1. Nemene la maca hna tro fë kowe la ka alanyim?

 PANE mekune jë laka, epuni e Ierusalema ekö. Alanyimu la itre atr ka traqa qa ngöne la itre xaa nöj, nge isa qene hlapa i angatre kö. E cili, kola traqa la ketre ewekë. Itre xaa atre Iudra a qaja la sipu qene hlapa ne la itre atr cili! Nge ame la ka sisitria, tre, kolo maca hnei angatr hna tro fë memine la hna qejepengöne hnei Peteru aposetolo. Öni angatr, tro ha mele la atre lapaune koi Iesu Keriso. Hna ketr la hni ne lo itre atr, matre hnei angatr hna hnying ka hape: “Nemene ju hë la nyine tro huni a kuca?” Nge öni Peteru: “Bapataiso jë.”—Itre hu. 2:37, 38.

2. Nemene la hne së hna troa ce wang? (Wange ju la icetrön.)

² Hetre ketre ewekë ka traqa e thupen. Traqa koi 3 000 la itre atr ka xomi bapataiso me xötrethenge Keriso. Celë hi qaane la huliwa ne cainöj, lo hnei Iesu hna ahnith kowe la itretre drei nyidrë ekö, me koi së enehila. Eje hi, tha ijije kö tro la ketre atr a xomi bapataiso, e hne së hi hna xatua angeic ngöne la itre hawa. Ngo itre treu me itre macatre ne tro sa xatua angeic. Maine easa ajane troa inine la ketre atr, nyipiewekë tro sa nue traem me trengecatr. Tro sa ce wang la aqane troa xatuane la ketre ka ini tus troa xomi bapataiso.

3. Thenge la Mataio 28:19, 20, nemene la nyine troa kuca hnene la ka ini tus qëmekene troa xomi bapataiso?

³ Qëmekene troa bapataiso, nyipiewekë tro la ka ini tus  a trongëne la hnei angeic hna inine hnine la Tusi Hmitrötr. (E jë la Mataio 28:19, 20.) Tro hë angeic a tune la atr “ka inamacan” hna qaja hnei Iesu, ka xupe la uma i angeic hune etë. (Mat. 7:24, 25; Luka 6:47, 48) Tro sa xatuane tune kaa la ka ini tus troa trongëne la hnei angeic hna inin? Hane hi la köni aqan.

4. Tro sa xatuane tune kaa la ka ini tus troa kökötr me xomi bapataiso? (Wange ju la hna eköhagen, “ Xatuane Jë La Ka Ini Tus Troa Mekun La Itre Nyine Troa Eatrën.”)

⁴ Troa xatua angeic troa mekun la itre nyine troa eatrën. Pine nemen? Hane hi la ketre ceitun: Pane mekune jë laka, epuni a xomi loto a tro ngöne la ketre götrane gaa nanyi catr. Maine jë, epuni a mekun troa cil ngöne la itre xaa götrane ka mingöming, matre kösë tha nanyi kö la gojeny. Ketre tune fe, maine tro la ka ini tus a mekun la itre nyine troa pane kuca me eatrën itre ej, tro hë angeic a öhn laka, ijiji angeice fe troa hane xomi bapataiso. Maine easa ajane troa xatua angeic, loi e tro sa huliwane la itre hna eköhagen hna hape, “Mon objectif ” e hnine la itus Vivez pour toujours ! Thupene la ketre ini, loi e troa ce wang me angeic la itre objectif memine la aqane troa trongëne la hna inin. Maine hetre ketre objectif hnei epuni hna mekun, cinyianyine jë fene la hna hape, “Autre objectif.” Jëne la itre hna eköhagen cili, tro sa ce ithanatan memine la ka ini tus la itre nyine tro angeic a eatrën.

