1. Nemene la hnei Iehova hna kuca koi së?

 HNEI Iehova hna ee së koi Nyidrë. (Ioane 6:44) Pane mekune jë laka, hnei Iehova hna goeëne la itre miliar lao atr e cailo fen, nge hnei Nyidrëti hna öhne la hni epun laka, ka troa hnimi Nyidrëti elany. (1 A. l. ite jo. 28:9) Eje hi, atrepengö së hnyawa hi hnei Iehova. Ketre, Nyidrëti a trotrohni së me hnimi së. Drei la ketre manathith ka tru!

2. Nemene la ceitune hna qaja hnei Iesu ka amamane laka Iehova a wangatrune la itre mamoe i Nyidrë?

² Iehova a hnimi së memine la itre trejin. Celë hi matre, hnei Iesu hna aceitunë Iehova memine la atre thupë mamoe. Maine jë, 100 lao mamoe ne la atre thupë mamoe, ngo paatre pi hi la ketre. Nemene la hnei angeic hna troa kuca? Tro angeic a “nue lai ala 99 ngöne la wetr, matre thele la ka paatr.” Ame hë la angeic a öhne la neköi mamoe, tha angeice kö a elëhni. Kolo pe a elitrauje la madrine i angeic! Nemene la ini? Ka sisitria catre koi Iehova la itre mamoe i Nyidrë. Öni Iesu: “Tha aja i Kakati kö e hnengödrai troa paatre la ketre ka co celë.”—Mat. 18:12-14.

3. Nemene la hne së hna troa ce wang?

³ Nyipici laka, tha ajane kö së troa akötrëne la itre trejin. Haawe, nemene la nyine tro sa kuca matre tha tro kö sa athixötrë angatr? Nge tune kaa e kola akötrë së hnei ketre? Tro la tane mekun celë a sa la lue hnying. Ngo tro sa pane ce wang ka hape, drei la itre “ka tune la nekönatr” hna qaja ngöne Mataio 18.

4. Drei la itre “ka tune la nekönatr”?

⁴ Ame la itre “ka tune la nekönatr” hna qaja hnei Iesu ke, kolo itretre drei nyidrë. Ngacama ka co maine ka tru angatr, ngo ceitu i angatr memine “la nekönatr” ke, angatr a ajane troa kepe ini qaathei Iesu. (Mat. 18:3) Nyipici, isa nöje i angatre kö me aqane mel me mekun. Ngo angatr asë hi a lapaune koi Iesu. Nge ame Iesu, tru la ihnimi nyidrëti koi angatr.—Mat. 18:6; Ioane 1:12.

5. Nemene la aqane ujë i Iehova ngöne la kola akötrëne la ketre hlue i Nyidrë?

⁵ Ame koi Iehova, sisitria asë hi la itre “nekönatr” cili. Tune kaa la aqane goeëne së la itre nekönatr? Easa hnimi nyudren. Nge easa ajane troa thupë nyudren ke, pëkö trengecatr me hna atrein hnei nyudren. Nyipici laka, tha ajane kö së troa goeëne la kola akötr hnene la ketre atr. Nge ame la kola akötrëne la ketre nekönatr, easa elëhni. Ketre tui Iehova, Nyidrëti a ajane troa thupë së. Nge Nyidrëti a elëhni ngöne la kola akötrëne la itre hlue i Nyidrë!—Is. 63:9; Mar. 9:42.

6. Thenge la 1 Korinito 1:26-29, nemene la aqane goeëne la itretre drei Iesu hnene la fene celë?

⁶ Pine nemene matre kola aceitunëne la itretre drei Iesu memine la itre “nekönatr”? Ame ngöne la fene celë, kola wangatrune la itre ka trenamo, ka hlemu me ka trene mus. Nge kola wangacone la itretre drei Iesu, kösë tha nyipiewekë kö angatr. Hna aceitunë angatr me itre “nekönatr.” (E jë la 1 Korinito 1:26-29.) Ngo tha celë kö lai mekuna i Iehova.

