Atre Jë La Ithupëjia Me Epun!
“Tha tha’te kö shë la ite nyinyithina i [Satana].”—2 KORINITO 2:11
1. Thupene la hnei Adamu me Eva hna ena la wathebo, nemene la hnei Iehova hna amamane göne la ithupëjia?
ATRE hnyawa hi Adamu laka, tha ka ithanata kö la un. Celë hi matre, ame la Adamu a dreng laka, hnei Eva hna ithanata memine la ketre un, canga trotrohnine ju hi Adamu laka, ketre u la ka ithanata me Eva. (Genese 3:1-6) Thatre kö Adamu me Eva la ëjene la u cili. Ngo, hnei Adamu hna iën troa ce xöl me ej, me icilekeu memine la Keme angeic e hnengödrai. (1 Timoteo 2:14) Qaane ju hi lai, hnei Iehova hna amamane trongëne la pengöne la ithupëjia cili, me thingehnaean laka, tro kö a lep apatrene ej elany. Ngo, hnei Iehova hna hmekë së laka, tro la u ka ithanata jëne la un, a icilekeu memine la itre ka hnimi Akötresie.—Genese 3:15.
2, 3. Pine nemene matre tha hna amamane hnyawa kö la pengöi Satana qëmekene troa traqa la Mesia?
2 Tha hnei Iehova kö hna qaja amamane la ëjene lo ka icilekeu me Nyidrë. * (Wange ju la ithuemacany.) Ngo, 2 500 lao macatre thupene la hna icilekeu e Edena, hnei Nyidrë hna amamane la ithupëjia cili. (Iobu 1:6) Ame la ëje i angeic tre, “Satana,” kola hape, “Ka Icilekeu.” Kola mama la ëje i angeic ngöne la köni tusi ne la Itre Hna Cinyihan Qene Heberu. Pine nemene matre tha hna amamane hnyawa kö la pengöi angeic qëmekene troa traqa la Mesia?
3 Ame ngöne la Itre Hna Cinyihane Qene Heberu, tha hnei Iehova kö hna amamane hnyawane la pengöi Satana, memine la hnei angeic hna kuca. Ketre, ame la kepin matre cinyihane jë la Itre Hna Cinyihane Qene Heberu tre, nyine xatuane la itre atr troa atrehmekune la Mesia, me xötrethenge nyidrë. (Luka 24:44; Galatia 3:24) Ame la kola traqa la Mesia, hnei Iehova hna jëne nyidrë memine la itretre drei nyidrë matre troa amamane hnyawa la pengöi Satana, memine la itre angela ka ce xöl me angeic. * (Wange ju la ithuemacany.) Ka nyipiewekë catre lai ke, jëne Iesu memine la itre hna iën, tro Iehova a lepe apatrenyi Satana memine la itre ka ce me angeic.—Roma 16:20; Hna Amamane 17:14; 20:10.
Iehova, me Iesu, memine la itre angela a xatua së troa cil koi Satana
4. Pine nemene matre, tha tro pi kö sa xoue Diabolo?
4 Peteru aposetolo a qeje Satana Diabolo ka hape, “liona a ho.” Nge Ioane a qeje angeic ka hape, “une” me “drakona.” (1 Peteru 5:8; Hna Amamane 12:9) Ngo, tha tro pi kö sa xoue Diabolo ke, hna ami ifegone hi la mene i angeic. (E jë la Iakobo 4:7.) Kola thupë së hnei Iehova, me Iesu, memine la itre angela. Nge, jëne la ixatua i angatr, ijiji së hi troa cile kowe la ithupëjia cili. Haawe, tro sa ce wange la köni hnyinge celë: Nemene la aqane musinëne la fen hnei Satana? Nemene la aqane ajojezine angeic la itre atr? Nemene la itre ewekë hnei angeic hna thatreine kuca? Troa sa la köni hnyinge celë, me xomi ini qa ngön.
