Iehova a Hnim La Itre ‘Ka Wa Wene Ngöne La Xomihni’
“Ame itre ej ngöne la hnadro ka loi, kola qaja la angetre . . . wa wene hnyawa ngöne la xomihni.”—LUKA 8:15, MN.
1, 2. (a) Pine nemen matre kola thuecatre së hnene la tulu ne la itre trejin ka catre cainöj, ngacama jol? (Wange ju la pane iatr.) (b) Nemene la hna qaja hnei Iesu göi troa cainöj ngöne la sipu ‘zi së’ kö? (Wange ju la ithuemacany.)
SERGIO me Olinda la lue trefën ka pionie e Etazini, nge isa sasaithe hë nyidro la 80 lao macatre. Ame hë enehila, jole hë koi nyidro troa tro ke, kola akötre la lue waca i nyidro. Ngo, tune la hna majemin e nöjei macatre, nyidroti a tro kowe la ketre park gaa tru atr, e 7 H e hmakany. Ame e cili, nyidroti a cil ezine la hnë xomi kar, me hamë zonal kowe la itre atr. Tha feke pi kö nyidro qa cili, ngacama alanyimu la itre ka xele ma drei nyidro. Nyidroti pe a madrine kowe la itre atr ka goeë nyidro. Ame hë e midi, nyidroti a nango bëeke kowe la hnalapa. Ame elanyi e 7 H e hmakany, nyidroti hmaca tro kowe la hnë xomi kar. Nge, aqane cainöje i nyidroti hi lai ngöne la 6 lao drai, e nöjei wiik.
2 Alanyimu la itre trejin ka ujë tui Sergio me Olinda laka, itre macatre ne cainöj angatr ngöne la götrane hnei angatre hna mele ngön, ngacama tha pi drei angatre kö. Maine jë, ceitune hi * (Wange ju la ithuemacany.) Eje hi, tro la tulu i epun a ithuecatr kowe la itre trejin, me kowe mina fe la itre ka hekö hë cainöj. Hanawang la hna qaja hnene la itre xa trejin ka iwai trootro. Önine la ketre: “Ame ngöne la eni a cainöj memine la itre trejin ka catre mele nyipici tre, kola aegöcatrenyi ni hnene la tulu i angatr.” Ketre a qaja ka hape: “Kola ithuecatre koi ni hnene la aqane mele nyipici angatr koi Iehova. Nge, celë hi ka xatua ni troa catre cainöj.” Nge, öni ketre mina fe: “Kola thue madrineng la tulu i angatr.”
memine la teritoare i epun. Celë hi matre, loi e troa qaja aloinyi epun ke, epuni a catre cainöj ngacama jol.3. Nemene la köni hnying hne së hna troa ce wang, nge pine nemen?
3 Ame ngöne la tane mekune celë, tro sa ce wang la köni hnying: Pine nemen matre easa kucakuca e itre xa ijin? Nemene la aliene la hna hape, troa wa wen? Nemene la ka troa xatua së tro palahi sa wa wene ngöne la xomihni? Tro la itre hnyinge celë a xatua së troa eatrëne hnyawa la huliwa ne cainöj hnei Iesu hna upi së troa kuca.
KEPINE MATRE EASA KUCAKUCA
4. (a) Nemene la ka ej e kuhu hni Paulo ngöne la kola icilekeu me xele ma drei angeic? (b) Pine nemene matre kola akötre tune lai hnei Paulo?
4 Maine jë, hna hane traqa koi epun la kucakuca ke, hna xele ma dreng la maca ne la Baselaia hnene la itre atr ne la teritoare i epun. Haawe, casi hi la mekuna i epun me Paulo aposetolo. Traqa koi 30 lao macatre ne cainöje Paulo. Hnei angeic hna xatuane la itre atr ka alanyimu troa hane nyihlue i Akötresie. (Ite Huliwa 14:21; 2 Korinito 3:2, 3) Ngo, nango jole pi hë koi angeic troa xatuane la itretre Iudra. Alanyimu e angatr ka xele ma drei angeic, nge ame itre xan, kola icilekeu me angeic. (Ite Huliwa 14:19; 17:1, 4, 5, 13) Tune kaa Paulo ngöne la kola icilekeu me xele ma drei angeic? Öni angeic: “Aköte atraqate ni, nge hleuhleu pala kö la hning.” (Roma 9:1-3) Pine nemen matre kola akötre tune lai hnei Paulo? Pine laka, atraqatr la aja i angeic troa cainöj, nge tru la ihnimi angeic kowe la itre atr. Tru mina fe la hnei angeic hna mekune la itretre Iudra. Nge kola hace la hni angeic, ngöne la angatr a thipëne la utipine i Akötresie.