7. Nemene la aja i Iehova koi së isa ala caas?

⁷ Iehova a hnime la itre hlue i Nyidrë, itre ka xötrei me itre ka hekö hë ngöne la nyipici. Sisitria asë hi la itre trejin koi Iehova. Celë hi matre, loi e tro fe sa wangatrunyi angatr. Tha easë kö a hnime hi la itre xan, ngo easa ‘hnim la lapa ne la itre trejin asë.’ (1 Pet. 2:17) Eje hi, loi e tro sa nyihnyawane la mele i angatr. Maine easa akötrëne la ketre trejin, tha tro kö sa wangahmalohmaloeëne la hne së hna kuca me hape, loi e tro angeic a inine troa nue la ngazo itre xan. Hnauëne laka, canga dreng akötrëne hi angatr la hna kuca? Maine jë, angatr a sipu wangaconyi angatre kö pine la nöje i angatr, me aqane mele i angatr ekö. Ame itre xan, angatr a xötrei atre la nyipici, matre thatreine palakö angatr troa xomihni itre xan. Ame pe, loi e tro palahi sa thele tingeting. Maine easa canga dreng akötrëne la hna kuca, loi e tro sa saze. E cili, tro ha lolo la mele së me mele ne la itre xane fe.

8. Nemene la aqane mekune thene la angetre Iudra ka ajojezine la itretre drei Iesu ekö?

⁸ Hnauëne la Iesu a qaja la itre “nekönatr”? Pine laka hnene la itretre dreng hna hnying ka hape: “Drei la ka tru ngöne la Baselaia ne hnengödrai?” (Mat. 18:1) Ame ekö, nyipiewekë tro la angetre Iudra a cilëne la itre göhnë ka tru. Önine la ketre ka inamacan: “Ame la ka sisitria kowe la itre atr ekö, tre, troa hlemu e cailo fen me cilëne la hnëqa ka tru, nge tro fe a metrötrë angatr hnei itre xan.”

9. Nemene la nyine troa kuca hnene la itretre drei Iesu?

⁹ Atre hi Iesu la pengöne la angetre Iudra. Ame koi angatr, ka sisitria catre kö angatr hune la itre xan. Pine laka, hna hetrune la itretre drei nyidrë ngöne la itre hna majemin me aqane mel ne la  angetre Iudra, matre nyidrëti a ajane tro angatr a xometrije qa kuhu hni angatr la thiina cili. Öni nyidrë: “Loi e tro la ka draië thei nyipunie a co, nge tro la atre weje meken a hlu.” (Luka 22:26) Haawe, maine easa ajane troa tune la ka “co,” loi e tro sa ‘mekun laka, sisitria catre kö itre xan hui easë.’ (Fil. 2:3) E cili, tha tro hë sa athixötrëne la itre xan.

10. Nemene la eamo ka lolo hna hamën hnei Paulo?

¹⁰ Maine tro sa goeëne la itre thiina ka lolo ne la itre trejin, tro hë sa öhne laka, hetre hnei angatr hna atreine kuca, nge hne së hna thatrein. Öni Paulo aposetolo koi angetre Korinito: “Drei la ka aisa pengönë eö me ketre? Nemene la hnei eö hna hetreny nge tha hna hamë eö? Haawe, maine hna hamë eö, hnauëne la eö a sipu selë eö kösë tha hnei eö hna kapa?” (1 Kor. 4:7) Eje hi, tha ajane kö së troa pi mama me qaja ka hape, sisitria catre kö së hui itre xan. Maine hetre ketre trejin trahmanyi ka atreine cile fë cainöj maine ketre trejine föe pena ka ini tus koi nyimu atr, loi e tro palahi nyidroti a olene me atrunyi Iehova.