AQANE MUSINËNE LA FEN HNEI SATANA
5, 6. Pine nemene matre thatreine kö la itre musi troa sazene la pengöne la fen?
5 Alanyimu la itre angela ka xötrethenge Satana ngöne la angeic a icilekeu me Akötresie. Qëmekene troa traqa la Iwë, hnei Satana hna ajojezine la itre xan e angatr matre troa ce meköl memine la itre föe. Tusi Hmitrötr a qejepengöne lai, ngöne lo kola qeje drakona, e trotro qa hnengödrai, me hule trongëne “la götrane hnaakönine la nöjei wëtesiji ne hnengödrai.” (Genese 6:1-4; Iuda 6; Hna Amamane 12:3, 4) Ame la kola trotrije la lapa i Akötresie hnene la itre angela cili tre, angatre hë lai a lapa fene la musi Satana . Tha tro pi kö sa mekun laka, ka zikoziko la aqane huliwa i angatr. Ame ngöne la gaa sihngödr, hnei Satana hna acile la musi angeic, me nyitipune la aqane trongene la Baselaia i Akötresie. Hnei angeic hna acili angeice kö troa joxu, me hamë hnëqane la itre dremoni, me thue mene i angatr, matre tro angatr a musinëne la fen.—Efeso 6:12.
Luka 4:5, 6) Nyipici laka, nyimutre la itre mus ka huliwa catre kowe la itre atrene la nöj, nge hetre hene ne mus ka ajan troa xatuane la itre atr. Ngo, thatreine kö la ketre e angatr troa sazene la pengöne la fen.—Salamo 146:3, 4; Hna Amamane 12:12.
6 Hnei Satana hna nyijëne la organizasio i angeic matre troa musinëne la itre musi ne la fen. Celë hi ka mama ngöne lo angeic a amamai Iesu “la nöjei baselaia asëjëihë e celë fen,” me qaja ka hape: “Tro ni a hamë cilieti la nöjei musi asë cili, memine la lolo ne it’ ej ; ke ase hë hamë ni, mate tro ni a hamëne kowe la hnenge hna ajan.” (7. Nemene la aqane huliwane Satana la hmi ka thoi, memine la fen ka salem? (Wange ju la pane iatr.)
7 Ketre, Satana me itre dremoni a nyijëne la hmi ka thoi, memine la fen ka salem matre troa “amenune la fene hnengödrai asëjëihë,” ene la itre atr asë. (Hna Amamane 12:9) Jëne la hmi ka thoi, Satana a sil la itre trenga thoi göi Iehova, me thel troa asihngödrine la ëje i Nyidrë. (Ieremia 23:26, 27) Ame la thangane lai, alanyimu la itre atr ka mekun laka, angatr a thil koi Akötresie, ngo kolo pe a thili koi itre dremoni. (1 Korinito 10:20; 2 Korinito 11:13-15) Nge, jëne la fen ka salem, Satana a ajojezine la atr matre, tro la atr a mekun laka, manie me mo la jëne madrin. (Ite Edomë 18:11) Ame la itre hna ajojezine tre, angatr a nue la mele i angatr troa nyihluene la mani, ngo tha Akötresieti kö. (Mataio 6:24) Ngacama angatr a hnimi Akötresie, ngo tro la aja mo a thahe la ihnimi angatr koi Nyidrë.—Mataio 13:22; 1 Ioane 2:15, 16.
Tro kö sa xötrethenge Iehova, maine Satana?
8, 9. (a) Nemene la lue ini nyine tro sa xom qa ngöne la aqane ujë i Adamu, me Eva, memine la itre angela ka ngazo? (b) Pine nemene matre, nyipiewekë koi së troa atre laka, Satana la ka musinëne la fen?
