EASA ajane tro la itre atr a qaja ka hape, ka loi thiina së. Ngo ame pe, tha ka hmaloi kö enehila troa loi thiina. Ame la ketre kepin ke, nyimutre la itre atr ka “tha ajane kö la loi.” (2 Tim. 3:3) Angatr a ketre sipu iëne la loi memine la ngazo. Öni angatr: “Ame la ngazo, te, loi; ngo loi, te, ngazo.” (Is. 5:20) Ketre, tha ka hmaloi kö ke, hnene la itre ewekë ka traqa ngöne la mele së ekö. Nge hnene fe laka, tha ka pexeje kö së. Maine jë, tro sa mekun tui Anne, * ketre trejine föe ka nyihlue i Iehova koi nyimu macatre hë. Öni eahlo: “Ame koi ni, tha ijijinge fe kö troa hane loi thiina.”

Eloine pe, ijiji së asë hi troa loi thiina! Ame la thiina ka loi, tre, ketre götran ne la wene ne la uati hmitrötre i Akötresie, nge pëkö ka atreine troa sawa la mene ne la uati hmitrötr troa xatua së. Tro sa ce wang la aliene la thiina ka loi, me inine la aqane tro sa hetrenyi la thiina cili.

Ame la atr ka thiina ka loi, tre, pëkö ngazo me elëhni thei angeic. Angeic palahi a thele troa kuca la loi, nge ka hetre thangane koi itre xan. Ame la atr ka loi thiina, tre, angeic a thele aqane troa xatua itre xan, me kuca la loi koi angatr.

Öhne hi së laka, ka hmaloi hi troa kuca la loi kowe la itre fami së me itre sinee së. Ngo hapeu, celë hmekuje hi la nyine tro sa kuca? Eje hi laka, thatreine kö tro sa thiina ka loi e nöjei ijin. Celë hi matre öni Tusi Hmitrötr ka hape, “pëkö ate ka meköti e celë fen, ate kuca la loi nge pë fe kö ngazo.” (Ate cai. 7:20) Öni Paulo aposetolo: “Ate hë ni laka pëkö kete ewekë ka loi a lapa e kuhu hning.” (Rom. 7:18) Haawe, maine easa ajane troa hetrenyi la thiina ka loi, nyipiewekë la ixatua i Iehova, ene la Qaane la thiina ka loi.

Ase hë Iehova Akötresieti amekötine la ka loi. Öni Tusi Hmitrötr göi Iehova: ‘Ka loi cilie, nge atre kuca la loi, ini ni jë la itre wathebo i cilie.’ (Sal. 119:68) Tro sa ce wang la lue xaa götrane la thiina ka loi Iehova, hna qaja ngöne la xötre celë.

Atre ihnimi Iehova. Thei Iehova la thiina ka loi. Hanawang la ka traqa, ngöne la Iehova a qaja koi Mose, ka hape: “Tro ni a cengöne tro fë qëmeke i ’ö la loing.” Hnei Iehova hna amamane koi Mose la etrune la thiina ka loi Nyidrë. Hnei Mose hna dreng la ketre nine ula, kola qeje Iehova ka hape: “Iehova, Iehova Akötesie, ate utipine me ka ihnim, ate xomi hni ahoean, nge ka tru loi me nyipici, ate thupëne la ihnimi thatraqane la nöjei thausan, me nue tije la menu, me hna shashaith, me ngazo; nge tha trojë kö a jele pë ngazone la ite ka ngazo.” (Eso. 33:19; 34:6, 7) Eje hi, ka pexeje hnyawa la thiina ka loi Iehova. Ngacama hnei Iesu hna xötrethenge hnyawa la aqane thiina ka loi Iehova lo nyidrëti e celë fen, ngo öni nyidrë: “Pëkö ka loi, ngo Akötesie casi hi.”—Luka 18:19.

