1-2. Nemene la ka traqa ngöne la kola xomi bapataiso hnene la itre ka ini Tus? Nge nemene la hne së hna troa ce wang ngöne la tane mekune celë?

 HNEI epuni kö hna hane sine la ketre ijine bapataiso? Mama hi ngöne la aqane sa i angatre la lue hnying ka hape, tru la aja i angatr troa xomi bapataiso. Madrine catr la fami me itre sinee i angatr. Nge, ame la angatr a mejë qa hnine la tim, ke kola xexe lai iatr nge madrine catre angatr. Ame e nöjei wiik, traqa koi itre thauzan lao atr ka nue mel koi Iehova me xomi bapataiso.

² Nge ame epuni ke? Maine epuni a mekun troa xomi bapataiso, ceitu epuni hi memine la lai ngöne la fene celë hna ajidrin, ke epuni a “thele Akötesie.” (Sal. 14:1, 2) Hna kuca la tane mekune celë koi epun, ngacama ka jeune ju hë epun maine qatr. Ngo thatraqane fe la itre ka xomi bapataiso hë, ke aja i angatr troa catre nyihlue i Iehova uti hë la pun. Haawe, tro sa ce wange la köni xaa kepin matre easa nyihlue i Iehova.

3. Pine nemen matre itre hlue i Iehova a ajane la nyipici me thiina ka meköt? (Salamo 119:128, 163)

³ Hnei Iehova hna upe la itre hlue i Nyidrë troa ‘ajane la nyipici.’ (Zaka. 8:19) Nge hnei Iesu hna ithuecatr kowe la itretre drei nyidrë troa thele catrëne la thiina ka meköt. (Mat. 5:6) Celë hi matre, aja së palahi troa kuca la loi me meköt qëmeke i Akötresie. Hapeu, epuni kö a hniin la nyipici me meköt? Öö. Methi epun la thoi me itre ewekë ka ngazo. (E jë la Salamo 119:128, 163.) Ame la atre thoi, ke ka nyitipu Satana, atre musinëne la fen. (Ioane 8:44; 12:31) Ame la aja i Satana, ke ene la troa adrone la ëje ka hmitrötre i Akötresie. Angeic a silitrengathoi Iehova qaane lo kola icilekeu  e Edrena. Nge öni angeic göi Iehova ka hape, Atre Mus ka pi tru me ka huliwa thoi, nge Nyidrëti a xomehnöth la mele ne la itre atr. (Gen. 3:1, 4, 5) Hnene la itre trengathoi cili, matre itre atr a qajangazo Akötresie. Maine tro la itre atr a thipetrije la nyipici, ke tro hë Satana lai a uku angatr troa kuca la nöjei ewekë ka ngazo.—Rom. 1:25-31.

4. Iehova a amamane tune kaa ka hape, “Akötesieti ka nyipici” Nyidrë? (Wange ju fe la iatr.)

⁴ Iehova la “Akötesieti ka nyipici,” matre Nyidrëti a amamane la nyipici kowe la itre hnei Nyidrëti hna hnim. (Sal. 31:5) Jëne lai, Nyidrëti a amele angatr qa ngöne la itre trengathoi Satana. Nyidrëti fe a ini angatr troa huliwa nyipici me thiina ka meköt. Celë hi matre, ka tingetinge la hni angatr, nge kola qaja aloinyi angatr. (Ite edomë 13:5, 6) Hapeu, tha celë fe kö la ka traqa koi epun, lo epuni a nyiqane ini Tus? Hnei epun hna öhn laka, ka hetre thangane catr la itre trepene meköti Nyidrë kowe la nöjei atr me koi epuni fe. (Sal. 77:13) Haawe, aja i epun troa kuca la loi me meköt qëmekei Akötresie. (Mat. 6:33) Ketre, aja i epun troa isigöline la nyipici me ahmitrötrëne la ëje i Iehova qa ngöne la itre trengathoi Satana. Ngo, tro epuni lai a kuca tune kaa?

5. Tro epuni a isigöline tune kaa la nyipici me meköt?

⁵ Ijiji epun hi troa iëne la aqane mele i epun, kösë epuni a qaja ka hape, “Eni a thipetrij la itre trengathoi Satana me isigöline la nyipici. Ajang troa lapa fene la musi Iehova, me kuca la loi me meköt qëmekei Nyidrë.” Ngo, tro epuni a amaman tune kaa ka hape, ce epun me Iehova? Loi e tro epuni a nue la mele i epun koi Nyidrë jëne la thith me xomi bapataiso. Eje hi, tro la ihnimi së kowe la nyipici me thiina ka meköt a uku së troa xomi bapataiso.