11. Nemene la ini hne së hna xom qa ngöne la ceitune i Iesu?

¹¹ Thupene la hnei Iesu hna hmekëne la itretre drei nyidrë göne la troa athixötrë itre xan, hnei nyidrëti hna qaja tulu ne la ketre hlu ka pë hni ne utipin. Hnene la joxu hna seng me nue la gufa ne la hlue ke, thatreine kö angeic të lai gufa. Ngo hnene la hlue cili hna akalabusine la ketre hlu ka xomi gufa thei angeic, ngacama tha tru kö lai gufa hune lo gufa i angeic thene la joxu. E cili, hnene la joxu hna akalabusi angeic. Nemene la ini? Öni Iesu: “Tro fe a hane kuca tune koi nyipunie hnei Kaka e hnengödrai, e tha nue kö nyipunie qaa kuhu hni la ngazo ne la ketre trejin.”—Mat. 18:21-35.

12. Nemene la thangan e tha nue kö së la ngazo hna kuca koi së?

¹² Hnene la aqane ujë ne la hlue ka pë hni ne utipin, hna hetre ethan koi angeic me koi itre xane fe. Hnei angeic hna akötrëne lo ketre hlu me ‘kuië angeic ngöne kalabus uti hë la troa të asë la gufa.’ Ketre, hnei angeic hna athixötrëne la itre ka goeë angeic. Öni Tusi Hmitrötr: “Öhne ju hi lai hnene lo itre xa hlu, nge hace ju hi la itre hni angatr.” Ketre tu së fe, hetre thangane koi itre xan la aqane ujë së. Maine xele kö së troa iloi me nue la ngazo hna kuca hnene la ketre atr, tro hë angeic a akötr. Ketre, tro fe hë sa athixötrëne la itre xaa trejin ka öhn.

13. Nemene la ini hne së hna xom qa ngöne la hna melën hnei Crystal?

¹³ Maine tro sa nue la ngazo hna kuca koi së, tro lai a hetre thangane ka loi koi së me koi itre xan. Celë hi ka traqa koi Crystal, ketre pionie. Hnene la ketre trejin hna akötrë angeic. Öni Crystal: “Hnei angeic palahi hna qaja la itre trengewekë ka akötr, matre kösë angeic a thinyi ni hnei hele. Ame lo eahuni a cainöj, xele ni troa ce ti loto me angeic. Pëhë madrin me ajang troa cainöj.” Maine ju, ijije hi tro Crystal a elëhni kowe lai trejin. Ngo tha hnei angeice kö hna elëhni me thele troa të la ngazo. Hnei angeice pe hna hetre hni ne ipië me trongëne la itre eamo hna qaja ngöne la Ita Ne Thup ne 15 Okotropa 1999 qene Wiwi, hna hape, “Pardonnez de tout votre cœur.” Hnei  angeic hna nue la ngazo ne lai trejin. Öni Crystal: “Trotrohnine hë ni laka, easë asë hi a thele troa hetrëne la itre thiina ka hnyipixe. Ketre, Iehova a nue la itre ngazo së o drai. E cili, kösë eni a una la ketre ehnef, matre madrin hmaca ha ni.”

14. (a) Thenge la Mataio 18:21, 22, nemene la jol ka traqa koi Peteru aposetolo? (b) Nemene la nyine tro sa kuca e jole koi së troa nue la ngazo i ketre?

