TANE MEKUN 21
The Nue Kö La “Inamacane i Fen” Troa Iaö Së”
“Ame la inamacane i fen, tre hmo lai koi Akötresie.”—1 KOR. 3:19.
NYIMA 98 Wesi Ula—Mekuna i Akötresie
MEKUN KA TRU *
1. Nemene la hna hamën hnei Tusi Hmitrötr?
PINE LAKA Iehova la Atre Ini së, haawe, pëkö jol hne së hna thatreine xomihnin. (Is. 30:20, 21) Nyimutre la itre eamo hna hamën hnei Tusi Hmitrötr, nge ka xatua së troa “atreine huliwa hnyawa” me “hnëkë hnyawa kowe la nöjei huliwa ka loi.” (2 Tim. 3:17) Ka inamacane catre kö së hune la itre ka xötrethenge la “inamacane i fen” ke, easa mel thenge la hna qaja hnei Tusi Hmitrötr.—1 Kor. 3:19; Sal. 119:97-100.
2. Nemene la hne së hna troa ce wang ngöne la tane mekun celë?
2 Tune la hne së hna troa ce wang, inamacane i fen a huli së troa xötrethenge la itre aja ne ngönetrei. Celë hi matre, jole koi së troa thipetrije la itre aqane mekun me aqane ujë ne la itre atrene fen. Öni Tusi Hmitrötr: “Wange pala kö wanga tro ketre a tra thethi nyipunie jëne la inamacane i fen, me itre mekune ka pë alien thenge la qenenöje i atr.” (Kol. 2:8) Ame ngöne la tane mekun celë, easa troa ce wang la lue trengathoi hna sil hnei Satana, nge hna xötrethenge hnene la itre atr. Tro sa ce wang la kepin matre ka hmo la atre xötrethenge la inamacane i fen, memine la kepin matre ka sisitria catre kö la inamacane i Akötresie.
SAZE HË LA AQANE GOEËNE LA CE MEKÖLE TREFËN
3-4. Ame ngöne lo itre macatre 1920 koi 1930, nemene la ka saze ngöne la aqane goeëne la itre atr la troa ce meköle trefën?
3 Ame ngöne lo itre macatre 1900 e Etazini, hna nyiqane saze la aqane goeëne la itre atr, la ce meköle trefën. Ame ekö, itre atr a mekun ka hape, itre ka faipoipo hmekuje hi la ka ijij troa meköle trefën, nge hmitrötre troa porotrikëne la
ewekë cili. Ame enehila, saze hë la aqane mekun cili.4 Hna saze hnyawa la aqane mekun ne la itre atr, ngöne lo itre macatre 1920 koi 1930, kolo ijine hna hën ka hape, les années folles. Önine la ketre atr ka inamacane ka hape, “Ame ngöne la ijine cili, kola nyiqaane mama la itre ewekë ka sis. Kola mama ngöne la itre film, me itre elo, me itre nyima me itre itus.” Nge kolo fe a hane mama ngöne la aqane fia, nge tha iheetre hnyawa ha. Tune la hna qaja hnei Tusi Hmitrötr göne la itre drai hnapin, tro la itre atr a “ajane catrëne la nyine iamadrinë.”—2 Tim. 3:4.
Kola haöthe la fen hnene la itre mekuna i Satana göne la kuci ngazo (Wange ju la paragarafe 5) *
5. Qaane lo itre macatre 1960, nemene la aqane mele ne la itre atr?
5 Qaane lo itre macatre 1960, itre atr ha nyiqane ce lapa nge tha ka faipoipo kö. Kolo ha ce meköl la lue trahmanyi maine lue föe. Itre trefëne ha seihnacil ngo pë pe nyipi kepin. Nge kolo fe a mama la itre ewekë ka sis ngöne la itre nyine iamadrinë. Nemene la thangane lai? Önine la ketre atr ka inamacan ka hape, kola isa lapa la kem me thin, matre hetre ethane kowe la itre nekönatr. Ame itre xan, majemine hë angatr goeëne la itre iatr ka sis. Ame la pune lai ke, kolo ha tithi angatr hnene la itre mec ka solesole tune la sida. Eje hi, ka hmo la atr ka xötrethenge la inamacane i fen.—2 Pet. 2:19.
