1-2. (a) Nemene la ka amamane laka, ajan asë hi së troa akeukawane la hni së, me ithuecatre koi itre xan? (b) Nemene la ketre aqane akötrëne la itre nekönatr?

AJAN asë hi së troa akeukawane la hni së. Ketre, atreine së fe ithuecatre kowe la itre xan. Ame la nekönatr a kei me eatr ngöne la nyën a elo ke, nyën a treij me canga nyinyape koi Kakaa me Nenë. Thatreine kö nyidroti troa aloine la eatre i nyën, ngo ijiji nyidroti hi troa aupune la akötre i nyën. Tro nyidroti lai a pane xepi nyën, me hnyingëne la kepin matre nyën a treij, me köle la itre trenge timidra i nyën, me ithanata amenyikeny, me paseman la eatre i nyën. E cili, tha treije hë nyën nge nyëne hmaca a elo. Itre drai thupen, loi hmaca ha la eatre i nyën.

² Ngo ame itre xaa ijin, ngazo catre palaha la akötre ne la itre nekönatr. Ngacama hna aca angazo nyudren, maine itre macatre ne qanangazo nyudren, ngo troa hetre ethane ngöne la mele i nyudreni asë. Ngacama othe ju hë la atr ka akötrë nyudren, ngo tha celë kö la ka troa apatrene la akötre ne la nekönatr. Tro pë hë nyën a akötr utihë la nyën a tru elany.

3. Thenge la hna qaja ngöne 2 Korinito 1:3, 4, nemene la aja i Iehova, nge nemene la itre hnying hne së hna troa ce wang?

³ Pane mekune jë la ketre trejin hna angazon ngöne lo angeic a co. Ngacama tru hë angeic, ngo angeic palahi a xomihnine la akötre cili. Nemene la aqane tro sa xatua angeic? (E jë la 2 Korinito 1:3, 4.) Iehova a ajane tro la itre mamoe i Nyidrëti a öhne la etrune la ihnimi Nyidrë, me kapa la ixatua hnei angatre hna ajan. Celë hi matre, tro sa ce wang la köni hnying celë: (1) Pine nemene matre itre hna angazon ngöne lo kola  co, a aja ixatua? (2) Drei la ka ijij troa xatua nyudren? (3) Nemene la aqane tro sa xatua nyudren?

4-5. (a) Pine nemene matre isapengöne la itre nekönatr memine la itre ka tru? (b) Nemene la ethane kowe la nekönatr hna angazon?

⁴ Ame la itre hna angazon ekö lo angatr a co, tre, angatr palahi a aja ixatua. Pine nemen? Tha tro kö sa thëthëhmine laka, isapengöne kö la itre nekönatr memine la itre ka tru. Ame la nekönatr hna angazon, tre, tha ceitune kö la aqane xomihnine nyëne la akötr, memine la itre ka tru. Hanawang la itre ceitun.

⁵ Itre nekönatr a mejiune kowe la itre ka hetru me thupë nyudren. E cili, nyudreni a mele tingeting me mejiune kowe la itre xan ka hnimi nyudren. (Sal. 22:9) Ngazo pe, ame itre xaa ijin, tha itre trenyiwa kö la ka angazone la itre nekönatr, kolo hmaca hi lo itre sipu atrene la hnepe lapa maine itre sinee pena. Ame la ethane lai ke, kola thë la mejiune i nyudren. Thatreine hmaca kö nyudreni mejiune koi itre xan.

6. Pine nemene matre ka ihnihni me calogitr la itre ka angazone la nekönatr?

⁶ Thatreine kö la itre nekönatr troa sipu thupëne la mele i nyudren, matre ka ihnihni me calogitr la itre ka angazo nyudren. Ka hetre ethane catr la troa ce meköl memine la itre nekönatr, nge co catre palakö nyudren. Tha ijine tro palakö a ce meköle trefën. Kola angazon me akötrëne la ngönetrei nyudren, memine la hni me itre mekuna i nyudren. Kola angazon la aqane goeëne nyudreni la ce meköle trefën. Ketre, tro fe hë nyudreni a sipu wangaconyi nyudren, nge thatreine hë nyudreni mejiune koi itre xan.

7. (a) Pine nemene matre tha jole kö kowe la itre ka iangazo troa iaöne la itre nekönatr, nge nemene la aqane kuca i angatr? (b) Nemene la thangane la itre trengathoi cili?