¹⁴ Atre hi së laka, nyipiewekë troa nue la ngazo itre xan. Ngo ame pe, tha ka hmaloi kö e itre xaa ijin. Celë hi lai ka traqa koi Peteru aposetolo. (E jë la Mataio 18:21, 22.) Nemene la ka troa xatua së? Ame la hnapan, loi e tro sa mekun la itre ngazo së hna nue hnei Iehova. (Mat. 18:32, 33) Ngacama tru catre la itre ngazo së ngo hnei Iehova hna nue asë itre ej. (Sal. 103:8-10) Maine celë hi lai hna kuca hnei Iehova, haawe “qa së fe troa ihnimikeu.” Hnëqa së troa nue la ngazo ne la itre trejin. (1 Ioane 4:11) Ame la hnaaluen, loi e tro sa lapa mekun la itre eloin e tro sa nue la ngazo itre xan, tune la troa kuca la loi, me thele tingeting me caas e hnine la ekalesia. Ketre, easa acatrene la aqane imelekeu së me Iehova, me unatrije la ketre ehnefe ka tru. (2 Kor. 2:7; Kol. 3:14) Nge ame la hnaakönin, loi e tro sa thith koi Iehova, lo Atre upi së troa inualoinekeun. Tha tro kö sa nue Satana troa thë la aqane imelekeu së memine la itre trejin. (Efe. 4:26, 27) Haawe, catre jë së sipo ixatua koi Iehova, matre tha tro kö a tra thethi së hnei Satana.

15. Thenge la Kolose 3:13, nemene la nyine tro sa kuca e kola akötrë së hnene la ketre trejin?

¹⁵ Nemene la nyine tro sa kuca e kola athixötrë së me akötrë së hnene la aqane ujë ne la ketre trejin? Loi e tro palahi sa  thele tingeting. Loi e tro sa fe la aliene hni së koi Iehova, me sipo Nyidrë troa amanathithine lai trejin. Ketre, tro fe sa sipo Iehova matre xatua së troa öhne la itre thiina ka lolo thene lai trejin. (Luka 6:28) Maine thatreine kö së thëthëhmine la ngazo hna kuca, loi e tro sa pane mekun la aqane troa ce ithanata me angeic. Nge tro fe sa mekun laka, tha hnei angeice kö hna thë troa akötrë së. (Mat. 5:23, 24; 1 Kor. 13:7) Ame hë la easa ce ithanata, loi e troa nue angeic troa pane qeje mekun. Ngo tune kaa e tha aja i angeice kö troa iloi? ‘Tha tro kö sa mano troa xomihni’ angeic. Eje hi, loi e tro sa xomihni aqeany. (E jë la Kolose 3:13.) Maine tro palahi sa lapa fë trengehni, tro ha thë la aqane imelekeu së me Iehova. Haawe, tha tro pi kö sa nue la ketre atr maine ewekë troa athixötrë së. E cili, tro hë sa amamane laka, ka sisitria kö Iehova hune la itre xaa ewekë.—Sal. 119:165.

16. Nemene la hnëqa së isa ala caas?

¹⁶ Tru la madrine së ke, easa nyihlue i Iehova ngöne la hna “ca axö mamoe” fene la musi ne la “ca atre thup”! (Ioane 10:16) Önine la itus, Organizasio Ka Kuca La Aja i Iehova, ngöne la götrane 153, ka hape: “Hnene laka, hetre eloin hnei epun hna kapa qa ngön, haawe, qa i epun troa thele matre tro palahi a hetrenyi la cas hnine la lapa cili.” Nyipiewekë tro sa “goeëne la itre trejine tune la aqane goeë angatre hnei Iehova.” Eje hi, itre “nekönatr” së ka sisitria catre koi Iehova. Hapeu, celë kö lai aqane goeëne së la itre trejin? Öhne hi Iehova la easa thele troa xatua angatr nge Nyidrëti a madrin.—Mat. 10:42.

17. Nemene la nyine tro sa isine troa kuca?

¹⁷ Atraqatr la ihnimi së kowe la itre trejin. Celë hi matre, easa ‘isine matre tha tro kö sa amë la ketre ewekë ka troa akeinyi angatr.’ (Rom. 14:13) Loi e tro palahi sa amamane kowe la itre trejin laka, ka sisitria kö angatr hui easë. Loi e tro fe sa nue la itre ngazo i angatr. Ketre, tha tro pi kö sa nue la ketre atr maine ewekë troa athixötrë së. Ngo loi e tro pe sa “thele la itre ewekë ne tingeting, me itre ewekë nyine thuecatrene la itre xan.”—Rom. 14:19.