TANE MEKUN 19
Troa Hnim Me Thiina Ka Meköt Kowe La Itre Hna Qanangazon
“Akötesie ka tha madi ngazo kö cilie; kete tha tro kö la ngazo a ce me cilie.”—SAL. 5:4.
NYIMA 142 Xölehuje Ju Së La Mejiune Hna Amë Qëmeke Së
MEKUN KA TRU *
1-3. (a) Thenge la hna qaja ngöne Salamo 5:4-6, nemene la mekuna i Iehova göne la huliwa ka ngazo? (b) Pine nemene matre ka icilekeu la atr ka angazone la nekönatr, memine la “wathebo i Keriso”?
METHI Iehova la nöjei huliwa ka ngazo. (E jë la Salamo 5:4-6.) Nyidrëti a methinëne la itre ka angazone la itre nekönatr. Ketre huliwa lai ka ngazo me ka sisi koi Nyidrë! Pine laka, itre hlue i Iehova së, matre easë fe a methinëne la huliwa cili, me canga thele troa nyinyine lai jol, e traqa ju öhn e hnine la ekalesia.—Rom. 12:9; Heb. 12:15, 16.
2 Ame asë hi la nöjei pengöne iakötrë hna kuca kowe la itre nekönatr, tre, ka icilekeu memine la “wathebo i Keriso”! (Gal. 6:2) Pine nemen? Ame ngöne lo tane mekun hnapan, hne së hna ce wang laka, ihnim la ka nyitrepene la wathebo i Keriso. Nge ame la wathebo i Keriso, tre, kola qaja la nöjei ini hnei Iesu hna hamën, itre hnei nyidrëti hna qaja me kuca. Celë hi matre, thenge la wathebo i Keriso, itre nyipi Keresiano a thupëne me hnime la itre nekönatr, matre tingeting me lolo la mele i nyudren. Ame la atr ka angazo nekönatr, tre, ka pi tru me ka pë ihnimin. Angeic a akötrëne la nekönatr, nge tro pë hë nyën a mekun ka hape, pëkö ka hnimi nyën.
3 Tru catr enehila la itre nekönatr hna angazon. Nge hna hane traqa fe e hnine la ekalesia. Pine nemen? Nyimutre la “itre atre ka ngazo me ka iaö” ka thele troa lö hnine la ekalesia. (2 Tim. 3:13) Ketre, hetre itre xan e hnine la ekalesia ka kei kowe la itre huliwa ka sis, me angazone la itre nekönatr. Tro sa pane ce wang la kepin matre ketre huliwa ka ngazo catr la troa angazone la nekönatr. Tro fe sa ce wang la hna troa kuca hnene la itre qatre thup, e traqa ju ketre kei kowe la ngazo, tune la troa angazone la nekönatr. Nge tro fe sa ce wang la aqane tro la kem me thin a thupëne la itre nekönatr. *
KETRE NGAZO KA TRU
4-5. Pine nemene matre ngazo ka tru la troa angazone la nekönatr?
4 Hace me hleuhleu la mele ne la itre nekönatr hna angazon. Ame la huliwa cili, tre, ka hetre ethane kowe la itre hna angazon, ngo kowe mina fe la itre sinee i angatr, tune la fami me itre trejin ne la ekalesia. Eje hi, ketre ngazo ka tru la troa angazone la itre nekönatr.
5 Ketre akötr ka tru kowe la nekönatr hna angazon. Ketre ngazo ka tru la troa angazone me akötrëne la itre xan. Tune la hne së hna troa ce wang ngöne la ketre tane mekun, troa hetre ethane ngöne la mele ne la nekönatr hna angazon. Nge kösë kola thapa la ketre ewekë qaathei nyën, matre hace me akötr la mele i nyën. Celë hi matre, loi e tro sa thupëne hnyawa la itre nekönatr qa ngöne la huliwa ka sisi cili, me hnim la itre nekönatr hna angazon.—1 Thes. 5:14.
6-7. Pine nemene matre ketre ngazo ka tru kowe la ekalesia me kowe la itre mus la troa angazone la itre nekönatr?
