Alanyimu la itre trejin ka huliwane la itre jiane huliwa ka hnyipixe, matre troa porotrik memine la itre fami angatr me itre xaa trejin ka mele gaa nany. Ngo loi e tro sa trongëne la eamo celë: “Ame la ate maca meke, te, kola goeëne la ngazo, me za; ngo ite wangadrapa kö a tro, nge hete thupenë hë.”—Ite Edomë 27:12.

Atre hi së laka, aja i Iehova troa thupë së. Celë hi matre, tha easë kö a ce tro memine la itre ka thi lapa, me itre hna upetröneë, me itre ka thoi. (Rom. 16:17; 1 Kor. 5:11; 2 Ioane 10, 11) Ngo hetre itre xan e hnine la ekalesia ka tha trongëne kö la hna qaja hnei Tusi Hmitrötr. (2 Tim. 2:20, 21) Celë hi matre, loi e tro sa iëne hnyawa la itre sinee së. Ngo tha ka hmaloi kö troa iëne la itre sinee së, ngöne la easa xome la itre jiane huliwa nyine icinyanyikeu.

Nyipiewekë tro sa hmek ngöne la kola könë së troa sine la ketre gurup ngöne Ëternet ke, hetre ethan la itre porotrik. Celë hi ka traqa kowe la itre xaa trejin. Ngo hapeu, atreine kö së hmek e kola könë së ngöne la ketre gurup ka traqa koi 100 lao atr? Atrepengöne hnyawa kö së la itre atr ka sine lai gurup? Nge tune kaa la lapaune i angatr? Kola qaja ngöne Salamo 26:4: “Tha hnenge kö hna ce lapa me itete thoi, nge tha tro kö ni a ce tro me angete iaö.” Eje hi, loi e tro sa sine la itre gurup hne së hna atrepengöne hnyawa la itre atren.

Maine tha tru kö hnei atr ngöne la gurup së, ngo loi e tro sa thupëne la traeme hne së hna nue göne lai, memine la itre hne së hna porotrikën. Tha nyipiewekë kö troa canga sa ngöne la kola cinyanyi koi së. Hnei Paulo hna hmekë Timoteo göne la itre ka “iqej, me lö hnine la itre ifekë jolen.” (1 Tim. 5:13) Ame enehila, itre xaa Keresiano a ujë tune lai jëne mobilis me tablet.

Ame la Keresiano ka macaj, tre, tha ka iqeji kö angeic me kötre fë ithanata. Ketre, tha ajane kö angeic troa dreng la kola qaja angazone la itre xaa trejin. (Sal. 15:3; Ite Edomë 20:19) Tha angeice kö a dreng me qajaqaja la itre ithuemacany ka thoi nge hna qaja atrun. (Efe. 4:25) Ame ngöne la site së jw.org me JW Télédiffusion, hetrenyi la itre itusi me itre ithuemacany ka nyipici hna hamën hnei organizasio i Iehova.

Ame la itre xaa Keresiano, angatr a tro kowe la itre jiane huliwa nyine icinyanyikeu, matre troa itö me salemë ewekë, maine thele huliwa pena. Ngazo pe, tha itre ewekë kö lai ka atrunyi Iehova. Loi e tro sa thupën matre tha tro kö sa “hni koi mani,” me sipo manie me mo kowe la itre trejin me easë.—Heb. 13:5.

Hapeu, ka loi kö troa icinyanyikeu göne troa sipo manie thatraqane la itre trejin ka aja ixatua, maine hna lepe hnei hulö? Eje hi laka, easa hnime la itre trejin, matre easa ajane troa ithuecatrekeu me ixatua. (Iako. 2:15, 16) Ngo maine tro sa sipo ahnahna jëne la ketre gurup ngöne Ëternet, tro lai a ajolëne la filial memine la itre ekalesia troa xatuane la itre trejin. (1 Tim. 5:3, 4, 9, 10, 16) Eje hi, tha ajane kö së tro la itre xan a mekun ka hape, celë hi hnëqa hna ahnithe koi së.

Easa ajane troa kuca asë nyine atrunyi Akötresie. (1 Kor. 10:31) Haawe, qëmekene troa huliwane la itre jiane huliwa nyine icinyanyikeu, loi e tro sa hmek me pane mekun la itre ethan.