Ka lolo la itre huliwa i Iehova. Ka lolo asë hi la itre ewekë hnei Iehova hna kuca, nge itre ej a amamane la elolo i Nyidrë. ‘Ka lolo Iehova kowe la nöjei ewekë asë, nge hune la nöjei huliwa asë i Nyidrë la utipine i Nyidrë.’ (Sal. 145:9) Ketre, tha ka ië hna hnime kö Iehova. Nyidrëti a hamëne la  mel memine la ka nyipiewekë kowe la nöjei atr. (Itre hu. 14:17) Iehova a thiina ka loi ngöne la Nyidrëti a nue la ngazo së. Önine la atre cinyihane la Salamo: “Ka loi cilieti, Joxu, me ate sheng.” (Sal. 86:5) Eje hi, “tha tro kö nyidëti a cipane la kete loi e angete trongëne la meköt.”—Sal. 84:11.

Eje hi laka, hnei Akötresieti hna xupi së hnaiji Nyidrë, matre ijiji së hi troa hane loi thiina me kuca la loi. (Gen. 1:27) Ngo ame pe, Iehova a upi së troa ‘inine troa kuca la loi.’ (Is. 1:17) Nemene la aqane tro sa inine troa kuca la loi? Hanawang la köni aqane tro sa kuca.

Ame la hnapan, jëne la thith tro sa sipone la uati hmitrötr ke, celë hi lai ka xatuane la itre Keresiano troa eënyine la thiina ka loi. (Gal. 5:22) Kola xatua së hnene la uati hmitrötre i Akötresie troa hniin la loi me thipetrije la ngazo. (Rom. 12:9) Öni Tusi Hmitrötr ka hape, ijije hi tro Iehova a “acile hutine ngöne la nöjei huliwa ka loi me ite tenge ewekë ka loi asëjëihë.”—2 Thes. 2:16, 17.

Ame la hnaaluen, loi e tro sa e la Wesi Ula i Akötresie. Celë hi aqane tro Iehova a ini së la “ite jëne ka loi asë” me hnëkë së “thatraqane la nöjei huliwa ka loi asëjëihë.” (Ite edomë 2:9; 2 Tim. 3:17) Ame la easa e Tusi Hmitrötr me lapa mekun, easë hi lai a nyialiene la hni së, hnene la itre ewekë ka lolo göi Akötresie me göne la itre aja i Nyidrë. Hna aceitunëne la hni së memine la ketre trengene mo. Ame la easa e Tusi Hmitrötr me lapa mekun, easa nyialiene la hni së hnene la itre ewekë ka lolo, kösë easa amë hnyawane la itre ewekë ka tru alameken, nge ka troa thupë së elany.—Luka 6:45; Efe. 5:9.

Ame la hnaakönin, easa kuca asë la hne së hna atreine matre troa “xöte thenge [. . . ] la loi.” (3 Ioane 11) Nyimu tulu e hnine la Tusi Hmitrötr nyine troa xötrethenge. Ngo ame la lue tulu ka sisitria, tre, tulu i Iehova me Iesu. Ame pe, hetre itre xane fe ka loi thiina, tui Tabitha me Banaba. (Itre hu. 9:36; 11:22-24) Troa hetre thangane lai, e hne së hna inine la hna qaja hnei Tusi Hmitrötr göi nyidro. Ame la easa inine la tulu i nyidro, tre, goeëne ju la aqane xatuane nyidroti la itre xan. Pane thele jë la itre xaa aqane troa xatuane la itre fami së me itre trejin e hnine la ekalesia. Nge goeëne jë la aqane amanathithi Tabitha me Banaba, hnene la hnei nyidroti hna loi thiina. Ijiji së fe hi troa hane kepe manathith tui nyidro.

Hetrenyi enehila la itre xaa trejine ka kuca la loi. Pane mekune jë la tulu hna amamane hnene la itre qatre thup, itre ka ‘ajane la ka loi.’ Hetrenyi fe la itre trejine föe ka amamane qa ngöne la aqane  ithanata me aqane ujë i nyudren laka, “itete inine la nöjei ewekë ka loi.” (Tito 1:8; 2:3) Öni Roslyn, ketre trejine föe, ka hape: “Hnene la ketre sineeng hna catre thele troa xatuan me ithuecatre kowe la itre xan e hnine la ekalesia. Hnei angeic hna mekun la itre hnei angatr hna melën. Ame hnei angeic hna nyi ahnahna me xatua angatr. Ame koi ni, ka loi thiina angeic.”

