TANE MEKUN 23
NYIMA 28 Thele Jë Troa Enehmu i Iehova
Iehova a Hë Së Ngöne La Itate i Nyidrë
“Troa eje thei angate la uma manong, nge tro ni a Akötesi angat.”—EZEK. 37:27.
MEKUN KA TRU
Tro la tane mekune celë a acatrene la hni ne ole së koi Iehova, Atre hë së kowe la itate i Nyidrë me Atre thupë së.
1-2. Nemene la manathith hnei Iehova hna hamëne kowe la itre hlue i Nyidrë?
MAINE tro ketre a hnyingë eö ka hape, drei Iehova koi eö? Tro eö a sa tune kaa? Tro eö lai a sa ka hape, ‘Iehova la Kemeng, me Akötresing, me Sineeng.’ Nge tro fe eö lai a qaja la itre xaa aqane hë Nyidrë. Ngo hapeu, eö kö a hane goeë Nyidrë tune la ketre Atr ka hë eö kowe la hnalapa i angeic?
2 Hnei Dravita joxu hna aceitunë Iehova memine la atr ka ikep ngöne la hnalapa i angeic, nge itre hlue i Nyidrë memine la itre hna hën. Öni Dravita: “Iehova fe, drei la hna troa hën kowe la itate i nyipë? Drei la ka troa mel hune la wetre i nyipë ka hmitrötr?” (Sal. 15:1) Easa trotrohnine e celë laka, ijije hi tro Iehova a hane hë së ngöne la itate i Nyidrë. Kolo hi lai a hape, troa nyisinee i Nyidrë. Drei la ketre manathith ka tru!
IEHOVA A HË SË NGÖNE LA ITATE I NYIDRË
3. Drei la hnei Iehova hna pane kapa ngöne la itate i Nyidrë? Nge tune kaa la aqane imelekeu i Iehova me Iesu?
3 Iehova a mele cas qëmekene troa xupe la itre ewekë. Ngo e thupen, hnei Nyidrëti hna xupi Iesu, lo pane nekö i Nyidrë. Madrine catre Iehova troa kepe Iesu ngöne la itate i Nyidrë. Tusi Hmitrötr a qaja ka hape, “tru la ihnimi” Iehova koi Iesu. Nge Iesu a “madrin qëmekei” Iehova e nöjei drai.—It. Ed. 8:30.
4. Drei la itre xan hnei Iehova hna hën kowe la itate i Nyidrë?
4 E thupen hnei Iehova hna xupe la itre xaa angela, me hë angatr kowe la itate i Nyidrë. Tusi Hmitrötr a hë angatr ka hape, “itre nekö i Akötresie,” nge eje fe a qaja ka hape, tru la madrine i angatr troa ce mel me Iehova. (Iobu 38:7; Dan. 7:10) Ame lo xötrei, itre sinee i Iehova asë hi e hnengödrai, lo götran hnë lapa i Nyidrë. Ngo thupen la Nyidrëti a xup la itre atr, hnei Nyidrëti hna atrune la itate i Nyidrë matre kepe angatr e kuhu hnin. Ame la itre xaa atr hna hën, ke Enoka, me Noa, me Aberahama, me Iobu. Tusi Hmitrötr a qeje angatr ka hape, itre sinee i Iehova, ke angatr a “ce tro memine la nyipi Akötresie.”—Gen. 5:24; 6:9; Iobu 29:4; Isa. 41:8.
5. Nemene la hne së hna inin qa ngön la hna perofetane ngöne Ezekiela 37:26, 27?
5 Qan ekö, hnei Iehova palahi hna hën la itre sinee i Nyidrë kowe la itate i Nyidrë. (E jë la Ezekiela 37:26, 27.) Kola amamane hnene la hna perofetane hnei Ezekiela laka, aja i Iehova troa catr la imelekeu i Nyidrë memine la itre hlue i Nyidrë. Eje fe a qaja ka hape, tro Nyidrëti a “kuca me angate la isisinyikeu ne tingeting.” Troa eatr la hna perofetane celë ngöne la ijine kola acasine la itre hlue i Iehova ka troa mele e hnengödrai me itre hlue i Nyidrë ka troa mele palua e celë fen, ngöne la “ca hna axö mamoe.” (Ioa. 10:16) Haawe, easa trotrohnine ka hape, kola eatr la hna perofetane celë ngöne la hneijine i easë!
