1. Nemene la itre jol hna cile kowe hnene la itre hlue i Iehova?

 HAPEU, epuni kö a cile kowe la ketre jol? Maine jë, hna akötrë epun hnene la ketre trejin. (Iako. 3:2) Maine jë, kola hnyimasai epun ngöne la hna huliwa maine hna ini ke, epuni a nyihlue i Iehova. (1 Pet. 4:3, 4) Maine pena, itre sinee i epuni a sewe epun troa sine la itre icasikeu me cainöj. (Mat. 10:35, 36) Pine laka, thatreine hë epuni xomihni, epuni ha mekun troa nue Iehova. Ngo the thëthëhmine kö laka, tro palahi Iehova a hamën la inamacan me trengecatr, matre xatua epun troa cile hut ngöne la itre jol.

2. Thenge la Roma 15:4, nemene la eloine e tro sa e la Tusi Hmitrötr?

² Hnauëne la Iehova a amë e hnine la Tusi Hmitrötr, la tulu ne la itre atr ka xomihnine la itre jol? Öni Paulo, matre tro sa xomi ini qa ngön. (E jë la Roma 15:4.) Maine tro sa e la itre tulu cili, tro ha ithuecatre së me hamë mejiune koi së. Ngo tha tro hmekuje kö sa e. Loi e tro fe sa nue itre ej troa saze la aqane mekune së me itre aliene hni së. E cili, tro hë sa atreine cile kowe la nöjei pengöne jol. Ame ngöne la tane mekun celë, tro sa ce wang la foa lao nyine troa kuca ngöne la easa ini tus: (1) Troa thith, (2) Troa lapa mekun, (3) Troa mekun ajuin, nge (4) Troa trongën. Jëne la foa lao ewekë celë, * tro sa ce ithanatane la hna melën hnei Dravita me Paulo.

3. Nemene la nyine troa pane kuca qëmekene troa e la Tusi Hmitrötr, nge pine nemen?

 ³ (1) Troa thith. Qëmekene troa e la Tusi Hmitrötr, loi e troa pane sipo Iehova la aqane troa kepe thangan qa ngön. Maine easa cile kowe la ketre jol, loi e troa sipo Nyidrë troa xatua së troa öhne la itre trepene meköt ka lolo.—Fil. 4:6, 7; Iako. 1:5.

4. Nemene la nyine troa kuca matre troa trotrohnine la ketre hna melën e hnine la Tusi Hmitrötr?

⁴ (2) Troa lapa mekun. Hnei Iehova hna aijijë së troa lapa mekun la itre ewekë. Maine easa ajane troa trotrohnine la ketre hna melën e hnine la Tusi Hmitrötr, loi e tro sa pane atre la itre götran me itre atren. Ketre, loi e tro sa thele la itre mekun me itre aliene hni ne la atr hna qaja.

5. Nemene la aliene la hna hape, troa mekun ajuin, nge nemene la itre hnying ka troa xatua së?

⁵ (3) Troa mekun ajuin. Kolo lai a hape, troa thel ajuine la itre hne së hna e me xomi ini qa ngön. Pane mekune jë laka, easa kuci itra. Nyipiewekë tro sa xome la nöjei xen thatraqane lai. Maine pëkö la itre xaa xen, tha tro kö a lolo la itra. Ketre tune fe, loi e tro sa ce xome la nöjei mekun matre trotrohnine hnyawa la hna qaja. Eje hi, maine tha tro kö sa mekun ajuin, tro ha gufa la itre hne së hna e. Hane hi la itre hnying ka troa xatua së ngöne la easa ini tus: ‘Nemene la aqane cile kowe la jol hnene la hlue i Iehova? Nemene la aqane xatua angeic hnei Iehova? Nemene la itre ini hnenge hna xom matre troa cile hut?’

