1. Nemene la itre eloin la troa ce wang la Salamo 15:​1-5?

 AME ngöne la tane mekun hnapan, hne së hna ce wang laka, ame la itre ka lapa ngöne la itate i Iehova, ke kolo itre atr ka nue mel koi Nyidrë me catre imelekeu me Nyidrë. Ngo nemene la nyine tro sa kuca, matre tro palahi sa lapa ngöne la itate i Nyidrë? Salamo 15 a qaja la nyine tro sa kuca. (E jë la Salamo 15:​1-5.) Ej a qaja la itre eamo ka troa xatua së troa easenyi catr koi Iehova.

2. Dravita jë a qeje nemen lo angeic a qaja la itate i Iehova?

² Kola nyiqane la Salamo 15 ka hape: “Iehova fe, drei la hna troa hën kowe la itate i nyipë? Drei la ka troa mel hune la wetre i nyipë ka hmitrötr?” (Sal. 15:1) Ame la Dravita a qaja la “itate” i Iehova, ma angeice jë a mekun lo uma mano, hna acil lo ijine cili e Gibeona. Ngo pine laka angeice fe a qaja “la wetre ka hmitrötr” i Akötresie, ma angeice jë a mekun lo itate hna acil hune la wetr e Ziona e Ierusalema. Hnei Dravita hna acil la itate cili ngöne la götrane kolopi ne Gibeona. Hna kuca ej matre hetre uman la pua ne isisinyikeu, treqene troa xup la ketre uma të.​—2 Sam. 6:​17.

3. Pine nemene matre loi e tro sa ce wang la Salamo 15? (Wange ju fe la iatr.)

³ Eje hi laka, tha angetre Isaraela asë kö la ka huliwa hnine la uma mano. Nge alaxalaithe hi la ka ijij troa lö kowe la itate hna amë la pua ne isisinyikeu. Ngo ame kö la itate i Iehova enehila, ke itre hlue i Nyidrëti asë la hna kapa e kuhu hnin. Nge ijij angatr troa hane nyisinee i Nyidrë. Celë hi aja i easë asë. Ame ngöne la Salamo 15, kola qaja la itre xaa thiina nyine tro sa huliwan, matre tro palahi sa nyisinee i Iehova.

 TROA MELE NYIPICI ME KUCA LA MEKÖT

4. Hapeu, Iehova kö a kepe së ke, ase hë së xomi bapataiso? (Isaia 48:1)

⁴ Salamo 15:2 a qaja la sinee i Akötresie ka hape, “atr ka mele nyipici, me ka kuca la meköt.” Ame lai hnëewekë hna hape, “mel” me “kuca,” kolo hi lai a hape, tro palahi a kuca. Ngo hapeu, ijiji së kö troa “mele nyipici”? Öö. Pëkö atr ka pexej, ngo ame koi Iehova, easa “mele nyipici” la easa isine troa drengethenge Nyidrë. Ame la easa nue mel me xomi bapataiso, easë hi lai a nyiqane ce tro me Nyidrë. Ame ngöne la Tusi Hmitrötr, tha angetre Isaraela asë kö la ka nyisinee i Iehova. Itre xan a thith koi Nyidrë, ngo “tha nyipici kö [angatr] me meköt.” (E jë la Isaia 48:1.) Loi e tro angatr a pane atre me trongën la hnei Iehova hna amekötin. Ketre tun mina fe enehila, maine easa ajan troa kepe së hnei Iehova, tha tro hmekuje kö së a xomi bapataiso me hane Temoë Iehova. Loi e tro palahi sa “kuca la meköt.” Kola hapeue lai?

5. Kola hapeu la troa drengethenge Iehova ngöne la nöjei götrane la mele së?

⁵ Ame koi Iehova, ame la atr “ka mele nyipici” me “ka kuca la meköt” ke, tha angeic hmekuje kö a tro troa icasikeu. (1 Sam. 15:22) Loi e tro sa isine troa drengethenge Akötresie ngöne la nöjei götrane la mele së, memine fe la easë cas. (It. Ed. 3:6; A. Cai. 12:​13, 14) Loi e tro mina fe sa drengethenge ngöne la itre ewekë ka co. Easë hi lai a amamane ka hape, ka tru Iehova koi easë, nge tro fe Nyidrëti lai a hnimi së.​—Ioa. 14:23; 1 Ioa. 5:3.

