1. Nemene la hnei Solomona joxu hna qaja ngöne Ate Cainöj 7:20?

 ÖNI Solomona joxu: “Pëkö ate ka meköti e celë fen, ate kuca la loi nge pë fe kö ngazo.” (Ate cai. 7:20) Nge trenge nyipici hi lai! Itre atr ka tria asë hi së. (1 Ioane 1:8) Matre nyipiewekë tro Iehova a nue la itre ngazo së, nge tro fe sa qeje menu kowe la itre xan.

2. Tune kaa epun la kola kapa la menu i epun hnene la ketre sinee?

² Maine mekune palahi epun la epuni a akötrëne la ketre sinee i epun. Aja i epun troa iloi hmaca me angeic, matre hnei epun hna qeje menu. Tune kaa ha epun la angeic a kapa la menu i epun? Tingetinge ju hi la hni epun me madrin!

3. Nemene la itre hnying hne së hna troa ce wang ngöne la tane mekun celë?

³ Aja i easë troa nyisinee i Iehova, ngo ame itre xaa ijin, easa kuca maine qaja la itre ewekë ka troa akötrë Nyidrë. Ngo pine nemene matre xecie koi së laka, aja i Iehova troa nue la itre ngazo së? Pine nemene matre isapengöne kö la aqane nue Iehova la itre ngazo së, memine la aqane nue së la ngazo ne la itre xan? Nge ngazo i drei la hnei Iehova hna troa seng?

4. Pine nemene matre xecie koi së laka, aja i Iehova troa nue la itre ngazo së?

⁴ Kola amamane hnei Tusi Hmitrötr ka hape, aja i  Iehova troa nue la itre ngazo së. Ame lo Iehova a mama koi Mose ngöne la Wetre Sinai, öni Nyidrë jëne la ketre angela ka hape: “Iehova, Iehova Akötresie ka utipin nge ka itrotrohni, nge ka hmitre troa elëhni, nge ka tru trenge ihnimi nyipici, me nyipici. Nyidrëti a amamane la ihnimi nyipici i nyidrë kowe la itre thauzan, me nue la itre ngazo, me itre tria me itre ngazo ka tru.” (Eso. 34:6, 7) Akötresie ka utipine Iehova, nge aja i Nyidrëti palahi troa nue la ngazo ne la itre ka ietra.—Neh. 9:17; Sal. 86:15.

5. Thenge la Salamo 103:13, 14, nemene la ka upi Iehova troa utipi së?

⁵ Atrepengö së hnyawa hi hnei Iehova, ke, Nyidrëti la ka xupi së. Atre hnyawa hi Nyidrë la itre atr ka mel e celë fen. (Sal. 139:15-17) Nge atre fe hi Nyidrë laka, hne së hna kapa la ngazo qaathene la pane keme me thine së. Ketre, atre hnyawa hi Nyidrë la nyipi pengö së qa ngöne la itre hne së hna melën. Pine laka, atre hnyawa hi Iehova la pengö së, nemene la hnei Nyidrëti hna kuca? Nyidrëti a utipi së.—Sal. 78:39; e jë la Salamo 103:13, 14.

6. Hnei Iehova hna amamane tune kaa laka, aja i Nyidrë troa seng la itre ngazo së?

⁶ Hnei Iehova hna amamane ka hape, aja i Nyidrë troa nue la itre ngazo së. Trotrohnine hi Nyidrë laka, hnene la hna tha idrei hnene la pane atr, Adramu, matre ngazo me mec la pun koi easë asë. (Rom. 5:12) Nge pëkö ala cas ka atreine thepe së qa ngöne la ngazo me mec. (Sal. 49:7-9) Ngo, hnene la Akötresie së ka tru ihnimin hna utipi së me thepe së qa ngöne la hnëjine cili. Nemene la hnei Nyidrë hna kuca? Kola qaja ngöne Ioane 3:16 ka hape, hnei Iehova hna up la nekö hnimina i Nyidrë ka cas troa meci pi easë. (Mat. 20:28; Rom. 5:19) Hnei Iesu hna akötr me mec matre amelene la itre atr ka lapaune koi nyidrë. (Heb. 2:9) Pane mekune jë la akötre i Iehova la Nyidrëti a öhne la kola axösisin me humuth la nekö hnimina i Nyidrë! Haawe, maine tha ajane ju Iehova troa seng la itre ngazo së, ke tha tro kö Nyidrëti lai a nue la nekö i Nyidrë troa mec.

