AME ngöne la itre macatre ne ini, pëkö ewekë ka saze. Casi hi la itre sine ce ining utihë lo eni a fenes qa hna ini. Nge, ka iatre asë hi la itre atrene la traon.

Kola lapa xötreithi la traon e Liberty, hnene la itre hnë axö öni, nge watolea la hna majemine tran e cili. Ame lo eni mala tre, kaka a huliwa ngöne la ketre hnë axö öni. Matre, ame lo eni a thöth, hnenge hna inine xomi kamio, me kuca la itre xa huliwa e cili.

Tha öhnyi kakati kö ni lo kola thupëtresij. Ame lo kola mala ni tre, 56 hë lao macatre i nyidrë, nge 35 lao macatre i nenë. Ngo, ka egöcatre palahi kaka. Ka tru koi nyidrë la troa huliwa catr, nge aja i nyidrë tro fe huni a tun. Tha ka trene manie kö nyidrë, ngo hnei nyidrëti hna hamë hun la ketre hnalapa, me itre iheetr, me xen. Nge, hnei nyidrëti palahi hna xomi ijine troa ce me eahun. Hna meci hnei nyidrë lo kola 93 lao macatre. Nge, hna mec hnei nenë lo kola 86 lao macatre. Tha ka nyihlue i Iehova kö nyidro. Ngo, hnene la ketre trejin me ni hna xome la hnëqa ne qatre thup utihë lo 1972.

Ka hmi catre nenë. E nöjei mecixen, eahlo a tro sai hun kowe la hnë hmi baptiste. Hnenge hna drenge lo kola xötrei qeje A.I.U. lo eni a 12 lao macatre. Ame lo eni a hnying koi nenë ka hape: “Nemene la aqane  tro Iesu a Hupuna me Tretretro?” Mekune pala kö ni la aqane sa i eahlo, lo kola hape: “Neköng, pëkö ka atre. Thatreine kö së trotrohnine lai.” Nyipici laka, pëkö hnenge hna trotrohnin ekö. Ngo, ame lo kola 14 lao macatreng, hnenge hna xomi bapataiso ngöne la hneopegejë ne la traon. Akönia lö ni e hnine la tim, acas kowe la Tretretro, hnaaluene kowe la Hupuna, nge hnaakönine kowe la uati hmitrötr!

Ame lo eni a ini, kola kuci box hnene la ketre sineeng, nge hnei angeic hna upi ni fe troa hane tui angeic. Celë hi matre, hnenge hna nyiqaane kuci box lapa, utihë la eni a lö hnine la ketre gurup ka kuci box hna hape, Golden Gloves. Tha ka nyipi maca kö ni ngöne la elo cili matre, thupene la itre xa isi, hnenge hna nue la elo box. Thupene lai, hna hë ni troa lö hnine la trongene isi angetre Etazini, nge hna upi ni a tro Alema. Ame ngöne la eni e cili, hnene la itre ka mus hna upi ni kowe la ketre hnë ini ke, ame koi angatr, tro eni a ketre tane isi ka lolo. Aja i angatr tro ni a kuca lai ngöne la meleng ka pexej. Ngo, tha ajange kö troa kuci isi, matre thupene la lue macatre ne huliwa, hnenge hna trotrij la kuci isi lo 1956. Tha qea ju kö thupene lai, hnenge hna lö hnine la ketre pengöne kuci isi.

Qëmekene tro ni a atre la nyipici, ka tria la mekunang göne la pengöne la nyipi trahmany. Hna ajojezi ni hnene la itre film, memine la itre ka lapa easenyi ni. Ame koi ni, ame la trahmanyi ka qeje Tusi Hmitrötr tre, angeic a qene föe. Ngo, hetre ewekë hnenge hna inin, nge ka saze la meleng. Ame ngöne la ketre drai, eni nyiapëne la traon memine la lotong, nge hnene la lue jajinyi hna halea ni. Ame nyidro tre, lue jinine la trahmanyi ka xome la mama i eni. Nge, lue ka anyipici Iehova nyidro. Hnenge hna kapa la Ita Ne Thup memine la Hmeke Jë! qaathei nyidro, ngacama ame koi ni, jole palaha la Ita Ne Thup troa trotrohnin. Hnei nyidro hna hane könë ni kowe la Ini Tusi Ne La Ekalesia, kolo neköi icasikeu ka qeje Tusi Hmitrötr, nge hna amë e koilo hnalapa i nyidro. Öning jë hi ka hape, tro pë hë ni a wang. Hnei nyidro hna dredrehnyima, me hape, “Ka nyipici kö lai?” Öning, “Öö, tro pë hë ni a wang.”

