1-2. Pine nemen matre tha tro kö epuni a kucakuca e tha ijiji epuni palakö troa xomi bapataiso? (Wange ju la icetrön.)

 MAINE aja i epun troa xomi bapataiso, ke ketre mekune lai ka lolo nyine troa eatrën. Ka hnëkë kö epun troa xomi bapataiso? Maine ka loi hi koi epun me kowe la itre qatre thup, ke the cile kö. E cili, tro hë epuni lai a kapa la itre manathith ngöne la huliwa i Iehova.

² Ngo tro epuni a ujë tune kaa e traqa ju qaja koi epun ka hape, tha ijiji epuni palakö troa xomi bapataiso? Maine pena epuni kö la ka sipu öhn. The kucakuca kö, ke ngacama jeune ju hë epun maine qatr, ngo ijiji epuni hi troa xomi bapataiso.

3. Nemen la hnying ne la atre Aithiope koi Filipo? Nge nemen la ketre hnying hna amejëne e cili? (Itre Huliwa 8:36, 38)

³ E jë la Itre Huliwa 8:36, 38. Önine la atre Aithiope koi Filipo ka hape: “Nemene pe kö la ka ajolë ni troa xomi bapataiso?” Aja i angeic troa xomi bapataiso. Ngo hapeu, ijiji angeice kö?

4. Nemen la ka amaman laka, tru la aja ne la atre Aithiope troa atre Iehova hnyawa?

⁴ Hnene la atre Aithiope hna “tro troa hmi e Ierusalema.” (Itre hu. 8:27) Angeice fe la ketre trenyiwa ka kapa la hmi angetre Iudra. Hnei angeic hna thele troa atre Iehova jëne la Itre Hna Cinyihan Qene Heberu. Tru la aja i angeic troa atre Iehova hnyawa. Nemen la hnei angeic hna kuca, lo Filipo a öhnyi angeic ngöne la gojeny? Angeic a e catrëne la ketre itus hna ewath hna cinyanyin hnei Isaia perofeta.  (Itre hu. 8:28) Itre ini lai ka jui qaathei Akötresie. Tha angeice kö a inine hmekuje hi la itre ini ka co, ngo angeice fe a thele ajuin.

5. Nemen la hna kuca hnene la atre Aithiope göne la itre ini hnei angeic hna kapa?

⁵ Angeic la ketre “atre ka draië fei Kanadaki, isola ne Aithiope, ke angeic a thupëne la itre mo i eahlo.” (Itre hu. 8:27) Celë hi matre, tru catre la hnëqa me itre huliwa i angeic. Ngo hnei angeic hna xomi ijine troa atrunyi Iehova. Tha angeic hmekuje kö a inine la Itre Hna Cinyihan, ngo angeic fe a trongëne itre ej. Pane mekune jë epuni la angeic a tro qa Aithiope troa hmi e Ierusalema. Hnei angeic hna nue trengecatr, me traem me mo matre troa tro Ierusalema troa atrunyi Iehova.

6-7. Hnene la atre Aithiope hna acatrene tune kaa la ihnimi angeic koi Iehova?

⁶ Hnei Filipo hna ce thawa memine la atre Aithiope la itre ini ka sisitria hnei angeic hna thatre. Hnei Filipo hna qaja amamane koi angeic ka hape, drei la Mesia. (Itre hu. 8:34, 35) Hna ketri angeic la angeic a atre la hnei Iesu hna kuca koi angeic. Matre nemene hë la thangane lai? Maine ju, tro hi angeic a lapa ngöne la hmi angetre Iudra. Ngo, hna kökötr la ihnimi angeic koi Iehova me Iesu. Celë hi ka saze la mele i angeic, ene pe, hnei angeic hna xomi bapataiso me xötrethenge Iesu. Öhne hi Filipo laka, ijiji hë kowe la atre Aithiope troa xomi bapataiso, ame hna bapataiso angeice jë.

⁷ Ame la aqane tro epuni a hnëkë kowe la bapataiso, ke ene la troa xötrethenge la tulu ne la atre Aithiope. Tro hë epuni e cili a qaja ka hape, “Nemene pe kö la ka ajolë ni troa xomi bapataiso?” Pi tro catre la atre Aithiope a inine la Itre Hna Cinyihan, me trongëne itre ej, me thele troa acatrene palahi la ihnimi angeic koi Iehova. Tro sa ce wange la aqane tro epuni a xötrethenge la tulu i angeic.