Iehova a ithuecatre kowe la itre hlue i Nyidrë troa ‘thele la loi.’ (Amosa 5:14) Celë hi ka troa xatua së troa hniin la itre hnei Nyidrëti hna amekötin, me thue aja së troa catre kuca la loi.

Tha eje kö la troa nyi ahnahna ka tru thupen maine hamë itre ewekë ka tru, matre troa loi thiina. Hanawang la ketre ceitun. Ame la atr ka desë, tre, tha tro kö angeic a aca tro peidrëne la tabolo. Angeice pe a pane goeën me wange hnyawa la aqane peidrën. Ketre tune fe, troa mama the së la thiina ka loi, hnene la itre hnepe ewekë hne së hna kuca, matre troa xatua itre xan.

Tusi Hmitrötr a upi së troa “hnëkë” matre kuca la loi. (2 Tim. 2:21; Tito 3:1) Ame la kola traqa la itre jol kowe la itre xan, easa hnehengazo angatr me thele la aqane troa ixatua. (Rom. 15:2) Tune la troa hamëne la ketre ewekë hne së hna hetreny. (Ite edomë 3:27) Maine jë, tro sa hëne la ketre trejin troa ce xen me ithuecatrekeu. Maine ka wezipo la ketre trejin, loi e tro sa cinyanyi tus koi angeic, maine hë angeic, maine wai angeic pena. Eje hi, nyimutre la itre aqane tro sa amamane “la tenge ka loi, la nyine troa eamon, mate aciane la loi koi angete deng.”—Efe. 4:29.

Tui Iehova, easa ajane troa kuca la loi kowe la nöjei atr. Celë hi matre, tha ajane kö së troa ië hna hnim. Ame la ketre aqane tro sa ujë kowe la itre atr tui Iehova, tre, ene la troa catre cainöjëne la itre maca ka lolo ne la Baselaia kowe la nöjei atr. Tune la hna qaja hnei Iesu, easë mina fe a ajane troa kuca la loi kowe la itre atr ka methinë së. (Luka 6:27) Hetre eloine la troa loi thiina me kuca la loi kowe la itre xan ke, “tha hna wathebo sane kö la ite ka tun.” (Gal. 5:22, 23) Ame la easa loi thiina ngacama kola icilekeu me easë, kösë easë hi lai a thenge la itre atr kowe la nyipici, me ithuecatre koi angatr troa hane atrunyi Akötresie.—1 Pet. 3:16, 17.

‘Tro la atr ka loi a meji hnene la itre ewekë i angeice kö.’ (Ite edomë 14:14) Nemene la itre xaa manathith? Maine tro sa kuca la loi koi itre xan, tro fe angatre lai a thiina ka loi koi së. (Ite edomë 14:22) Ngacama ka ngazo la aqane ujë i angatr koi së, ngo loi e tro palahi sa loi thiina koi angatr. Maine jë, troa saze la aqane ujë i angatr koi së.—Rom. 12:20.

Ketre, maine tro sa catre kuca la loi me thipetrije la ngazo, tre, tro lai a hetre thangane koi së. Nyimutre la itre trejin ka anyipicine lai. Hanawang la tulu i Nancy. Öni angeic: “Ka waele ni ekö lo eni a co, ka pë metrötre ni, nge hnenge hna kuca la itre huliwa ka sis. Ngo, ame la eni a atre me trongëne la itre hna amekötin hnei Akötresie göne la loi, tre, madrine hë ni. Ame enehila, tha hmahma ha ni.”

Ame la nyipi kepin matre easa thiina ka loi, tre, kola amadrinë Iehova. Ngacama pëkö ka öhne la hne së hna kuca, ngo öhn asë hi Iehova. Atre hi Nyidrëti la nöjei ijine easa kuca la loi, me mekune la ka lolo. (Efe. 6:7, 8) Nemene la aqane amanathithi së hnei Nyidrë? “Ame la ate ka loi, te, troa hnimi angeice hnei Iehova.” (Ite edomë 12:2) Haawe, catre pi së thiina ka loi. Ase hë Iehova thingehnaean ka hape, “hadehadeu, me mingöming, me tingeting koi angate asë angete kuca la loi.”—Rom. 2:10.