6 Ngazo ka tru kowe la ekalesia. Maine tro la ketre atr e hnine la ekalesia a angazone la nekönatr ke, angeic a adrone la ekalesia. (Mat. 5:16; 1 Pet. 2:12) Tha ka meköti kö la aqane ujë i angatr kowe la itre milio lao trejin ka “catre isi thatraqane la lapaun”! (Iudra 3) Tha hna kapa kö e hnine la ekalesia, la itre atr ka tha ietrane kö la itre huliwa i angatr ka ngazo, me ka adrone la ekalesia.
7 Ngazo ka tru kowe la itre mus. Itre Keresiano “a drengethenge la itre mus.” (Rom. 13:1) Easa drengethenge la itre mus ngöne la easa metrötrëne me trongëne la itre wathebo hna acile hnei mus. Maine tro la ketre atr e hnine la ekalesia a ena la wathebo i mus, tune la troa angazone la nekönatr, haawe, tria hë angeic qëmekene la mus. (Wange ju fe la Itre Huliwa 25:8.) Eje hi laka, tha itre qatre thupe kö la ka troa amekötine la itre atr ka ena la wathebo i mus. Ngo ame pe, tha angatre kö a nyixölene la itre ka angazone la itre nekönatr. (Rom. 13:4) Tro kö angeic a ketre xeni pune la huliwa i angeic.—Gal. 6:7.
8. Nemene la aqane goeëne Iehova la itre ngazo hna kuca hnene la itre atr?
8 Ngazo ka tru catre kö nge ka sis xajawa i Akötresie. (Sal. 51:4) Ame la easa kuca la ngazo kowe la ketre atr, tre, kösë easë hi lai a ngazo me icilekeu me Iehova. Hanawang la ketre wathebo hna hamën ekö hnei Akötresie koi angetre Isaraela. Ame la atr ka atrekënö maine iaöne la ketre atr ke, angeic a “shashaithe la wathebo i Iehova.” (Lev. 6:2-4) Eje hi, maine tro la ketre atr e hnine la ekalesia a angazone la nekönatr, angeice hi lai a adrone la ëje i Iehova. Celë hi kepin, matre loi e tro sa sisine me thipetrije la itre huliwa ka ngazo cili. Kola adrone la ëje i Iehova me icilekeu memine la aja i Nyidrë. Meköti e troa amekötine la ka kuca la itre huliwa ka sisi cili.
9. Nemene la mekuna i Tusi Hmitrötr göne la itre ka angazone la itre nekönatr, nge pine nemen?
9 Qane ekö, hnene la organizasio i Iehova
hna amamane la mekuna i Tusi Hmitrötr, göne la itre ka angazone la itre nekönatr. Ame ngöne la lue zonal, Ita Ne Thup me Hmeke Jë!, kola hamë ixatua göne la aqane tro la itre hna angazon a cile kowe la akötre i angatr. Kolo fe a qaja la aqane tro la itre xan a akeukawanyi angatr, me aqane tro la itre kem me thin a thupëne la itre nekö i angatr. Jëne la Tusi Hmitrötr, hnene la organizasio hna amamane kowe la itre qatre thup, la nyine troa kuca e traqa ju angazone la ketre nekönatr. Hnene palahi la organizasio i Iehova hna thupëne la aqane amekötine la itre ekalesia, la atr ka angazo nekönatr. Angatr a ajane tro la itre ekalesia a trongëne hnyawa la wathebo i Keriso.AQANE TROA AMEKÖTIN LA ITRE KA KUCI NGAZO
10-12. (a) Ame la itre qatre thup a amekötine la ketre atr ka kuca la ngazo, nemene la hnei angatr hna trongën, nge nemene la ka nyipiewekë koi angatr? (b) Thenge la hna qaja ngöne Iakobo 5:14, 15, nemene la hnëqa ne la itre qatre thup?
10 Ame la itre qatre thup a amekötine la ketre atr ka kuca la ngazo, angatr a trongëne la wathebo i Keriso. Angatr a hnim me thiina ka meköt kowe la itre trejin. Celë hi matre, ame la ketre trejin a kuca la ngazo, angatr a pane lapa mekune la nöjei ewekë. Ame la ka nyipiewekë kowe la itre qatre thup, tre, troa atrunyi Iehova. (Lev. 22:31, 32; Mat. 6:9) Ketre, angatr a xatuane la itre trejin ne la ekalesia, matre tro palahi angatr a imelekeu hnyawa me Iehova. Aja ne la itre qatre thup troa akeukawane la hni ne la itre hna angazon.
