1. Nemene la ka xatuane la itre hlue i Iehova troa catre nyihlue i Nyidrë, ngacama tru la itre jol?

 TUSI HMITRÖTR a qaja la hneijine i easë ka hape, “itre ijin akötr hna thatreine xomihnin.” (2 Tim. 3:1) Tru catr la itre jol ka traqa ngöne la fen asë, ngo ame kö easë itre hlue i Iehova, ke easa cil kowe la icilekeu me iaxösisi. Nemene la ka xatua së troa catr nyihlue i Iehova? Hnene laka, atrepengöi Iehova hnyawa hi hne së, atre hi së ka hape, Nyidrëti la “Akötresie ka nyipici.”​—Iere. 10:10; 2 Tim. 1:​12.

2. Nemene la ka amamane ka hape, Akötresie ka mele Iehova?

² Akötresie ka mele Iehova, matre öhne hi Nyidrë la easa cil kowe la itre itupath, nge aja i Nyidrë troa xatua së. (2 Aq. Jo. 16:9; Sal. 23:4) Maine ka xecie koi së ka hape, ka mele Akötresie, tro lai a xatua së troa cil kowe la nöjei itupath. Tro sa ce wang la hna melën hnei Dravita Joxu.

3. Hnauëne la Dravita a qaja ka hape, “ka mele Iehova”?

³ Atrepengöi Iehova hnyawa hi hnei Dravita, nge angeic a mejiun koi Nyidrë. Ame lo kola wejehuzu angeic hnene la itre ithupëjia, tui Saulo joxu, hnei angeic hna sipo ixatua koi Iehova. (Sal. 18:6) Hnei Akötresie hna sa la thithi angeic, me amele angeic. Matre öni Dravita: “Ka mele Iehova!” (Sal. 18:46) Tha angeice kö a qaja e celë ka hape, hetre Akötresie. Önine la ketre itus ka hape, Dravita e celë a qaja la mejiune i angeic koi Iehova, “Akötresie ka mel, nge ka xatuane palahi la itre hlue i Nyidrë.” Eje hi, öhne hi Dravita ngöne la mele i angeic ka hape, ka mele Akötresie, nge celë hi ka acatrene la aja i angeic troa nyihlue i Nyidrë me atrunyi Nyidrë.​—Sal. 18:​28, 29, 49.

4. Maine ka mele Iehova koi së, nemene la hne së hna troa atreine kuca?

 ⁴ Maine ka xecie koi së ka hape, Akötresie ka mele Iehova, tro lai a uku së troa catre nyihlue i Nyidrë. Ketre, tro së lai a atreine cil kowe la itre itupath, me catre kuca la itre huliwa i Nyidrë, me isine troa lapa qale koi Nyidrë.

TRO LA AKÖTRESIE KA MEL A HAMË EÖ LA CATR

5. Pine nemene matre tha luelue kö së la easa cil kowe la ketre itupath? (Filipi 4:​13)

⁵ Maine tro palahi sa mekun ka hape, ka mele Iehova, nge aja i Nyidrë troa xatua së, tro së lai a atreine xomihnin la nöjei itupath ka co, maine ka tru pena. E ce easë me Iehova, ijiji easë troa elëhune la nöjei pengöne jol. Akötresie ka Tru Trenge Mene Nyidrë, matre ijiji Nyidrë troa hamë së la trengecatr matre xomihnine la itre jol. (E jë la Filipi 4:​13.) Haawe, tha tro pi kö së a luelu la easa cil kowe la ketre itupath. Ame la easa öhne ka hape, Iehova a xatua së ngöne la itre itupath ka co, kola xecie fe koi së ka hape, tro Nyidrëti fe a xatua së ngöne la itre itupath ka tru.

6. Nemene la lue ijin ka acatrene la mejiune i Dravita koi Iehova?

⁶ Tro sa ce wang la lue ewekë ka traqa koi Dravita, nge ka acatrene la mejiune i angeic koi Iehova. Ame lo jeune palakö angeic, hnene la liona hna thapa la ketre mamoe qa ngöne la hna axö mamoe i Iese qatr. Nge tune hmaca la ketre ijin hnene la bea. Ame ngöne la lue ijine cili, hnei angeic hna wejehuzune la liona me bea, me thapa hmaca la haneköi mamoe. Ngo tha hnei angeic kö hna sipu selën, ke atre hi angeic ka hape, Iehova la ka xatua angeic. (1 Sam. 17:​34-​37) Tha ase pi kö Dravita thëthëhmine la itre ijine cili. Hnei angeice pe hna mekune lapan, nge celë hi ka acatrene la mejiune i angeic laka, tro kö la Akötresie ka mel a xatua angeic hmaca elany.