6. Thenge la Salamo 45:4, pine nemen matre epuni a hnimi Iesu?

⁶ Pine nemen matre epuni a hnimi Iesu? Kola sa la hnyinge celë ngöne Salamo 45:4. (E jë.) Kola qaja e celë ka hape, Iesu a nyinyape fë la nyipici, me ipië me meköt. Maine epuni a ajane la nyipici me meköt, haawe tro fe epuni lai a hnimi Iesu. Mekune jë epuni lo ijine nyidrëti a isigöline la nyipici me meköt. (Ioane 18:37) Tune kaa la aqane amamane Iesu la enyipiewekëne troa ipië?

7. Nemen la ka ketri epun ngöne la aqane ipië Iesu?

⁷ Iesu a amaman qa ngöne la aqane ujë i  nyidrë la enyipiewekëne troa ipië. Tha hnei nyidrëti kö hna thele troa atrunyi nyidrë, ngo Keme i nyidrëti pe. (Mar. 10:17, 18; Ioane 5:19) Nemen la ka ketri epun ngöne la aqane ipië i nyidrë? Hapeu, tha kolo kö lai a upi epun troa hnim me xötrethenge nyidrë? Nyipici. Hnauën laka, ka ipië Iesu? Ke nyidrëti a hnim me xötrethenge la Keme i nyidrë ka ipië. (Sal. 18:35; Heb. 1:3) Aja i epuni kö troa hnime la atre ka xötrethenge hnyawane la itre thiina i Iehova?

8. Pine nemen matre easa madrin tro Iesu a Joxu së?

⁸ Easa madrin tro Iesu a Joxu së, ke pëkö Atre Mus ka tui nyidrë. Iehova kö la ka ini nyidrë me acili nyidrë troa joxu. (Is. 50:4, 5) Hnei Iesu hna amaman la ihnimi nyidrëti koi së, ngöne lo nyidrëti a huujëne la mele i nyidrë. (Ioane 13:1) Meköt tro epuni a hnimi nyidrë, ke nyidrëti la Joxu i epun. Öni nyidrë, ame la itre ka hnimi nyidrë, ene lo itre sipu sinee i nyidrë ke, kolo itre ka trongëne la itre hnei nyidrëti hna amekötin. (Ioane 14:15; 15:14, 15) Ketre manathith ka tru la troa nyisineene la nekö i Iehova!

9. Nemen la ka ceitu ngöne la bapataiso enehila memine la bapataiso i Iesu?

⁹ Ame la ketre hna amekötin hnei Iesu, ke ene la troa bapataiso hnene la itretre drei nyidrë. (Mat. 28:19, 20) Nge hnei nyidrëti hna amamai tulu ngöne la götrane cili. Ame pe, hetre eisapengönene la bapataiso i nyidrë me easë. (Wange ju la hna eköhagen hna hape, “ Eisapengönene La Bapataiso i Iesu Me Easë.”) Ngo hetre ka ceitu mina fe. Ame la Iesu a bapataiso, ke nyidrëti hi lai a iën troa kuca la aja ne la Keme i nyidrë. (Heb. 10:7) Ceitune hi lai memine la kola xomi bapataiso hnene la keresiano, angeic a amaman laka, ase hë angeic nue la mele i angeic koi Iehova. Tui Iesu, angeic a amaman e cili laka, tro hë angeice a kuca la aja i Iehova ngo tha sipu aja i angeic hmaca kö. Haawe, angeice hi lai a xötrethenge la tulu i Iesu.

10. Pine nemen matre epuni a hnimi Iesu? Nge nemene la hna uku epun troa kuca hnene la ihnimi epun koi nyidrë?

¹⁰ Xecie koi epun laka, Iesu la nekö i Iehova, nge nyidrëti la hna iëne troa mus koi së. Atre hi epun laka, ka ipië Iesu, nge nyidrëti hnyawa hi la hnaiji Keme i nyidrë. Ketre, hnei nyidrëti hna ithuan la ka alanyim, me ithuecatr kowe la itre ka kucakuca, me aloine la itre ka wezipo. (Mat. 14:14-21) Nge mama hi koi epun laka, nyidrëti la ka xomiujine la itre ekalesia enehila. (Mat. 23:10) Nge tro nyidrëti fe a kuca la itre ewekë ka tru elany fene la Baselaia i Akötresie. Tro epuni a amamane tune kaa la ihnimi epun koi nyidrë? Loi e tro epuni a xötrethenge la tulu i nyidrë. (Ioane 14:21) Matre ame la epuni a nue mel koi Iehova me xomi bapataiso, ke epuni hi lai a nyiqane xötrethenge nyidrë.