11 Ketre, maine hetre trejin ka tria e hnine la ekalesia, loi e tro la itre qatre thup a thel matre tro hmaca angeic a imelekeu hnyawa me Iehova. (E jë la Iakobo 5:14, 15.) Ame la Keresiano ka kei kowe la aja ne ngönetrei me kuca la itre huliwa ka sis ke, kösë ka wezipo angeic ngöne la götrane u. Tha imelekeu hnyawa ha angeic me Iehova. * Ame la itre qatre thup, tre, kösë itre droketre angatr. Angatr a thel troa aloine la “meci ne lai ka wezipo.” Jëne la Tusi Hmitrötr, itre qatre thup a xatuane lai ka wezipo troa bëeke koi Iehova. Ngo nyipiewekë tro angeic a pane ietra.—Itre hu. 3:19; 2 Kor. 2:5-10.
12 Eje hi, ka nyipiewekë la hnëqa ne la itre qatre thup. Hnei Iehova hna acili angatr matre troa thupëne la itre mamoe i Nyidrë. (1 Pet. 5:1-3) Itre qatre thup a ajane tro la itre trejin a mele tingeting me mele madrin e hnine la ekalesia. Celë hi matre, canga saqe hi angatr troa nyinyine la itre jol ka traqa, tune la kola angazone la ketre nekönatr. Nemene la hnei angatr hna kuca? Tro sa ce wang la itre hnying ka mama ngöne la itre paragarafe 13, 15 me 17.
13-14. Hapeu, itre qatre thupe kö a trongëne la itre wathebo i mus me utisane la itre ka angazone la itre nekönatr? Qejepengöne jë.
13 Hapeu, itre qatre thupe kö a trongëne la itre wathebo i mus me utisane la itre ka angazone la itre nekönatr? Eje hi. Ame ngöne la itre xaa nöj, hna amekötin ka hape, troa canga thuemacane la itre mus, e hetre nekönatr hna angazon. Itre hna amekötine lai hna trongëne hnyawa hnene la itre qatre thup. (Rom. 13:1) Tha ka isazikeu kö la itre wathebo cili memine la wathebo i Akötresie. (Itre hu. 5:28, 29) Celë hi matre, maine ketre trejin a qajaqaja kowe la itre qatre thup ka hape, hna angazone la ketre nekönatr, loi e tro angatr a canga thuemacane la filial, matre troa xatua angatr troa trongëne hnyawa la itre wathebo i mus.
14 Itre qatre thup a ithuecatre kowe la itre hna angazon, me itre kem me thine i nyudren, me itre xan ka atre la jol ka hape, ijije hi tro angatr a iuti sai. Ngo tune kaa e ketre trejin hi ne la ekalesia, nge atre hë hnei nöjei atr la ngazo hna kuca? Maine easë hi la ka öhne lai jol me qajaqaja, hapeu, zö së kö la kola adrone la ëje i Iehova? Ohea, tha zö së kö. Ame la atrekë zön, tre, kolo atr ka kuca la ngazo.
15-16. (a) Thenge la hna qaja ngöne 1 Timoteo 5:19, pine nemene matre loi e troa iëne la lue temoë qëmekene troa ameköti ewekë? (b) Nemene la hna troa kuca hnene la itre qatre thup, e traqa ju upe zöne la ketre trejin ka hape, hnei angeic hna angazone la ketre nekönatr?
15 Pine nemene matre nyipiewekë tro la itre qatre thup a drenge la lue temoë qëmekene troa ameköti ewekë? Pine laka, celë hi la hna amekötin hnei Tusi Hmitrötr. Maine tha qaja kö hnene la atr ka kuca la ngazo, nyipiewekë troa iëne la lue temoë, matre troa anyipicine la ngazo hna kuca. E cili, ijije hi tro la itre qatre thup a acile la ketre komite ne iameköti. (Deu. 19:15; Mat. 18:16; e jë la 1 Timoteo 5:19.) Hapeu, kolo kö lai a qaja ka hape, tro fe a thele la lue temoë qëmekene troa iutisai? Ohea. E traqa ju ketre atr ena la wathebo i mus me kuca la ngazo ka tru, nyipiewekë tro la itre qatre thup a canga iutisai.