7. Drei la hnei Iehova hna nue ngazon e hnine la Tusi Hmitrötr?

⁷ Nyimutre la itre atr e hnine la Tusi  Hmitrötr hnei Iehova hna nue la ngazon. (Efe. 4:32) Hetre atre kö hnei epuni hna mekun? Maine jë epuni a meku Manase joxu. Hnei angeic hna kuca la itre ewekë ka ngazo qëmekei Iehova. Hnei angeic hna acile hmaca la hmi ka thoi. Hnei angeic hna humuth la itre sipu nekö i angeic matre huujëne kowe la itre haze. Göi acili fe angeic la ketre hnasaatr e hnine la uma ne hmi Iehova. Ketre, öni Tusi Hmitrötr: “Atraqate la ngazo hnei nyidëti hna kuca xajawa i Iehova mate aelëhni anganyidë.” (2 A. l. ite jo. 33:2-7) Ngo ame la Manase a ietra, hnei Iehova hna nue la ngazo i angeic me acili angeice hmaca troa joxu. (2 A. l. ite jo. 33:12, 13) Maine epuni fe a meku Dravita joxu. Hnei angeic hna kuca la lue ngazo ka tru qëmekei Iehova, ene la nyixetë me ihumuth. Ngo ame hë la Dravita a ietra me atrehmekune la ngazo i angeic, hnei Iehova hna nue la ngazo i angeic. (2 Sam. 12:9, 10, 13, 14) Haawe, xecie koi së laka, aja i Iehova troa nue la itre ngazo së. Nge tune la hne së hna troa ce wang, sisitria kö la aqane nue Iehova la itre ngazo hui easë itre atr.

8. Pine nemene matre Iehova hmekuje hi la ka ijij troa amekötine la itre atr?

⁸ Iehova “la Atre Iameköti e cailo fen.” (Gen. 18:25) Ame la atre iameköti, ke ka atre hnyawa la itre wathebo. Tui Iehova hi ke, Nyidrë la Atre Iameköti me Atre Acili Wathebo. (Is. 33:22) Pëkö atr ka tui Iehova, ka atrehmekune hnyawa la loi me ngazo. Nemene la itre xaa ewekë hna atreine kuca hnene la atre iameköti? Loi e tro angeic a atre hnyawa la itre ewekë ka traqa qëmekene troa amekötine la ketre atr. Nge ame ngöne la götrane cili, ke Iehova hmekuje hi la ka ijij troa amekötin.

9. Nemene la itre ewekë hnei Iehova hna atre ka upi Nyidrë troa nue la itre ngazo së?

⁹ Tha ceitu Iehova kö memine la itre ka iameköti ngöne la itre hnaakootr, ke atre hnyawa hi Nyidrë la itre hna melën hnene la itre atr. (Gen. 18:20, 21; Sal. 90:8) Tha Nyidrëti kö a ameköti së thenge la hna dreng maine öhne hnene la itre xan. Trotrohnine hi Iehova ka hape, ame la aqane hetru së, memine la götran hne së hna mele ngön, memine la itre sine meci së ke, ka hetre thangan kowe la aqane ujë së. Ketre, atre hi Iehova la itre aliene hni së. Nge öhne hi Nyidrë la itre mekun me itre aja i easë isa ala cas. Pëkö ewekë hna juetrën qëmekei Nyidrë. (Heb. 4:13) Celë hi matre, hetre nyipi kepin la Iehova a nue la ngazo ne la itre atr.

10. Pine nemene matre ka meköti palahi la itre aqane axecië mekune i Iehova? (Deuteronomi 32:4)

¹⁰ Meköti palahi la aqane axecië mekune i Iehova. Tha ka iwangatrehmekunyi atre kö Nyidrë. Nge tha Nyidrëti kö a goeëne la atr thenge la pengöi angeic, me manie i angeic, me götrane qa i angeic, memine la hnei angeic hna atreine kuca. (1 Sam. 16:7; Iako. 2:1-4) Pëkö ka atreine musinë Nyidrë me nyithupei Nyidrë. (2 A. l. ite jo. 19:7) Ketre, tha Nyidrëti kö a axecië mekun cememine la elëhni. (Eso. 34:7) Haawe, Iehova hi la atre iameköti ka sisitria, ke atre hnyawa hi Nyidrë la pengö së memine la hne së hna melën.—E jë la Deuteronomi 32:4.