Jole hnyawa ni ke, ase hë ni qeje ithanata. Celë hi matre, ame ngöne la heji cili, hnenge hna tro troa icasikeu. Hnenge hna pane haine la itre nekönatr. Hnene la aqane atre hnyawa nyudreni la Tusi Hmitrötr! Ngacama hnenge hna sine lapane la hmi ekö me nenë, ngo pëkö hnenge hna atre göne la Tusi Hmitrötr. Ame enehila, hetre ajang troa atrepengöne la Tusi Hmitrötr, matre hnenge hna inine ej. Ame la hnenge hna pane inine tre, ene la sipu ëje i Akötresie, Iehova. Itre macatre qëmekene lai, lo eni a hnyingë nenë la pengöne la Itretre Anyipici Iehova, öni eahlo, “Öö, ame angatre lo lai, itre ka nyihluene la ketre qatr hna hën ka hape, Iehova.” Ngo ame enehila, mama cile hnyawa koi ni la nyipici!

Canga kökötre jë hi ni ke, mama ha koi ni laka, celë hi la nyipici. Ame lo Maac 1957, 9 hi lao treu thupene lo eni a xötrei sine la icasikeu, hnenge hna xomi bapataiso. Saze hë ni. Madrine catre ni la hnenge hna atre la hna qaja hnei Tusi Hmitrötr göne la pengöne la nyipi trahmany. Iesu la ketre atr ka pexej. Nge, ka catr, me trene mene nyidrë hune la nöjei trahmanyi asë. Ngo, tha hnei nyidrëti pi kö hna thele isi me ketre. Hnei nyidrëti pe “hna xomi hnin,” tune la aqane qaja amë hë göi nyidrë. (Isaia 53:2, 7) Ketre, hnenge hna inin laka, loi e tro la itretre drei Iesu a “menyike la thina kowe la nöjei ate asëjëihë.”—2 Timoteo 2:24.

 Hnenge hna xome la huliwa ne pionie lo 1958. Thupene lai, hnenge hna nue la huliwa ne pionie koi hnepe ijine hi. Pine nemen? Pine laka, hnenge hna axeciën troa faipoipo me Gloria, kolo ketre jajinyi ka könë ni kowe la icasikeu! Madrine catre ni la mekun hnenge hna axeciën. Qaan ekö utihë enehila, tha saze kö la pengöi Gloria. Ceitu i angeice hi memine la ketre etë ka melemel. Ame koi ni, ka tru alamekene catre kö angeic hune la ketre etë ka melemel, nge elitrauje la madrineng la eni a xomi angeic troa föeng! Tro eni a nue angeic troa ketre qejepengöne la mele i angeic:

“Ala 17 eahun. Nge, ka catre nyihlue i Iehova nenë. Ame lo eni a 14 lao macatre, meci pi hi eahlo. Thupene lai, hnei kaka hna nyiqaane ini Tusi Hmitrötr. Pine laka, patre hë nenë, hnei kakati hna wange la tane la uma ne ini matre, tro eni memine la mamang a ithöeën troa tro kowe la hna ini. Celë hi matre, tro palahi a hetre atr e koilo hnalapa, me thupëne la haajini nyio. Ketre, loi e tro palahi a hnëkë xen kowe la hnepe lapa ngöne la ijine kakati a traqa qa hna huliwa. Hna kapa la aja i kaka hnene la tane la uma ne ini, nge celë hi hnei nyio hna kuca utihë la kola fenes qa hna ini hnene la mamang. Lue hnepe lapa la ka ini Tusi me eahun, matre ala 11 thei eahun ka hane anyipici Iehova enehila. Ka tru la huliwa ne cainöj koi ni, ngacama eni a xou troa ithanata kowe la itre atr. Itre macatre ne xatua ni hnene la föeng, Sam.”

