1. Nemene la ketre aqane kuca i Iobu matre troa atrepengöi Iehova hnyawa?

 ALANYIM la itre atr hnei Iobu hna ithanata memin, ngo ame kö la ka ketri angeic, ke kolo ijine angeic a porotrike me Iehova. Hnei Iehova hna amamai Iobu la itre hnei Nyidrëti hna xup matre troa acatrene la lapaune i angeic kowe la atreine i Nyidrë troa thupëne la itre hlue i Nyidrë. Nge tro fe lai a amekunë angeic la ejuine la inamacane i Nyidrë. Ketre, hnei Iehova hna amamai Iobu la aqane thupëne Nyidrë la itre öni, me akeukawanyi angeic laka, tro fe Nyidrëti a ujë tune koi angeic. (Iobu 38:39-41; 39:1, 5, 13-16) Jëne la hna lapa mekune la itre hna xup, hnei Iobu hna inin troa atrepengöi Iehova hnyawa.

2. Pine nemen matre tha ka hmaloi kö e itre xaa ijine troa goeëne hnyawane la itre hna xup?

² Ketre tui easë fe, loi e tro sa goeëne la itre hna xup matre troa atrepengöi Iehova hnyawa. Ngo ame itre xaa ijin, tha ka hmaloi kö. Ame la easa lapa ngöne la itre traon ka tru, ke jole koi së troa goeëne la itre hna xup. Nge maine ka lapa ju hë së ngöne la itre tribu, ke pë palahi ijine së troa hane goeëne hnyawane la itre hna xup. Tro sa ce wange la enyipiewekën troa ami ijine me nue trengecatr matre xomi ini qa ngöne la itre hna xup. Tro mina fe sa ce wange laka, hnei Iehova me Iesu hna hamë ini jëne la itre hna xup. Ketre, tro fe sa ce wange la nyine tro sa kuca matre xomi ini qa ngöne itre ej.

3. Nemene la ka amaman ka hape, Iehova a ajane troa amadrinë Adramu jëne la itre ewekë hna xup?

³ Aja i Iehova tro Adramu a madrin la angeic a goeëne la itre hna xup. Hnei Iehova hna hamë Adramu la ketre hlapa ka  mingöming, me upi angeic troa eëny me nyihnyawan ej. (Gen. 2:8, 9, 15) Pane mekune jë la madrine i Adramu la angeic a öhne la kola cia la itre itine feja memine la kola kekë la itre iengen. Ketre madrine ka tru koi angeic troa nyihnyawane la hlapa e Edrena. Hnei Iehova fe hna upi angeic troa ati ëjen la itre öni. (Gen. 2:19, 20) Maine ju hi, tro kö Iehova a ati ëjen la itre öni, ngo hnei Nyidrë hna hamëne la hnëqa cili koi Adramu. Qëmeken tro Adramu a ati ëjen la itre öni, angeic a pane goeëne hnyawane la pengön me aqane ujë i nyudren. Madrine catre angeic troa kuca la huliwa cili. Nge jëne nyudren, angeic a öhne la inamacan, memine la atreine i Iehova troa xupe la itre ewekë.

4. (a) Qaja jë la ketre kepine matre nyipiewekë tro sa goeëne la itre hna xup. (b) Nge nemene la ketre ewekë hna xupe hnei Iehova ka ketri epun?

⁴ Ame la ketre kepine matre nyipiewekë tro sa goeëne la itre hna xup, ke hna upi së hnei Iehova. Öni Nyidrë: “Galajë draië nyipunie, me goeën”. Nge thupene lai, Nyidrëti a hnying, ka hape: “Hnei dei hna xup’ it’ eje lai?” Atre hi së la qaan la itre ewekë cili. (Is. 40:26) Hnei Iehova hna atiqane la hnengödrai me fene hnengödrai hnene la itre ewekë nyine hain, nge nyine tro fe sa xomi ini qa ngön. (Sal. 104:24, 25) Mekune jë fe la aqane xupi së hnei Nyidrë. Pi tro catre sa goeëne la emingömingöne la itre hna xup. Ketre, hnei Nyidrëti hna xupi së matre mele madrin memine la atreine troa goeëne la itre hna xup, me dreng, me ketr, me tupath, me punepun.

