1. Nemene la itre ethane la aqane ujë i Adamu me Eva, nge nemene la pune lai?

DREI la ka ijij troa acil la itre trepene meköt göi loi me ngazo? Hnei Adamu me Eva hna xen la wene la sinöe ne atrehmekune la loi me ngazo. Nyidroti hi lai a amamane laka, tha mejiune kö nyidroti koi Iehova me kowe la itre trepene meköti Nyidrë. Hnei nyidroti hna ketre sipu iëne la loi qa ngöne la ngazo. (Gen. 3:22) Ngo pane mekune jë la itre ethane lai. Hnei nyidroti hna thë la aqane imelekeu i nyidroti me Iehova. Ketre, luzi hë la mel ka tha ase palua kö, nge ngazo me mec la pun kowe la itre matra i nyidro. (Rom. 5:12) Eje hi, ame la pune la aqane ujë i Adamu me Eva, tre, akötre me hleuhleu.

2-3. (a) Nemene la hna kuca hnene lo eunuka lo Filipo a cainöj koi angeic? (b) Nemene la itre manathith hne së hna troa kapa qa ngöne la hna xomi bapataiso, nge nemene la itre hnying hne së hna troa sa?

² Tha ceitune kö la aqane ujë i Adamu me Eva memine lo eunuka atre Aithiope. Hna ketr la hni angeic lo Filipo a cainöjëne la itre hna kuca hnei Iehova me Iesu. Ame hnei angeic hna xomi bapataiso. (Itre hu. 8:34-38) Haawe, tune la eunuka, ame la easa sa xepu me xomi bapataiso ke, easë hi lai a amamane la hni ne ole së me mejiune së koi Iehova me Iesu. Iehova hmekuje hi la ka atre la ewekë ka loi qa ngöne la ka ngazo.

³ Pane mekune jë la itre manathith hne së hna troa kapa ngöne la easa nyihlue i Iehova! Tro Iehova a hamë së la nöjei ewekë hna aluzin hnei Adamu me Eva, tune la mele ka tha ase palua kö. Hnene la lapaune së koi Iesu, matre  Iehova a köletrije la itre ngazo së, nge hetrenyi hë the së la mekuthetheu ka lolo. (Mat. 20:28; Itre hu. 10:43) Ketre, easa sine la lapa i Iehova, me mejiune troa kapa elany la itre xaa manathith ka tru. (Ioane 10:14-16; Rom. 8:20, 21) Ngacama atre hi itre xan la itre manathith cili, ngo tha hnei angatre pe hna xötrethenge la tulu ne lo eunuka. Nemene la ka sewe angatr troa xomi bapataiso? Nge nemene la aqane tro angatr a elë hun la itre jol cili?

4-5. Nemene la itre jol hna cile kow hnei Avery me Hanna?

⁴ Kola luelu me seseu la hni. Lue ka hmi la kem me thine i Avery, ketre thöth. Nge ketre qatre thup hna qaja aloin, la keme i angeic. Ngo, hetre ewekë ka sewe Avery troa xomi bapataiso. Öni angeic: “Thatreine fe kö ni troa hane tui kakaa.” Ame koi Avery, tha ijiji angeice kö elany troa hane cilë hnëqa. Öni angeic: “Xoung troa thith me cainöj qëmekene la nöjei atr, me elemekene la ketre gurup ne cainöj.”

⁵ Hanna la ketre thöth ka 18 lao macatre. Hna hetru angeic ngöne la nyipici, ngo hnei angeic hna luelu. Ame koi angeic, tha ijiji angeice kö troa trongëne hnyawa la itre trepene meköti Iehova. Pine nemen? Hnei Hanna hna ketre sipu wangaconyi angeice kö. Ame itre xaa ijin, hace catre palaha koi angeic, matre hnei angeic hna qanangazon me akötrëne la ngönetrei angeic. Öni Hanna: “Tha hnenge kö hna qajaqaja lai koi kakaa me nenë. Ame koi ni, tha tro kö Iehova a kepe ni.”