6. Pine nemene matre Satana a madrin?
6 Satana a ajane tro la itre atr a triane la aqane ce meköle trefën. Madrine catre Satana, la itre atr a huliwane menune la ahnahna hna hamëne hnei Iehova Akötresie, ene la troa ce meköle trefën. (Efe. 2:2) Ame la itre ka kuci ngazo ke, pëkö metrötre i angatr kowe la ahnahna qaathei Iehova, ene la troa hnaho. Nge tha ijiji angatre kö troa hane hetrenyi la mele ka tha ase palua kö elany.—1 Kor. 6:9, 10.
MEKUNA I TUSI HMITRÖTR GÖNE LA CE MEKÖLE TREFËN
7-8. Pine nemene matre ka sisitria catre kö la mekuna i Tusi Hmitrötr, göne la troa ce meköle trefën?
7 Ame la itre ka xötrethenge la inamacane i fen ke, angatr a wangesixane la itre trepene meköti ne la Tusi Hmitrötr. Ame koi angatr, tha ka nyipiewekë hmaca kö itre ej enehila. Itre xan a hnying, ka hape: ‘Pine nemene matre Akötresieti a xupi së cememine la aja troa ce meköle trefën, me sewe së troa aejën?’ Angatr a hnyingëne tune lai ke, ame koi angatr, ka loi e troa kei thenge la nöjei aja së. Kol. 3:5) Ketre, jëne la faipoipo, Iehova a nue la lue trefëne troa ce meköle trefën. (1 Kor. 7:8, 9) Jëne la faipoipo, ijije hi tro la lue trefën a aejëne la aja i nyidro, nge pëkö ethane kowe la mele ne trefën.
Ngo tha celë kö la hna qaja hnei Tusi Hmitrötr. Ej a ithuecatre koi së troa isi me xomehnöthe la itre aja ne ngönetrei ka ngazo. (8 Ka sisitria catre kö la inamacane i Akötresie, hune la inamacane i fen. Tusi Hmitrötr a amamane la nyipici göne la troa ce meköle trefën laka, ketre ahnahna lai qaathei Akötresie, nge nyine madrin. (Ite edomë 5:18, 19) Ngo öni Tusi Hmitrötr: “Nyipiewekë tro nyipunie a atre la aqane troa isa xomehnöthi ngönetrei, matre tro pala hi ej a pë ethan, nge troa kapa hnei Akötresie. Nge the tro kö a nyinyape thele la itre aja ka sis, tune la aqane ujë ne la itre ka thatre Akötresie.”—1 Thes. 4:4, 5.
9. (a) Nemene la hna kuca hnene la itre hlue i Iehova, ngöne la itre macatre 1900? (b) Nemene la eamo hna hamën ngöne 1 Ioane 2:15, 16? (c) Thenge la xötre Roma 1:24-27, nemene la itre huliwa ka ngazo nyine tro sa thipetrij?
9 Ame ngöne la itre macatre 1900, tha hna ajojezine kö la nöje i Iehova, hnene la itre ka “pë hë wangatrehmekun.” (Efe. 4:19) Hnene la itre hlue i Iehova hna catre trongëne la itre trepene meköti Nyidrë. Önine lo Ita Ne Thup ne 15 Mei 1926, ka hape, “tro la itre trahmanyi a pë ethan ngöne la aqane mekun me aqane ujë kowe la ketre föe. Nge ketre tune fe kowe la itre föe.” Ngacama kola ngazo trootro la fen, ngo hnene palahi la nöje i Iehova hna xötrethenge la inamacane i Nyidrë. (E jë la 1 Ioane 2:15, 16.) Drei la hni ne ole së kowe la Wesi Ula i Akötresie! Easa madrin me olene koi Iehova ke, Nyidrëti a hamë së la itre göxeni ngöne la nyipi ijin, me xatua së troa thipetrij la inamacane i fen. *—E jë la Roma 1:24-27.
TROA SAZE LA AQANE GOEË SË KÖ
10-11. Nemene la aqane hmekë së hnei Tusi Hmitrötr göne la itre drai hnapin?
