TANE MEKUN 14
“Qa Ngöne Lai, Tro La Nöjei Atr Asë a Wangatrehmekune Laka, Nyipunieti La Itretre Drei Ni”
“Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.”—IOANE 13:35.
NYIMA 106 Eëne Jë La Ihnim
MEKUN KA TRU a
Nemen la thangane la ihnimi easë thene la itre atre ne fen? (Wange ju la paragarafe 1)
1. Nemen la ka ketr la itre atr ka xötrei sine la itre icasikeu së? (Wange ju fe la iatr.)
PANE mekune jë la lue trefën, nyidroti petre hi a sine la ketre icasikeu ngöne la Uma Ne Baselaia. Hna ketri nyidro hnene la aqane ikep memine la ihnimi ne la itre atrene la ekalesia. Ame hë la nyidroti a bëek kowe la hnalapa, önine jë hi la föe ka hape, ‘Tha ka ceitu kö la itre Temoë Iehova me itre xan. Nge madrine catre ni troa ce me angatr.’
2. Pine nemen matre itre xan a trotriji Iehova?
2 Nyine haine la ihnim ka mama thene la itre hlue i Iehova. Ngo, tha ka pexeje kö angatr. (1 Ioane 1:8) Matre, ame hë la easa iatre hnyawa, ke canga mama hi koi easë la itre tria i angatr. (Rom. 3:23) Nge pine la itre tria cili, hnei itre xan hna trotriji Iehova.
3. Troa wangatrehmekune tune kaa la itre nyipi keresiano? (Ioane 13:34, 35)
3 Pane goeëne hmaca jë la xötr ka nyitane la tane mekune celë. (E jë la Ioane 13:34, 35.) Troa wangatrehmekune tune kaa la itre nyipi keresiano? Hnene la ihnimi angatr. Tha hnei Tusi Hmitrötr kö hna qaja ka hape, tro la itre nyipi keresiano a pexej. Ketre, tha hnei Iesu kö hna qaja ka hape: ‘Qa ngöne lai, tro nyipunie a wangatrehmekune laka, nyipunieti la itretre drei ni.’ Ngo, öni nyidrëti pe: “Qa ngöne lai, tro la nöjei atr asë a wangatrehmekune laka, nyipunieti la itretre drei ni.” Iesu a qaja e celë ka hape, troa wangatrehmekune la itre nyipi keresiano hnene la aqane ihnimikeu i angatr. Nge, tha itretre drei nyidrëti hmekuje kö la ka troa wangatrehmekune lai, ngo tro nöjei atr asë.
4. Nemen la itre xaa hnying ne la itre atre ne fen?
4 Maine jë tro la itre xaa atre ne fen a hnyinge ka hape: ‘Nemene la alien la kola hape, troa wangatrehmekun la itre nyipi keresiano hnene la ihnim? Hnei Iesu hna amamane tune kaa la ihnimi nyidrë kowe la itre aposetolo? Nge, troa xötrethenge tune kaa la tulu i Iesu enehila?’ Ngacama ka bapataiso hë së, ngo nyipiewekë tro sa lapa mekun la itre hnyinge celë. Celë hi ka troa acatrene la ihnimi së koi itre xan, ngacama hnei angatr hna ngazo koi së.—Efe. 5:2.
ITRE NYIPI KERESIANO A IHNIMIKEU
5. Qejepengöne jë la hna qaja hnei Iesu ngöne Ioane 15:12, 13.
5 Öni Iesu, ka ketrepengöne kö la ihnim ka mama thene la itretre drei nyidrë. (E jë la Ioane 15:12, 13.) Hane hi la hnei Iesu hna amekötine koi angatr: “Tro nyipunieti a ihnimikeu, tune la aqane hnimi nyipunieti ni.” Nemene la aliene lai? Iesu e celë a qaja la ihnim ka upi së troa amë panëne la aja i itre xan. Ihnimi hi lai, ka upi së troa meci pine la ketre trejin. b
6. Tune kaa la aqane amamane Tusi Hmitrötr laka, ka nyipiewekë la ihnim?
6 Ihnim la thiina hna qaja atrun e hnine la Tusi Hmitrötr. Ame la itre xötr hna pi e hnei itre xan, ke: “Akötresieti la ihnim.” (1 Ioane 4:8) “Qa i eö troa hnime la atre lapa easenyi eö, tui eö hi.” (Mat. 22:39) “Ihnim la ka atreine he la nöjei pengöne ngazo.” (1 Pet. 4:8) “Tha tro kö a patre la ihnim.” (1 Kor. 13:8) Itre xötre celë a amamane la enyipiewekëne troa hetreny me melëne la ihnim.