IEHOVA A THUPË SË NGÖNE LA NÖJEI GÖTRAN
6. Nemene la nyine tro sa kuca matre troa hane lö kowe la itate i Iehova? Hna acile ekaa la itate i Nyidrë?
6 Ame ngöne la Tusi Hmitrötr, itre atr a lapa fene itat matre troa mano, maine thele gaa xeut la kola ngazo drai. Maine troa hën la ketre atr kowe la itat, atre hi angeice ka hape, tro lai a kepe angeic hnyawa. Ame la easa nue mel koi Iehova, kösë Iehova hi lai a kepe së ngöne la itat i Nyidrë. (Sal. 61:4) Ame ngöne la itate i Nyidrë, kola mana la xen, nge easë fe a madrin troa ce lapa memine la itre xaa sinee i Nyidrë. Ngo ame la itat cili, ke tha hna acile kö ngöne la ca götran. Maine hnei eö hna hane sine la ketre asabele ka ketrepengön ngöne la ketre nöj, nga hnei eö hna iöhnyi memine la itre xaa hlue i Iehova, itre ka lapa fe ngöne la itate i Nyidrë. Ngacama lapa ju hë së ngöne la ketre götran gaa nany, ngo easë ngöne la itate i Nyidrë, la easa nyihlue i Iehova.—Hna Am. 21:3.
7. Pine nemene matre easa qaja ka hape, ame la itre hlue i Iehova ka mec ke angatr palahi ngöne la itate i Nyidrë? (Wange ju fe la iatr.)
7 Nge tune kaa kowe la itre hlue i Iehova ka mec? Angatre palakö ngöne la itate i Nyidrë? Öö! Hnauëne la easa qaja lai? Ke ka mel palahi angatr ngöne la mekuna i Nyidrë. Öni Iesu: “Hnei Mose fe lo hna hane qeje mele hmaca kowe la itre ka mec, ngöne lo angeic a hë Iehova qëmekene la sinöe ka ithinyi ka hape, ‘Akötresi Aberahama, me Akötresi Isaaka, me Akötresi Iakobo.’ Haawe, tha nyidrëti kö la Akötresi ne la itre ka mec, ngo itre ka mele pe. Ke ame koi nyidrë, itre ka mel asë hi angatr.”—Luka 20:37, 38.
Eje hi, ame la itre hlue i Iehova ka mec, ke angatr palahi ngöne la itate i Nyidrë (Wange ju la paragarafe 7)
HETRE ELOINE NGO HETRE HNËQA SË FE
8. Nemene la itre eloine la troa lapa ngöne la itate i Iehova?
8 Ame la itat, ke hnë mano me hnë zae la kola ngazo drai. Ceitune hi lai memine la itate i Iehova, ej a thupë së qa ngöne la itre ewekë ka troa angazone la imelekeu së me Nyidrë, me itre ewekë ka troa akötrë së. Maine tro sa catre easeny Iehova, thatreine kö Satana troa akötrë së palua. (Sal. 31:23; 1 Ioa. 3:8) Ame ngöne la fen ka hnyipixe, tro palahi Iehova a thupën la itre sinee i Nyidrë, qa ngöne la itre ewekë ka troa angazone la imelekeu së me Nyidrë, göi pë fe hë emenene la mec.—Hna Am. 21:4.