8. Nemen la hna uku epun troa kuca hnene la hna qaja ngöne Ioane 17:3?

⁸ E jë la Ioane 17:3. Hapeu, hnene kö la itre trengewekë i Iesu celë hna uku epun troa ini Tus? Eje hi, alanyim la itre hna ketr hnene la xötre celë. Hapeu, kolo fe kö a uku së troa catre inine la Tusi Hmitrötr? Öö. Hetre nyine tro palahi sa inine göi Akötresie. (Ate cai. 3:11) Ame elany ngöne la paradraiso, ke tro palahi sa inine troa atrepengöi Iehova hnyawa. Nge jëne lai, tro hë sa easenyi catre koi Nyidrë.—Sal. 73:28.

9. Nemen la nyine tro epuni a kuca e atre hë epun la itre pane ini?

⁹ Maine aja së troa atre Iehova, ke loi e  troa pane inine la itre ini ka nyitrepene la Tusi Hmitrötr. Kolo hna qaja hnei Paulo ngöne la itre tusi angeic kowe la angetre Heberu ka hape, “itre pane ini” hna aceitunën me melek ka ithuane la medreng. (Heb. 5:12; 6:1) Hnei angeic hna hmekën la itre keresiano laka, tha tro hmekuje kö a inine la itre pane ini cili. Loi e tro fe angatr a inine la itre ini ka jui ne la Tusi Hmitrötr. Aja i epuni kö troa atre la itre nyipici cili? Nge, aja i epuni fe kö tro palahi a atrepengöi Iehova hnyawa memine la aja i Nyidrë?

10. Pine nemen matre jole koi itre xan troa ini tus?

¹⁰ Alanyim hnei ka qaja ka hape, jole catre koi angatr troa e me inine la ketre itus. Ame epuni ke? Hnei epuni kö hna inine troa e hnyawa me ini tus ngöne uma ne ini? Hetre thangane kö la hnei epun hna ini? Maine öhne hi epun laka, jole catre koi epun? Maine eje hi , ke tha epuni casi kö. Ngo ame pe, ijije hi tro Iehova a xatua epun, ke ka pexeje Nyidrë, nge Nyidrëti la Atre Ini Ka Tru.

11. Pine nemen matre Iehova la “Atre Ini Ka Tru”?

¹¹ Iehova la “Atre Ini Ka Tru.” (Is. 30:20, 21) Ka atreine itreqe Nyidrë, ka loi thiina, nge ka itrotrohni. Nyidrëti a thele la ka loi thene la itre ka ini. (Sal. 130:3) Nge, tha Nyidrëti kö a upi angatr troa kuca la ketre ewekë hnei angatr hna thatreine kuca. The thëthëhmine pi kö laka, hnei Nyidrëti hna hamë epun la ketre ahnahna, ene la atuat i epun. (Sal. 139:14) Hnei Nyidrëti hna xupi së memine la aja troa inine la itre ewekë. Ketre, aja i Nyidrë tro palahi sa madrin la easa kapa la itre ini. Celë hi matre, nyipiewekë enehila troa acatrene la “aja” së troa atre la itre ini qa hnine la Tusi Hmitrötr. (1 Pet. 2:2) Thele jë troa hetre mekun nyine troa eatrën. Ketre isine jë troa eatrëne la porogaram ne e me ini Tusi Hmitrötre i epun. (Ios. 1:8) Nge jëne la ixatua i Iehova, tro hë epuni lai a e Tusi Hmitrötr lapa, me atrepengöi Nyidrëti hnyawa.

12. Hnauën laka, nyipiewekë troa lapa mekun la mel me huliwa ne cainöje i Iesu?

¹² Xomi ijine jë troa lapa mekun la mel me huliwa ne cainöje i Iesu. Maine aja së troa catre nyihlue i Iehova ngöne la hneijine celë ka ngazo, nyipiewekë tro sa trongëne hnyawa la itre thupa ca i Iesu. (1 Pet. 2:21) Hnei nyidrë hna qaja amaman kowe la itretre drei nyidrë la itre jol hnei angatr hna troa cile kow. (Luka 14:27, 28) Ngo, xecie koi nyidrë laka, tro kö angatr a elë hun itre ej, tune la aqane ngaane nyidrëti la fen. (Ioane 16:33) Haawe, xomi ijine jë troa inine hnyawane la mele i Iesu, me xötrethenge la tulu i nyidrë.

13. Nemen la nyine tro epun a catre sipon koi Iehova, nge pine nemen?

¹³ Tha tro hmekuje kö së a hetreny la atrehmekun. Ka nyipiewekë la atrehmekun, e tro ej a xatua së troa atre Iehova hnyawa me huliwane la itre thiina i Nyidrë. Eje fe a xatua së troa acatrene la ihnim me lapaune së koi Iehova. (1 Kor. 8:1-3) Catre jë sipo Iehova troa nyixane la lapaune i epun, ngöne la epuni a ini Tusi cas. (Luka 17:5) Pi tro catre Iehova a sa la itre thithi cili. Tro la lapaun hna nyitrepene hnene la nyipi atrehmekun a xatua epun troa imelekeu hnyawa me Iehova.—Iako. 2:26.