7. Pine nemen matre thatreine kö Satana troa acasine la itre atr ngöne la nyipi ihnim?
7 Alanyim la itre ka hnyinge ka hape: ‘Troa öhne tune kaa la nyipi hmi? Itre hmi asë hi a qaja ka hape, thei angatr la nyipici, ngo isapengöne kö la aqane qeje Akötresie hnei angatr.’ Hnei Satana hna acil la itre hmi ka thoi, matre amenune la itre atr. Ngo, thatreine kö angeic acasine la itre atr e cailo fen ngöne la ihnim. Iehova hmekuje hi la ka atrein. Pine nemen? Pine laka, qaathei Iehova la nyipi ihnim. Maine aja së troa hetrenyi la thiina cili, loi e tro sa kapa la uati hmitrötr me manathith qaathei Nyidrë. (1 Ioane 4:7) Celë hi matre öni Iesu ka hape, troa wangatrehmekun la itre nyipi keresiano hnene la ihnim ka eje thei angatr.
8-9. Hna ketr tune kaa la itre xaa atr hnene la ihnim ka mama thene la itre Temoë Iehova?
8 Tune la hna qaja hnei Iesu, alanyim la itre ka wangatrehmekun la itre nyipi keresiano jëne la nyipi ihnim ka eje thei angatr. Tro sa ce wang la ka traqa koi Ian. Mekune palahi angeic la asabele hnei angeic hna xötrei sine ngöne la ketre stade ezine la hnalapa i angeic. Itre treu qëmeken, hnei angeic hna sine la ketre elo ngöne la stade cili. Öni angeic: “Isapengöne catr la aqane ujë ne la itre atr ka sine la asabele. Ka metrötr nge ka heetre hnyawa la itre Temoë Iehova, uti fe hë la itre neköi angatr. Angatr a tingeting me madrin, nge celë hi hnenge hna thel. Thëthëhmine hë ni la itre cainöj hna cile fë ngöne la ijine cili, ngo mekune palahi ni la aqane ujë i angatr.” c Easa ujë tun hnene la nyipi ihnim ka eje the së. Easa metrötrëne la itre trejin, ke easa hnimi angatr.
9 Tui Ian, hna ketri John fe lo angeic a xötrei sine la itre icasikeu. Öni angeic: “Ka loi thiina asë hi angatr, itre ka ihnim. Celë hi ka ketri ni. Xecie hë koi ni laka, thei angatr la nyipi hmi.” d Kola amamane hnene la lue hna melëne celë me itre xane ju kö laka, itre Temoë Iehova hi la itre nyipi keresiano.
10. Eu la ijine tro sa amamane la nyipi ihnim kowe la itre trejin? (Wange ju la ithuemacany.)
10 Tune lo hne së hna qaja ha, pëkö trejin ka pexej. Matre ame itre xaa ijin, tro angatr a qaja maine kuca la ketre ewekë ka akötrë së. e (Iako. 3:2) Ame e cili, tro la aqane ujë së a amamane laka, easa hnimi angatr. Nemene la tulu hnei Iesu hna amamane koi së?—Ioane 13:15.
HNEI IESU HNA HNIM LA ITRE APOSETOLO
Hnei Iesu palahi hna hnim la itre aposetolo, ngacama hnei angatr hna ngazo thiina (Wange ju la paragarafe 11-13)
11. Nemen la itre thiina ka ngazo hna amaman hnei Iakobo me Ioane? (Wange ju fe la iatr.)
11 Atre hnyawa hi Iesu laka, tha ka pexeje kö la itretre drei nyidrë. Hnei nyidrëti hna xatua angatr troa saze, matre tro Iehova a kepe angatr. Ame lo ketre ijin, hnei Iakobo me Ioane hna sipone kowe la thine i nyidro troa ithanata koi Iesu matre tro nyidroti a hane lapa ezi nyidrë ngöne la Baselaia. (Mat. 20:20, 21) Nyidroti a amaman e cili laka, nyidroti a pi draië me pi mama.—Ite edomë 16:18.