5. (a) Nemene la ka upi së troa cainöj? (b) Pine nemene matre tha sesëkötre kö së la easa kucakuca e itre xa ijin?
5 Ceitu së hi me Paulo, easa cainöje kowe la itre atr ke, easa hnimi angatr me ajane troa xatua angatr. (Mataio 22:39; 1 Korinito 11:1) Hnene laka, itre ka cainöje hë së, trotrohnine hi së laka, pëkö mel ka sisitria hune la troa nyihlue i Iehova. Nge ame la aja së, tro angatr a hetre mele ka loi! Celë hi kepine matre, easa xatua angatr troa atre la nyipici göi Iehova, memine la aja i Nyidrë kowe la itre atr. Kösë easë hi lai a hamëne koi angatr la ketre ahnahna ka tru, me qaja koi angatr ka hape: ‘Ange kapa ju!’ Ngo e tha kapa kö angatr, eje hi laka, tro sa ‘hleuhleu,’ tui Paulo. Ame ngöne la easa hacehni tre, tha kolo kö lai a hape, ka nanazije la lapaune së, ngo kolo pe a amamane la etrune la ihnimi së kowe la itre atr. Haawe, maine traqa ju së kucakuca e itre xa ijin, catre jë kö cainöj. Ce mekuna së hi me Elena, ketre trejine ka pionie laka, 25 hë lao macatre. Öni angeic: “Nyipici laka, ame itre xa ijin, tru la jol ngöne la huliwa ne cainöj. Ngo, celë hi huliwa hneng hna pi kuca.”
ALIENE LA TROA WA WEN
6. Nemene la hnying hne së hna troa ce wang enehila?
6 Pine nemene matre ka xecie koi së laka, easë ju hë ngöne la ketre götran, ngo ka hetre thangane palahi la huliwa ne cainöj? Haawe, tro sa ce ithanatane la lue ceitun hna hamën hnei Iesu, nge ka qaja la enyipiewekëne troa ‘wa wen.’ (Mataio 13:23) Ame la pane ceitun tre, kola qeje vine.
7. (a) Ame ngöne la ceitune i Iesu, drei la “ate eëny,” me “vine,” me itre “umen”? (b) Nemene la hnyinge hne së hna troa sa?
7 E jë la Ioane 15:1-5, 8. Ame ngöne la ceitune celë, hnei Iesu hna qaja ka hape, ame Iehova, Nyidrëti la “ate eëny,” Iesu hi la “vine,” nge ame itretre dreng tre, itre “umen.” * (Wange ju la ithuemacany.) Thupene lai, hnei Iesu hna qaja kowe la itre aposetolo ka hape: “Nyine atrunyi Kaka la tro nyipunie a wa atrun ; nge tro ha nyipunie a itete dei ni.” Haawe, nemene la aliene la troa wa wen? Ame ngöne la ceitune celë, tha hnei Iesu kö hna qaja la pengöne la wene cili, ngo nyidrëti pe a hamëne la ketre hatrene ka troa xatua së troa sa la hnying.
8. (a) Pine nemene matre ame la troa “wa wen” ngöne la ceitune i Iesu, tha kolo kö a qaja la troa inine la itre atr matre troa atre drei Iesu? (b) Ka jole kö la itre hnei Iehova hna upi së troa kuca?