16 Maine traqa ju upe zöne la ketre trejin ka hape, hnei angeic hna angazone la ketre nekönatr, tro la itre qatre thup a pane trongëne la itre wathebo i mus. Thupene lai, angatr a ce axeciëne jëne la Tusi Hmitrötr laka, troa acile la ketre komite ne iameköti. Itre qatre thup a pane hnyingëne mekötine kowe la atr la hnei angeic hna kuca. Maine angeic a jelethoine la hna qaja, tro la itre qatre thup a dreng la hna qaja hnene la itre temoë (itre xan ka atre la ka traqa). Maine ala lu la ka öhne la ngazo hna kuca kowe lai nekönatr, haawe, ijije hi tro la itre qatre thup a acile la ketre komite ne iameköti. * Ngo maine ala caasi hi la ka öhne la ngazo hna kuca, tha kolo kö lai a hape, ka thoi la hnei angeic hna qaja. Atre hi la itre qatre thup laka, hetre ewekë ka ngazo hna kuca, nge ka akötrëne la nekönatr, matre angatr a thupëne hnyawa angeic.—Itre hu. 20:28.
17-18. Qejepengöne jë la hnëqa ne la komite ne iameköti.
17 Nemene la hna kuca hnene la komite ne iameköti? Ame la hnaewekë “iameköti,” tre, tha kolo kö a hape, itre qatre thup la ka troa iën e troa akalabusine la atr ka kuca la ngazo. Angatre pe a trongëne la itre wathebo i mus. Angatr a nue koi mus troa amekötine lai atr, thenge la ngazo hnei angeic hna kuca. (Rom. 13:2-4; Tito 3:1) Ame pe, hnëqa ne la itre qatre thup troa amekötin ka hape, troa lapa maine troa upetröneë la atr ka kuca la ngazo qa hnine la ekalesia.
18 Ame ngöne la komite ne iameköti, itre qatre thup a iameköti ngöne hi la götrane u. Angatr a thupëne la aqane imelekeu së me Akötresie. Jëne la ixatua ne la Tusi Hmitrötr, angatr a atrehmekune laka, ka ietra kö la atr. Maine tha ka ietra kö angeic, tro hë angatr a upetröneë angeic, me thuemacanyine la ekalesia. (1 Kor. 5:11-13) Ngo maine ka ietra angeic, ijiji angeic palahi troa lapa e hnine la ekalesia. Ngo ame pe, tha tro kö a athipi hnëqa i angeic, maine jë, koi nyimu macatre, maine ngöne pë hë la mele i angeic. Eje hi, ka nyipiewekë kowe la itre qatre thup la mele ne la itre nekönatr. Celë hi matre, angatr a canga ithuemacanyine me hmekëne la itre kem me thin göne lai atr, wanga traqa hmaca pi la itre ewekë ka ngazo. Ngo tha tro kö la itre qatre thup a qaja la ëjene la itre hna angazon.
AQANE TROA THUPËNE LA ITRE NEKÖNATR
Itre kem me thin a thupëne la itre nekönatr, matre tha tro kö a angazo nyudren. Jëne la hna hnëkën hnene la organizasio, angatr a hamë nyudreni la itre ithuemacany, göne la troa ce meköle trefën. (Wange ju la tane mekun 19, paragarafe 19-22)
19-22. Nemene la nyine tro la itre kem me thin a kuca matre troa thupëne la itre nekö i angatr? (Wange ju la pane iatr.)
19 Drei la pane atrekë hnëqane la troa thupëne la itre nekönatr? Itre kem me thin. * Itre ahnahna qaathei Akötresieti la itre nekönatr. Öni Tusi Hmitrötr, itre “edö qa thei Iehova.” (Sal. 127:3) Hnei Iehova hna ahnithi nyudren koi nyipunie, itre keme me thin. Celë hi matre, hnëqa i nyipunie troa thupë nyudreni hnyawa. Nemene la aqane troa thupëne hnyawa la itre nekönatr qa ngöne la iangazo?
20 Ame la hnapan, tre, troa pane atrepengöne la itre ka angazone la itre nekönatr. Nyipiewekë tro sa atrepengöne hnyawa la itre atr cili, memine la itre nyinyithiina i angatr ka iaö. Loi e tro palahi a hmek. (Ite edomë 22:3; 24:3) Tha tro kö sa thëthëhmine laka, tha ketre trenyiwa kö la atr ka angazone la nekönatr. Ketre atr hi hnei nyën hna mejiune kow.