14. Tune kaa la aqane amamane Peteru la enyipiewekën troa trongëne la hne së hna inin? (Wange ju fe la iatr.)

¹⁴ Hnei Peteru aposetolo hna qaja la enyipiewekëne tro la itretre drei Iesu a trongëne la hnei angatr hna inin. Matre hnei  angeic hna xome la tulu i Noa. Hnei Iehova hna qaja koi Noa laka, tro Nyidrëti a apatrene la itre atr ka ngazo jëne la iwë atraqatr. Maine aja i Noa me fami nyidrë troa amele angatr, ke tha tro hmekuje kö angatr a atre laka, easenyi hë la iwë atraqatr. Öni Peteru göne la ijin qëmeken troa traqa la Iwë Atraqatr ka hape, “hmekune la kola cane la aka.” (1 Pet. 3:20) Eje hi, thenge la hna qaja hnei Akötresie, hnei Noa me fami nyidrë hna cane la aka, ketre he atraqatr. (Heb. 11:7) Thupene lai, hnei Peteru hna aceitunëne la huliwa hna kuca hnei Noa memine la bapataiso. Öni angeic: “Kolo fe a amele nyipunie enehila hnene la ewekë celë, ene la bapataiso.” (1 Pet. 3:21) Kolo lai a hape, ame la easa hnëkë troa xomi bapataiso, ke ceitune hi lai memine la huliwa hna kuca hnei Noa me fami nyidrë matre cane la aka ngöne la itre macatre. Haawe, nemen hë la nyine tro epuni a kuca matre hnëkë kowe la bapataiso?

15. Tune kaa la aqane tro sa amaman ka hape, easa nyipi ietra?

¹⁵ Ame la ketre nyine tro sa pane kuca, ke ene la troa ietran la itre ngazo së. (Itre hu. 2:37, 38) Maine tro epuni a nyipi ietra, ke tro ha saze la aqane ujë i epun. Hapeu, hnei epuni kö hna nuetrij la itre huliwa hna methinën hnei Iehova, tune la kuci ngazo, ufi sixa maine iqaqa? (1 Kor. 6:9, 10; 2 Kor. 7:1; Efe. 4:29) Ngo maine tha ase palakö epun nuetrij itre ej, ke catre jë huliwa matre saze. Sipo ixatua jë kowe la ka hamë ini koi epun, maine itre qatre thup pena. Maine epuni palakö thei kaka me nenë, nge epuni a isi memine la ketre aja ka ngazo, ke sipo ixatua jë thei nyidro.

16. Nemen la nyine tro sa kuca matre catre nyihlue i Iehova?

¹⁶ Nyipiewekë mina fe tro sa hetre hna majemin ka loi ngöne la huliwa i Iehova. Kola qaja la troa sine lapan la itre icasikeu me hane qeje mekun. (Heb. 10:24, 25) Nge maine ijiji epuni hë troa hane cainöj, ke catre jë cainöj. E tro epuni a cainöj lapa, ke tro hë epuni lai a pi cainöj. (2 Tim. 4:5) Maine epuni palakö thei kaka me nenë, hnyinge jë ka hape: ‘Eni kö a sine la itre icasikeu me cainöj, ke hna upi ni hnei nyidro? Maine eni a kuca qa kuhu hning?’ Ame la epuni a kuca la itre huliwa i Iehova  qa kuhu hni, ke epuni hi lai a amamane la lapaun, me ihnim me hni ne ole i epun koi Nyidrë. Epuni e cili a kuca “la itre huliwa ka nyipici koi Akötresie,” itre ahnahna lai koi Nyidrë. (2 Pet. 3:11; Heb. 13:15) Ame asë hi la itre ahnahna hne së hna hamën qa kuhu hni, ke ka amadrinë Nyidrë. (Wange ju fe la 2 Korinito 9:7.) Easa kuca la itre huliwa i Iehova, ke aja i easë troa hamë Nyidrë la ka sisitria.