8 Hnei Iesu hna qaja la Keme i nyidrë ka hape: “Nyidëti a xomepi la nöjei umene thenge ka tha wa kö.” Kösë nyidrëti a qaja e celë ka hape, Atre Anyipici Iehova së, e tro sa wa wen. (Mataio 13:23; 21:43) Haawe, ame ngöne la ceitune celë, ame la troa wa wen, tha kolo kö a qaja la troa inine la itre atr matre tro angatr a drei Iesu. (Mataio 28:19) Maine nyipici hi lai ke, kösë kola qaja e celë ka hape, ame la itre trejin ka tha hane kö xatua ketre troa hane drei Iesu tre, ceitu i angatr me itre umen ka tha wa wen. Hapeu, aqane tro hi lai a trotrohnine la trengewekë i Iesu? Ohea! Tha easë kö la ka musinëne la itre atr troa hane drei Iesu. Ketre, ame Iehova, ka ihnim. Tha tro jë kö Nyidrëti a upi së troa kuca la ketre ewekë hne së hna thatrein. Ame la itre hnei Nyidrëti hna upi së troa kuca tre, tha ka jole kö koi së troa trongën.—Deuteronomi 30:11-14.
9. (a) Nemene la aqane tro sa wa wen? (b) Nemene la ceitune hne së hna troa ce wang?
9 Nemene la aliene la kola hape, troa wa wen? Kola qaja la ketre ewekë hne së asë hi hna atreine kuca. Nemene la huliwa hnei Iehova hna ahnith kowe la itre hlue i Nyidrë? Kola qaja la huliwa ne cainöjëne la maca ka loi ne la Baselaia i Akötresie. * (Wange ju la ithuemacany.) (Mataio 24:14) Kola mama hnyawa lai ngöne la ceitune i Iesu göne lo atre eëny. Tro sa ce wang la ceitune cili.
10. (a) Ame ngöne la ceitune i Iesu, nemene la itine feja? Nge, nemene la hnadro? (b) Nemene la hna hamëne hnene la qitr?
10 E jë la Luka 8:5-8, 11-15. Ame ngöne la ceitune göne lo atre eëny tre, Iesu a amamane laka, ame la itine feja tre, kola qaja la “Wesi ula i Akötesie,” ene la maca ne la Baselaia i Nyidrë. Ame la hnadro tre, kola qaja la hni ne la atr. Ame la kola mala la itine feja hune la hnadro ka loi, tre ej a cia wan me cia hlöeë. Thupene lai, kola “wa, isa ca hadede la o wen.” Maine ame la feja tre, qitr, nemene la hnene ej hna troa hamën? Itre neköi qitr? Ohea, tro eje lai a hamë itre itine feja, ka troa cia me nyi qitr. Ame ngöne la ceitune celë tre, e ca itine feja hna tran, tro lai a hamëne la 100 lao itine feja. Nemene la ini hne së hna xome göi huliwa ne cainöj?
Nemene la aqane tro sa “wa wene hnyawa ngöne la xomihni”? (Wange ju la paragarafe 11)
11. (a) Nemene la ini hne së hna xom qa ngöne la ceitun ne la atre eëny? (b) Nemene la aqane troa wa the së la itre itine feja ka hnyipixe?
11 Hnei easë hna xötrei inine la nyipici göne la Baselaia i Akötresie memine la kem me thine së, maine ketre trejine pena. Ame e cili, kösë hnei angatr hna trane la itine feja ngöne la dro ka loi. Ame hna kökötre trootro la itine feja cili, uti hë la eng me nyiqaane wa wen. Atraqatre la madrine i angatr la easa kapa la maca ka loi. Tune la qitr hna qaja ngöne la ceitun ne la atre eëny, tha eje kö a xöl, ngo eje pe a hamë itre itin. Haawe, tha easë kö a wa wen la easa eatrongëne la ketre atr matre troa nyihlue i Iehova. Ngo, easa wa wen la kola wa the së la itre itine feja ka hnyipixe. * (Wange ju la ithuemacany.) Kola hapeue lai? Ame la easa qaja la maca ne la Baselaia i Akötresie tre, kösë easë hi lai a jume la itre itine feja ka cia e kuhu hni së. (Luka 6:45; 8:1) Haawe, ame la easa catre cainöjëne la maca ne la Baselaia tre, easë hi lai a “wa wene hnyawa ngöne la xomihni.”