Hnenge me Gloria hna faipoipo lo Febuare 1959. Madrine catre nyio troa ce xome la huliwa ne pionie. Ame lo Julai ne la macatre cili, hnei nyio hna nyialiene la pepa ne lö koi Bethela. Tru la aja i nyio troa huliwa ngöne la hnalapa ne xomi meköt. Hnei Simon Kraker, ketre trejin, hna ithanata me nyio. Hnei angeic hna qaja koi nyio laka, ame enehila, tha hna nue kö kowe la itre trefën troa lö ngöne la Bethela. Ngo, eje palahi thei nyio la aja troa huliwa ngöne Bethela.

Hnei nyio hna cinyihane kowe la hnalapa ne xomi meköt, me sipo angatr troa upi nyio kowe la ketre götran gaa aja ixatua. Casi hi la götranhnei angatr hna amamane koi nyio: Pine Bluff, Arkansas. Ame ngöne la ijine cili, luetre hi lao ekalesia e Pine Bluff. Ame ngöne la ketre ekalesia tre, itre kamadra casi hi, nge ame ngöne la ketre, itre kawetrewetr. Hna upi nyio kowe la ekalesia ne itre trejin kawetrewetr, nge 14 hi lao trejin.

Maine jë, epuni a hnyingëne thele la kepin matre kola aisane la Itretre Anyipici Iehova kamadra me kawetrewetr. Ame ngöne la ijine cili, tha hna nue së kö troa iën. Hna wathebon kowe la itre ka isa hane ngönetrei kö troa ce icasikeu, nge hetre itre ka iakötrë. Ame ngöne la nyimu götran, itre trejin a xouene la troa thë la itre Uma Ne Baselaia, e kola icasikeu la itre atr ka isa hane ngönetrei kö troa atrunyi Iehova. Hna hane fe traqa la itre ewekë cili. E kola cainöj ngöne la itre hnalapa ne la itre kamadra hnene la itre trejin kawetrewetr, troa aretë angatr, me lepi angatr. Eahuni a trongëne la itre wathebo i mus, matre tha tro kö a ajolëne la huliwa ne cainöj. Nge, eahuni pe a mejiun troa saze e thupen.

Tha ka hmaloi kö e itre xa ijin troa cainöj. Ame la eahuni a cainöj ngöne la itre hnalapa ne la itre kawetrewetr, hetre ijin laka, eahuni a fenafena la qëhnelo ne la ketre hnepe lapa kamadra. Haawe, ame e cili, loi e tro huni a canga wange laka, tro kö eahuni a qeje Tusi Hmitrötre kow, maine qeje menu me tro kowe la ketre qëhnelö. Aqane trongene la mel ngöne la ijine cili.

Hnene laka, lue ka pionie nyio, nyipiewekë tro nyio a huliwa. Ame la nyio a huliwa tre, co hi la hna nyithupe i nyio ngöne la drai. Gloria a nyidrawane la itre xa uma. Hna aijijë ni troa xatua angeic ngöne la ketre uma matre, tro angeic a canga fenes. Hnene la hnepe lapa hna thue a i nyio. Nge, eni me Gloria a ce xen, qëmekene tro nyio a tro. E nöjei wiik, Gloria a aeane thene la ketre hnepe lapa. Nge, eni a huliwa e kuhu qëhnelö, me wasi mamala, me itre xa huliwa ju kö. Ame ngöne la hnalapa ne la ketre hnepe lapa kamadra, nyio a wasi mamala. Gloria a was qa koho hnin, nge eni a was qa kuhu trön. Celë hi hnei nyio hna kuca ngöne la drai ka pexej, ame hnei angatr hna thue a i nyio. Gloria a xen e hnine la uma, ngo tha cememine kö la hnepe lapa. Nge, eni a xen ngöne la hnë ami loto. Tha nyipiewekë kö ke, ka hnyapa catr la xen. Nge, ka lolo la thiinan la hnepe lapa cili, ngo hna hane ajojezi angatr hnene la thiina ne la itre ka lapa xötreithi angatr. Tha thëthëhmine kö ni lo ijin eni a xomi sas. Thupene la hna nyialiene  la loto, hnenge hna sipone la trahmanyi matre, tro Gloria a hane tro kowe la gaa co. Ka elëhni hnyawa nyidrë, öni nyidrë, “Hna thing!”