5. Thenge la Mareko 10:17-22, nemene la eamo hnei Iesu hna hamën kowe la atr ka trenamo, nge pine nemen?

⁵ Troa xatua angeic troa saze. (E jë la Mareko 10:17-22.) Atre hi Iesu laka, tha ka hmaloi kö kowe la atr ka trenamo troa salemën la itre mo i angeic.  (Mar. 10:23) Ngo hnei nyidrëti kö hna upe la atre trenamo troa salemën la itre ewekë i angeic. Pine nemen? Pine laka, tru la ihnimi Iesu koi angeic. Ame itre xaa ijin, easa cil troa qaja kowe la ka ini tus troa trongëne la hnei angeic hna inin. Maine jë, ame koi easë, tha ijiji angeice palakö troa saze. Nyipici, tha tro kö a canga paatre la itre hna majemine kuca ekö. Nyipiewekë troa nue traeme matre troa heetrëne la heetr ka hnyipixe. (Kol. 3:9, 10) Ngo maine tro sa canga qaja koi angeic la itre nyine saze, tro hë angeic a canga kökötr. Nge ketre aqane tro sa amamane la ihnimi së koi angeic.—Sal. 141:5; Ite edomë 27:17.

6. Pine nemene matre nyipiewekë tro sa hnying kowe la ka ini tus?

⁶ Nyipiewekë tro sa hnying kowe la ka ini tus, matre troa atre la hnei angeic hna trotrohnin me mejiune kow. Maine tro sa majemine kuca tun, tro ha hmaloi koi së elany, troa ce ithanatan me angeic la itre jol hnei angeic hna melën. Nyimutre la itre hnying hna amë e hnine la itus, Vivez pour toujours ! Ame ngöne la ini 04 kola hape: “À votre avis, que ressent Jéhovah quand vous utilisez son nom ?” Nge kola hnying ngöne la ini 09: “Pour quelles choses voudriez-vous prier ?” Ame ngöne la xötrei, loi e troa pane nue ijine koi angeic troa sa. Loi e tro sa xatua angeic troa xomi ini qa ngöne la itre xötr me itre iatr.

7. Nemene la aqane tro sa huliwane hnyawa la itre hna melën hnene la itre trejin?

⁷ Maine trotrohnine hë la ka ini tus la nyine troa kuca, loi e tro sa ithuecatr koi angeic troa trongëne la hna inin. Ame ngöne la itus, Vivez pour toujours !, hetre götrane hna hape, “Approfondissons” me “À découvrir aussi.” Lue ej a amamane la hna melën hnene la itre xaa trejin. * Maine jol koi angeic troa sine la itre icasikeu, amamane jë koi angeic la video, Jéhovah a pris soin de moi, ka mama ngöne la götrane “À découvrir aussi” ne la ini 14. Ngo tha tro kö sa aceitunë angeic memine la ketre atr me hape, “Maine hnei angeic hna saze, haawe, ijiji eö fe hi.” Tro pe sa nue angeic troa sipu öhne la enyipiewekëne troa saze. Loi e tro sa ce ithanatane me angeic la ka xatuane la trejin e hnine la video, troa trongëne la hna qaja hnei Tusi Hmitrötr. Tro fe sa amamane la ketre xötr maine ketre mekun ka troa xatua angeic, me amamane la aqane xatuane Iehova lai trejin e hnine la video.

8. Tro sa xatuane tune kaa la ka ini tus troa acatrene la ihnimi angeic koi Iehova?

⁸ Troa xatua angeic troa hnimi Iehova. Tune kaa? Tro sa amamane koi angeic la itre thiina i Iehova, me xatua angeic troa öhne laka, ka madrine Iehova, nge aja i Nyidrë troa xatuane la itre ka hnimi Nyidrë. (1 Tim. 1:11; Heb. 11:6) Tro fe sa amamai angeic la itre manathith hna troa kapa, e tro angeic a trongëne la hna inin. Ketre, tro fe sa amamane laka, ame la itre manathith cili, tre, itre hatrene ihnimi Iehova koi angeic. (Is. 48:17, 18) Maine tro angeic a hnimi Iehova, tro hë angeic a nue trengecatr troa saze.—1 Ioane 5:3.

9. Thenge la Mareko 10:29, 30, nemene la ka troa xatuane la ketre atr troa nuetrije la itre xaa ewekë matre xomi bapataiso?