12. (a) Nemene la ini hne së hna kapa qa ngöne la itre ceitune i Iesu? (b) Nemene la thangane la ini celë koi epun?
12 Nemene hë la ini hne së hna kapa qa ngöne la itre ceitune i Iesu, göne la vine memine la atre eëny? Hne së hna inine laka, tha easë kö a “wa wen” ke, kola drenge la maca hne së hna tro fë hnene la itre atr. Ngo, easa wa wen la easa catre cainöj. Celë hi hna qaja hnei Paulo, lo kola hape: “Tro ha isa hete thupene ka ijije la huliwa.” (1 Korinito 3:8) Iehova a amanathithin la huliwa së. Tha Nyidrëti kö a goeëne la thangane la hne së hna huliwa. Öni Matilda, ketre trejine ka pionie, 20 hë lao macatre ka hape, “Madrine catre ni laka, Iehova a amanathithin la trengecatre së.”
AQANE TRO SA “WA WENE HNYAWA NGÖNE LA XOMIHNI”
13, 14. Thenge la hna qaja ngöne Roma 10:1, 2, pine nemen matre Paulo a catre cainöj?
13 Nemene la ka troa xatua së troa “wa wene hnyawa ngöne la xomihni”? Tro sa ce wange la tulu i Paulo. Atre hi së laka, ame lo kola thipetrije la maca ne Baselaia hnene la angetre Roma 10:1, 2) Haawe, tro sa ce wange la itre kepin matre Paulo a catre cainöj.
Iudra, hna kucakuca hnei Paulo. Ngo, tha hnei angeice kö hna cile troa cainöj koi angatr. Angeic a qaja la ihnimi angeic kowe la angetre Iudra, lo kola hape: “Ame la aja ne la hninge memine la thithinge koi Akötesie thatraqai angat, te, mate mel. Ke ini a wai hatenyi angate laka itete cate troa huliwa koi Akötesie, ngo tha thenge la inamacan.” (14 Ame la hnapan tre, hnene la ‘aja ne la hni angeic,’ matre Paulo a cainöj kowe la angetre Iudra. Aja i angeic tro angatr a mel. (Roma 11:13, 14) Ame la hnaaluen tre, angeic a ‘thithi koi Akötresie thatraqai angatr.’ Paulo a sipo iele Iehova troa xatua angatr isa ala cas, matre troa kapa la maca ne Baselaia. Ame la hnaakönin, öni Paulo: “Itete cate troa huliwa koi Akötesie.” Loi la hna goeën hnei Paulo thene la itre atr, nge tha sihngödri kö koi angeic laka, ijiji angatre fe troa hane nyihlue i Iehova. Mama hnyawa hi koi angeic laka, itretre Iudra ka catre hmi, nge tro fe angatr elanyi a hane xötrethenge Iesu tui angeic.
15. Nemene la aqane tro sa nyitipu Paulo? Qaja jë la itre hna melën.
15 Nemene la aqane tro sa nyitipu Paulo? Ame la hnapan tre, loi e hetre aja së troa thel la itre hni ka ajan “la mele ka tha ase palua kö.” Ame la hnaaluen tre, tro sa sipo iele Iehova troa xatuan la itre atr ka hetre hni ka ajan troa dreng la maca hne së hna tro fë. (Ite Huliwa 13:48; 16:14) Celë hi hna kuca hnei Silvana, ketre trejin ka 30 hë lao macatre ne pionie. Öni angeic, “Qëmekene tro eni a fenafena la ketre qëhnelö, eni a thith koi Iehova, me sipo Nyidrë troa xatua ni troa atreine waiewekë hnyawa.” Easë mina fe a thith matre tro la itre angela a xatua së troa öhne la itre atr ka pi drei së. (Mataio 10:11-13; Hna Amamane 14:6) Hna qaja fe hnei Robert, ketre trejine ka 30 hë lao macatre ne pionie, ka hape, “Ketre madrine ka tru la troa ce huliwa memine la itre angela, itre ka atre la mele ne la itre atr ne la teritoar.” Ame la hnaakönin, tro sa thel la ka loi thene la itre atr, memine la hnei angatr hna troa atreine kuca ngöne la huliwa i Iehova. Karl, la ketre qatre thup, nge traqa koi 50 lao macatre ne xomi bapataiso. Öni nyidrë, “Eni a thel la ketre ewekë ka amaman laka, hetre aja thene la atr troa kapa la maca. Maine jë, kola hnyimahnyima, nge lolo la aqane goeë së, maine pena ka lolo la itre hnying.” Maine tro sa kuca la itre ewekë celë, tro hë së lai a “wa wene hnyawa ngöne la xomihni” tui Paulo.