6. Thenge la Heberu 6:​10-​12, nemene la ka nyipiewekë catr hune la itre huliwa ka loi hne së hna kuca ekö?

⁶ Ka tru koi Iehova la itre ewekë hne së hna kuca koi Nyidrëti ekö. Ngo tha hnene kö laka, hne së hna kuca la itre  ewekë ka loi ekö, matre tro palahi sa lapa ngöne la itate i Iehova. Celë hi ka mama ngöne Heberu 6:​10-​12. (E jë.) Thatreine kö Iehova thëthëhmine la nöjei ewekë ka loi hne së hna kuca. Ngo aja i Nyidrëti pe tro sa catre nyihlue i Nyidrë qa kuhu hni “uti hë la pun.” Tro hë Nyidrëti lai a nyisinee së utihë epine palua, “e tha kucakuca kö së.”​—Gal. 6:9.

QAJA JË LA NYIPICI E KUHU HNI EÖ

7. Kola hapeu la troa qaja la nyipici e kuhu hni së?

⁷ Maine easa ajane troa kepe së hnei Iehova me nyisinee i Nyidrë, nyipiewekë tro sa “qaja la nyipici e kuhu hni” së. (Sal. 15:2) Kolo kö lai a qaja ka hape, tro hi a qaja la nyipici? Waea. Aja i Iehova tro fe sa nyipici ngöne la nöjei ewekë hne së hna qaja me kuca. (Heb. 13:18) Ka nyipiewekë catre lai, ‘ke sisi koi Iehova la itre atr ka mele thoi, ngo nyipi sinee i nyidrë la itre atr ka meköt.’​—It. Ed. 3:​32.

8. Nemene la thiina nyine tro sa thipetrij?

⁸ Ame la itre ka ‘qaja la nyipici e kuhu hni’ angatr, ke tha angatre kö a lue ialamek, ene la troa drengethenge Akötresie qëmekei itre xan, ngo ame la angatre cas, kola ena la itre wathebo. (Isa. 29:13) Tha angatre kö a ujë tune la itre atr ka mele thoi maine ka mele hnihni. Ame la atr ka mele hnihni, ke tro angeice lai a nyiqane mekune ka hape, tha ka inamacane kö la itre xaa wathebo i Iehova. (Iako. 1:​5-8) Tha xou i angeice kö troa ena la itre xaa wathebo, ke ame koi angeic tha ka nyipiewekë kö. Nge e pëkö thangane ka ngazo ka traqa koi angeic, tro angeice lai a ena la itre xaa wathebo ka tru me kuca la itre ewekë ka ngazo. Ame e cili, tha tro hë Iehova a kapa la hmi angeic. (A. Cai. 8:​11) Ngo ame easë, aja së troa nyipici ngöne la nöjei götran asë.

9. Nemene la ewekë ka traqa lo Iesu petre hi a öhnyi Nathaniela? Nge nemene la ini koi së? (Wange ju fe la iatr.)

⁹ Kola mama qa ngöne lo hnei Iesu hna qaja koi Nathaniela, la enyipiewekëne troa nyipici e kuhu hni. Hetre ewekë ka traqa lo Filipo a traqa sai Nathaniela koi Iesu.  Ngacama Iesu petre hi lai a hane öhnyi Nathaniela, öni nyidrë: “Hane petre hi la ketre atre Isaraela ka pë thoi ngön!” (Ioa. 1:​47) Itre ka nyipici asë hi la itretre drei Iesu, ngo ame palakö Nathaniela, ke ketrepengöne kö la aqane nyipici angeic. Tui easë, tha ka pexeje kö Nathaniela. Ame pe, tha ka lue ialameke kö angeic. Ketre ewekë lai hnei Iesu hna hain thei Nathaniela, nge hnei nyidrë hna qaja aloinyi angeic. Tro së lai a madrin e tro Iesu a hane qeje së tun!