Ame ngöne la ketre götran, madrine catre nyio troa ce lapa memine la itre trejin, me cainöj e cili! Ame lo nyio a xötrei traqa e Pine Bluff, nyio a lapa thene la ketre trejin ka cilëne la hnëqa hna hën enehila ka hape, kordinatör ne la lapa ne la itre qatre thup. Tha ka hmi kö la föi nyidrë, matre hnei Gloria hna nyiqaane ini Tusi me eahlo. Nge, ame ngöne la ijine cili, eni fe a nyiqaane ini Tusi memine la nekö i nyidro jajinyi me föi angeic. Haawe, hnene la thine memine la nekö jajinyi hna axeciën troa nyihlue i Iehova, me xomi bapataiso.

Hetre enehmu i nyio ngöne la ekalesia kamadra. Angatr a könë nyio troa ce xen ngöne la hnalapa i angatr, ngo tro hi nyio a tro e jidr, matre pëkö ka troa öhnyi huni a ce lapa. Ka catre hnyawa la Ku Klux Klan (KKK), ketre organizasio ka selëne la ixelemaiwai pi hane ngönetrei, me isi. Ame ngöne ketre hej, tha thëthëhmine kö ni la ketre trahmanyi ka lapa qëmekene la qëhnelö i angeic. Angeic a hetrëne la hna heetr ka wië, me atu he tune la hna majemine kuca hnene la itre ka sajuëne la KKK. Ngo, tha hna sawa kö la itre trejin troa amamane palahi la ihnim. Ame ngöne la ketre drai, pëkö manie i nyio troa sine la ketre asabele ka tru, matre hnene la ketre trejin hna itöne la loto i nyio (1950 Ford). Ame hnei nyio hna sine la asabele ka tru. Ca treu thupene lai, kucakuca hnyawa nyio ke, hnei nyio hna cainöj ngöne la itre hnalapa trootro, me ini Tus memine la itre atr. Ame la nyio a traqa kowe la hnalapa, hane hi la loto i nyio, hna amë qëmekene la hnalapa! Hna cinyihane hune la ketre ipepa hna liine hune la loto, ka hape, “Hane hi la loto i epon, ahnahna i eni koi epon. Trejin me epon.”

Hetre ketre ewekë ka ketre la hning ekö. Ame lo 1962, hna hane hë ni troa sine la Ini Ne Cainöjëne La Baselaia e Lansing götrane kolojë (Neweyok). Ca treu ne ini hnene la itretre thupëne la ekalesia, itre ka iwai trootro, me itretre thupëne la distrik. Ame ngöne la ijine cili, pëkö huliwang, matre hna e hi la manie hnenge hna hetreny. Ngo, hnene la sosiete ne kuci telefon e Pine Bluff hna ithanata me ni koi huliwa. Maine tro angatr a kepe ni ngöne la sosiete ke, eni petre hi la pane atr kawetrewetr ka troa huliwa koi angatr. Ame hë e thupen, hnei angatr hna mekun troa hamë ni la huliwa. Nemene jë la nyine tro ni a kuca? Pëkö manieng troa tro Neweyok. Nge, eni ha mekun troa xom la huliwa, me tha sine la ini. Eni ha troa cinyianyine la itus kowe la Bethela, nge traqa pi hi la ketre ewekë. Thatreine jë kö ni troa thëthëhmine lai.

