1. Pine nemene matre hnei Iesu hna sipo Iehova troa thupëne la itretre drei nyidrë?

 AME ngöne lo jidri tixenuë i Iesu e celë fen, hnei nyidrëti hna thithi sane la itretre drei nyidrë. Atre hi nyidrëti laka, tro angatr a ixelë memine la itre jol. Tru la ihnimi Iesu kowe la itre sinee i nyidrë, matre hnei nyidrëti hna sipone la Keme i nyidrë troa “thupë angatr pine la atre ka ngazo.” (Ioane 17:14, 15) Ketre, atre hi Iesu laka, ame hë la nyidrëti a elë e hnengödrai ke, tro palahi Satana a isi memine la itre hlue i Iehova. Celë hi matre, nyipiewekë troa thupë angatr.

2. Pine nemene matre xecie koi së laka, tro palahi Iehova a sa la itre thithi së?

² Hnei Iehova hna sa la thithi Iesu pine laka, Nyidrëti a hnimi Iesu. Maine tro sa isine troa amadrinë Iehova, tro hë Nyidrëti lai a hnimi së me sa la itre thithi së ngöne la easa sipo ixatua. Eje hi, ketre Kem ka ihnimi Iehova, matre Nyidrëti a thupëne la itre nekö i Nyidrë. Celë hi aliene la ëje i Nyidrë.

3. Pine nemene matre nyipiewekë tro Iehova a thupë së enehila?

³ Nyipiewekë catr enehila tro Iehova a thupë së. Eje hi, ase hë helë Satana qa hnengödrai nge “atraqatr la trenge elëhni i angeic.” (Hna ama. 12:12) Hnei Satana hna thoi koi itre xan, matre tro angatr a qanangazo së me mekun ka hape, “angatr a huliwa koi Akötresie.” (Ioane 16:2) Ame pena la itre xan ka tha lapaune kö koi Akötresie, angatr a qanangazo së ke, tha ceitu së kö me angatr. Ngo tha tro kö sa xou. Pine nemen? Pine laka, öni Tusi Hmitrötr: “Ka mele nyipici Joxu, tro kö nyidrëti a aegöcatrenyi nyipunie,  me thupë nyipunie qa ngöne la atre ka ngazo.” (2 Thes. 3:3) Nyimutre la itre aqane thupë së hnei Iehova. Tro sa ce wang la luetre.

4. Thenge la Efeso 6:13-17, nemene la hnei Iehova hna hamën matre thupë së?

⁴ Hnei Iehova hna hamë së la iheetre ne isi, matre thupë së qa ngöne la itre hnö i Satana. (E jë la Efeso 6:13-17.) Eje hi laka, ka catre la iheetre ne isi cili, ngo tro ej a thupë së, e hne së hna heetrën asë la nöjei götranene lai iheetr. Nemene la hna nyihatrene hnene la itre igötranene la iheetre cili?

5. Nemene la hna nyihatrene hnene la beletr ne la nyipici, nge pine nemene matre nyipiewekë tro sa othe hnyawa ej?

⁵ Ame la beletr ne la nyipici, kola nyihatrene la itre nyipici ka ej e hnine la Trengewekë i Akötresie, ene la Tusi Hmitrötr. Pine nemene matre loi e tro sa othe hnyawa lai beletr? Pine laka, Satana la “keme ne la thoi.” (Ioane 8:44) Itre macatre ne angeic a thoi me “amenune la fen asë.” (Hna ama. 12:9) Ame pe, itre nyipici qa hnine la Tusi Hmitrötr a thupë së qa ngöne la itre trengathoi Satana. Maine easa ajane troa othe hnyawa la beletr, loi e tro sa atre la nyipici göi Iehova, me nyihlue i Nyidrë “thenge la uati hmitrötr me nyipici,” me amamai tulu ngöne la mele së.—Ioane 4:24; Efe. 4:25; Heb. 13:18.