10 Öni Tusi Hmitrötr ka hape, ame ngöne la itre drai hnapin, tro la itre atr a “hnimi angatre kö.” (2 Tim. 3:1, 2) Celë hi la hne së hna öhne ngöne la fen. Önine la ketre itus ka hape, qaane lo itre macatre 1970, “nyimutre la itre itusi hna kuca nge ka hamë ithuemacany göne la aqane troa mele ka loi.” Itre itusi celë a “upe la itre atr troa hnimi angatre kö.” Hanawang la hna qaja ngöne la ketre itus: “Loi e tro epuni a sipu hnimi epuni kö. Ka sisitria catre kö epun, hui itre xan. Pëkö ketre atr ka ceitu me epun.” Eje fe a qaja ka hape, ka loi e tro sa isa kuci ajan, me ketre sipu iëne la ka loi.”
11 Hapeu, hane fe kö epuni öhne lai? Eje hi, celë hi aqane iaö Eva ekö hnei Satana. Öni Satana koi Eva ka hape, “kösë lue akötesie nyipo, mate ate hmekune la loi me ngazo.” (Gen. 3:5) Ame enehila, alanyimu la itre ka ketre sipu wangatrunyi angatre kö. Ame koi angatr, pëkö ka troa qaja koi angatr la nyine troa kuca, göi tha drei Akötresieti kö angatr. Celë hi ka mama ngöne la aqane goeëne la itre atr la faipoipo.
Itre trefën Keresiano a imetrötrekeu me inyipicikeu (Wange ju la paragarafe 12) *
12. Nemene la mekuna ne la itre atrene fen göne la faipoipo?
12 Tusi Hmitrötr a upe la lue trefën troa imetrötrekeu me wangatrune la faipoipo. Ej a ithuecatre koi nyidro tro palahi a ce mele nyipici, me hape: “Tro la trahmanyi a nue la keme i angeice me thine i angeic, me fede kowe la fö’ i angeic; nge tro nyidoti a ca Gen. 2:24) Tha celë kö lai hna qaja ngöne la fen. Ame la lue trefën ke, nyidroti a isa wangatrune la itre sipu aja i nyidro. Önine la ketre itusi ka qeje seihnacil, ka hape, “Ame ngöne la itre xaa nöj, lue atr ka faipoipo a isisinyikeu me qaja catrën ka hape, ‘Epi troa cile huti la faipoipo i nyiso utihë mec.’ Ngo ame hë enehila, nyidroti pena a hape, ‘Epi troa cile huti la faipoipo, e tru palahi la ihnimi nyiso.’ ” Ka hetre ethane catre la aqane waiewekë celë. Nyimutre la itre faipoipo hna thë, nge akötr me hleuhleu la pune kowe la itre hnepe lapa. Eje hi, ka hmo la itre ka xötrethenge la inamacane i fen, göne la faipoipo.
ngönetei.” (13. Pine nemene matre methi Iehova la itre ka pi mama me pi draië?
13 Öni Tusi Hmitrötr: “Methi Iehova la angete hni tru asë.” (Ite edomë 16:5) Pine nemene matre methi Iehova la itre ka pi mama me pi draië? Pine laka, itre aqane ujë lai ka hetre ethane catr. Tro lai a kökötr e kuhu hni së e tha canga lepetrije kö së, nge tro fe a angazone la mele së, tui Satana. Hnei Iehova me Iesu ekö hna ce huliwa me xupe la nöjei ewekë asë. Ngo pane mekune jë ka hape, Satana a mejiune laka, tro Iesu a thili me atrunyi angeic! (Mat. 4:8, 9; Kol. 1:15, 16) Eje hi, ame la itre ka sipu wangatrunyi angatre kö, tre, angatr a jelehmone la itre ka trongëne la inamacane i Akötresie.