12. Hapeu, Iakobo me Ioane hmekuje hi la ka ngazo thiina ngöne la ijine cili? Qejepengöne jë.
12 Ame ngöne la ijine cili, tha Iakobo me Ioane hmekuje kö la ka ngazo thiina. Ketre, ka ngazo fe la aqane ujë ne la itre xaa aposetolo. Öni Tusi Hmitrötr: “Matre atre jë hi lai hnene lo ala treen, ame hnei angatr hna wesitr kowe la lue trejin.” (Mat. 20:24) Maine jë hnene la itre xaa aposetolo hna iwesitrë memine la lue trejin. Ma öni angatre jë koi nyidro ka hape: ‘Ke drei epon matre troa hane lapa ezi Iesu ngöne la Baselaia? Ame koi epon, ke epone casi hi la ka ijij? Tha epone casi kö la ka ce huliwa me Iesu. Hnauëne la tro pe kö eahun a cilëne la itre göhnë kaco?’ Tha mama kö ngöne la ijine cili laka, itre ka ihnimikeu.
13. Tune kaa la aqane ujë i Iesu ngacama ka tria palahi la itre aposetolo? (Mataio 20:25-28)
13 Tune kaa la aqane ujë i Iesu e cili? Tha hnei nyidrëti kö hna elëhni. Tha hnei nyidrëti kö hna qaja ka hape, tro nyidrëti a nyihnai angatr hnene la itre atr ka ipië me ka ihnimikeu. Atre hnyawa hi Iesu laka, hetre aja i angatr troa kuca la loi, matre hnei nyidrëti hna xomi ijine troa xatua angatr. (E jë la Mataio 20:25-28.) Hnei Iesu hna hnimi angatr, ngacama angatre palahi a isi pi göhnë.—Mar. 9:34; Luka 22:24.
14. Hna hetrune tune kaa la itre aposetolo?
14 Atre hnyawa hi Iesu la aqane hetrune la itre aposetolo. (Ioane 2:24, 25) Ka tru kowe la itre hene ne hmi i angetre Iudra la göhnë i angatr. (Mat. 23:6; wange ju la video, Les premiers sièges dans les synagogues, ka ce tro memine la ithuemacany ka mama ngöne la Bible d’étude ne la tusi Mataio 23:6.) Ame koi angatr, ke ka sisitria kö angatr hui itre xan. f (Luka 18:9-12) Atre hi Iesu laka, ijije hi tro la aqane hetru angatr ngöne la hmi angetre Iudra, a ajojezine la aqane waiewekë i angatr. (Ite edomë 19:11) Trotrohni angatre hi hnei Iesu, matre ame la angatr a tria, ke tha nyidrëti kö a canga elëhni. Öhne hi nyidrë ka hape, itre atr ka loi hi angatr. Celë hi matre, hnei nyidrëti hna xatua angatr troa xometrij la pi draië me pi mama, me nyihnan hnene la ihnim.
TRO SA NYITIPU IESU TUNE KAA?
15. Nemen la ini hne së hna xom qa ngöne la ewekë ka traqa koi Iakobo me Ioane me itre xaa aposetolo?
15 Hetre ini nyine tro sa xom qa ngöne la ka traqa koi Iakobo me Ioane me itre xaa aposetolo. Tha ka loi kö la hna kuca hnene la lue trejin, la nyidroti a sipo Iesu troa lapa ezi nyidrë ngöne la Baselaia. Ketre tune la itre xaa aposetolo, tha hnei angatre kö hna thele troa acatrene la cas. Ngo, Iesu pe hi la ka loi thiina me hnimi angatr asë, lo ala 12. Nemen la ini koi së? Ame la ka nyipiewekë, ke ene la aqane ujë i easë kowe la tria itre xan, ngo tha ene kö la hna kuca hnei angatr. Nemen la ka troa xatua së? Maine tro la ketre trejin a akötrë së, loi e tro sa hnyinge ka hape: ‘Hnauëne laka, akötre catre koi ni la hnei angeic hna kuca? Kolo kö lai a amaman ka hape, hetre nyine tro ni a saze? Maine jë, hetre jole hnei angeic hna cile kow? Ngacama hetre nyipi kepin matre eni a elëhni, ngo ijije kö tro ni a amaman la nyipi ihnim me nue la ngazo i angeic?’ Ame la easa isine troa hnim la itre xan, ke easë hi lai a amaman laka, itre nyipi keresiano së.
16. Nemen la ketre ini hne së hna xom qa ngöne la tulu i Iesu?
16 Tro mina fe la tulu i Iesu a xatua së troa trotrohnine la itre trejin. (Ite edomë 20:5) Nyipici laka, thatreine kö sa e la itre aliene hni ne la itre trejin, tui Iesu. Ngo, ijije hi tro sa xomihni angatr ngöne la angatr a akötrë së. (Efe. 4:1, 2; 1 Pet. 3:8) Nge tro sa atreine xomihni angatr, e hne së hna thel troa atre angatr. Hane hi la ketre ceitun.