6. Pine nemene matre nyipiewekë tro sa trongëne la hne së hna inin e hnine la Tusi Hmitrötr?

⁶ (4) Troa trongën. Öni Iesu ka hape, maine tha trongëne kö së la itre hne së hna inin ke, kösë easa xupi uma ngöne la ngöni. Ngacama tru la trengecatre hna nue, ngo ka gufa la huliwa. Pine nemen? Pine laka, e traqa ju manie me di, troa kei uma. (Mat. 7:24-27) Ketre tune fe, maine tro sa thith, me lapa mekun, me mekun ajuin, ngo tha trongëne pe ke, tro ha gufa la itre trengecatre së. E cili, tro hë sa canga kei kowe la itre jol me itupath ke, tha catrecatre kö la lapaune së. Ngo maine tro sa trongëne la itre hna inin e hnine la Tusi Hmitrötr, tro hë sa axecië mekun hnyawa, me mele tingeting, me catre lapaun. (Is. 48:17, 18) Haawe, jëne la foa lao mekun hne së hna ce wang, tro sa xomi ini qa ngöne la tulu i Dravita.

7. Nemene la tulu hne së hna troa ce wang?

⁷ Hapeu, hnene kö la ketre sinee i epun hna iaö epun? Maine eje hi, tro la tulu i Dravita a xatua epun. Hnei Abasaloma, sipu nekö i Dravita, hna iaö nyidrë me thele troa thapa la musi nyidrë.—2 Sam. 15:5-14, 31; 18:6-14.

8. Nemene la nyine tro sa kuca matre troa xatua së hnei Iehova?

⁸ (1) Troa thith. Qëmekene troa e la hna melën hnei Dravita, loi e tro sa pane qaja koi Iehova la akötr ka eje the së. (Sal. 6:6-9) Loi e tro sa fe la hni së me sipo ixatua koi Nyidrë, matre tro sa öhne la itre trepene meköt ka troa akeukawanyi së.

9. Qejepengöne jë la ka traqa koi Dravita me Abasaloma.

⁹ (2) Troa lapa mekun. Pane mekune jë la ka traqa koi Dravita, me itre aliene hni i nyidrë. Nyimu macatre ne Abasaloma a iaöne la nöj matre tro angatr a hnimi angeic. (2 Sam. 15:7) Ame la Abasaloma a öhne laka, ijine hë, hnei angeic hna upe  la itre sooce i angeic kowe la nöj, matre ië angeic troa joxu. Hnei angeice fe hna iaö Ahitofela, ketre atresi me sinee i Dravita. Ame hë la Abasaloma a joxu, hnei angeic hna thele troa othi Dravita me humuthi nyidrë, ngacama ka wezipo nyidrë. (Sal. 41:1-9) E cili, hnei Dravita hna kötr qa Ierusalema. Thupene lai, hna isi hnene la itre sooce i Abasaloma me Dravita. Ame hna lep la trongene isi Abasaloma me humuthi angeic.

10. Maine ju, nemene la aqane tro Dravita a ujë?

¹⁰ Pane mekune jë la aliene hni i Dravita. Nyidrëti a hnimi Abasaloma me mejiune koi Ahitofela. Ngazo pe, hnei nyidroti hna huliwa thoi me iaö Dravita. Ketre, hnei nyidroti hna thele troa humuthi nyidrë. Eje hi, tru catre la akötre i Dravita. Maine ju, tro Dravita a mekuhnine la itre xaa sinee i nyidrë ka hape, ce angatre fe me Abasaloma. Nge maine ju, tro nyidrëti a sipu meku nyidrë, me kötre caas, me hleuhleu me akötr. Ngo tha celë kö aqane ujë i Dravita. Hnei nyidrëti pe hna xomihni me cile hut. Nemene la ka xatua nyidrë?

11. Nemene la hna kuca hnei Dravita?

¹¹ (3) Troa mekun ajuin. Maine easa ajane troa xomi ini qa ngöne la hna melën hnei Dravita, loi e tro sa isa hnying ka hape: ‘Nemene la hnei nyidrëti hna kuca matre troa cile kowe la itre jol?’ Tha hnei nyidrëti kö hna xou. Qëmekene troa axecië mekun, hnei Dravita hna xomi ijin matre troa mekun la nyine troa kuca. Nge tha hnei nyidrëti kö hna hmitr troa eatrëne la mekuna i nyidrë. Hnei Dravita hna sipo ixatua koi Iehova me kowe la itre sinee i nyidrë. Ngacama akötre catre Dravita, ngo tha hnei nyidrëti kö hna wesitr. Hnei nyidrëti pe hna catre mejiune koi Iehova me kowe la itre sinee i nyidrë.