MEKUNA I TUSI HMITRÖTR GÖNE LA ITRE KA SIPU SELË
14. Nemene la aqane xatua së hnene la xötre Roma 12:3, matre troa atreine waiewekë hnyawa?
14 Tusi Hmitrötr a xatua së troa atreine waiewekë hnyawa. Ej a qaja ka hape, loi e tro sa madrin kowe la itre ewekë hne së hna sipu kuca maine qaja pena. Ngo ame pe, tha tro kö a sasaithi tulu ngöne la aqane waiewekë së. Öni Iesu: “Qa i eö troa hnime la atre lapa easenyi eö tui eö hi.” Kola amamane hnyawa e celë laka, tha tro kö sa wangatrune catrëne la itre aja së. (Mat. 19:19) Tusi Hmitrötr a ini së troa wangatrune la itre hna ajan hnei itre xan, nge pine pë hë la itre sipu aja së. Ej a hape: “The kuca kö la ketre ewekë matre thele iwesitrë maine pi draië, ngo ipië ju nge mekune ju ka hape, sisitria kö itre xane hui nyipunie.”—Fil. 2:3; e jë la Roma 12:3.
15. Nemene la ka amamane laka, ka hetre thangane catr la itre eamo qa hnine la Tusi Hmitrötr?
15 Ame enehila, alanyimu la itre atr, tune la itre ka inamacan, ka jelehmone la itre ka trongëne la itre eamo qa hnine la Tusi Hmitrötr. Ame koi angatr, maine tro sa atrune la itre xan, tro hë angatre lai a wajahuji së me iaö së. Ngo nemene la ethane lai kowe la itre atr? Hapeu, ka madrine kö la itre ka pi mama? Ka madrine kö la itre atrene la hnepe lapa i angatr? Hetre sinee i angatre kö? Ka lolo kö la aqane imelekeu i angatr me Akötresie? Thenge la itre hne së hna öhn, inamacane i drei la ka loi, inamacane i fen maine inamacane i Akötresie?
16-17. Pine nemene matre easa olene koi Iehova?
16 Hna aceitunëne la itre ka trongëne la inamacane i fen, memine la ketre atr ka ihamë, nge ka hnyingë gojenyi kowe la ketre atr ka ihamë fe. Eje hi, tro nyidroti lai a paatr ke, lue trenyiwa nyidro ngöne la nöj. Celë hi lai hna qaja hnei Iesu ekö göne la “inamacane” ne la itre atr. Öni nyidrë: “Itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.” (Mat. 15:14) Eje hi, tha ka ihmeku kö la inamacane i fen, memine la inamacane i Akötresie.
Easa madrin me olene koi Iehova ke, hnei Nyidrëti hna thepe së qa ngöne la inamacane i fen (Wange ju la paragarafe 17) *
17 Ka hetre thangane catre la itre eamo qa hnine la Tusi Hmitrötr ke, “ka nyipiewekë göi troa hamë ini, me hmekën, me xom amekötine la nöjei ewekë, me hajin ngöne la thiina ka meköt.” (2 Tim. 3:16) Easa madrin me olene koi Iehova ke, jëne la organizasio i Nyidrë, hnei Nyidrëti hna thepe së qa ngöne la inamacane i fen! (Efe. 4:14) Kola xatua së hnene la itre göxeni hnei Nyidrëti hna hnëkën, matre tro sa catre trongëne la itre trepene meköti ne la Tusi Hmitrötr. Drei la ketre manathithi ka tru troa xötrethenge la inamacane i Iehova, jëne la Tusi Hmitrötr!
NYIMA 54 “Dei La Gojeny”
^ par. 5 Tro la tane mekun celë a acatrene la mejiune së laka, qaathei Iehova hmekuje hi la nyipi eamo. Tro fe sa ce wang la itre ethan e tro sa xötrethenge la inamacane i fen, memine la itre thangan e tro sa kapa me trongëne la inamacane i Akötresie.
^ par. 9 Wange ju la itus hna hape, Les jeunes s’interrogent—Réponses pratiques, volume 1, mek. 24, 25, 26, me volume 2, mek. 4-5.
^ par. 50 ITRE IATR: Easa öhne la mele ne la lue trefën Keresiano. Nyidroti a cainöj ngöne lo itre macatre 1960.
^ par. 52 ITRE IATR: Ame ngöne lo itre macatre 1980, trahmanyi a nyihnyawane la ifënekö i nyidrë ka wezipo, nge kola goeëne hnene la nekö i nyidro jajiny.
^ par. 54 ITRE IATR: Ame hë enehila, nyidroti hmaca a mekune la mele i nyidroti ekö, ngöne la kola huliwa i Iehova. Nyidroti a amamane la itre foto kowe la nekö i nyidroti jajiny me hnepe lapa i angeic.