Itre Hnyinge Ne La Itre Ka e
Pine nemene matre itre xan a mekune ka hape, ame la Salamo 12:7 ke, ej a qaja la “trengewekë i Iehova,” (xötre 6) ngo tha itre “ka akötr” kö (xötre 5)?
Kola amamane hnene la contexte ne lai xötre ka hape, ej a qaja la itre atr.
Kola qaja ngöne Salamo 12:1-4 ka hape, “patre hë la itre ka mele nyipici qaathene la itre atr.” Ngo goeëne la hna qaja ngöne Salamo 12:5-7.
“ ‘Pine laka, hna axösisin la itre ka akötr,
Pine laka, kola awe la itre ka pë ewekë,
Tro hë ni a mejë me xatua angatr.
Tro hë ni a amele angatr qa ngöne la itre ka imethinë.’
Ka pë ethan la itre trengewekë i Iehova;
Kösë sileva hna a 7 lao dreuth ngöne la hu eë dro.
Iehova fe, tro kö nyipëti a wai angatr;
Tro kö nyipëti a isa thupë angatr qa ngöne la itre atre ce ka ngazo, uti hë epin.”
Ame ngöne la xötre 5, kola qaja la hnei Iehova hna troa kuca kowe la itre “ka akötr.” Tro Nyidrëti a amele angatr.
Önine la xötre 6 ka hape, “Ka pë ethan la itre trengewekë i Iehova,” “kösë sileva.” Nge celë fe hi mekuna së.—Sal. 18:30; 119:140.
Tro pena së a ce wang la xötre 7: “Iehova fe, tro kö nyipëti a wai angatr; Tro kö nyipëti a isa thupë angatr qa ngöne la itre atre ce ka ngazo, uti hë epin.” Drei lae “angatr” hna qaja e celë?
Pine laka, ame ngöne la xötre 6 kola qaja “la itre trengewekë i Iehova,” itre xan a mekun ka hape, Akötresie a thupëne la “itre trengewekë” i Nyidrë. Nge ka nyipici hi, ke hnei Akötresie hna thupëne matre tro sa e la Tusi Hmitrötr enehila, ngacama tru la itre atr ka thel troa apatrene ej me wathebon.—Isa. 40:8; 1 Pet. 1:25.
Ngo, Akötresie mina fe a thupëne la itre atr hna qaja ngöne la xötre 5. Qane ekö, hnei Iehova hna thupëne me amelene la “itre ka akötr” me “ka pë ewekë.”—Iobu 36:15; Sal. 6:4; 31:1, 2; 54:7; 145:20.
Haawe, hnauëne la easa qaja ka hape, ame la “angatr” ke, kola qaja la itre atr?
Hnene la itre xötr ka tro pa me ka tro pi.
Ame ngöne Salamo 12:1, Dravita a qaja la “atr ka nyipici,” itre atr hna lapa thoi kow. E thupen, kola qaja ka hape, Iehova a amekötine la itre atr ka huliwan angazon la thineme i angatr. Thenge la Salamo celë, xecie koi së laka, tro kö Akötresie a xatuane la itre hlue i Nyidrë, ke ka pë ethan la itre trengewekë i Nyidrë.
Matre ame ngöne la xötre 7, kola amamane laka, tro Iehova a thupëne la itre hna akötrën hnene la itre atr ka ngazo.
Ketre, ame la aqane ujëne la hnëewekë “angatr” ngöne la Tusi Hmitrötre së, ke ka ihmeku memine lo texte hébreu massorétique. Nge ame ngöne la Tusi Hmitrötr Septante, alua mama la hnëewekë “easë” ngöne la xötr 7. Matre kolo hi a qaja la itre atr “ka akötr” me “ka pë ewekë.” Nge ame ngöne la xötre 7, kola qaja ka hape, tro Iehova “a isa thupë angatr . . . qa ngöne la itre atre ce ka ngazo,” ene la itre ka “sajuën la itre huliwa ka sis.” (Sal. 12:7, 8) Önine la Tusi Hmitrötr Targums, ngöne la xötre 7 ka hape, “Nyipë, JOXU FE, tro nyipëti a thupëne la itre ka meköt, me thupë angatr utihë epine palua qa ngöne la xötre atr cili ka ngazo. Ceitune hi la atr ka ngazo memine la atr ka ji lapa, me ka iji madran la itre nekö i atr.” Hane hi la ketre ewekë ka amamane ka hape, tha kolo kö a qaja la itre trengewekë i Iehova ngöne la Salamo 12:7.
Haawe, kola amamane ngöne la xötre celë laka, tro kö Iehova a xatuane la “atr ka nyipici.”
