë ngöne la mele i nyio.