9. Nemene la nyine tro sa kuca matre lapa ngöne la itate i Iehova?
9 Ketre manathith ka tru la troa lapa ngöne la itate i Iehova, ene la troa imelekeu me Nyidrë utihë epine palua. Nemene la nyine tro sa kuca matre tro palahi sa lapa ngöne la itate i Iehova? Ame la ketre atr a hë epun kowe la hnalapa i angeic, tro epuni lai a dreng la hnei angeic hna qaja. E upi epuni jë hnei angeic troa uni butr qëmeken troa lö, tro epuni lai a dreng. Ketre tun, loi e tro mina fe sa atre la hnei Iehova hna ajan kowe la itre ka lö kowe la itate i Nyidrë. Tro la ihnimi së koi Nyidrë a uku së troa kuca la hne së hna atrein, matre “amadrinë nyidrë.” (Kol. 1:10) Nyipici laka, Iehova la sinee së, ngo Nyidrëti fe la Akötresie me Keme së, matre nyipiewekë tro sa metrötrë Nyidrë. (Sal. 25:14) Haawe, tha tro pi kö sa wangacone la götrane cili, me catre metrötrë Nyidrë. Tro lai a sewe së troa kuca la itre huliwa hnei Nyidrëti hna xele ma wang. Haawe, tru la aja së troa ‘ce tro’ me Akötresie.—Mika 6:8.
THA ASE KÖ IEHOVA IË HNA HNIM EKÖ
10-11. Hnei Iehova hna amamane tune kaa kowe la angetre Isaraela ngöne la hnapapa e Sinai laka, tha ka ië hna hnim kö Nyidrë?
10 Iehova a hnim ceitu la itre ka lapa ngöne la itate i Nyidrë. (Roma 2:11) Tro sa ce wang la aqane ujë i Iehova kowe la angetre Isaraela ekö, ngöne la hnapapa e Sinai. Tro sa öhn e cili laka, tha ka ië hna hnim kö Nyidrë.
11 Thupene la Iehova a thapa la angetre Isaraela qa Aigupito, hnei Nyidrë hna acil la itre xan e angatr troa hane atre huuj matre nyihlue i Nyidrë ngöne la uma mano. Ketre, hnei Nyidrë hna hamën la itre xaa huliwa ngöne la uma mano kowe la itre nekö i Levi. Hapeu, Iehova kö a hnim catrën la itre ka huliwa me ka lapa easenyine la uma mano, hune la itre xaa atre Isaraela? Waea! Tha ka ië hna hnime kö la Akötresi së.
12. Nemene la ka amamane ka hape, Iehova a hnim ceitu la itre atrene la nöje Isaraela? (Esodro 40:38) (Wange ju fe la iatr.)
12 Ame ngöne la hnapapa, ijiji angatr asë hi troa hetre imelekeu me Iehova, ngacama pëkö hnëqa i angatr, nge ka nanyi la itate i angatr qa ngöne la uma mano. Hnei Iehova hna kuca matre tro la nöj asë a öhne qa ngöne la isa göhnë i angatr, la iaw ka cile meköt, memine la eë ka ej hune la uma mano. (E jë la Esodro 40:38.) Ame la kola nyiqane ehnij la iaw, öhne asë hi la angetre Isaraela, ngacama angatr e gaa nany. Ame e cili, angatr a sa trengetreng, me tha la itre itat, me ce mejë memine la nöj. (Num. 9:15-23) Angatr asë hi a treqene la mej ne la lue trutru sileva, matre troa nyiqane tro. (Num. 10:2) Haawe, kolo hi lai a amamane ka hape, tha hnene kö laka, ketre atr Isaraela a lapa ezine la uma mano, matre ka catre kö la imelekeu i angeic me Iehova hune la ka lapa gaa nany. Haawe, ijije hi tro la angetre Isaraela asë a nyisinee i Iehova, matre tro Nyidrëti a eatrongë angatr me thupë angatr. Ketre tune mina fe enehila, ngacama mele ju hë së e gaa nany, ngo Iehova a thupë së me hnimi së.