5. Thenge la Roma 1:20, pine nemen matre nyipiewekë tro sa goeëne la itre hna xup?

⁵ Tusi Hmitrötr fe a amamane la ketre kepin, matre nyipiewekë tro sa goeëne la itre hna xup. Itre ej a amamane la itre thiina i Akötresie. (E jë la Roma 1:20.) Pane mekune jë la emingömingöne la itre ewekë ka lapa xötreithi së. Hapeu, tha itre ej kö lai a amamane la inamacane i Akötresie? Nge pane mekune jë la nöjei pengöne xen e celë fen. Ketre hatrene ihnimi Nyidrëti hi lai kowe la itre atr! Ame la easa öhne la itre thiina i Iehova ka mama ngöne la itre hna xup, ke easa atrepengöi Nyidrëti hnyawa me easenyi koi Nyidrë. Tro pena sa ce wange la itre ini hnei Iehova hna hamëne kowe la itre atr, jëne la itre hna xup.

6. Nemene la ini hne së hna xome qa ngöne la itre kasida?

⁶ Hetre calendrier i Iehova. Ame e nöjei macatre, qane Febuare koi Mei, angetre Isaraela a öhne la wenge kasida a sesë kowe la itre nöje e kolopi. Öni Iehova: “Ate hë la  kasida ne hnengödrai la ijine i nyën.” (Iere. 8:7) Iehova la ka sa la ijine tro la itre kasida a sesë. Ketre tun, hnei Iehova hna sa la ijine troa amekötine la itre atr. Kola amamane koi së hnene la itre waco cili laka, tro kö Iehova a amekötine la fene celë ngöne la ijin “hna sa.”—Hab. 2:3.

7. Nemene la ka xecie koi së la easa goeëne la waco a sesë? (Isaia 40:31)

⁷ Iehova a hamë trengecatr kowe la itre hlue i Nyidrë. Hnei Iehova hna thingehnaeane jëne Isaia laka, tro kö Nyidrëti a hamë trengecatr kowe la itre hlue i Nyidrë ka kucakuca. E cili, tro hë “angat’ a sheshë draië hnei iape tune la aeto.” (E jë la Isaia 40:31.) Hnene la angetre Isaraela hna majemine goeëne la itre aeto a sesë hnine la itre enyi ka idreuth matre troa kepe draië nyudren, nge co hi la trengecatr hna nu. Tune la aqane hamëne Iehova la trengecatr kowe la itre waco cili, tro fe Nyidrëti a hamë trengecatr kowe la itre hlue i Nyidrë. Ame la epuni a goeëne la ketre waco a sesë draië, ke the thëthëhmine kö laka, tro kö Iehova a hamë trengecatr koi epun matre atreine elë hun la itre jol me cile catr.

8. Ka hetre thangane kö koi Iobu la hna lapa mekune la itre hna xup? Nge nemene la ini koi së?

⁸ Ijije hi tro sa mejiune koi Iehova. Hnei Iehova hna acatrene la mejiune i Iobu koi Nyidrë. (Iobu 32:2; 40:6-8) Ame ngöne lo nyidroti a porotrik, hnei Iehova hna xatua Iobu troa lapa mekune la itre hna xup, tune la itre wëtresij, me itre iaw, me itre samek. Hnei Nyidrëti fe hna amamane koi angeic la pengöne la itre öni, tune la kau me hoos. (Iobu 38:32-35; 39:9, 19, 20) E cili, hnei Iobu hna öhne la ecatrene la mene i Iehova, memine la ihnim me inamacane i Nyidrë. Jëne la porotrike i nyidro, mejiune hnyawa ha Iobu koi Iehova. (Iobu 42:1-6) Ame fe la easa lapa mekune la itre hna xup, ke tro hë së lai a öhne la inamacane me mene i Iehova. Haawe xecie koi së laka, tro kö Iehova a apatrene la itre jole së. Hapeu, tha kolo kö lai a acatren catrëne la mejiune së koi Nyidrë?

9-10. Nemene la hna ini së hnene la jö me mani göi Iehova?

⁹ Atre hnyawa hi Iesu la pengöne la itre hna xup. Hnei Iehova hna aijijë Iesu troa hane ce huliwa me Nyidrë ngöne lo kola xup la hnengödrai me fene hnengödrai. (Ite edomë 8:30) Ame hë lo Iesu e celë fen, hnei nyidrëti hna xatuane la itretre drei nyidrë troa atre Iehova, jëne la itre hna xup. Tro sa ce wange la itre xaa ini hnei nyidrëti hna hamën jëne itre ej.