11. Pine nemene matre ka sisitria catre kö la aqane nue Iehova la itre ngazo së?

¹¹ Önine la itre ka cinyanyine la Tusi  Hmitrötr qene Heberu ka hape, ka sisitria catre kö la aqane nue Iehova la ngazo. Ame ngöne la itre xaa götran ne la Tusi Hmitrötr, hna huliwane la ketre hnëewekë qene Heberu göne la aqane nue Iehova la itre ngazo së. Önine la ketre itus, “hna huliwan hmekuje hi la hnëewekë cili koi Akötresie, ngo tha koi itre atre kö.” Iehova hmekuje hi la ka atreine nue hnyawane la ngazo ne la atr ka ietra. Nemene la thangane la Iehova a nue la ngazo së?

12-13. (a) Tune kaa easë la Iehova a nue la itre ngazo i easë? (b) Tro kö Iehova a nue paluane la itre ngazo së?

¹² Ame la Iehova a nue la itre ngazo së, easa kapa “la itre ijine iakeukawanyi,” nge kola tingeting la mekuna së me mekuthetheu së. Thatreine kö la itre atr nue la ngazo tune lai, ngo Iehova hmekuje hi. (Itre hu. 3:19) Ame la Iehova a nue la ngazo së, Nyidrëti hmaca a nyisinee së, nge kösë pëkö ngazo hne së hna kuca.

¹³ Ame hë la Iehova a nue la ngazo së, ke tha Nyidrëti hmaca kö a amexeje maine upezö së pine la ngazo cili. (Is. 43:25; Iere. 31:34) Iehova a ananyine “la ngazo shë tune la enanyine kohië me kuë.” * (Sal. 103:12) Ame la easa lapa mekun la aqane nue Iehova la itre ngazo së, ke tru la ole me xoue së. (Sal. 130:4) Ngo hetre kepin matre Iehova a nue la itre ngazo së.

14. Nemene hë la hne së hna ce wang göne la aqane nue Iehova la itre ngazo së?

¹⁴ Tune la hne së hna ce wang, tha Iehova kö a nue la itre ngazo së thenge la etrun la ngazo hne së hna kuca. Hne së mina fe hna ce wang laka, Iehova la Atre Xup, me Atre Acili Wathebo me Atre Iameköti. Nge Nyidrëti a huliwan la itre hnei Nyidrë hna atre, matre troa nue la itre ngazo së. Nemene la itre kepin ka upi Iehova troa nue la itre ngazo së?

15. Thenge la Luka 12:47, 48, nemene la ketre kepin ka upi Iehova troa nue la itre ngazo së?

¹⁵ Qëmekene tro Iehova a nue la ngazo ne la ketre atr, Nyidrëti a pane wang ka  hape, atre kö lai atr laka, ka ngazo la hnei angeic hna kuca. Celë hi hnei Iesu hna qaja ngöne Luka 12:47, 48. (E jë.) Ketre ngazo ka tru la troa kuca la ketre ewekë ka ngazo, nge atre hnyawa hi së laka, tro lai a akötrë Iehova. Ma tha tro kö Iehova lai a nue la ngazo i angeic. (Mar. 3:29; Ioane 9:41) Nyipici laka, ame itre xaa ijin, easa kuca atre la ngazo. Ngo hapeu, tro kö Iehova e cili a nue la itre ngazo së? Ö! Hetre ketre kepine mina fe ka upi Nyidrë troa nue la itre ngazo së.