⁹ Qëmekene troa xomi bapataiso, hetre nyine troa pane kuca hnene la ka ini tus. Tune lo atr ka trenamo, loi e tro angeic a nuetrije la itre xaa ewekë. Maine jë, tro angeic a saze huliwa, e tha ka ihmeku kö memine la Tusi Hmitrötr. Ketre, itre xan a trotrije la itre sinee i angatr ka tha hnimi Iehova kö. Ame pena itre xan, itre sinee i angatr a icilekeu memine la itre hlue i Iehova. Atre hi Iesu laka, tha ka hmaloi kö troa nue la itre ewekë cili. Ngo hnei nyidrëti hna thingehnaeane laka, tro kö Iehova a amanathithi angatr me hamë angatr la ketre fami ka tru ihnimin. (E jë la Mareko 10:29, 30.) Tro sa xatuane tune kaa la ka ini tus troa kapa la ahnahna cili?

10. Nemene la hna ini së hnene la hna melën hnei Manuel?

¹⁰ Troa nyisinee i angeic. Nyipiewekë tro sa amamane kowe la ka ini tus laka, easa wangatrunyi angeic. Pine nemen? Öni Manuel, ketre trejin qa Mexique: “Qëmekene troa ini tus, hnene la trejin hna hnyingë pengöne la meleng. Tha xounge hë troa ithanata ke, öhne hi ni laka, nyidrëti a wangatrunyi ni.”

11. Nemene la thangane kowe la ka ini tus e tro sa xomi ijine koi angeic?

¹¹ Hnei Iesu hna xomi ijine kowe la itretre drei nyidrë. (Ioane 3:22) Ketre tune fe, loi e tro sa xomi ijine kowe la ka ini tus. Maine jë, tro sa hë angeic troa iji tri maine ce xen, maine troa goeëne pena la JW Télédiffusion. Ketre, tro sa hë angeic ngöne la itre ijine feet ke, itre ijine lai angeice caas. Öni Kazibwe, ka mel e Ouganda: “Hnenge hna kepe ini qa ngöne la ini tusing, ngo qa ngöne fe la hna ce tro  memine la trejin ka ini tusi me eni. Hnenge hna öhne la etrune la ihnimi Iehova kowe la itre hlue i Nyidrë, memine la madrine i angatr. Eni a hane pi tui angatr.”

12. Pine nemene matre nyipiewekë tro sa hëne la itre xaa trejin troa sine la ini tus?

¹² Troa hëne la itre xaa trejin troa sine la ini tus. Maine jë, easa mekun laka, ka loi e troa tro caas maine ce tro palahi memine la ketre trejin troa ini tus. Nyipici laka, hetre eloine troa kuca tun. Ngo tro fe a hetre eloine kowe la ka ini tus e tro sa ce traqa memine la itre xaa trejin. Öni Dmitrii, ka mel e Moldavie: “Ame la itre trejin ka sine lo ini tusing ke, isa aqane qeje mekune i angatre kö. Celë hi ka xatua ni troa trotrohnine hnyawa la ini. Ketre, tha xounge kö troa sine la itre icasikeu ke, hetre trejine hë hnenge hna atre.”

13. Pine nemene matre loi e tro sa xatuane la ka ini tus troa sine la itre icasikeu?

¹³ Troa xatua angeic troa sine la itre icasikeu. Pine nemen? Pine laka, celë hi hna amekötin hnei Iehova, nge ketre aqane tro sa atrunyi Nyidrë. (Heb. 10:24, 25) Ketre, easa cememine la fami së ngöne la götrane u. Ame la easa icasikeu, kösë easë hi lai a ce xen memine la itre trejin. Matre, ame la easa xatuane la ka ini tus troa sine la itre icasikeu, easë hi lai a xatua angeic troa xomi bapataiso. Nyipici, tha ka hmaloi kö. Nemene la aqane tro la itus, Vivez pour toujours ! a xatua angeic?