6. Nemene la hna nyihatrene hnene la imano ne la meköt, nge pine nemene matre nyipiewekë tro sa heetrën ej?

⁶ Ame la imano ne la meköt, kola nyihatrene la itre hna amekötin hnei Iehova. Pine nemene matre nyipiewekë tro sa heetrëne la imano cili? Ame la itre sooc, kola thupëne la wenethëhmi angatr hnene la imano. Ketre tu së fe, imano ne la meköt a thupëne la itre hni së, ene la atr ka ej e kuhu hni, qa ngöne la ihuli ne la fen. (Ite Edomë 4:23) Iehova a ajane tro sa hnimi Nyidrë me nyihlue i Nyidrë hnene la hni së ka pexej. (Mat. 22:36, 37) Celë hi matre, Satana a thele tro sa hnime la itre ewekë ne fen, itre hna methinën hnei Iehova. Aja i Satana tro sa lue hni. (Iako. 4:4; 1 Ioane 2:15, 16) Ketre, angeice fe a akötrë së me qanangazo së matre tro sa triane la ketre wathebo i Iehova.

7. Nemene la nyine tro sa kuca matre troa heetrëne la imano ne la meköt?

⁷ Maine easa ajane troa heetrëne la imano ne la meköt, loi e tro sa kapa la itre hna amekötin hnei Iehova göi loi me ngazo, me trongëne itre ej ngöne la mele së. (Sal. 97:10) Itre xan a mekun ka hape, itre wathebo i Iehova a othe la mele së. Ngo maine tha trongëne hë së itre ej, tro hë sa tune la ketre sooc ka unatrij la mano i angeic ngöne la isi ke, hace palaha. Ame kowe la itre hlue i Iehova, “tha ka hace kö” la itre wathebo i Nyidrë. Atre hi angatr laka, jëne mele i angatre lai.—1 Ioane 5:3.

8. Kola hapeue la troa otrë ibutr, ene la troa catre tro fë la maca ka loi?

⁸ Paulo mina fe a ithuecatre koi së troa otrë ibutr, ene la troa catre tro fë la maca ka loi ne tingeting. Kolo lai a hape, loi e tro palahi sa catre cainöjëne la maca ka loi ne la Baselaia. Ame la easa qeje Tusi Hmitrötr koi itre xan, kola acatrene la lapaune së. Eje hi, kola ithuecatre koi së la easa öhn laka, itre hlue i Iehova e cailo fen a catre cainöjëne la maca ka loi. Angatr a cainöj kowe la itre sine huliwa, itre sine ini, ngöne la itre magazë ka tru, ngöne la itre hnalapa trootro, ngöne la angatr a komisio, ngöne la angatr a wang  la itre fami ka tha hmi kö, ngöne la angatr a porotrik, me ngöne la angatr a confiné. Maine tro sa xou me nue la huliwa ne cainöj, tro hë sa tune la ketre sooc ka uni butr ngöne la hna isi. Tro ha eatr la lue waca i angeic, nge jole hë koi angeic troa drengethenge la tane isi.

9. Pine nemene matre nyipiewekë tro sa xome hnyawa la petr ka tru ne la lapaun?

⁹ Ame la petr ka tru ne la lapaun, kola nyihatrene la lapaune së koi Iehova. Eje hi, xecie hnyawa koi së laka, tro kö Akötresieti a eatrëne la itre hnei Nyidrëti hna thingehnaean. Celë hi ka ‘thupë së qa ngöne la itre ewekë hna hna koi së.’ Pine nemene matre nyipiewekë tro sa xome hnyawa la ipetr ka tru? Pine laka, kola thupë së qa ngöne la itre trengathoi ne la itre ka iamenumenu me itre ka hnyimasai së. Maine tha catre kö la lapaune së, thatreine hë së drengethenge Iehova, ngöne la itre xan a huli së troa kuca la ngazo. Eje hi, ame la easa cilëgöline la lapaune së qëmekene la itre sine huliwa me itre sine ini ke, easë hi lai a xome la petre së. (1 Pet. 3:15) Easë fe a xome hnyawa la petre së ngöne la easa nue la ketre huliwa hna nyithupene hnyawa, matre troa catre huliwa  i Akötresie. (Heb. 13:5, 6) Ketre, ame la easa mele nyipici ngöne la icilekeu, easë hi lai a xome la petre së matre troa thupë së.—1 Thes. 2:2.