16. Kola hapeu la troa ietra, nge pine nemene matre ka nyipiewekë troa nyipi ietra?

¹⁶ Ame la ketre kepin ka uku Iehova troa nue la ngazo, ke loi e tro la atr a nyipi ietra. Kola hapeu la troa ietra? Ame la atr ka ietra, ke “angeic a saze la aqane mekun me aqane ujë i angeic.” Angeic fe a hace pine la itre ewekë ka ngazo hnei angeic hna kuca memine la itre ewekë ka loi hnei angeic hna tha kuca. Angeic a akötr pine laka, ngazo catr la itre huliwa hnei angeic hna kuca, nge nanyi hë angeic qaathei Iehova. Tru catr la ngazo hna kuca hnei Manase me Dravita, ngo hnei Iehova hna nue la ngazo i nyidro, ke, hnei nyidro hna nyipi ietra. (1 Ite jo. 14:8) Tro Iehova a nue la itre ngazo së, e öhne hi Nyidrë ka hape, easa nyipi ietra. Tha tro hmekuje hi angeic a akötr pine la ngazo hnei angeic hna kuca. Ngo loi e tro fe angeic a saze la aqane ujë i angeic. * Celë hi ketre kepin ka upi Iehova troa nue la itre ngazo së.

17. Kola hapeu la troa ujë? Nge pine nemene matre ka nyipiewekë tro sa ujë? (Isaia 55:7)

¹⁷ Ame la ketre kepin matre Iehova a nue la itre ngazo së, ke loi e tro sa ujë. Ame la atr ka ujë, ke angeic a saze la itre thiina i angeic. Angeic a nuetrij la itre aqane ujë i angeic ka ngazo, me xötrëne la jë i Iehova. (E jë la Isaia 55:7.) Loi e tro angeic a xome la aqane waiewekë i Iehova. (Rom. 12:2; Efe. 4:23) Ketre, loi e tro fe angeic a isine troa nuetrij la aqane mekun me aqane ujë i angeic ka ngazo. (Kol. 3:7-10) Ngo ame la ka nyipiewekë  catr matre tro Iehova a nue la itre ngazo së, ke ene la troa lapaune kowe la mel hna huujën hnei Keriso. Tro sa kepe thangan qa ngöne la huuje i Iesu, e tro sa nue trengecatr troa saze la aqane ujë së.—1 Ioane 1:7.

18. Nemene la itre mekun ka tru hne së hna ce wang ngöne la tane mekun celë?

¹⁸ Tro sa amexeje la itre mekun ka tru hne së hna ce wang. Iehova casi hi la ka atreine nue hnyawane la itre ngazo së. Pine nemene matre qaja jë së tune lai? Ame la hnapan, ke aja i Nyidrë troa nue la itre ngazo së. Ame la hnaaluen, ke atre së hnyawa hi hnei Nyidrë. Atre hnyawa hi Nyidrë la pengö së, nge Nyidrë hmekuje hi la ka atre laka, ka nyipi ietra kö la atr. Nge ame la hnaakönin, ke ame la Iehova a nue la itre ngazo së, Nyidrëti a nu apexejen. Tro hë Iehova lai a kepe së hmaca, nge tro ha lolo la mekuthetheu së.

19. Ngacama itre atr ka ngazo së, ngo hnauën la easë palahi a madrin?

¹⁹ Pine laka itre atr ka tha pexeje kö së, tro palahi së lai a tria. Ngo kola thuecatre së hnene la hna qaja ngöne la itus Étude perspicace, Volume 2, götrane 765, ka hape: “Trotrohnine hi Iehova laka, itre atr ka tha pexeje kö së, nge ka ngazo. Matre tha tro kö sa hace fë la itre tria së. (Sal. 103:8-14; 130:3) Maine tro sa isine troa xötrëne la itre jë i Iehova, ke tro hë sa madrin. (Fil. 4:4-6; 1 Ioane 3:19-22).” Hapeu, tha ketre mekune kö lai ka ithuecatr?

20. Nemene la itre hnying hne së hna troa ce wang ngöne la tane mekun e thupen?

²⁰ Easa olene koi Iehova ke, Nyidrë a nue la itre ngazo së ngöne la easa nyipi ietra. Tune kaa fe la aqane tro sa nyitipu Iehova? Nemene la ka ceitu ngöne la aqane nue së la ngazo me aqane nue Iehova la itre ngazo së? Nge nemene la eisapengönen? Pine nemene matre nyipiewekë tro sa atre lai? Tro pë hë la tane mekun e thupen a sa la itre hnyinge cili.