8 Lue ini nyine tro sa xome qa ngöne la aqane ujë i Adamu, me Eva, me itre angela ka ngazo. Ame la hnapan tre, hne së hna ce wang laka, lue gojenyi hi, ngo casi hi la nyine tro sa xötrën. Hapeu, tro kö sa xötrethenge Iehova, maine Satana? (Mataio 7:13) Ame la hnaaluen tre, xalaithe hi la itre edrö hna kapa hnene la itre ka xötrethenge Satana. Eje hi laka, ame Adamu me Eva, hna nue koi nyidro troa iën la loi me ngazo. Nge, ame la itre dremoni, hna nue koi angatr troa musinën la itre musi ne la fen. (Genese 3:22) Ngo, hetre thangane ka ngazo palahi la hna kapa e troa xötrethenge Satana. Pëkö ca eloin!—Iobu 21:7-17; Galatia 6:7, 8.
9 Pine nemene matre, nyipiewekë koi së troa atre laka, Satana la ka musinëne la fen? Celë hi ka troa xatua së troa atreine waiewekë hnyawa göne la itre mus, me upi së troa catre cainöjëne la maca ka loi. The thëthëhmine kö së laka, aja i Iehova tro sa metrötrëne la itre mus. (1 Peteru 2:17) Ketre, aja i Nyidrë tro sa trongëne la itre wathebo, e tha ka icilekeu kö memine la itre trepene meköti Nyidrë. (Roma 13:1-4) Nge, tha easë kö a hane kuci politik, maine sajuëne pena la ketre parti, maine ketre atr ka kuci politik. (Ioane 17:15, 16; 18:36) Atre hi së laka, Satana a thel troa asihngödrin, me adrone la ëje i Iehova, haawe, loi e tro sa isin troa inine la nyipici göi Akötresie kowe la nöjei atr. Hetre madrine së troa xom, me qaja la ëje i Nyidrë. Ka sisitria kö la ihnimi së koi Akötresie hune la ihnimi së kowe la manie me mo.—Isaia 43:10; 1 Timoteo 6:6-10.
AQANE AJOJEZINE LA ITRE ATR HNEI SATANA
10-12. (a) Nemene la aqane tupathe Satana la itre angela? (b) Nemene la ini hne së ha xom qa ngöne la hna kuca hnene la itre angela cili?
10 Hetre itre xa aqane iajojezi Satana kowe la itre atr. Ame itre xa ijin, angeic a tupathi angatr maine akötrë angatr matre, tro angatr a kuca la aja i angeic.
11 Hnei Satana hna tupathe fe la itre angela. Maine jë, hnei angeic hna goeëne hnyawane la pengöi angatr, matre troa mama la itupath ka troa ie koi angatr. Alanyimu la itre angela ka kei kowe la itupath, ene lo troa ce meköl memine la itre föe. Thupene lai, hnene la itre föe hna hnahone la itre nekönatr ka tru matran, nge ka akötrëne la itre atr ka lapa easenyi angatr. (Genese 6:1-4) Hnei Satana hna tupath la itre angela hnene la kuci ngazo, me qaja fe koi angatr ka hape, troa catre la mene i angatr hune la itre atr. Ame e cili, Satana a thel matre tha tro kö a eatr la hna perofetane hnei Iehova göne la ‘matra ne la föe.’ (Genese 3:15) Ngo, tha hnei Iehova kö hna nue angeic troa hun. Hnei Nyidrëti hna axulune la Iwë Atraqatr, matre sewe Satana me itre dremoni troa eatrëne la aja i angatr.