10. Nemene la hna nyihatrene hnene la itrapetr ne iamele, nge pine nemene matre loi e tro sa petrën ej?

¹⁰ Ame la itrapetr ne iamele, kola nyihatrene la mejiune së qaathei Iehova. Eje hi, xecie hnyawa koi së laka, tro kö Iehova a amanathithine la itre ka kuca la aja i Nyidrë, me amelene hmaca la itre ka mec. (1 Thes. 5:8; 1 Tim. 4:10; Tito 1:1, 2) Ame la itre sooc, angatr a petrëne la itre trapetr, matre troa thupëne la he i angatr. Ketre tu së fe, kola thupëne la itre mekuna së hnene la mejiune kowe la iamele. Tune kaa? Ej a xatua së troa lapa mekun la itre hna thingehnaean hnei Akötresie, me cile catr ngöne la itre jol. Nemene la nyine tro sa kuca matre troa petrëne la itrapetr ne iamele? Loi e tro sa goeëne la itre ewekë tui Iehova. Eje hi, tha tro kö sa mejiun kowe la itre ewekë me itre mo, ngo koi Akötresieti pe.—Sal. 26:2; 104:34; 1 Tim. 6:17.

11. Nemene la hna nyihatrene hnene la taua ne la uati hmitrötr, nge pine nemene matre nyipiewekë tro sa huliwan ej?

¹¹ Ame la taua ne la uati hmitrötr, kola nyihatrene la Trengewekë i Akötresie, ene la Tusi Hmitrötr. Jëne la taua cili, ijije hi tro sa lepetrije la nöjei mekun ka thoi, me thapa la itre atr qa ngöne la itre ini ka thoi, me itre hna majemine kuca ka ngazo. (2 Kor. 10:4, 5; 2 Tim. 3:16, 17; Heb. 4:12) Maine easa ajane troa huliwane hnyawa la taua cili, loi e tro sa inine la Tusi Hmitrötr, me kapa la itre ini hna hamën hnene la organizasio i Iehova. (2 Tim. 2:15) Eje hi, hnei Iehova hna hamë së la iheetre ne isi ne la lapaun. Ngo hetre itre xaa aqane thupë së hnei Nyidrë. Tune kaa?

12. Drei fe la ka troa xatua së, nge pine nemen?

¹² Atre hi la ketre sooc ka hape, thatreine kö tro angeic a isi caas. Nyipiewekë tro angeic a ce isi memine la itre xaa sooc. Ketre tune fe, maine easa ajane troa isi me Satana memine la itre sine xöle i angeic, nyipiewekë la ixatua ne la itre trejin. Eje hi, ketre ahnahna qaathei Iehova la “lapa ne la itre trejin asë.” Tro palahi angatr a ceme easë.—1 Pet. 2:17.