Ame ngöne la ketre hmakanyi sinejidr, hnene la ketre trejin ne la ekalesia, ka tha hmi kö la föi angeic hna fenafena la qëhnelo, me hamë ni la trenge mani. Hnei angeic, me itre nekö i angeic hna ihlë hmakany, me tro kowe la hnë tra koto troa wakeca. Hnei angatr hna ujë tune lai, matre tro ni a hetre manie ne tro Neweyok. Öni angeic, “Tro jë kowe la Ini, nge kapa jë la itre ini, nge bëeke hmaca jë troa ini hun!” Thupene lai, hnenge hna sipon kowe la sosiete ne kuci telefon matre tro ni a xejë la huliwa thupene la 5 lao wiik.  Öni angatr, “Waea!” nge eje hi lai. Ngo, tha nyipiewekë kö. Ase hë ni axecië mekun. Madrine catre ni la hnenge hna nue pe lai huliwa!

Öni Gloria la kola mekune hmaca la nyio a lapa e Pine Bluff, ka hape: “Madrine catre ni troa huliwane la teritoar! Ala 15 koi 20 lao atr hnenge hna ini Tus memin. Haawe, eahuni a cainöj ngöne la itre hnalapa trootro e hmakany, nge thupene lai, eahuni a ini Tusi memine la itre atr, utihë e 23 H. Madrine catre ni troa cainöj e cili! Ajang troa lapa. Nyipici laka, tha ajange kö tro nyio a xome la huliwa ne sirkoskripsio, ngo celë hi aja i Iehova.”

Ame ngöne lo nyio a pionie e Pine Bluff, hnei nyio hna nyialiene la pepa troa pionie hut. Aja i nyio troa kapa la aja i nyio. Pine nemen? Atre hi nyio laka, ajane la atre thupëne la distrik tro nyio a ixatua ngöne la ketre ekalesia e Texas, me pionie hut e cili. Nge, celë fe hi aja i nyio. Celë hi matre, meci hë nyio hna lapa itreqe tro angatr a kapa la aja i nyio, ngo pë pi kö itusi ka traqa. Hna traqa la ketre itus, nge kola upi nyio troa iwai trootro! Kolo Januare 1965. Ame ngöne la ijine cili, hna hane acilë Leon Weaver, kordinatör ne la Filial e Etazini enehila, tro fe a hane iwai trootro.

Hetre xoung troa xome la huliwa ne iwai trootro. Qëmekene lo pane macatre me e thupen, hnei James A. Thompson, Jr., atre thupëne la distrik hna goeëne la pengöi eni. Hnei nyidrë hna ithanata hnyawa me ni, me amamane la itre götrane nyine tro ni a huliwan, me qaja la hna ajan thene la atre ka iwai trootro. Tha qea ju kö thupene la eni a xome la huliwa ne iwai trootro, nge kola mama koi ni la enyipiewekëne la eamo i nyidrë. Thupene la hna acilë ni, Thompson la pane atre thupëne la distrik hnenge hna ce huliwa memin. Tru catr la itre ini hnenge hna kapa qaathene la trejin cili, ka catre mele nyipici koi Iehova.

Ame ngöne la ijine cili, tha tru kö la itre ini hna kapa hnene la itretre iwai trootro. Ca wiik ne goeëne ni la aqane kuca ne la atre thupëne la sirkoskripsio ngöne la nyidrëti a wange la ketre ekalesia. Thupene lai, nyidrëti pena la ka goeë ni la eni a wange la ketre ekalesia. Nyidrëti a qaja koi ni la nyine tro ni a huliwan, me hamë eamo koi ni. Ngo, thupene lai, nyio a isa tro troa wang la itre ekalesia. Mekune pala kö ni lo eni a qaja koi Gloria ka hape, “Eni a ajane tro nyidrëti a pane lapalapa.” Ame ngöne la ijine cili, hnenge hna trotrohnine la ketre ewekë ka sisitria. Tro pala hi a hetre trejin ka lolo ka troa xatua së, ngo loi e tro sa nue angatr troa xatua së. Ka tru koi ni la ixatua hnenge hna kapa qa ngöne la hna melën hnei J. R. Brown, ketre ka iwai trootro, me Fred Rusk, atrene la Bethela.