12. Nemene la aqane xatua Dravita hnei Iehova?

¹² Nemene la aqane xatua Dravita hnei Iehova? Maine tro sa ithel, tro hë sa öhne laka, hnei Iehova hna thue trengecatre i Dravita, matre troa cile hut. (Sal. 3:1-8; texte de présentation du Psaume) Hnei Iehova fe hna amanathithi Dravita, me thupëne la mele ne la itre sinee i nyidrë ka hnimi nyidrë.

13. Nemene la aqane tro sa nyitipu Dravita ngöne la kola akötrë së hnene la ketre sinee së? (Mataio 18:15-17)

¹³ (4) Troa trongën. Loi e tro sa isa hnying ka hape: ‘Nemene la aqane tro ni a nyitipu Dravita?’ Tui Dravita, loi e tro sa canga nyinyine lai jol. Nyipiewekë mina fe tro sa trongëne hnyawa la hna qaja hnei Iesu ngöne Mataio 18. (E jë la Mataio 18:15-17.) Ngo tha tro kö sa canga axecië mekun ngöne la easa elëhni. Loi e tro sa sipo ixatua koi Iehova, matre tro sa atreine xomihni me inamacan. Ketre, loi e tro sa catre mejiune kowe la itre sinee së me kapa la ixatua i angatr. (Ite Edomë 17:17) Ngo ame la ka sisitria catr, tre, troa trongëne la itre eamo hna hamën hnei Iehova e hnine la Tusi Hmitrötr.—Ite Edomë 3:5, 6.

14. Pine nemene matre nyipiewekë tro sa e la hna qaja ngöne 2 Timoteo 1:12-16 me 4:6-11, 17-22?

¹⁴ Hapeu, kolo kö a icilekeu hnene la fami epun? Epuni kö a mel ngöne la ketre nöj hna wathebone la huliwa i Iehova? Maine eje hi, loi e tro epuni a e la itre ithuecatre i Paulo, ngöne 2 Timoteo 1:12-16 me 4:6-11, 17-22. * Hnei nyidrëti hna  cinyihane la itre itusi celë e hnine la kalabus.

15. Nemene la nyine tro sa sipone koi Iehova?

¹⁵ (1) Troa thith. Qëmekene troa e la itre xötr, loi e troa pane qaja koi Iehova la jol hne së hna cile kow, me itre aliene hni së. Ketre, tro fe sa sipo Nyidrë matre tro sa xomi ini qa ngöne la tulu i Paulo, me öhne la itre trepene meköt ka troa xatua së.

16. Qejepengöne jë la itre jol ka traqa koi Paulo.

¹⁶ (2) Troa lapa mekun. Pane mekune jë la hna melën hnei Paulo. Hna othi nyidrë me akalabusi nyidrëti e Roma. Nge atre hi Paulo laka, kola troa humuthi nyidrë. Ketre, hnene la itre xaa trejin hna nuaxöji nyidrë, nge kucakuca catre nyidrë.—2 Tim. 1:15.

17. Maine ju, nemene la aqane tro Paulo a ujë?

¹⁷ Maine ju, tro Paulo a mekun laka, maine tha catre cainöje kö nyidrë ke, tha tro kö a akalabusi nyidrë. Maine ju, tro fe nyidrëti a elëhni kowe la itre trahmany ne Asia ka nuaxöji nyidrë, me tha mejiune kowe la itre xaa sinee i nyidrë. Ngo tha celë kö aqane ujë i Paulo. Nemene la ka xatua Paulo tro palahi a mejiune kowe la itre sinee i nyidrë me koi Iehova?

18. Nemene la hna kuca hnei Paulo?

¹⁸ (3) Troa mekun ajuin. Loi e tro sa isa hnying ka hape: “Nemene la ka xatua Paulo troa cile hut?” Ngacama atre hi Paulo laka, nyidrëti a troa mec, ngo tha hnei nyidrëti kö hna thëthëhmine la ka nyipiewekë, ene la troa atrunyi Iehova. Hnei nyidrëti fe hna kuca la loi koi itre xan me catre thith. (2 Tim. 1:3) Ketre, tha hnei Paulo kö hna lapa mekun la aqane nuaxöji nyidrë hnei itre xan. Hnei nyidrëti pe hna hetre hni ne ole kowe la ihnim me ixatua ne la itre sinee i nyidrë. Hnei Paulo fe hna catre inine la Trengewekë i Akötresie. Nge ame la ka sisitria ke, xecie koi Paulo laka, Iehova me Iesu a hnimi nyidrë. Tha hnei nyidroti kö hna nuaxöji nyidrë. Nge tro kö nyidroti a amanathithine la huliwa i nyidrë.