Satana a tupathi së së memine la kuci ngazo, pi tru, me kuci iöni (Wange ju la paragarafe 12, 13)
12 Nemene la hne së hna inin qa ngön? Ame la kuci ngazo, memine la pi tru tre, lue itupathe lai ka ie catre kö hune la itre xan. Ame la itre angela ka xötrethenge Satana tre, itre macatre ne ce mele angatr me Iehova e hnengödrai. Ngo, hnei angatr hna nue la itre aja ka ngazo troa kökötr, utihë la kola lapane la itre hni angatr. Tha tro pi kö sa thëthëhmine laka, itre macatre ne nyihlue i Iehova ju hë së, ngo ijije hi tro la itre aja ka ngazo a lapane la hni së. (1 Korinito 10:12) Celë hi kepin matre, loi e tro palahi sa waipengö së, me thel ka hape, tha cia kö e kuhu hni së la itre aja ka ngazo, maine pi tru pena.—Galatia 5:26; e jë la Kolose 3:5.
13. Nemene la ketre itupathi Satana, nge nemene la aqane tro sa cile kow?
13 Ame la ketre itupath i Satana tre, kolo ajane troa goeëne la kuci iöni. Ame enehila, Heberu 5:14) Nge, e “ka pë thoi ngön” la ihnimi së koi Akötresie, tro së lai a iëne hnyawa la itre nyine iamadrinë. (Roma 12:9) Ame la atr ka lue ialamek tre, angeice hi a qaja, ngo tha ka kuca kö. Celë hi matre, ame la easa iëne la ketre nyine iamadrinë, loi e tro sa isa hnying ka hape: ‘Eni kö a trongëne la itre trepene meköt hnenge hna inine kowe la itre atr? Nemene la mekuna ne la itre hnenge hna ini Tusi memin, maine itre hnenge hna cainöje kow, e tro angatr a öhne la nyine iamadrinë hnenge hna iën?’ E tro sa trongëne la itre trepene meköt hne së hna inine kowe la itre atr, haawe, tro ha hmaloi koi së troa thipetrij la itre itupathi Satana.—1 John 3:18.
Satana a nyijëne la hmi ka thoi, memine la itre nyine iamadrinë, matre tro la itre atr a thele troa atre pengöne la itre dremoni. Itre film, me itre elo, me itre xa nyine iamadrinë a amamane la kuci iöni ceitu me ketre ewekë nyine madrin. Nemene la aqane tro sa cile kowe la itupath cili? Tha tro kö sa treqene tro la organizasio i Iehova a amë wengëne la itre nyine iamadrinë ka loi me ka ngazo. Nyipiewekë tro sa inine la mekuthethewe së, matre tro sa atreine axecië mekun thenge la itre trepene meköti Iehova. (Satana a akötrë së jëne la itre wathebo i mus, memine la icilekeu qaathene la itre sine ce ini së, maine hnepe lapa së (Wange ju la paragarafe 14)
14. Nemene la aqane akötrë së hnei Satana, nge nemene la aqane tro sa cile kowe lai?
14 Satana a thel troa akötrë së, me axouenyi së matre tro sa nuetriji Iehova. Maine jë, tro angeic a kuca matre tro la itre mus a wathebone la huliwa ne cainöj. Maine pena, tro la itre sine ce huliwa së, maine itre ka ce ini me easë a hnyimasai së pine laka, easa trongëne la itre trepene meköt ne la Tusi Hmitrötr. (1 Peteru 4:4) Tro Satana lai a thel tro la itre atrene la hnepe lapa së ka tha hmi kö a sewe së troa sine la itre icasikeu ke, aja i angatr troa xatua së. (Mataio 10:36) Nemene la aqane tro sa cile kowe la iakötrë i Satana? Eje hi laka, tha tro kö sa sesëkötr la kola traqa la itre ewekë cili ke, tha sihngödri kö koi së laka, Satana a icilekeu me easë. (Hna Amamane 2:10; 12:17) Ketre, the tro pi kö sa thëthëhmine lo jole ka tru hna amejën ekö. Öni Satana, easa nyihlue i Iehova ngöne la itre ijine loi, ngo ame la kola traqa la itre jol, canga tro hi sa thipetriji Nyidrë. (Iobu 1:9-11; 2:4, 5) Haawe, the cile kö së troa sipo trengecatr thei Nyidrë. Tha tro jë kö Iehova a nuaxöji së.—Heberu 13:5.