10. Pine nemene matre loi e tro sa thupën la aqane huliwane së la thineme së? (Iakobo 1:​26)

¹⁰ Ame ngöne la Salamo 15, nyimutre catr la itre eamo ka qaja la aqane tro sa ujë koi itre xan. Ame ngöne la xötre 3, kola qaja ka hape, ame la atr hna hën kowe la itate i Iehova, ke “tha ka ixöjetrije kö memine la thineme i angeic, nge tha ka akötrëne kö la atre lapa ezi angeic, me qaja angazone la itre sinee i angeic.” Ame la ketre atr a huliwan angazone la thineme i angeic, ke angeice hi lai a akötrë itre xan, matre tro Iehova lai a helë angeic qa ngöne la itate i Nyidrë.​—E jë la Iakobo 1:​26.

11. Kola hapeu la troa ixöjetrij, nge nemene la pun koi angatr e tha ietra kö?

¹¹ Hnene la atre cinyihane la Salamo hna qaja hnyawane la ixöjetrij. Kola hapeu la troa ixöjetrij? Kola qaja la ketre atr ka silitrengathoi ketre, matre akötrë angeic, me adrone la ëje i angeic. Ame la itre atr ka ixöjetrij, nge tha ka ietra kö, ke troa upetröneë angatr qa ngöne la ekalesia.​—Iere. 17:10.

12-13. Eu la itre ijine tro sa qaja angazone la itre sinee së? (Wange ju fe la iatr.)

¹² Salamo 15:3 a qaja ka hape, ame la atr hna hën kowe la itate i Iehova, ke tha ka akötrëne kö la atr lapa ezi angeic, me qaja angazone la itre sinee i angeic. Matre nemene la nyine tro sa kuca?

¹³ Nyipici laka, tha aja i easë kö troa qaja  angazone la ketre atr. Ngo ame itre xaa ijin, easa qaja angazo ketre, la easa qaja la itre tria i angeic koi itre xan. Pane mekune jë laka, (1) tro la ketre trejin föe a nue la huliwa ne pionie, (2) tro la lue trefën a tro qa ngöne la Bethela, maine (3) troa alapane la ketre trejin trahmanyi ka qatre thup maine atre ixatua. Hapeu, ka loi kö tro sa pi atre la ifekë melen, me qaja menune koilo? Maine jë, hetre nyipi kepin matre saze pi la hnëqa i angatr, ngo thatre kö së. Ketre, the thëthëhmine kö laka, ame la atr hna hën kowe la itate i Iehova, ke “tha ka akötrëne kö la atre lapa ezi angeic, me qaja angazone la itre sinee i angeic.”

WANGATRUNE JË LA ITRE KA XOUE IEHOVA

14. Drei la “itre atr ka qali thiina” nyine tro sa ananyin?

¹⁴ Salamo 15:4 a qaja ka hape, ame la sinee i Iehova, ke “angeic a xele ma wang la nöjei atr ka qali thiina.” Tro sa atre tune kaa ka hape, ka qali thiina la ketre atr? Thatreine kö së öhne la atr ka qali thiina. Pine nemen? Pine laka, tha ka pexeje kö së, matre easa canga epe kowe la itre atr hne së hna hnim, me ananyine la itre atr ka hetre thiina hne së hna xele ma wang. Matre loi e tro pe sa ananyine la itre atr hnei Iehova hna qaja ka hape, itre “ka qali thiina.” (1 Kor. 5:​11) Kola qaja la itre atr ka kuca la ngazo, nge tha ka ietra kö, itre ka thaipiëne la hmi së, maine ka thel troa akeinyi së.​—It. Ed. 13:20.

15. Qaja jë la ketre aqane tro sa wangatrune la “itre ka xoue Iehova.”

¹⁵ Salamo 15:4 a upi easë fe troa wangatrune la ‘itre ka xou Iehova.’ Celë hi matre, easa thele jën troa amamane la ihnimi së me metrötre së kowe la itre sinee i Nyidrë. (Roma 12:10) Tune kaa? Ame ngöne la pune la xötr, kola qaja ka hape, easa kuca lai, la easa metrötrën la hna sisiny, “ngacama ka jole koi së.” Maine tha metrötrëne kö së la hna sisiny, tro së lai a akötrëne la itre xan. (Mat. 5:​37) Aja i Iehova tro la itre ka faipoipo ka lapa ngöne la itate i Nyidrë, a metrötrën la hnei angatr hna sisiny. Nge Iehova a madrin kowe la itre keme me thin ka isine troa eatrëne la hnei angatr hna sisinyi kowe la itre nekö i angatr. Tro la ihnimi së koi Akötresie me kowe la atr lapa easenyi së, a uku së troa eatrën palahi la hne së hna qaja.