⁷ Thatreine palakö la itre nekönatr troa sipu axecië mekun, me wangatrehmekune la ngazo me neën. (1 Kor. 13:11) Celë hi matre, tha jole kö kowe la itre ka iangazo troa iaöne me angazone la itre nekönatr. Angatr a silitrengathoi kowe la itre nekönatr. Öni angatr, zöi nyudren la kola angazo nyudren, nge pë fe kö ka troa drei nyudren e traqa ju nyudreni ithanata. Ketre öni angatr ka hape, ketre hatrene ihnim la troa ce meköl, matre tha nyipi ngazo kö. Hnene la itre trengathoi cili, matre thatreine hë nyudreni atre la ka loi me ka ngazo. Tru jë hi nyudreni a mekun ka hape, pëkö eloine thei nyudren, nge pëkö ka hnim me utipi nyudren.

8. Pine nemene matre tha luelue kö së laka, tro kö Iehova a xatuane me akeukawane la itre hna akötrën?

⁸ Haawe, trotrohnine hë së la kepin, matre itre macatre ne akötre me hleuhleu la hni ne la itre hna angazon. Ka ngazo catre la aqane ujë cili! Kola amamane hnyawa laka, easa melëne la itre drai hnapin. Ame itre xan, “tha hnimi atr” kö, nge “tro la itre atre ka ngazo me ka iaö a ngazo catre hmaca kö.” (2 Tim. 3:1-5, 13) Ka ngazo catr la itre nyinyithiina i Satana. Kola akötrë së la easa goeëne la itre atr ka kuca la aja i Satana. Ngo ame pe, ka catre kö Iehova hui Satana me itre ka kuca la aja i angeic. Tha tro kö sa luelu. Atre hi Iehova la akötre së, nge tro kö Nyidrëti a xatua së. Eje hi, ketre manathith ka tru la troa nyihluene la “Akötresie ne iakeukawany, atre akeukawanyi së ngöne la nöjei akötre së, matre atreine jë së troa hane akeukawane la itre xan ngöne la nöjei pengöne akötr, jëne la iakeukawany hne së hna kapa qaathei Akötresie.” (2 Kor. 1:3, 4) Drei la hnei Iehova hna upe troa hamë ithuecatr?

9. Thenge la hna qaja hnei Davita joxu ngöne Salamo 27:10, nemene la hna troa kuca hnei Iehova kowe la itre hna nuetrij hnene la itre sipu fami nyudren?

⁹ Loi e tro sa xatuane la itre hna nuetrij hnei kem me thin, maine hna qanangazon hnene la itre sinee. Atre hnyawa hi Davita joxu ekö laka, Iehova hmekuje hi la ka atreine troa aegöcatrenyi së. (E jë la Salamo 27:10.) Xecie hnyawa koi Davita laka, tro Iehova a kapa la itre hna nuetrij hnene la itre sipu fami nyudren. Nemene la aqane xatua nyudreni hnei Iehova? Nyidrëti a upe la itre hlue i Nyidrë. Ame la itre trejin ne la ekalesia, tre, angatre hi la sipu fami së. Öni Iesu göne la itre ka nyihlue i Iehova ekö ka hape, angatre hi la itre sipu sinee me trejin me thine i nyidrë.—Mat. 12:48-50.

10. Nemene la aqane qejepengöne Paulo la hnëqa i nyidrë ne qatre thup?

¹⁰ Hanawang la ketre ceitune ka amamane laka, sipu fami së hi la ekalesia. Ame Paulo aposetolo, tre, qatre thup ka catre huliwa nyidrë. Nyidrëti la ketre tulu ka lolo. Öni Tusi Hmitrötr, troa nyitipu nyidrë, atre xötrethenge hnyawa la tulu i Keriso. (1 Kor. 11:1) Hnei Paulo aposetolo hna qejepengöne la hnëqa i nyidrë ne qatre thup, me hape: “Hne huni pe hna menyik nyipi nyipunie, tune la ketre thine ka iji thin me thupëne hnyawa la itre kuku.” (1 Thes. 2:7) Ijije fe tro la itre qatre thup enehila a ithanata amenyikeny, ngöne la angatr a huliwane la Wesi Ula i Akötresie, matre troa akeukawane la itre ka aja ixatua.