Ame ngöne la ijine cili, itre atr asë a ixelemaiwai pi hane ngönetrei. Ame ngöne la ketre ijin, hnene la KKK hna tro ngöne la traon hnei nyio hna wang e  Tennessee. Tha thëthëhmine kö ni la ketre drai lo eahuni a tro ngöne la ketre hnë xen troa nango mano thupene la hna cainöje trootro. Ame lo eni a tro kowe la gaa co, hnene la ketre trahmanyi ka wesitr, nge hna sija ngönetrei hna xötrethenge ni. Ngo, hnene la ketre trejin kamadra, nge ka qea catr, hna ixötrethenge fe. Öni angeic, “Ka lolo, trejin Herd?” Ame hnene la trahmanyi hna trotriji nyio, nge tha tro ju kö angeic kowe la gaa co. Ame ngöne la itre macatre cili, mama ha koi ni la kepin matre kola ixelemaiwai hnene la itre atr, tha pi hane ngönetrei kö, ngo hnene la ngazo ka ej thei easë asë. Nge, trotrohnine hë ni laka, itre trejin asë hi së, ngacama isa hane ngönetrei së ju hë. Nge, ijije hi tro ketre a meci pi ketre.

Traqa koi 33 lao macatre ne xome nyio la huliwa ne iwai trootro. Nyimutre la itre ini, me itre manathith hnei nyio hna kapa ngöne la itre macatre cili, nge celë hi ka ithuecatre i nyio. Ngo, hetre ketre ewekë kö hnei nyio hna troa kapa. Ame lo Ogas 1997, hna eatrëne lo aja i nyio ekö. Hna hane hë nyio troa huliwa ngöne la Bethela e Etazini. Thötre eitr lao macatre thupene lo nyio a nyialiene lo pepa. Ngöne la treu thupen, nyio hë a nyiqaane huliwa ngöne la Bethela. Ame koi ni, itre trejin ka elemekene la huliwa e Bethela a ajan tro ni a ixatua ngöne la hnepe ijine hi, ngo tha celë kö ka traqa.

Hnenge hna pane huliwa ngöne la Biero Thatraqane La Huliwa Ne Cainöj. Tru catre la itre ini hnenge hna kapa! Kola traqa kowe la itre trejin e cili la itre hnying ka jole catr qaathene la itre lapa ne la itre qatre thup, memine la itretre ka iwai trootro ne la nöj. Eni a olene catrëne kowe la itre trejin cili laka, hnei angatr hna xomihni, me hamë ixatua ngöne la kola ini ni. Maine troa amë ni hmaca troa huliwa e cili, tru pala kö la itre ini hnenge hna troa kapa qaathei angatr.

Ka tru koi ni me Gloria la mele ngöne la Bethela. Majemine nyio troa ihlë hmakany, nge celë hi ka xatua nyio ngöne la mele i nyio e cili. Ca macatre thupen, hnenge hna nyiqaane ixatua ngöne la Kometr Thatraqane La Huliwa Ne Cainöj Ne La Lapa Ne Xomi Meköt Ne La Itretre Anyipici Iehova. Nge, ame lo 1999, hnenge fe hna hane ketre atrene la Lapa Ne Xomi Meköt. Nyimutre catr la itre ini hnenge hna kapa ngöne la hnëqang celë. Ngo, ame la ini ka tru hnenge hna trotrohnine tre, Iesu Keriso la he ne la ekalesia, ngo tha ketre atre kö.

Ame la eni a mekune hmaca la meleng, ceitui eni me Amosa perofeta. Iehova a goeëne la atre thupë öni, nge ka huji wene wacua, göxene la itre ka puafala. Ngo, hnei Akötresie hna acilë Amosa perofeta, me amanathithi angeic ngöne la hnëqa i angeic. (Amosa 7:14, 15) Ketre tune mina fe, hnei Iehova hna öhnyi ni, ketre nekön ne la atre axö öni ka pë ewekë e Liberty (Indiana). Nge, hnei Nyidrëti hna amanathithi ni. Tru palaha la itre manathith matre tro ni a qejepengön asë e ce! (Ite Edomë 10:22) Kösë ame ekö, pëkö ewekëng, ngo ame koi ni, tru catre kö la itre ewekë hnenge hna kapa enehila!