“Lolo catr la thiina ne la itre trejin,” öni Lisa. * Celë hi lai ka uku angeic troa ini Tusi Hmitrötr. Tui Anne fe, öni angeic: “Hetrenyi la itre trenge nyipici, ngo ame la ka ketri ni catre ke, ene la ihnimi ne la itre trejin.” Ame la saze pi Lisa me Anne ke, hnene la thiina ka lolo ne la itre trejin. Matre ame hë enehila ke, lue ka pi e me lapa mekune catre nyidro la Tusi Hmitrötr. Ketre, lue Temoë Iehova fe hë nyidro.

Nemene la aqane tro sa amamane la itre thiina ka loi, nge ka troa ketr la itre atr? Tro sa pane ce wange la lue aqane: jëne la thineme së, me thiina së. E thupen, tro sa ce wang ka hape, tro sa thiina ka loi koi drei.

Kola qaja ngöne la tusi Ite edomë 31, la föe loi thiina. Nge ej “ngöne la sesepeneqe i [eahlo] la wathebo ne ihnim.” (Ed 31:26). Jëne la “wathebo ne ihnim,” atreine hi eahlo tuluthe la aqane ewekë i eahlo. Hetrenyi fe la “wathebo” cili thene la itre kem. Atre hnyawa hi la itre keme me thine laka, e catre palaha la aqane ithanata i angatr, ke tro lai a hetre thangane ka ngazo kowe la itre nekönatr. Eje hi, ame e cili ke canga tro hi la itre nekönatr a elëhni. Ngo maine tro pe la itre keme me thin a ithanata amenyiken, canga tro hi la itre nekönatr a hmalahnine troa drei angatr.

Nemene la aqane tro sa musinëne la thineme së? Ame la hnapan, ke ej e ngöne la pane götrane la tusi Ite edomë 31:26 MN, kola hape: “Eahlo a ewekë thenge la inamacan.” Kolo lai a hape, troa iëne hnyawa la itre nyine troa qaja, me aqane troa qaja. Nge isa hnyinge jë ka hape: ‘Tro kö la itre hnenge hna troa qaja, a aelëhnine la itre atr, maine apujene pena la elëhni angatr?’ (Ite edomë. 15:1) Celë hi matre, qëmekene tro sa ithanata, loi e tro palahi sa pane lapa mekune hnyawa la itre nyine tro sa qaja, me aqane tro sa qaja.

Önine la ketre edromë: “Hetre [trengewekë] kösë hna thine hnei taua.” (Ite edomë. 12:18) Maine tro sa pane lapa mekune hnyawa la thangane la itre trengewekë së, tro hë së e cili a atreine tuluthe la itre hne së hna troa qaja, me aqane tro sa qaja. Matre, e tro sa trongëne la “wathebo ne ihnim,” tha tro kö lai a catr la nine ithanata së, nge tha tro kö sa qaja la itre treng ka akötr. Ngo tro pe sa qaja la itre trengewekë ka keukawa me menyik. (Efe. 4:31, 32) Iehova hi la tulu koi së ngöne la götrane celë. Ame lo Elia a xou, hnei Iehova hna akeukawanyi angeic. Nge hnene la ketre angela ka nyi trengewekë i Nyidrë, hna ‘ithanata hmidra hnene la nine ithanata ka menyik.’ (1 Ite jo. 19:12 MN) Eje hi, ame la loi thiina ke, tha ene hmekuje kö la tro sa qaja la itre trengewekë ka menyik me ka keukawa. Tro fe lai a mama qa ngöne la aqane ujë së. Kola hapeu lai?

Tui Iehova, nyipiewekë tro sa thiina ka loi, jëne la aqane ithanata së, me aqane ujë së. (Efe. 4:32; 5:1, 2) Hnei Lisa, lo trejine hna qaja e caha hun hna qaja aloine  la itre Temoë. Öni eahlo: “Ame lo kola troa fek hnene la fami hun, hnene la lue trejin ne la ekalesia hna xomi congé matre troa pane xatua eahun. Ame ngöne la ijine cili, tha ka ini Tus palakö ni!” Matre jëne la thiina ka loi ne la lue trejin, Lisa ha pi atre la hna qaja hnei Tusi Hmitrötr.

Ketre ceitu me Anne, lo trejine hna qaja e caha hun. Hna ketri eahlo fe hnene la thiina ka loi ne la itre Temoë. Öni eahlo: “Eni a xou la eni a goeëne la aqane ujë ne la itre atr. Ketre, tha ka mejiune fe kö ni kowe la ketre atr hnenge hna thatre.” Öni eahlo hmaca: “Ame la eni a nyiqaane porotrike memine la itre Temoë, tha nyipi mejiune kö ni koi angatr. Eni a pane hnying ka hape, ‘A hnauëne la angatr a pi ithanata me eni?’ Nge hna ketri ni catr hnene la thiina ka lolo ne la ka hamë ini koi ni. Nge eni fe hë a hane mejiune koi angeic.” Nemene hë la thangan? “E thupen, eni fe a hane trongëne la itre hnenge hna inin.”