11. Nemen la pane kepin matre epuni a xomi bapataiso, nge pine nemen?

¹¹ Nemen la pane kepin matre epuni a xomi bapataiso? Hane hi la wathebo ka tru ne la trenge wathebo i Akötresie hna qaja hnei Iesu. Öni nyidrë: “Qa i eö troa hnimi Iehova Akötresi eö hnene la hni eö ka pexej, me mele i eö ka pexej, me mekuna i eö ka pexej, me trenge catre i eö ka pexej.” (Mar. 12:30) Hapeu, aqane hnimi Akötresieti hi lai hnei epun?

12. Hnauën laka epuni a hnimi Iehova? (Wange ju fe la iatr.)

¹² Nyimutre catre la itre kepin matre easa hnimi Iehova. Xecie koi së laka, Nyidrëti la “qeqe ne mel” nge qaathei Nyidrë la “nöjei loi me nöjei ahnahna ka pexej.” (Sal. 36:9;  Iako. 1:17) Ame asë hi la nöjei ewekë hnei epun hna kapa, ke qaathene la Akötresi së ka ham me ka ihnim.

13. Pine nemen matre ketre ahnahna ka tru la thupene mel?

¹³ Ketre ahnahna ka tru qaathei Iehova la thupene mel. Pine nemen? Pane mekune jë la imelekeu i Iehova me nekö i Nyidrë. Öni Iesu: ‘Kakati a hnimi ni’ nge “ka hnimi Kakati ni.” (Ioane 10:17; 14:31) Hnene la itre macatre ne ce mele nyidro hna acatrene la aqane imelekeu i nyidro. (Ite edomë 8:22, 23, 30) Pane mekune jë la akötre Iehova ngöne la kola axösisin me humuth la nekö i Nyidrë. Atraqatr la ihnimi Iehova kowe la fen, matre hnei Nyidrëti hna up la nekö hnimina i Nyidrë troa mec me aijijë epun me nöjei atr troa kapa la mel ka pë pun. (Ioane 3:16; Gal. 2:20) Celë hi lai pane kepin matre easa hnimi Akötresie.

14. Nemen la ketre mekun ka lolo nyine tro epuni a eatrën ngöne la mele i epun?

¹⁴ Ame la epuni a inine troa atrepengöi Iehova hnyawa, ke kola tru trootro la ihnimi epun koi Nyidrë. Ijije hi tro palahi epuni a easenyi Nyidrë. Madrine catre Iehova la epuni a kuca la aja i Nyidrë. (Ite edomë 23:15, 16) Ijije hi tro epuni a amadrinë Nyidrë qa ngöne la aqane ithanata me huliwa i epun. Troa mama qa ngöne la aqane axecië mekun i epun laka, epuni a hnimi Iehova. (1 Ioane 5:3) Ame la troa amadrinë  Iehova, ke ketre mekune lai ka lolo nyine tro epuni a eatrëne ngöne la mele i epun.

15. Tro epuni a amaman tune kaa ka hape, epuni a hnimi Iehova?

¹⁵ Tune kaa la aqane tro epuni a amaman laka, epuni a hnimi Iehova? Ame la hnapan, ene la troa nue la mele i epun koi Nyidrë jëne la thith. (Sal. 40:8) Nge thupen, troa xomi bapataiso. Tune la hne së hna ce wang, ame la ijine epuni a xomi bapataiso, ke ketre drai lai ka tru koi epun nge ijine madrin. Ame e cili, tha tro hmaca kö epuni a mel koi epuni hmekuj, ngo koi Iehova pë hë. (Rom. 14:8; 1 Pet. 4:1, 2) Eje hi, ketre mekune lai ka tru hnei epun hna troa xom. Ngo ame pe, jëne mele hi lai ka lolo.

16. Thenge la Salamo 41:12 tro Iehova a amanathithine tune kaa la itre ka huliwa catr koi Nyidrë?

¹⁶ Pëkö ketre atr ka ham tui Iehova. Ame la nöjei ewekë hnei epun hna hamë Nyidrë, ke tro hmaca kö Nyidrëti a hamëne atrun koi epun. (Mar. 10:29, 30) Tro Nyidrëti a hamë epun la mele ka loi, ka hetre aliene ngöne la fene celë ka ngazo. Tro lai a nyiqane ngöne la ijine epuni a xomi bapataiso, nge hetre itre xaa manathith palakö nyine tro epuni a kapa e thupen. Ijiji epuni mina fe troa nyihluene la Keme i epun uti hë epine palua. Nge tro fe lai a acatrene catrëne la aqane imelekeu i epun me Nyidrë. Pane mekune jë laka, tro hë epun a mele palua tui Nyidrë!—E jë la Salamo 41:12.