13. Thenge la Heberu 10:24, 25, nemene la eloine la itre icasikeu?

¹³ Kola xatua së hnene la itre icasikeu. (E jë la Heberu 10:24, 25.) Ame la easa kucakuca, itre icasikeu a ithuecatre koi së. Eje hi, easa kepe thangane qa ngöne la itre mekun hna hamën hnene la itre trejin. Ketre, itre cainöj me itre hnëqa i angatr a ithuecatre koi së tro palahi a catre nyihlue i Iehova. Nge kola akeukawanyi së la easa porotrik memine la itre trejin. (1 Thes. 5:14) Ketre, jëne la itre icasikeu, easa xatuane la itre xan. Celë hi ka hamë madrine koi së. (Itre hu. 20:35; Rom. 1:11, 12) Ngo hetre itre xaa eloine la itre icasikeu. Itre ej a hnëkë së kowe la isi, me xatua së troa maca troa cainöj me hamë ini. Itre eje fe a xatua së troa huliwane hnyawa la Itre Jia Ne Cainöj. Haawe, loi e tro sa hnëkëne hnyawa la itre icasikeu, me drenge hnyawa itre ej, me trongëne la itre hne së hna inin. E cili, tro hë sa “ketre nyipi sooc i Keriso Iesu.”—2 Tim. 2:3.

14. Drei fe la ka xatua së?

¹⁴ Kolo fe a xatua së hnene la itre milio lao angela. Pane mekune jë la hna atreine kuca hnene hi la caa angela. (Is. 37:36) Nge the qaja palaha la trongene  isi ne la itre angela! Eje hi, pëkö atr maine dremoni ka atreine cil qëmekene la trongene isi Iehova. Önine la ketre atr, maine easë caasi hi me Iehova, pëkö ka atreine cile koi së ke, alanyimu kö the së. (A. ame. 6:16) Haawe, tha tro kö sa kucakuca pine la aqane ujë me aqane ithanata ne la ketre sine huliwa, maine ketre sine ini, maine pena ketre sinee ka tha hmi kö. Eje hi, tha easë caasi kö. Maine tro palahi sa drengethenge Iehova, tro kö Nyidrëti a xatua së.

15. Thenge la Isaia 54:15, 17, pine nemene matre pëkö ka atreine troa ahumune la itre hlue i Akötresie?

¹⁵ Nyimutre la itre kepin matre kola methinë së hnene la fene i Satana. Eje hi, tha easë kö a kuci politik, me isi. Ketre, easa cainöjëne la ëje i Akötresie me trongëne la itre wathebo i Nyidrë. Ame koi së, Baselaia i Nyidrëti hmekuje hi la ka troa hamën la tingeting. Easë fe a amamane ka hape, ka thoi nge ka ihumuth la tane la fen celë. (Ioane 8:44) Ketre, easë fe a qaja ka hape, easenyi hë matre patre pi la fene i Satana. Eje hi, thatreine kö Diabolo me itre sine xöle i angeic troa ahumunyi së. Tro palahi sa atrunyi Iehova! Nyipici laka, ka catre lae Satana, ngo thatreine kö angeic troa sawa la huliwa ne cainöj e cailo fen. Iehova a thupëne la itre hlue i Nyidrë.—E jë la Isaia 54:15, 17.

16. Nemene la hnei Iehova hna troa kuca kowe la itre hlue i Nyidrë ngöne la akötr atraqatr?

¹⁶ Nemene la hne së hna lapa treqen? Ame ngöne la akötr atraqatr, tro Iehova a thupë së ngöne la lue götran. Ame la hnapan, tro Iehova a thupë së ngöne la itre joxu ne la fen a troa lepi Babulona Atraqatr, ene la itre hmi ka thoi. (Hna ama. 17:16-18; 18:2, 4) Nge ame la hnaaluen, tro Nyidrëti a thupë së ngöne la kola troa apatrene la fene i Satana e Amagedro.—Hna ama. 7:9, 10; 16:14, 16.

17. Pine nemene matre nyipiewekë tro sa qale catre koi Iehova?

¹⁷ Maine tro sa qale catre koi Iehova, thatreine kö tro Satana a apatrenyi së. Eje hi, angeice la hna troa apatren. (Rom. 16:20) Haawe, heetrëne jë la iheetre ne isi, nge the unatrije pi kö! Ketre, the isi caasi pi kö. Xatuane jë la itre trejin, nge trongëne jë la itre hna amekötin hnei Iehova. E cili, tro la Keme së ka tru ihnimin a xatua së me thupë së.—Is. 41:10.