17. Nemen la hna öhne hnene la atre thupëne la sirkoskripsio la nyidrëti a thel troa atre hnyawa la ketre trejin?
17 Mekune palahi la ketre atre thupëne la sirkoskripsio ne Afrique, la ketre trejin ka calogitr. Nemen la hnei nyidrë hna kuca? Öni nyidrë: “Tha hnenge kö hna ananyi angeic, ngo hnenge pe hna thele troa atrepengöi angeice hnyawa.” Trotrohnine ju hi nyidrë laka, hnene la aqane hetru angeic, matre angeic a ujë tun. Öni nyidrëti hmaca jë hi: “Ame hë la eni a atre la itre jol hnei angeic hna melën, me itre trengecatr hnei angeic hna kuca, ke eni a pane hai angeic. Qane ju hi lai, lue treme sineene hë nyio.” Nyipici, ame la sa thel troa trotrohnine la itre trejin me easë, ke tha jole hë koi së troa hnimi angatr.
18. Maine hna akötrë së hnene la ketre trejin, nemen la itre hnying nyine tro sa lapa mekun? (Itre Edomë 26:20)
18 Maine hna akötrë së hnene la ketre trejin, canga tro hi së a wai angeic. Ngo qëmeken troa tro, loi e tro sa pane hnying ka hape: ‘Hapeu, atre asë kö ni la itre ithuemacany?’ (Ite edomë 18:13) ‘Hnei angeice kö hna thë troa akötrë ni?’ (Ate cai. 7:20) ‘Hnenge fe kö hna hane ujë tui angeic ekö?’ (Ate cai. 7:21, 22) ‘Maine tro ni a wange lai trejin, hapeu, tha eni kö lai a troa atrune catrëne lai jol?’ (E jë la Ite Edomë 26:20.) Maine tro sa xomi ijine troa lapa mekun la itre hnyinge celë, troa kökötre la ihnimi së kowe la trejin, nge tro hë sa nue la ngazo i angeic.
19. Nemen la nyine tro epuni a catre kuca?
19 Itre Temoë Iehova hi la itre nyipi keresiano, hnene la aqane ihnimikeu i angatr. Ngo, isa hnëqa së isa ala cas. Eje hi, nyipiewekë tro sa amaman la ihnimi së kowe la itre trejin, ngacama tha ka pexeje kö angatr. Tro la aqane ujë së a aijijëne la itre atr troa wangatrehmekune la nyipi hmi me ce nyihlue i Iehova me easë. Haawe, catre pi së ihnimikeu, ke celë hi sipu hatrene la itre nyipi keresiano.
NYIMA 17 ‘Ajange’
a Alanyim la itre atr ka lö kowe la nyipi hmi, ke hnei angatr hna öhne la aqane ihnimikeu së. Ngo itre atr ka tha pexeje kö së, matre jole koi së e itre xaa ijine troa hnim la itre xaa trejin. Ame ngöne la tane mekune celë, tro sa ce wange la kepin matre nyipiewekë tro sa ihnimikeu, me nyitipune la aqane ujë i Iesu ngöne la kola tria hnei itre xan.
b Wange ju fe la itus “Viens, suis-moi,” mek. 17, par. 10-11 (Qene Wiwi).
c Wange ju fe la tane mekun hna hape, “Ma vie a enfin un but” ngöne la Ita Ne Thup ne 1 Nofeba 2012, g. 13-14 (Qene Wiwi).
d Wange ju fe la tane mekun hna hape, “Tout semblait me réussir” ngöne la Ita Ne Thup ne 1 Mei 2012, g. 18-19 (Qene Wiwi).
e Tha easë kö e celë a qaja la itre ngazo ka tru ka mama ngöne 1 Korinito 6:9, 10. Hnëqa ne la itre qatre thup troa wange la itre atr ka kuca la itre ngazo cili.
f Thenge la itre hna cinyihane i angetre Iudra, önine la ketre rabi ka hape: “Maine, traqa koi 30 lao atr e celë fen ka meköt tui Aberahama, ke eni fe me neköng thene la ala 30. Nge maine ala 10, ke eni fe me neköng e kuhu hnin. Nge maine ala 5, ke eni palahi me neköng e kuhu hnin. Nge maine ala lu, ke eni hi lai me neköng, nge maine ala cas, ke eni hi.”