“THE SHAWA KÖ LA IWANAKOIME I ’Ö”
16, 17. (a) Nemene la ini hne së hna xome qa ngöne la tusi Ate Cainöj 11:6? (b) Nemene la aqane tro la huliwa ne cainöj a ketr la hni ne la itre atr?
16 Tha tro pi kö sa thëthëhmine laka, ka hetre thangane la huliwa ne cainöje së kowe la itre atr, ngacama pëkö ka pi drei së. (E jë la Ate Cainöj 11:6.) Itre atr a goeë së. Öhne hi angatr laka, ka lolo la aqane heetre së, nge hetre metrötre me thiina ka menyik the së. Celë hi ka troa ketr la hni angatr. Nge, göi tro fe a saze la aqane goeë së hnene la itre ka xele ma wai së. Celë hi hna melën hnei Sergio me Olinda.
17 Öni Sergio: “Hnene la hnei nyio hna wezipo matre pane cile ju hi nyio troa tro kowe la park. Ame la nyio hmaca a traqa, itre atr a hning ka hape, ‘Qa i epone kaa? Tru la hne huni hna meku epon.’ ” Kola dredrehnyima hnei Olinda, me qaja ka hape: “Kola halehale koi nyio hnene la itre ka xomi kar me qaja ka hape, ‘Catre pi!’ Hnei angatre mina fe hna xom la itre zonale së.” Sesëkötre ju hi Sergio me Olinda la kola traqa fë hnene la ketre trahmany la uke iengen koi nyidro ngöne lai présentoir. Nge, nyidrëti a olene koi nyidro la huliwa hnei nyidroti hna kuca.
18. Pine nemen matre ka ej e kuhu hni epun la troa catr “wa wene hnyawa ngöne la xomihni”?
18 Maine tha epuni kö a ‘sawa la iwanakoime i epun’ troa cainöjën la maca ne Baselaia ke, epuni hi lai a “anyipicine kowe la nöjei nöj.” (Mataio 24:14) Ame la ka sisitria tre, tru la madrine i epun ke, epuni a amadrinë Iehova. Atraqatr la ihnimi Nyidrë kowe la itre “ka wa wene hnyawa ngöne la xomihni”!
^ par. 2 Öni Iesu, tha ka hmaloi kö troa cainöj ngöne la sipu ‘zi së’ kö. Nge celë hi ka mama ngöne la foa lao evangelia.—Mataio 13:57; Mareko 6:4; Luka 4:24; Ioane 4:44.
^ par. 7 Maine nyipici laka, ame la itre umen hna qaja ngöne la ceitun tre, kola qaja la itre keresiano ka troa mele hnengödrai, ngo hetre ini nyine tro la itre hlue i Akötresieti asë a xom.
^ par. 9 Ame la hnëewekë troa “wa wen” tre, kolo mina fe a qaja la troa melëne la itre igötranene la “wene la [u]a.” Tro la tane mekune celë memine la ketre e thupen a amamane la aqane troa melëne la “wene la ite ukeineqe shë,” ene la huliwa ne cainöj.—Galatia 5:22, 23; Heberu 13:15.
^ par. 11 Ame itre xa ijin, Iesu a hamëne la itre ceitune göi “ate trane memine la ate sin,” matre troa qaja la huliwa ne cainöj, ene la troa inine la itre atr troa hane drei Iesu.—Mataio 9:37; Ioane 4:35-38.