21 Ame la hnaaluen, tre, troa ifekeune la itre mekun memine la itre nekö së. (Deu. 6:6, 7) Loi e tro fe sa drei nyudreni hnyawa. (Iako. 1:19) Tha tro kö sa thëthëhmine laka, jole catr kowe la itre nekönatr hna angazon, troa ithanata. Maine jë, nyudreni a xou ka hape, tha tro kö sa mejiune kowe la itre hnei nyudreni hna qaja. Maine pena, hnene la ka angazo nyudreni hna upi nyudreni troa lapa thaup. Ngo maine hetre ewekë hne së hna öhn, loi e tro sa easenyi nyudren me drei nyudreni hnyawa.
22 Ame la hnaakönin, tre, troa hnëkën me inine la itre nekö së. Nyipiewekë troa qaja koi nyudren la pengöne la troa ce meköle trefën. Eje hi, loi e tro sa hamëne la itre ithuemacany ka ihmeku hnyawa memine la macatre i nyudren, me thenge la itre hnei nyudreni hna atreine trotrohnin. Loi e tro fe sa ini nyudreni la aqane troa sa me nyine troa kuca, e traqa ju thele troa angazo nyudren. Ketre, huliwane jë la itre ithuemacanyi hna hamën hnei Iehova jëne la organizasio i Nyidrë.—Wange ju la hna eköhagen, hna hape, “Kola Ini Së Me Itre Nekö Së.”
23. Nemene la aqane goeëne së la itre ka angazone la itre nekönatr, nge nemene la hnying hne së hna troa ce wang ngöne la ketre tane mekun?
23 Ame koi easë, Itretre Anyipici Iehova, tre, ketre ngazo ka tru me ka sisi la troa angazone la itre nekönatr. Pine laka, easa trongëne la wathebo i Keriso, haawe, tha easë kö a nyixölene la itre ka kuca la ngazo. Nemene la aqane tro sa xatuane la ketre atr hna angazon? Troa sa la hnying celë ngöne la ketre tane mekun.
NYIMA 103 Itretre Thupë Mamoe, Itre Atr Nyine Ahnahna
^ par. 5 Tro sa ce wang ngöne la tane mekun celë, la aqane troa thupën me nyihnyawane la itre nekönatr hna angazon. Tro fe sa ce wang la aqane tro la itre qatre thup a ameköti ewekë e hnine la ekalesia, memine la aqane tro angatr a xatuane la itre kem me thin troa thupëne hnyawa la itre nekö i angatr.
^ par. 3 GÖI TROA TROTROHNIN: Ame la itre atr a ce meköle memine la nekönatr matre troa aejëne la sipu aja i angatr ka ngazo, tre, angatre lai a angazo nyën. Kola qaja la troa ce meköle me nyën; maine qene sodroma pena; maine amë la ka hmitrötre i angatr ngöne la që i nyën; maine huliwane menune la gaa hmitrötre i nyën me itre xaa götrane la ngönetrei nyën. Tha tro kö sa thëthëhmine laka, tha zöi nyudreni kö la kola angazo nyudren. Ame la atr ka ujë tune lai ke, angeic a akötrën me qanangazone la nekönatr, nge co catr petre kö nyën. Eje hi laka, itre nekönatr jajinyi la hna lapa angazon, ngo hetre itre nekönatr trahmanyi fe. Ketre, tha itre trahmanyi hmekuje kö la ka angazone la itre nekönatr, ngo itre föe mina fe.
^ par. 11 Tha hnene kö laka, tha ka catre petre kö la lapaune ne la ketre atr koi Akötresie, matre ijiji angeice hi troa kuca la ketre ewekë ka ngazo. Zöi angeice kö la itre ngazo hnei angeice hna kuca, nge tro kö Iehova a ameköti angeic.—Rom. 14:12.
^ par. 16 Ame ngöne la kola troa ithanatane la jol, tha tro pi kö la itre qatre thup a ce hëne la nekönatr memine la atr ka angazo nyën. Ijije hi tro la ketre atrene la fami maine ketre atr hnei nyën hna mejiune kow, a qaja kowe la itre qatre thup la ka traqa koi nyën.
^ par. 19 Kolo fe a qaja la itre atr ka thupëne la itre nekönatr ka co, ngacama tha itre nekö i angatre kö.