6. Nemene la ka ajolë Vanessa troa xomi bapataiso?

⁶ Itre sinee ka iajojezi. Vanessa la ketre thöth ka 22 lao macatre. Öni angeic: “Hnenge hna ce mel memine la ketre jajiny. Ngo tha hnei angeice kö hna xatua ni troa eatrëne la ajang troa xomi bapataiso.” Hace catre koi Vanessa, matre öni angeic: “Angeice hi la sineeng, matre jole koi ni troa nue angeic wanga pë pi pe sineeng.”

7. Nemene la hna xouene hnei Makayla, nge pine nemen?

⁷ Kola xou troa tria. Faifi lao macatre i Makayla, ngöne la kola upetröneë la mama i angeic. Ame la Makayla a tru trootro, öhne hi angeice la akötre ne la kem me thine i angeic, pine la aqane ujë ne la mama i angeic. Öni Makayla: “Eni a xou troa xomi bapataiso, wanga  upetröneë ni pi. Tha ajane kö ni troa akötrë kakaa me nenë.”

8. Nemene la hna xouene hnei Miles?

⁸ Kola xouene la icilekeu. Miles, la ketre thöth ka 22 lao macatre. Ka nyihlue i Iehova la keme i Miles me föe i nyidrë. Ngo tha ka hmi pë hë la sipu thine i angeic. Öni Miles: “Hnenge hna mel thei nenë utihë 18 lao macatreng. Eni a xou troa qaja koi eahlo la ajang troa xomi bapataiso. Öhne hi ni ekö la aqane ujë i eahlo lo kakaa a xomi bapataiso, matre eni a xou e tro eahlo a sewe ni.”

9. Nemene la thangan e tro sa lapa mekun la aqane xomihni ahoeanyi Iehova me etrune la ihnimi Nyidrë?

⁹ Tha hnei Adamu kö me Eva hna acatrene la ihnimi nyidroti koi Iehova. Celë hi matre, tha hnei nyidroti kö hna drengethenge Nyidrë. Ame pe, hnei Iehova hna nue nyidroti troa mel aqeany me hnaho, me ketre sipu amekötine la aqane troa hetrune la itre nekö i nyidro. Kola mama qa ngöne la itre thangan laka, ka ngazo la aqane axecië mekune i nyidro. Hnene la pane nekö i nyidro hna humuthe la jini angeic. Qaane ju hi lai, kola elë trootro la ngazo me iakötrë. (Gen. 4:8; 6:11-13) Ngo hetre hnei Iehova hna hnëkëne thatraqane la itre matra i Adamu me Eva, ka ajane troa nyihlue i Nyidrë. (Ioane 6:38-40, 57, 58) Maine tro sa lapa mekun la aqane xomihni ahoeanyi Iehova memine la etrune la ihnimi Nyidrë, tro ha kökötre la ihnimi së koi Nyidrë. Tha tro kö sa tui Adamu me Eva, ngo tro pe sa nue la mele së koi Nyidrë.

10. Nemene la aqane troa xatua së troa nyihlue i Iehova, hnene la tusi Salamo 19:7?

¹⁰ Thele jë troa atrepengöi Iehova hnyawa. Maine tro sa thele troa atrepengöi Iehova hnyawa, tro ha acatrene la aja së troa nyihlue i Nyidrë. Öni Avery: “Hnenge hna catre e me lapa mekun la hna thingehnaean ngöne la Salamo 19:7.” (E jë.) Ame la Avery a öhne la aqane eatrëne Iehova la hna qaja e celë, tre, hna acatrene la ihnimi angeic koi Iehova. Eje hi, hnene la ihnim hna acatrene  la lapaune së. Ngo eje fe a xatua së troa atrunyi Iehova me catre kuca la aja i Nyidrë. Öni Hanna: “Hnenge hna catre e me inine la Tusi Hmitrötr. Trotrohnine hë ni laka, tha eni hmekuje kö la ka akötr, ngo Iehova mina fe.” (1 Pet. 5:7) Ame hë enehila, Hanna a ‘kuca thenge la wesi ula i Akötresie.’ (Iako. 1:22) Nemene la thangane lai? Öni Hanna: “Ame la eni a öhne la eloine la troa drengethenge Iehova, kola acatrene la ihniming koi Nyidrë. Xecie hnyawa koi ni laka, tro kö Iehova a ceme ni, ngöne la eni a aja ixatua.” Hnei Hanna hna cile kowe la jol ka eje thei angeic, me sa xepu me xomi bapataiso.