¹⁰ Iehova a hnime la nöjei atr. Ame ngöne lo Cainöje i Iesu Hune La Wetr, hnei nyidrëti hna qaja la lue ewekë hna xupe hnei Iehova, ngo tha hna nyipiewekëne kö hnene la itre atr, ene la jö me mani. Ka nyipiewekë lue ej kowe la mele së. Maine ju hi, tha tro kö Iehova a hamëne la lue ewekë cili kowe la itre atr ka ngazo. Ngo hnene la ihnimi Nyidrë, matre angatr a hane kepe thangan. (Mat. 5:43-45) Nemene la ini hnei Iesu hna kapa? Aja i Iehova tro sa hnime la nöjei atr. Ame la easa goeëne la emingömingöne la hnengödrai ngöne la kola lö la jö, maine kola menyike la drai thupene la hna mani, ke mekune jë së la ihnimi Iehova kowe la nöjei atr. Nge celë hi ka uku së troa cainöj kowe la nöjei atr.

11. Hnauëne laka ka ithuecatre koi së la troa goeëne la itre waco?

¹¹ Iehova a hamë së la ka nyipiewekë. Ame ngöne palahi lo Cainöje i Iesu Hune La Wetr, öni nyidrë: “Goeëne hnyawane ju la itre waco, tha nyudreni kö a jumi feja, me menuën, me xawane me amë acon ngöne la itre uma të, ngo Keme i nyipunie e koho  hnengödrai a thue a i nyudren.” Maine jë, öhne hi lo itre ka drei Iesu la itre waco a sesë hune la itre he i angatr, ngöne lo Iesu a hnyinge ka hape: “Hapeu, tha sisitria kö nyipunieti hui nyudren?” (Mat. 6:26) Aja i Iesu tro la itretre dreng a mejiun laka, tro kö Iehova a hamë angatr la ka nyipiewekë! (Mat. 6:31, 32) Ame la ini celë, ke kolo palahi a hamë ithuecatr kowe la itre hlue i Iehova enehila. Tune la ketre trejine föe ka pionie e Espagne. Kucakuca catre eahlo, ke pë palakö uma ka lolo hnei eahlo hna öhn. Ngo ame la eahlo a öhne lo ketre drai, la itre waco a xen la itre itine feja, ke lolo hmaca pi eahlo. Öni eahlo: “Ame la eni a goeëne la aqane thupëne Iehova la itre neköi waco cili, ke mekune hmaca jë hi ni ka hape, tro kö Iehova a thupë ni.” Tha qea ju kö, nge hnei eahlo hna öhnyi uma ka lolo.

12. Nemene la hna qaja hnei Mataio 10:29-31 göne la itre sisi? Nge nemene la hna ini së göi Iehova?

¹² Iehova a nyipiewekë së isa ala cas. Qëmeken tro la itretre drei Iesu a cainöj, hnei nyidrë hna xome la ketre ceitune matre xatua angatr troa triji xou. (E jë la Mataio 10:29-31.) Hnei nyidrëti hna qaja la ketre waco hna atre hnyawa e Isaraela, ene la neköi sisi. Ame ngöne lo hneijine i Iesu, ke hna wangacone la itre neköi waco cili. Ngo ame pe, öni Iesu kowe la itretre drei nyidrë ka hape: “Tha kei kö e kuhu hnadro la ala casi e nyidro, nge tha hna öhne kö hnei Keme i nyipunie e koho hnengödrai.” Öni nyidrëti hmaca jë hi: “Nyipiewekë catre kö nyipunie hune la itre sisi ka nyimutre.” E cili, Iesu a amamane ka hape, ka tru angatr isa ala cas koi Iehova, nge tha tro kö angatr a xouene la itre ka icilekeu. Ame hë la angatr a öhne la itre neköi sisi ngöne la angatr a cainöje trootro, ke canga mekune jë hi angatre lo hnei Iesu hna qaja. Ketre tui epuni fe, e tro epuni a öhne la ketre neköi waco, ke mekune kö laka, ka tru catr epuni koi Iehova, nge ka “nyipiewekë catre kö nyipunie hune la itre sisi ka nyimutre.” Celë hi lai ka troa ithuecatr koi së, e traqa ju icilekeu me easë.—Sal. 118:6.