7. Nemene la hnei Dravita hna canga mekun, matre atreine jë angeice cil koi Goliatha?

⁷ Ame e thupen, lo jeune palakö Dravita, hnei angeic hna tro troa wang la trongene isi Isaraela. Itre sooc a cile hnö qëmekene la ketre atre Filisiti, ketre matran atr, hna hën ka hape, Goliatha. Angeic a “hë isi kowe la itre sooc i angetre Isaraela.” (1 Sam. 17:​10, 11) Itre sooc a xou, ke angatr a goeëne la hmae i angeic, me aqane ithanata angeic. (1 Sam. 17:​24, 25) Ngo ame kö Dravita, tha angeice kö a nyipiewekëne lai. Ame koi angeic, tha Goliatha kö a thel isi memine la trongene isi Isaraela, ngo angeic pe a thele isi memine “la itre sooc ne la Akötresie ka mel.” (1 Sam. 17:26) Tru catre kö la hnei angeic hna meku Iehova. Ka xecie koi angeic ka hape, ame lo Akötresie ka xatua angeic ekö, lo angeic a thupë mamoe, ke tro kö Nyidrëti a amele angeice hmaca. Celë hi matre, hnei angeic hna cil koi Goliatha me ngaa angeic!​—1 Sam. 17:​45-​51.

8. Nemene la ka troa acatrene la mejiune i eö kowe la atreine i Iehova troa xatua eö ngöne la itupath? (Wange ju fe la iatr.)

⁸ Tro sa atreine cile kowe la itre itupath, e tha tro kö sa thëthëhmine ka hape, aja ne la Akötresie ka mel troa xatua së. (Sal. 118:6) Troa xecie koi së laka, tro Iehova a xatua së elany, e tro sa lapa mekun lo itre ewekë hnei Nyidrëti hna kuca ekö. E jë la itre hna melëne e hnine la Tusi Hmitrötr ka amamane la aqane xatuane Iehova la itre hlue i Nyidrëti ekö. (Isa. 37:​17, 33-​37) Wange ju fe la itre tane mekun me itre video ngöne jw.org ka amaman la aqane xatuane Nyidrë la itre trejin enehila. Nge, mekune hmaca jë lo itre ijine Iehova a xatua eö.  Maine ame koi eö, co hi la hnei Iehova hna kuca koi eö. Eje hi, tha ase kö Nyidrë amele eö qa ngöne bea me liona, ngo the luelue kö. Hnauëne la easa qaja lai? Ke tru catr la itre ewekë hnei Iehova hna kuca koi eö qane ekö! Ame la ketre, Nyidrëti la ka e eö koi Nyidrë. (Ioa. 6:​44) Nge, hnei Nyidrë matre eö palahi ngöne la nyipici. Sipo Nyidrëti jë troa amekunë eö la itre ijin Nyidrëti a sa la itre thithi eö, me xatua eö ngöne la nyipi ijin, me thupë eö ngöne la itupath. Tro lai a acatrene la mejiune i eö laka, tro palahi Iehova a xatua eö.

9. Tune kaa la aqane tro sa goeëne la itre itupath? (Itre Edromë 27:11)

⁹ E ka xecie koi së ka hape, ka mele Iehova, tro lai a saze la aqane goeëne së la itre itupath. Tune kaa? Ame la kola traqa la ketre itupath, ke ijine hi lai tro sa cilëgöli Iehova. Ame koi Diabolo, tro sa trotriji Iehova qëmekene la itupath. (Iobu 1:​10, 11; e jë la Itre Edromë 27:11.) Ngo ame la easa mele nyipici qëmekene la itupath, easë hi lai a amamane ka hape, tru kö la ihnimi së koi Iehova nge atre thoi lae Diabolo. Hapeu, eö kö a cile kowe la ketre itupath? Maine jë kola icilekeu hnei mus, maine pëhë mani eö, maine kola xele ma drenge la maca ka loi hnene la itre atr. Maine eje hi, the thëthëhmine kö laka, ijine hi lai tro eö a amadrinëne la hni Iehova. Ketre tha tro kö Nyidrëti a nue eö kowe la itupath hnei eö hna thatreine xomihnin. (1 Kor. 10:13) Tro kö Nyidrëti a hamë eö la trengecatr ka ijij.