11. Nemene la hnei Vanessa hna kuca matre troa öhnyi nyipi sinee, nge nemene la ini hne së hna troa xom?

¹¹ Troa iëne hnyawa la itre sinee. Trotrohnine hë Vanessa ka hape, kola sewe angeic hnene la sinee i angeic troa nyihlue i Iehova. Celë hi matre, hnei angeice hna nue pe la sinee i angeic, me thele la itre xaa sinee e hnine la ekalesia. Hna xatua Vanessa hnene la tulu i Noa me hnepe lapa i nyidrë. Öni angeic: “Ngacama angatr a mel nyipine la itre ka tha hnimi Iehova kö, ngo hnei angatre palahi hna caas.” Thupene la hna xomi bapataiso, hnei Vanessa hna xome la huliwa ne pionie. Öni angeic: “Celë hi ka xatua ni troa öhnyi nyipi sinee e hnine la ekalesiang, me ngöne fe la itre xaa ekalesia.” Ijiji së fe hi troa hane öhnyi nyipi sinee, e hne së hna catre xome la huliwa i Iehova.—Mat. 24:14.

12. Nemene la xou ka paatre thei Adamu me Eva, nge nemene la pun?

¹² Troa trotrohnine la nyipi aliene la xou. Ame la nyipi xou, tre, ene la easa xou troa akötrëne la hni Iehova. (Sal. 111:10) Maine hetrenyi ju Adamu me Eva la xou cili, tha tro jë kö nyidroti a icilekeu me Iehova. Ngo hnei nyidroti hna tha idrei. Ame hna maca la lue meke i nyidro, nge nyidroti a wangatrehmekune laka, lue atr ka ngazo hë nyidro. Ngazo me meci pe hi la pune kowe la itre matra i nyidro. Hnei nyidroti hna  zae ke, hmahma ha nyidro. Trotrohnine hë nyidroti laka, ase hë nyidroti ena la wathebo i Akötresie.—Gen. 3:7, 21.

13-14. (a) Thenge la hna qaja ngöne 1 Peteru 3:21, pine nemene matre tha meci kö la nyine tro sa xouen? (b) Pine nemene matre easa hnimi Iehova?

¹³ Loi e tro sa xou troa akötrëne la hni Iehova, ngo tha ene kö la troa xouene la mec. Hnei Iehova hna aijijë së troa hetrenyi la mel ka tha ase palua kö. Ame ngöne la easa tria, loi e tro sa ietra qa kuhu hni së. Tro Iehova a köletrije la ngazo së. Hnene la lapaune së kowe la mel hna huujëne hnei Iesu, matre Iehova a troa nue la itre ngazo së. Easa amamane la lapaune së, ngöne la easa sa xepu me xomi bapataiso.—E jë la 1 Peteru 3:21.

¹⁴ Nyimutre la itre kepin matre easa hnimi Iehova. Nyidrëti a hamë së la nöjei ewekë ka lolo. Nyidrëti fe a ini së la nyipici göi Nyidrë, me göne la aja i Nyidrë. (Ioane 8:31, 32) Hnei Iehova hna acile la ekalesia matre troa eatrongë së me xatua së. Nyidrëti a xatua së troa xomihnine la itre jol, me hamë mejiune koi së troa mele tingeting epine palua. (Sal. 68:19; Hna ama. 21:3, 4) Ame la easa lapa mekun la nöjei ewekë hnei Iehova hna kuca thatraqai së, tre, kola acatrene la aqane imelekeu së me Nyidrë. Nge ame la easa hnimi Iehova, hetrenyi fe hë së la nyipi xou, ene la xou troa akötrë Nyidrë.

