Pine nemene matre qaja jë la trahmany ka hape, e tro angeic a faipoipo me Rutha, ke troa “ngazo” la zi angeic? (Rutha 4:1, 6)

Ame ekö, maine troa mec la ketre trahmany nge pëkö neköi angeic, ke nyimutre la itre hnying hna amejën: Hapeu, drei pë hë la ka troa xome la itre götrane i angeic? Tro kö a patre palua la ëje ne la fami angeic? Kola sa la itre hnyinge celë ngöne la Wathebo i Mose.

Nemene la hna qaja hnene la Wathebo göne la itre götran ne la atr ka mec, maine göne la atr ka salemëne la götrane i angeic, ke pëhë manie i angeic? Ijije hi tro la trejin maine ketre atrene la fami angeic a itöne hmaca. Celë hi matre, tro kö la götrane i angeic a lapa ngöne la fami.—Lev. 25:23-28; Num. 27:8-11.

Troa cile hut tune kaa la ëje ne la fami ne la atr ka mec? Tro lai a cile hut e tro la trejin me angeic a faipoipo memine la föi angeic. Nge tro la neköi nyidro a xome la ëje ne lai atr ka mec memine la itre götrane i angeic. Celë hi la ka traqa koi Rutha. Nge jëne fe lai, kola nyipiewekëne la föe ne lai atre ka mec.—Deu. 25:5-7; Mat. 22:23-28.

Tro sa ce wange la tulu i Naomi. Ame la ëje ne la föi eahlo, ke Elimelek. Ngo ame lo nyidrë memine la lue neköi nyidroti trahmanyi a mec, ke pë pi hi trahmany ngöne la hnalapa ka troa thupë eahlo. (Rutha 1:1-5) Ame hë la eahlo a bëek a tro Iudra, hnei eahlo hna upi Rutha tresi eahlo troa wai Boaza matre tro nyidrëti a itöne hmaca la itre götrane i angatr. Boaza la ketre atrene la fami Elimelek. (Rutha 2:1, 19, 20; 3:1-4) Ngo mekune hmaca jë hi Boaza ka hape, hetre ketre atr ka easenyi catre kö koi Elimelek hui angeic. Nge, angeice hi la ka troa pane ithanata matre itöne la itre götrane i Elimelek.—Rutha 3:9, 12, 13.

Ame lo xötrei, aja ne lai atre cili troa xatua Naomi. (Rutha 4:1-4) Ngacama atre hi angeic laka, tro lai a tru thupene koi angeic, ngo pine laka qatre föe hë Naomi, tha ijiji eahlo hmaca kö troa hamë matra i Elimelek. Matre ame asë hi la itre götrane i Elimelek, ke thatraqai angeice pë hë, nge tro lai a nyixane hmaca la itre götrane i angeic. Celë hi matre, madrine catre angeic troa atre nyi matra i Elimelek.

Ngo ame la angeic a atre ka hape, tro fe angeic a faipoipo me Rutha, ke xele hmaca ju hi angeic. Öni angeic: “Tha’teine kö ni troa itön’ eje thatraqai ni kö, wanga ngazo pe la zing.” (Rutha 4:5, 6) Hnauëne laka, saze mekune hmaca ju hi angeic?

Ke maine tro angeic a faipoipo me Rutha me hnaho, ke thatraqane pë hë lai nekönatr la itre götrane i Elimelek. Nge tro lai a “ngazo” tune kaa la “zi” i angeic? Tha hna qaja kö hnei Tusi Hmitrötr, ngo hane hi la itre xaa kepin:

• Ame la hnaapan, angeic a troa itöne la itre götrane i Elimelek ngo tha thatraqai angeice kö. Thatraqane pë hë la neköi Rutha.

• Ame la hnaaluen, ke hnëqa i angeice fe troa thupë Naomi me Rutha.

• Ame la hnaakönin, ke maine tro Rutha a hnaho nge hetre neköne hë lai trahmany, ke tro la itre nekönatr asë a ce thawa la itre götrane i angeic.

• Ame la hnaafoan, ke maine pëkö neköne lai trahmany, nge tro Rutha a hnaho, ke thatraqane pë hë la nekönatr la itre götrane i angeic memine la itre götrane i Elimelek. Nge maine tro angeic a mec, ame la itre götrane i angeic ke thatraqane pë hë la nekönatr ka xome la ëje i Elimelek, ngo tha ëje i angeice kö. Celë hi matre xele angeic troa xatua Naomi. Hnei angeic hna nue koi Boaza troa atre nyi matra i Elimelek. Nge hnei Boaza hna kapa, “mate axulune la ëjene la ka meci hune la zi angeic.”—Rutha 4:10.

Ame la ka sisitria kowe lo trahmany, ke ene la troa thupëne la ëje me itre götrane i angeic. Aqane ujë lai ne la atre ka pi tru. Aja i angeic troa thupëne la ëje i angeic, ngo uti hë enehila, pëkö ka atre la ëje i angeic. Ketre, hnei angeice pë hë hna triane la manathith hna kapa hnei Boaza, ene la troa xötrapan ne la Mesia, Iesu Keriso. Pine nemen? Hnene hi laka, hnei angeic hna thipëne la sipo ne la atre ka aja ixatua. Ekölöhini pe angeic!—Mat. 1:5; Luka 3:23, 32.