17. Nemene la ewekë ka pë thei Iehova nyine tro epuni a hamë Nyidrë?

¹⁷ Ame la epuni a nue la mele i epun koi Iehova me xomi bapataiso, ke epuni hi lai a hamëne la ketre ahnahna koi Nyidrë. Qaathei Nyidrëti asë hi la nöjei ewekë ka loi hnei epun hna kapa, memine la itre ijine madrin hnei epun hna melën. Haawe, loi e tro epuni a nyihlue i Nyidrë cememine la hni ka pexej me nyipici matre olene koi Nyidrë. E cili, tro hë epun a hamëne kowe la Atre Xup la hnengödrai me ihnadro la ketre ewekë ka pë thei Nyidrë. (Iobu 1:8; 41:11; Ite edomë 27:11) Aqane tro hi epuni lai a huliwan hnyawane la mele i epun. Eje hi, ame la pane kepin matre epuni a xomi bapataiso, ke hnene la ihnimi epun koi Iehova.

18. Nemen la itre hnying nyine tro epuni a isa hnyingën?

¹⁸ Hapeu, tro kö epuni a xomi bapataiso? Epuni casi hi la ka ijije troa xome la mekune cili. Hnyinge jë ka hape, ‘Nemene la ka ajolë ni?’ (Itre hu. 8:36) Hne së hna ce wang la köni kepin ka troa upi epun troa xomi bapataiso. Ame la hnapan, aja i epun troa nyipici me meköt. Isa hnyinge jë ka hape, ‘Ajange kö troa mele ngöne la fene laka, itre atr asë hi a qaja la nyipici me kuca la loi?’ Ame la hnaaluen, ke epuni a hnimi Iesu. Isa hnyinge jë ka hape, ‘Ajange kö troa mele fene la musi Iesu, me xötrethenge la tulu i nyidrë?’ Ame la hnaakönin, lo ka nyipiewekë catr, ke epuni a hnimi Iehova. Isa hnyinge jë ka hape, ‘Ajange kö troa catre huliwa i Iehova matre amadrinë Nyidrë?’ Maine eje hë thei epun la köni kepin e caha, nga hnauëne laka, tha xomi bapataiso palakö epun? Nemen la ka ajolë epun?—Itre hu. 16:33.

19. Hnauën laka, tha tro kö epuni a xou troa xomi bapataiso? Qaja jë la ketre ceitun. (Ioane 4:34)

¹⁹ Maine xou epuni troa xomi bapataiso, pane mekune jë lo ceitun hnei Iesu hna hamën. (E jë la Ioane 4:34.) Öni nyidrë, ai nyidrë la troa kuca la aja ne la Keme i nyidrë. Pine nemen? Pine laka, ka nyipiewekë la troa xen. Nge atre hi Iesu laka, ame asë hi la itre hnei Iehova hna qaja, ke nyine loi koi së. Tha aja i Iehova kö tro sa kuca la itre ewekë ka troa akötrë së. Hapeu, aja i Nyidrëti kö tro epuni a xomi bapataiso? Öö. (Itre hu. 2:38) Haawe, tro epuni lai a kepe manathith e tro epuni a trongëne la hna amekötin göi troa xomi bapataiso. Maine hna hnëkëne la ketre xen hnei epuni hna ajan, ke tro kö epuni lai a xou troa xen? Waea! Nga hnauëne hö la epuni a xou troa xomi bapataiso?

20. Nemen la hne së hna troa ce wang ngöne la tane mekun e thupen?

²⁰ Nemen la ka ajolë ni? Maine jë tro epuni a sa ka hape, “Tha ijijinge pala kö.” Nyipici, tha tro kö a wangacon la mekune cili, ene la troa nue mel koi Iehova me xomi bapataiso. Celë hi matre, nyipiewekë troa xomi ijine troa mekune hnyawa. Tha nyine tro kö lai a wangahmaloeën. Ngo maine aja i epuni troa catre huliwa i Iehova, nemen la nyine tro epuni a nyiqane kuca enehila? Troa sa la hnyinge celë ngöne la tane mekun e thupen.