TRO LA AKÖTRESIE KA MEL A NYITHUPENE KOI EÖ

10. Nemene la hna kuca hnene la Akötresie ka mel kowe la itre hlue i Nyidrë?

¹⁰ Iehova la Atre Nyithupen kowe la itre hlue i Nyidrë. (Heb. 11:6) Nyidrëti a xatua së enehila troa tingeting me melëne la hna hetreny, nge tro Nyidrëti a hamë së elany la mel ka pë pun. Loi e troa xecie koi së laka, aja i Nyidrë nge atreine hi Nyidrë nyithupene koi së. Celë hi ka uku së troa kuca la hne së hna atrein matre atrunyi Nyidrë,  tune la itre hlue i Nyidrëti ekö. Tro sa ce wange la tulu i Timoteo, ketre keresiano ekö.​—Heb. 6:​10-​12.

11. Nemene la ka uku Timoteo troa catre huliwa kowe la ekalesia? (1 Timoteo 4:​10)

¹¹ E jë la 1 Timoteo 4:​10. Ka catre la lapaune i Timoteo kowe la Akötresie ka nyithupen. Celë hi matre, hnei angeic hna catre huliwa koi Iehova me koi itre xan. Tune kaa? Hnei Paulo aposetolo hna ithuecatr koi angeic troa maca ngöne la aqane hamë ini, me cile fë cainöj. Hnei nyidrëti mina fe hna upi angeic troa amamai tulu kowe la itre trejin ka qatr me ka jeune. Nge tha ka hmaloi kö la itre xaa hnëqa i angeic. Eje hi, ame itre xaa ijin, loi e tro angeic a amekötine la itre xaa trejin cememine la ihnim. (1 Tim. 4:​11-​16; 2 Tim. 4:​1-5) Ngacama pëkö ka öhne la itre trengecatre i Timoteo, nge pëkö hni ne ole i itre xan koi angeic, ngo ka xecie koi Timoteo laka, tro kö Iehova a nyithupen koi angeic.​—Roma 2:​6, 7.

12. Pine nemene matre itre qatre thup a catre huliwa kowe la ekalesia? (Wange ju fe la iatr.)

¹² Ame enehila, loi e tro mina fe a xecie kowe la itre qatre thup laka, öhne hi Iehova la itre huliwa i angatr nge ka sisitria koi Nyidrë. Itre qatre thup a catre thupëne la ekalesia me hamë ini, me cainöj. Ame la itre xan, angatr a sine la itre huliwa ne xupi uma ne Baselaia, me itre huliwa ne hamë ixatua. Ame pena la itre xan, angatr a vizitëne la itre trejin ka wezipo e pital, me hane sine la CLH. Ame kowe la itre qatre thup cili, ke ewekë i Iehova la ekalesia, ngo tha ewekë i atre kö. Matre angatr a catre huliwa cememine la hni ka pexej, nge xecie koi angatr laka, tro kö Akötresieti a nyithupen koi angatr.​—Kol. 3:​23, 24.

13. Tune kaa la aqane goeëne Iehova la itre trengecatr hnei eö hna kuca koi Nyidrë?

¹³ Tha ijiji easë asë kö troa qatre thup. Ngo ijiji easë asë hi troa hamëne la ketre ewekë koi Iehova. Nge madrine catre Nyidrë la easa kuca la hne së hna atreine matre  nyihlue i Nyidrë. Öhne hi Nyidrëti la easa kuië ahnahna thatraqane la itre huliwa ne la Baselaia, ngacama tha tru kö la hne së hna hamën. Nge drei jë kö la madrine i Nyidrë la easa liim troa hamë mekun ngöne la itre ijine icasikeu nge tru pe la xou easë, me ngöne la easa nue la ngazo ne la itre ka akötrë së. Ngacama ame koi eö tha tru kö la hnei eö hna kuca, ngo the luelue kö laka, Nyidrëti a wangatrun la itre trengecatre i eö. Nyidrëti a hnimi eö nge tro kö Nyidrëti a nyithupene koi eö.​—Luka 21:​1-4.