19. Nemene la aqane xatua Paulo hnei Iehova?

¹⁹ Hnei Iehova hna hmekë Paulo göne la itre jol hnei angeic hna troa cile kow. (Itre hu. 21:11-13) Nemene la aqane xatua Paulo hnei Iehova? Hnei Nyidrëti hna sa la itre thithi Paulo me hamë trengecatre i angeic. (2 Tim. 4:17) Ketre, hnei Iehova hna akeukawane la hni Paulo ka hape, tro angeic a kepe manathith qa ngöne la hnei angeic hna akötr. Nge hnei Iehova hna upe la itre sinee i Paulo matre troa xatua angeic.

20. Thenge la Roma 8:38, 39, tro sa nyitipu Paulo tune kaa?

²⁰ (4) Troa trongën. Loi e tro sa isa hnying ka hape: ‘Nemene la aqane tro ni a nyitipu Paulo?’ Tui Paulo, tro fe a hane icilekeu me easë. (Mar. 10:29, 30) Maine easa ajane troa cile hut, loi e tro sa thithi koi Iehova, me mejiune koi Nyidrë, me catre inine la Tusi Hmitrötr. Nge tha tro kö sa thëthëhmine la ka sisitria, ene la troa atrunyi Iehova. Loi e xecie koi së laka, tha tro jë kö Iehova a nuaxöji së. Nge pëkö ewekë ka atreine troa thapa la ihnimi Nyidrë koi së.—E jë la Roma 8:38, 39; Heb. 13:5, 6.

21. Nemene la ka xatua Aya me Hector troa cile hut ngöne la itre jol?

²¹ Ijije hi tro la itre tulu ne la Tusi Hmitrötr a xatua së troa cile hut ngöne la itre jol. Ame Aya, ketre pionie qa Zapo, tre,  hnene la tulu i Iona hna xatua angeic matre tha tro kö a xou troa cainöj ngöne la gaa tru atr. Ame pena Hector, ketre nekötrahmany qa Indonésie ke, tha ka hmi kö la kem me thine i angeic. Hnene la tulu i Rutha hna thue aja koi angeic troa atrepengöi Iehova hnyawa me nyihlue i Nyidrë.

22. Nemene la aqane tro sa kepe thangan qa ngöne la itre jiane huliwa hna hnëkën hnene la organizasio i Iehova?

²² Hnene la itre xaa hlue i Iehova ekö hna hane cile kowe la itre jol tu së enehila. Nemene la ka troa xatua së troa atrepengöi angatre hnyawa? Nyimutre la itre jiane huliwa hna hnëkën hnene la organizasio i Iehova, tune la itre video, itre nyine dreng, itre hna elo, me itre tane mekun hna hape, “Ange Hane Ju Lapaune Tui Angatr.” * Qëmekene tro sa huliwane itre ej, loi e tro sa pane sipo Iehova troa xatua së troa xomi ini qa ngön me trongën. Loi e tro sa lapa mekun la mele ne la hlue i Iehova ekö. Tro fe sa mekun ajuine la hnei angeic hna kuca, memine la aqane xatua angeic hnei Iehova. Nyipiewekë tro sa xomi ini me trongën ngöne la mele së. Ketre, loi e tro sa olene koi Iehova la ixatua i Nyidrë, me hamë ithuecatr koi itre xan.

23. Nemene la hna thingehnaean hnei Iehova ngöne Isaia 41:10, 13?

²³ Tha ka hmaloi la mele ngöne la fen hna musinën hnei Satana. (2 Tim. 3:1) Ngo tha tro kö sa hnehengazo me xou. Atre hnyawa hi Iehova la itre jol hne së hna cile kow. Hnei Nyidrëti hna thingehnaean laka, tro Nyidrëti a ee së memine la ime maca i Nyidrë. (E jë la Isaia 41:10, 13.) Haawe, loi e xecie koi së laka, tro kö Iehova a xatua së. Maine tro palahi sa thele ixatua jëne la itre tulu ne la Tusi Hmitrötr, tro hë sa catre xomihni me cile hut ngöne la nöjei pengöne jol!