Pine laka, uma mano nyipine la nöje Isaraela, kola mama ka hape, tha ka ië hna hnim kö Iehova (Wange ju la paragarafe 12)
ENEHILA PALAHI THA KA IË HNA HNIME KÖ IEHOVA
13. Nemene la ka amamane ka hape, tha ka ië hna hnim kö Iehova kowe la itre hlue i Nyidrë enehila?
13 Ame la itre xaa trejin enehila, angatr a lapa easenyine la hnalapa ne xomi meköt ne la itre Temoë Iehova, maine ezine la ketre Bethela. Ame la itre xan, angatr a lapa ngöne la Bethela. Matre angatr a hane sine la itre huliwa ne la organizasio, me iatre hnyawa memine la itre trejin ka hetre hnëqa ka tru. Ame la itre xan, angatr a thupë sirkoskripsio, maine xom la itre xaa huliwa i Iehova drai ka pexej. Maine tha epuni kö a huliwa i Iehova drai ka pexej, ngo loi e troa xecie koi epun laka, ame Iehova, lo Atre hë së kowe la itate i Nyidrë, ke Nyidrëti a hnimi së asë, me thupë së isa ala cas. (1 Pet. 5:7) Iehova a hamë xen koi së asë, matre acatrene la imelekeu së me Nyidrë. Nyidrëti fe a eatrongë së me thupë së.
14. Nemene la ketre aqane amamane Iehova laka, tha ka ië hna hnim kö Nyidrë?
14 Hane hi la ketre ewekë ka amamane ka hape, tha ka ië hna hnim kö Iehova: Nyidrëti a ajane tro la nöjei atr a e la Tusi Hmitrötr. Hna cinyanyine ekö la Tusi Hmitrötr ngöne la köni qene hlapa: la qene Heberu, me qene Arama, me qene Geres. Hapeu la itre ka atreine e la itre qene hlapa cili, ka catre kö la imelekeu i angatr me Iehova hune la itre xan? Waea, tha eje kö.—Mat. 11:25.
15. Qaja jë la ketre aqane amamane Iehova laka, tha ka ië hna hnim kö Nyidrë. (Wange ju fe la iatr.)
15 Tha Iehova kö a nyisineene hmekuje hi la itre atr ka ini aqeany, maine ka atre la qene Heberu, me qene Arama, me qene Geres. Nge tha Nyidrëti kö a hamëne la inacamane i Nyidrë kowe la itre ka inamacan hmekuje hi, Nyidrëti fe a hamën kowe la nöjei atr. Hna ujëne la Trengewekë i Nyidrë ngöne la itre thauzane lao qene hlapa. Matre mele ju hë së ngöne la ketre nöj, ngo ijiji easë asë hi troa kepe thangane qa ngöne la itre ini Nyidrë, me hane nyisinee i Nyidrë.—2 Tim. 3:16, 17.
Nöjei atr a e Tusi Hmitrötr, matre tha ka ië hna hnim kö Iehova (Wange ju la paragarafe 15)
CATRE JË AMADRINË IEHOVA
16. Thenge la hna qaja ngöne Itre Huliwa 10:34, 35, nemene la nyine tro sa kuca matre tro palahi Iehova a kepe së ngöne la itate i Nyidrë?
16 Pëkö manathith ka tru hune la troa lö kowe la itate i Iehova. Nyidrë la Atre kepe së hnyawa, me hnimi së. Ketre, tha ka ië hna hnim kö Nyidrë. Nyidrëti a kapa la nöjei atr, ngacama isa nöje i angatre kö, isa qenenöj, isa hane ngönetrei, isa tribu, isa macatre, trahmanyi me föe, ka ini aqeanyi maine tha ka ini aqeanyi kö. Ngo ame pe, tro hi a lapa ngöne la itate i Nyidrë la itre ka metrötrëne la itre trepene meköt i Nyidrë.—E jë la Itre Huliwa 10:34, 35.
17. Ekaa la tro sa öhne la itre ithuemacanyi ka troa xatua së tro palahi a lapa ngöne la itate i Iehova?
17 Ame ngöne Salamo 15:1, Dravita a hnying ka hape: “Iehova fe, drei la hna troa hën kowe la itate i nyipë? Drei la ka troa mel hune la wetre i nyipë ka hmitrötr?” Ame ngöne la itre xötr e thupen, hnei Iehova hna sa jëne Dravita. Ame ngöne la tane mekun e thupen, tro sa ce wang la itre xaa nyine tro sa kuca matre tro Iehova a kepe së.
NYIMA 32 Ië Iehova Jë Së!