LAPA QALE JË KOWE LA AKÖTRESIE KA MEL

14. Pine nemene matre tro sa mele nyipici e ka catre la imelekeu së me Iehova? (Wange ju fe la iatr.)

¹⁴ E ka mele Iehova koi së, tro ha hmaloi koi së troa mele nyipici koi Nyidrë. Tro sa ce wange la tulu Iosefa. Xele kö angeic troa kuci ngazo. Ka mele Iehova koi angeic, nge tha aja i angeic kö troa akötrë Nyidrë. (Gen. 39:9) Maine aja së troa catre la imelekeu së me Iehova, loi e tro sa xomi ijine troa thith me inine la Tusi Hmitrötr. Ame cili, tro ha catrecatre la imelekeu së me Iehova. Nge tui Iosefa, e ka catre la imelekeu së me Iehova, tha tro kö së lai a kuca la ketre ewekë ka troa akötrë Nyidrë.​—Iako. 4:8.

15. Nemene la ini hne së hna xom qa ngöne la aqane ujë ne la angetre Isaraela ngöne la hnapapa? (Heberu 3:​12)

¹⁵ Ame la itre atr ka luelu laka, ka mele Iehova, ke canga tro hi angatr a ananyi Nyidrë. Tro sa ce wange la aqane ujë ne la angetre Isaraela lo angatr ngöne la hnapapa. Atre hi angatr ka hape, ka mele Iehova ngo hnei angatr hna nyiqane luelu göne la atreine i Nyidrë troa thupë angatr. Göi hnyinge fe angatr ka hape: “Iehova kö the së maine waea?” (Eso. 17:​2, 7) Tha hmitre ju kö nge angatr a nyiqane icilekeu me Akötresie. Haawe, tha aja i easë kö troa nyitipune la tulu ka ngazo i angatr.​—E jë la Heberu 3:​12.

16. Nemene la ka troa ananazijëne la lapaune së?

¹⁶ Ame ngöne la fen celë, tha ka hmaloi  kö troa lapa qale koi Iehova. Alanyim la itre ka qaja ka hape, pëkö Akötresie. Nge ame pena la itre ka tha metrötrëne la itre wathebo i Nyidrë, ke ka lolo la mele i angatr. Ijije hi tro la itre ewekë cili a ananazijëne la lapaune së. Tha tro kö së lai a qaja ka hape, pëkö Akötresie. Ngo ame pe, tro së lai a nyiqane luelu laka, tha ijiji Nyidrëti kö troa xatua së. Celë hi ka traqa kowe la atre cinyihane la Salamo 73. Angeic a öhne laka, ame la itre atr ka lapa xötreithi angeic, ke tha angatre kö a metrötrëne la itre wathebo i Akötresie, ngo ka loi hi la mele i angatr. Matre angeic ha nyiqane mekune ka hape, pëkö eloine la troa nyihlue i Akötresie.​—Sal. 73:​11-​13.

17. Nemene la ka troa xatua së troa lapa qale koi Iehova?

¹⁷ Nemene la ka xatuane la atre cinyihane la Salamo? Hnei angeic hna lapa mekune la pun kowe la itre ka thëthëhmi Iehova. (Sal. 73:​18, 19, 27) Hnei angeice mina fe hna mekun la itre eloin la troa nyihlue Iehova. (Sal. 73:24) Ketre tu së fe, loi e tro sa lapa mekune la itre manathith hne së hna kapa qaathei Iehova. Nge, tune kaa la mele i epun e patre kö Iehova? Celë hi ka troa xatua së troa mele nyipici me qaja tune la atre cinyihane la Salamo ka hape: “Ame koi ni, ka loi kö la troa easenyi Akötresie.”​—Sal. 73:28.

18. Pine nemen matre tha xouene kö së la itre drai elany?

¹⁸ Xecie koi së laka, ijiji easë hi troa elëhune la nöjei jol ka troa traqa koi së ngöne la itre drai ne la pun. Pine nemen? Pine laka, easa “nyihluene la Akötresie ka mel me ka nyipici.” (1 Thes. 1:9) Ame la Akötresi së, ke Akötresie ka mel nge ka xatuane la itre hlue i Nyidrë. Hnei Nyidrëti hna xatuane la itre hlue i Nyidrëti ekö me easë mina fe enehila. Easenyi hë troa nyiqane la akötr atraqatr hna tha hane kö traqa qane ekö. Ngo tro kö Iehova a ce me easë ngöne la ijine cili. (Isa. 41:10) Haawe, isa catre pi së me qaja ka hape: “Iehova la ixatuang, tha tro kö ni a xou.”​—Heb. 13:​5, 6.