16. Qaja jë la ketre aqane tro sa wangatrune la itre sinee i Iehova.

¹⁶ Ame la ketre aqane troa wangatrune la itre sinee i Iehova, ke ene la troa ikep me ham. (Roma 12:13) Ame la easa ce madrine memine la itre trejin, ke easë hi lai a acatrene la imelekeu së me angatr, memine la imelekeu së me Iehova. Ketre, ame la easë a ikep, easë hi lai a nyitipu Iehova.

THA TRO KÖ A HNIMI MANI

17. Hnauëne la kola qeje mani ngöne Salamo 15?

¹⁷ Kola qaja ngöne Salamo ka hape, ame la atr hna hëne ngöne la itate i Iehova, ke “tha angeice kö a hamë mani göi thupen, me kapa la mani hna hamën juetrën matre akötrëne la ka pë engazon.” (Sal. 15:5) Hnauëne la kola qeje mani ngöne la Salamo celë, nge tha tru pe hnei xötr? Pine laka, e tro sa wangatrune palaha la mani, tro lai a angazone la imelekeu së me itre xan, ngo memine fe la imelekeu së me Akötresie. (1 Tim. 6:​10) Ame ekö, tha ka loi kö la aqane ujë ne la itre xaa trejin. Angatr a hamë mani kowe la itre trejin ka pë ewekë, me upi angatr e thupen troa të la mani me  nyixane hmaca kö. Ketre, hnene la itre xaa atre iameköti hna kapa la mani hna hamëne juetrën, matre tran la itre ka pë engazon. Xele catre Iehova ma wang la itre aqane ujë cili.​—Ezek. 22:12.

18. Nemene la itre hnying ka troa xatua së troa waipengö së göi mani? (Heberu 13:5)

¹⁸ Nyipiewekë tro sa isa waipengöne la aqane goeëne së la mani. Isa hnyinge jë ka hape: ‘Hapeu, eni pala pe hi a meku mani, memine la nyine tro ni a itön? Maine hnenge hna sipo mani koi ketre, eni kö a hmitr troa të koi angeic, ke ame koi ni tha bezoë kö angeic? Maine eni la ketre ka trene mani, eni kö a mekun ka hape, sisitria kö ni hu itre xan? Ka xeni cipa kö ni? Hapeu, eni kö a mekun ka hape, ame la itre trejin ka trene mani, ke itre ka hnimi mani? Eni kö a thel tro nyisineene la itre trejin ka trene mani, me xele ma wange la itre ka pë mani?’ Hnei Iehova hna aijijë së troa hane lö kowe la itate i Nyidrë. Ngo thupëne kö, tha tro kö a hnimi mani, wanga tro Iehova a nuetriji së!​—E jë la Heberu 13:5.

IEHOVA A HNIM LA ITRE SINEE I NYIDRË

19. Hnauëne la Iehova a ajane tro sa trongëne la itre hna amekötin ngöne Salamo 15?

¹⁹ Kola nyipune la Salamo 15 ka hape: “Tha tro jë kö a enienijën la atre cili.” (Sal. 15:5) Easa öhn e celë la kepin matre, aja i Iehova tro sa trongëne la itre hnei Nyidrëti hna amekötin. Aja i Nyidrë tro sa madrin. Ame la itre hnei Nyidrëti hna amekötin, ke nyine loi koi së, nge itre ej a thupë së.​—Isa. 48:17.

20. Nemene la manathith ka tru hna troa kapa hnene la itre ka lapa ngöne la itate i Iehova?

²⁰ Hetre manathith ka lolo hna troa kapa hnene la itre hnei Iehova hna hëne kowe la itate i Nyidrë. Tro la itre hna iën ka mele nyipici, a kapa la “itre göhnë” i angatr hnei Iesu hna hnëkën e hnengödrai. (Ioa. 14:2) Nge ame pena la itre ka troa mele palua e celë fen, ke tro angatr a madrin troa öhne la aqane eatr la hna qaja ngöne Hna Amaman 21:3. Eje hi, manathith ka tru koi së asë la troa nyisinee i Iehova me hane lapa ngöne la itate i Nyidrë uti hë epine palua!