Maine easa ajane troa amadrinë Iehova, nyipiewekë troa lapaune koi Nyidrë. Ngo öni Tusi Hmitrötr, “tha ewekë i nöjei atr asë kö la lapaun.” (2 Thes. 3:2) Paulo aposetolo a qaja e celë la “itre atre ka ngazo,” itre ka axösisi angeic. Ngo ka nyipici fe la hnei angeic hna qaja kowe la itre xaa atr. Ame la itre xan, xele kö angatr troa mejiune laka, hetre Atre Xup, ene Akötresie. (Roma 1:​20) Itre xane pena a mejiune kowe la ketre haze ka trene men. Ngo tha ijiji kö la lapaune cili troa amadrinë Iehova.

Nge xecie koi së laka, ka mele Iehova nge Nyidrëti la “atre nyithupen” kowe la itre ka catre lapaun. (Heb. 11:6) Ame la lapaun, ke ketre igötranene la wene la ua. Maine easa ajane troa kapa la uati hmitrötr, loi e tro sa sipone koi Iehova ngöne la thith. (Luka 11:​9, 10, 13) Nyipiewekë fe tro sa e la Tusi Hmitrötr hna cinyanyine jëne la ua. E thupen, loi e tro sa lapa mekun la itre hne së hna e, me trongën. Maine tro sa kuca lai, tro la uati hmitrötre i Iehova a xatua së troa axecië mekun hnyawa, me hetrenyi la lapaun ka amadrinë Nyidrë.