HNA THATREINE KUCA HNEI SATANA
15. Ijiji Satana kö troa musinë së matre troa kuca la ketre ewekë, nge tha ajane kö së? Qejepengöne jë.
15 Thatreine kö Satana musinë së troa kuca la ketre ewekë, nge tha ajane kö së. (Iakobo 1:14) Thatre kö la itre atr enehila laka, angatr a xötrethenge Satana. Celë hi matre, ame la kola atre la nyipici hnei ketre, nyipiewekë tro angeic a iën la hnei angeic hna troa ce xöl memin, Iehova maine Satana. (Ite Huliwa 3:17; 17:30) E tro sa isine troa drengethenge Akötresie, thatreine kö Satana troa thë la lapaune së.—Iobu 2:3; 27:5.
16, 17. (a) Nemene la ewekë hna thatreine kuca hnei Satana me itre dremoni? (b) Pine nemene matre tha tro pi kö sa xou troa qaja amamane la aliene hni së koi Iehova?
16 Hetre ketre ewekë hna thatreine kuca hnei Satana, memine la itre dremoni. Tha hnei Tusi Hmitrötre kö hna qaja ka hape, ijiji angatr troa atre la aliene hni së, maine mekuna së. Iehova me Iesu hmekuje hi la ka atrein. (1 Samuela 16:7; Mareko 2:8) Haawe, tro kö sa xou troa qaja la aliene hni së koi ketre, maine thithi pena wanga drenge jë Diabolo me itre dremoni, nge xome jë angatr la itre ithuemacanyi cili nyine angazo së? Ohea! Pane mekune jë la: Tha xou së kö troa kuca la ketre ewekë ngöne la huliwa i Iehova wanga goeëne jë hnei Diabolo. Ketre tune mina fe, tha tro pi kö sa xou troa thithi wanga drei së jë hnei Diabolo. Ketre, anyimua qaja e hnine la Tusi Hmitrötr la itre hlue i Iehova ka thithi draië koi Iehova. Nge, tha hane kö së e laka, hnei angatr hna xouen tro Diabolo a drei angatr. (1 Ite Joxu 8:22, 23; Ioane 11:41, 42; Ite Huliwa 4:23, 24) Maine tro sa isine troa ithanata, me ujë thenge la aja i Iehova, haawe, tha tro pi kö Nyidrëti lai a nue Diabolo troa akötrë së.—E jë la Salamo 34:7.
17 Nyipiewekë tro sa atrepengöne la ithupëjia me easë, ngo tha tro pi kö sa xoue angeic. Nyipici laka, itre atr ka tha pexeje kö së, ngo jëne la ixatua i Iehova, ijiji së hi troa ngaa Satana! (1 Ioane 2:14) Maine tro sa cile koi Satana, tro angeic a kötre ananyi së. (Iakobo 4:7; 1 Peteru 5:9) Ame enehila, Satana a thel troa ajojezine la itre thöth. Nemene la aqane tro angatr a cil kowe la itre nyinyithiina i angeic? Tro sa ce ithanatane lai ngöne la tane mekune ka troa xulu.
^ par. 2 Tusi Hmitrötr a qaja la ëjene la itre xa angela. (Angete Amekötin 13:18; Daniela 8:16; Luka 1:19; Hna Amamane 12:7) Ketre, hnei Iehova hna ati ëjene la nöjei wëtresiji asë. (Salamo 147:4) Haawe, meköt e tro sa mekun laka, tro fe Nyidrëti a ati ëjene la itre angela asë, uti fe hë lo angela ka nyi Satana e thupen.
^ par. 3 Ame ngöne la Itre Hna Cinyihane Qene Heberu, a 18 lao mama la hna hape, “Satana.” Nge, ame ngöne la Itre Hna Cinyihane Qene Heleni tre, a 36 lao mama ej.