15. Nemene la aqane elë hune Makayla la xoue i angeic troa tria?

¹⁵ Pëhë xou i Makayla, e traqa ju angeic kuca la ngazo. Atre hë angeic laka, aja i Iehova troa nue la itre ngazo së. Öni angeic: “Trotrohnine hë ni laka, itre atr ka tha pexeje kö së, matre easa tria. Ketre, hnene la ihnimi Iehova jëne la thupene mel, Nyidrëti a nue la itre ngazo së.” Hnene la ihnimi Makayla koi Iehova, matre angeic a sa xepu me xomi bapataiso.

16. Nemene la ka xatua Miles ngöne la kola icilekeu?

¹⁶ Ame pena Miles, lo thöthi ka pi xomi bapataiso ngo ka xoue thin, tre, hnei angeic hna thele ixatua thene la atre thupëne la sirkoskripsio. Öni Miles: “Trotrohni ni hi hnei nyidrë ke, tha ka hmi kö la thine i nyidrë. Hnei nyidrëti hna xatua ni troa thel la aqane troa qejepengöne koi nenë la ajang troa xomi bapataiso. Hnenge hna qaja hnyawa koi nenë laka, tha kakaa kö la ka musinë ni.” Ngacama tha madrine kö la thine i Miles, ngo tha hnei angeic kö hna saze mekun. Hnei angeice pe hna fek qa ngöne la hnalapa. Öni Miles: “Hna ketr la hning la eni a atre la nöjei ewekë ka lolo hnei Iehova hna kuca koi ni. Ame la eni a mekune hmaca la aliene la thupene mel, eni ha trotrohnine la etrune la ihnimi Iehova koi ni. Eni a sa xepu jë koi Iehova me xomi bapataiso.”

17. Nemene la nyine tro sa isa kuca?

¹⁷ Ame la Eva a xeni la wene sinöe e Edena ke, angeice hi lai a icilekeu me Iehova, Keme i angeic. Ame la Adamu a ce xöle me Eva ke, angeice hi lai a amamane laka, pëkö hni ne ole i angeic kowe la nöjei ewekë ka lolo hnei Iehova hna kuca. Isa qanyi së amamane laka, tha ceitu së kö me Adamu me Eva. Atraqatr la ole së koi Iehova. Celë hi matre easa xomi bapataiso. Easë hi lai a amamane koi Iehova laka, Nyidrëti hmekuje hi la ka ijij troa acile la itre trepene meköt, göne la loi me ngazo. Nge easë fe a amamane la mejiune së me etrune la ihnimi së koi Nyidrë.

18. Nemene la nyine tro sa kuca matre troa catre nyihlue i Iehova?

¹⁸ Thupene la easa xomi bapataiso, nyipiewekë tro sa mel thenge la itre trepene meköti Iehova, ngo tha thenge hmaca kö la itre sipu aja së. Celë hi hna kuca hnene la itre hlue i Iehova e cailo fen. Ijiji së fe hi troa hane tui angatr. Loi e tro sa catre inine la Tusi Hmitrötr, me nyisineene la itre trejin. Tro fe sa ce thawa me itre xan la itre hne së hna inin göne la Keme së ka tru ihnimin. (Heb. 10:24, 25) Haawe, qëmekene troa axecië mekun, nyipiewekë tro sa thele eamo e hnine la Wesi Ula i Iehova me thene la organizasio i Nyidrë. (Is. 30:21) E cili, tro hë sa catre nyihlue i Iehova.—Ite edomë 16:3, 20.

19. Nemene la nyine tro sa lapa mekun, nge pine nemen?

¹⁹ Loi e tro palahi sa lapa mekun la itre manathith hne së hna kapa, qa ngöne la hna drengethenge Iehova. Celë hi ka troa acatrene la ihnimi së koi Nyidrë, me kowe la itre trepene meköti Nyidrë. Haawe, thatreine jë kö Satana troa ajolë së troa nyihlue i Iehova. Pane mekune jë la mele së elany. Pëkö ketre mekun ka sisitria hune la troa xomi bapataiso!