14. Tro sa ithuecatre tune kaa kowe la ka ini tus troa sine la itre icasikeu?

¹⁴ Jëne la ini 10 ne la itus, Vivez pour toujours !, ijije hi tro sa ithuecatre kowe la ka ini tus troa sine la itre icasikeu. Qëmekene troa fejane la itus, hna sipone kowe la itre xaa trejin troa inine la ini cili. Nyimutre la itre thangane hnei angatr hna kapa. Eje hi, tha tro kö a treqene troa traqa kowe la ini 10 matre troa könëne la ka ini tus kowe la itre icasikeu. Loi e troa canga hë angeic. Ngo isapengöne kö la itre jol ka traqa kowe la itre ka ini tus. Celë hi matre loi e tro sa pane meku angeic memine la aqane tro sa xatua angeic. Tha tro kö sa kucakuca e tha sine palakö angeic la itre icasikeu. Loi e tro pe sa xomihni aqeany.

15. Nemene la jol ka traqa kowe la itre ka ini tus?

¹⁵ Hapeu, hnei epuni kö hna xou troa nyihlue i Iehova ngöne la xötrei? Maine jë, jole koi epuni troa cainöje trootro. Nge epuni a xou troa qanangazo epuni hnene la itre fami me itre sinee i epun. Maine eje hi, canga trotrohnine hi epuni la hna melën hnene la ka ini tusi. Atre fe hi Iesu laka, troa traqa la jole cili. Celë hi matre, hnei nyidrëti hna ithuecatr kowe la itretre dreng ka hape, tha tro kö a nue la jole cili troa sewe angatr troa nyihlue i Iehova. (Mat. 10:16, 17, 27, 28) Tune kaa la aqane xatua angatr hnei Iesu? Nge tro sa nyitipu nyidrë tune kaa?

16. Tune kaa la aqane tro sa amamane kowe la ka ini tus la aqane troa cainöj?

¹⁶ Troa amamai angeic la aqane troa cainöj. Ame lo Iesu a upe la itretre dreng troa cainöj, hnei angatr hna xou. Ngo hnei Iesu hna amamane koi angatr la nyine troa qaja, memine la itre atr ne angatr hna troa cainöje kow. (Mat. 10:5-7) Tro sa nyitipu Iesu tune kaa? Loi e tro sa amamane kowe la ka ini tus la itre atr nyine tro angeic a cainöje kow. Maine jë,  hetre atr hnei angeic hna mekun troa xatuane jëne la Tusi Hmitrötr. Loi e tro sa xatua angeic troa hnëkëne la nyine troa qaja. Ame ngöne la itus, Vivez pour toujours !, hetrenyi la itre götrane hna hape, “On entend parfois” me “On pourrait vous demander.” Jëne la lue götrane cili, ijije hi troa kuca la itre iamacany, matre xatua angeic troa sa la itre hnying jëne la Tusi Hmitrötr.

17. Nemene la aqane tro sa xatuane la ka ini tus troa mejiune koi Iehova, jëne Mataio 10:19, 20, 29-31?

¹⁷ Troa xatua angeic troa mejiune koi Iehova. Hnei Iesu hna amamane kowe la itretre dreng laka, tro Iehova a xatua angatr ke, tru la ihnimi Nyidrëti koi angatr. (E jë la Mataio 10:19, 20, 29-31.) Loi e tro sa amamane kowe la ka ini tus laka, tro kö Iehova a xatua angeic. Tro fe sa ce thithi me angeic matre xatua angeic troa mejiune koi Iehova. Öni Franciszek, ka mel e Pologne: “Hnene la trejin ka ini tusi me eni hna ce thithi me eni me qaja la itre ewekë hnenge hna ajane troa eatrën. Ame la eni a öhne la Iehova a sa la itre thithi angeic, eni ha nyiqaane catre thith. Nge hnei Iehova hna xatua ni ngöne la eni a sipo drai ne mano, matre troa sine la asabele me itre icasikeu.”

18. Nemene la aqane goeëne Iehova la itre trengecatre hne së hna kuca matre troa xatuane la itre ka ini tus?

¹⁸ Tru la ihnimi Iehova kowe la itre ka ini Tusi Hmitrötr. Ketre, öhne hi Nyidrëti la itre hne së hna kuca matre troa xatua angatr troa easenyi koi Nyidrë. Nge sisitria koi Nyidrëti la itre trengecatre hne së hna kuca. (Is. 52:7) Ngacama pë palakö ka ini tusi me easë, ngo ijije hi tro sa sine la ini tusi ne la itre xan, me xatua angatr troa kökötr me xomi bapataiso.