Easa öhne e celë laka, hna ketri Lisa me Anne hnene la aqane ujë ne la itre Temoë Iehova. Nge hnei nyidro hna ini Tusi Hmitrötr. Ketre, jëne fe la thiina ka loi ne la itre  atrene la ekalesia, nyidroti fe hë a hane amamane la thiina cili.

Ame koi itre xan ke, sine trongene kö la aqane mele i angatr la troa hnyimahnyima, me ithanata amenyiken. Ketre aqane mele lai ka lolo catr. Ame pe, tha celë kö lai la ka nyipiewekë. Ame la ka nyipiewekë catr ke, ene la loi thiina qaathei Akötresie.—Wange ju fe la Itre Huliwa 28:2.

Ame la loi thiina ke, ej a xulu qa ngöne la uati hmitrötre i Iehova. Celë hi matre, loi e tro palahi sa sipone la ixatua ne la uati hmitrötr. (Gal. 5:22, 23) Eje hi, Iehova me Iesu la lue tulu koi së. Nge pine laka, itre keresiano së, haawe, loi e tro mina fe sa loi thiina koi itre xan. Matre ame hi lai ka upi së troa ujë tun, ke hnene la ihnimi së koi Iehova, me ihnimi së koi itre xan. E tro sa catre amamane la thiina cili, tro hë sa amadrinë Iehova Akötresie.

Canga saqe hi së loi thiina kowe la itre ka loi thiina koi së, me itre hne së hna majemi kow. (2 Sam. 2:6) Nge ame hi la ketre aqane tro sa loi thiina, ke tro sa olen. (Kol. 3:15) Nge tune kaa, tro kö sa loi thiina kowe la itre atr hne së hna thatre?

Pane mekune jë: Ngacama pë ju hë hna kuca koi Iehova hnene la itre atr, ngo Iehova palahi a thiina ka loi koi angatr. Tulu hi lai koi së! Ame e hnine la Trengewekë i Nyidrë, Nyidrëti a amamai së la aqane tro sa hane loi thiina koi itre xan. Anyimua mama ngöne la itre hna cinyihane qene Geres la hnaewekë, “ihnimi gufa.” Hnei Iehova hna loi thiina tune kaa koi së?

Pane mekune jë la itre milio lao atr hnei Iehova hna hnim. E nöjei drai, Nyidrëti a hamë angatr la ka nyipiewekë kowe la mele i angatr. Nge qëmekene tro la itre atr a atre Iehova, ase palakö Nyidrëti hnimi angatr. (Mat. 5:45) Ame hi lai ketre ke, ene la nekö hnimina i Nyidrë hnei Nyidrëti hna nu, matre troa meci pi së. (Efe. 2:4, 5, 8) Ketre öni Paulo, hna itö mele së pine laka, “atraqatre la ihnimi gufa i Akötresie.” (Efe. 1:7) Nge kuca ju hë së la ketre ngazo ka tru, tro palahi Iehova a eatrongë së me ini së. Ame la itre hnei Nyidrëti hna amekötin me itre trengewekë i Nyidrë, ke ceitu hnyawa hi memine la “hnemuhnem hune la haö.” (Deu. 32:2) Matre thatreine kö tro sa lapa hi tune la, me tha olene koi Nyidrë. Eje hi, maine pë ju ihnimi gufa, ketre pëkö mele ka pë pun.—Wange ju fe la 1 Peteru 1:13.

Kola ketri së hnene la ihnimi gufa i Iehova, nge easa pi tui Nyidrë. Celë hi lai ka upi së matre tha tro kö sa ië hna hnim. Nge easë pe a tui Iehova, ngöne la easa thiina ka loi koi itre xan, ngöne la nöjei götrane la mele së. (1 Thes. 5:15) E tro palahi sa thiina ka loi, ceitu i easë memine la ketre eë ka keukawa e ijine hnötr. Easa akeukawane la itre atrene la fami së, itre trejine me easë, itre sine huliwa së, itre sine ini easë, me itre ka lapa ezi së.

Pane mekune jë la thangane la hnei epuni hna akeukawane la itre atrene la fami epun, me ekalesia i epun, jëne la aqane ithanata i epun, me thiina i epun. Maine jë, hetre trejine ngöne la ekalesia i epun ka ajane troa nyidrawane la uma i angeic, maine thelë i angeic, maine komisio i angeic pena. Ketre, maine epuni a öhne la ketre atr ngöne la hna cainöj ka aja ixatua, xatua angeice jë.

Haawe, catre pi së nyitipu Iehova! Nge epi tro la itre trengewekë së me thiina së, a ihmeku memine la “wathebo ne ihnim.”