17-18. Nemen la thiina ka sisitria ka troa xatua epun troa xomi bapataiso, nge pine nemen? (Ite Edomë 3:3-6)

¹⁷ Ame la epuni a isine troa xomi bapataiso, ke troa traqa koi epun la itre itupath. Maine jë tro la itre xan a hnyima fë la hmi epun, maine pena troa icilekeu me qanangazo epun. (2 Tim. 3:12) Maine epuni a isi memine la ketre hna majemine ka ngazo, ke ijije hi tro hmaca epuni a kei. Nge e cili, tro epuni a elëhni, ke thatreine kö epun canga nuetrij la itre hna majemine cili. Nemen la ka troa xatua epun troa cile catr? Troa xatua epun hnene la ketre thiina ka sisitria, ene la ihnimi epun koi Iehova.

¹⁸ Ame la ihnimi epun koi Iehova, ke celë hi thiina ka lolo nyine tro epuni a hetreny. (E jë la Ite Edomë 3:3-6.) Maine ka catrecatre la ihnimi epun koi Iehova, ke tro lai a xatua epun troa cile kowe la itre itupath. Hnei Tusi Hmitrötr palahi hna qaja la ihnimi nyipici Iehova kowe la itre hlue i Nyidrë. Pine laka, ka tru catr la ihnimi Nyidrëti koi angatr, matre tha hnei Nyidrëti kö hna nuetriji angatr. (Sal. 100:5) Ketre, hna xupi epun hnaiji Akötresie, matre ijiji epuni fe troa hetreny la thiina cili. (Gen. 1:26) Tune kaa?

19. Tro epuni a acatrene tune kaa la hni ne ole i epun kowe la itre hnei Iehova hna kuca koi epun? (Galatia 2:20)

¹⁹ Amamane jë la hni ne ole i epun koi Iehova. (1 Thes. 5:18) Hnyinge jë e nöjei drai ka hape, ‘Tune kaa la aqane hnimi ni hnei Iehova?’ Thupene lai, olene jë koi Nyidrë, nge qaja asë jë la itre ewekë hnei Nyidrëti hna kuca koi epun. Tui Paulo aposetolo, goeëne jë la itre hatrene ihnimi Iehova ceitu me itre ahnahna i Nyidrëti koi epun. (E jë la Galatia 2:20.) Nge hnyinge jë fe ka hape, ‘Hapeu, tha celë kö lai ka upi ni troa hnimi Nyidrë?’ Tro la ihnimi epun koi Iehova a xatua epun  troa cile kowe la itre itupath me xomihnine la itre jol. Nge, tro fe lai a xatua epun troa hetre hna majemine ka loi ngöne la huliwa i Iehova. Celë hi aqane tro epuni a amamane la ihnimi epun koi Nyidrë, e nöjei drai.

20. Kola hapeue la troa nue mel koi Iehova, nge pine nemen matre ka sisitria la mekune cili?

²⁰ Troa traqa la ijin laka, tro la ihnimi epun koi Iehova a uku epun troa thith me nue la mele i epun koi Nyidrë. Ame la epun a nue mel koi Nyidrë, ke epuni hi lai a sisiny troa mele nyipici koi Nyidrë ngöne la itre ijine loi me ngazo. Ketre, epuni a amamane ka hape, ewekë i Nyidrëti hë epun uti hë epin. Tha nyipiewekë kö troa amexeje hmaca la hne së hna sisiny. Eje hi, ame la troa nue mel koi Iehova, ke tha nyine tro kö a xom ahmalohmaloeën. Nyimutre la itre mekun hnei epun hna troa xom ngöne la mele i epun. Ngo ame kö la ka sisitria, ke ene la troa nue mel koi Iehova. (Sal. 50:14) Tro Satana lai a thel troa ananazijëne la ihnimi epun koi Iehova, matre tha tro kö epuni a mele nyipici koi Nyidrë. Ngo, catre pi pe! (Iobu 27:5) Tro la ihnimi epun koi Iehova a xatua epun troa metrötrëne la hnei epun hna sisiny me easenyi catre koi Nyidrë.

21. Pine nemen matre ame la easa xomi bapataiso, ke easë hi lai a nyiqane huliwa me Iehova?

²¹ Maine ase hë epun nue mel koi Iehova, qaja jë kowe la itre qatre thup ne la ekalesia, la aja i epun troa xomi bapataiso. Ame la bapataiso, ke celë hi ka fe gojenyi epun kowe la nöjei huliwa i Iehova. Haawe, nyiqane acatrene jë la ihnimi epun koi Nyidrëti enehila. Nge, thele jë la itre mekun nyine troa eatrën ka troa xatua epun ngöne la götrane cili. Aqane tro epuni hi lai a hnëkë kowe la bapataiso. Ketre ijine madrine ka tru la epuni a xomi bapataiso, ngo epuni petre hi lai a nyiqane ce huliwa me Iehova. Epi tro la ihnimi epun koi Iehova me Iesu a catr uti hë epine palua!