13. Tro sa xomi ini tune kaa qa ngöne la itre hna xup?

¹³ Tro sa öhne tune kaa la itre xaa ini göi Iehova ngöne la itre hna xup? Ame la hnapan, troa xomi ijine matre goeëne la itre hna xup. Ame la hnaaluen, tro sa thele la hna ini së hnei itre ej, göi Iehova. Ngo tha ka hmaloi kö. Öni Géraldine, ketre trejine föe qa Cameroun ka hape, “Jole koi ni troa goeën la itre hna xup, ke eni a lapa traon.” Nge öni Alfonso, ketre qatre thup ka hape, “Loi e tro ni a lapa cas matre hetre ijine troa goeëne la itre hna xup me lapa mekune la pengöi Iehova.”

14. Nemene la hna ini Dravita hnene la itre hna xup?

¹⁴ Hnei Dravita hna lapa mekune la itre hna xup. Celë hi ka uku angeic troa qaja koi Iehova, ka hape: ‘Ame la eni a goeëne la  hnengödrai i nyipë, huliwa ne la iwanakoime i nyipë, ene la treu me itre wëtresiji lo hnei nyipëti hna isa amë; ka ue la atr, matre tro nyipëti a meku angeic?’ (Sal. 8:3, 4, MN) Eje hi, ame la Dravita a goeëne la itre wëtresij, ke tha angeic hmekuje kö a haine la emingömingöne la hnengödrai. Ngo angeic fe a xomi ini göi Iehova. E cili hi la angeic a öhne la edraië i Nyidrë. Nge göi lapa mekune fe angeic la aqane kökötre trootro angeic e kuhu hni thin. Ame la angeic a mekune lai, ke angeic a haine me atrehmekun laka, ka inamacane catre Iehova.—Sal. 139:14-17.

15. Hamëne pi la ketre ceitune qa ngöne la itre hna xup ka amamane la thiina i Iehova. (Salamo 148:7-10)

¹⁵ Tui Dravita, tha nyipiewekë kö tro epuni a tro kowe la ketre götran gaa nanyi matre troa lapa mekune la itre hna xup. Maine tro epuni a goeëne la itre ewekë ka lapa xötreithi epun, ke tro epuni lai a öhne la itre thiina i Iehova. Ame la epuni a drenge la idreuthine la jö, ke hapeu, tha kolo kö lai a amekunë epuni la mene i Iehova? (Iere. 31:35) Ame la epuni a goeëne la waco a kuca la trengene ej, ke hapeu, tha kolo kö lai a amekunë epuni la inamacane i Nyidrë? Nge ame la epuni a öhne la neköi kuli a thele troa heje la pune i nyiën, ke tha kolo kö lai a amamane la pengöi Iehova, laka Akötresie ka ihnyima? Ketre, ame la epuni a goeëne la thine a elo memine la neköi eahlo, ke hapeu, tha kolo kö lai a uku epun troa olene koi Iehova la ihnimi Nyidrë? Nyimutre catre la itre ijine ka troa xatua së troa atrepengöi Iehova. Ame la itre hnei Iehova hna xup, ka tru maine ka co, nge ka easenyi maine ka nany, ke itre ej asë hi a atrunyi Nyidrë.—E jë la Salamo 148:7-10.

16. Nemene la nyine tro sa kuca?

¹⁶ Nyine haine la itre hnei Iehova hna xup, nge ka inamacane catre Nyidrë, me ihnim, me trene men. Nge mama cile hi koi së la pengöi Iehova jëne la itre hna xup. Ngo nyipiewekë tro sa xomi ijine troa goeëne itre ej. Haawe, xomi ijine jë troa goeëne la itre hna xup, me lapa mekun la hnene itre ej hna ini së göi Iehova. Maine tro palahi sa kuca lai, tro hë sa easenyi catre koi Iehova. (Iako. 4:8) Ame ngöne la tane mekune e thupen, tro sa ce wange la aqane tro la itre kem me thine a xatuane la itre neköi angatr troa easenyi Iehova jëne la itre hna xup.