11. Nemene la ka amamane ka hape, tha hnëqa ne la itre qatre thup hmekuje kö troa xatuane la itre xan?

¹¹ Hapeu, itre qatre thup hmekuje hi la ka ijij troa akeukawane la itre hna angazon? Ohea. Hnëqa së asë hi troa “iakeukawanyikeu.” (1 Thes. 4:18) Ijije hi tro la itre trejine föe ka macaj a xatuane la itre trejine föe ka kucakuca. Hnei Iehova hna ketre sipu aceitunë Nyidrë memine la ketre thin ka hnim me aupune la nekönatr. (Is. 66:13) Tusi Hmitrötr a qaja la tulu ne la itre föe ka akeukawane la itre ka akötr. (Iobu 42:11) Drei la madrine i Iehova la Nyidrëti a goeëne la itre trejine föe  ka macaj, kola akeukawane la itre xaa trejine föe ka akötr! Ame itre xaa ijin, ijije hi tro la itre qatre thup a sipone kowe la ketre trejine föe ka macaj troa xatuane la ketre trejine föe ka akötr. *

12. Nemene la nyine tro sa kuca ngöne la easa xatuane la ketre trejin?

¹² Ame la easa xatuane la ketre trejin, loi e tro sa metrötrë angeic. Tha tro kö sa hnyingëne menune maine ithanatane la itre mekun hnei angeic hna xele troa ithanatan. (1 Thes. 4:11) Haawe, nemene la aqane tro sa xatuane la itre ka akötr me ka aja ixatua? Tro sa ce wang la faifi lao aqane tro sa kuca, hna qaja hnei Tusi Hmitrötr.

13. Tune la hna qaja ngöne 1 Ite Joxu 19:5-8, nemene la aqane xatua Elia hnene la angela i Iehova, nge nemene la aqane tro sa nyitipune la angela?

¹³ Ixatua kowe la atr ka akötr. Hace catre la mele i Elia perofeta, lo nyidrëti a kötrene lo itre ka thele troa humuthi nyidrë, nge göi ajane fe nyidrëti troa mec. Hnei Iehova hna upe la ketre angela koi nyidrë. Hnene la angela hna xatua me aegöcatrenyi Elia, me hnëkë xen koi nyidrë, me upi nyidrë troa xen. (E jë la 1 Ite Joxu 19:5-8.) Hetre eloine koi së la ceitune celë. Ame itre xaa ijin, tha tru kö la hne së hna kuca matre troa xatua ketre, ngo ame pe, ka tru koi angeic. Maine jë, tro sa kuci xen, maine nyi ahnahna, maine pena tro sa cinyanyi tus koi angeic. Itre ewekë lai ka troa xatua së, e thatreine kö së ithanata meköti koi angeic. Nge itre aqane tro fe së lai a amamane la ihnimi së koi nyudren.

14. Nemene la ini hne së xom qa ngöne la ceitune i Elia?

¹⁴ Loi e tro sa nyihnyawane me thupëne la mele ne la itre hna angazon. Hetre ketre ini hne së hna xom qa ngöne la ceitune i Elia. Hnei Iehova hna xatua Elia troa elë hune la wetr e Horeba. Tingeting la hni Elia la nyidrëti a elë hune la wetr cili, lo hnë isisinyikeu hnei Iehova memine la nöjei Nyidrë. Ketre, nanyi hë la itre ka thel troa humuthi nyidrë. Nemene la ini koi së? Maine easa ajane troa xatuane la itre hna qanangazon, loi e tro sa pane thel troa tingeting la hni nyudren. Celë hi la nyine tro la itre qatre thup a mekun, ngöne la angatr a xatuane la ketre trejine föe. Maine jë, troa hmaloi kowe lai trejin troa porotrik ngöne la hnalapa me nango iji tri, hune la troa porotrik e hnine la Uma Ne Baselaia. Easa ajan troa lolo me tingeting la mele i nyudren.

15-16. Nemene la nyine troa kuca matre troa atreine dreng?

¹⁵ Loi e tro sa atreine dreng. Öni Tusi Hmitrötr: “Nyipiewekë troa saqe dreng, me hmitre ithanata.” (Iako. 1:19) Hapeu, atreine kö së dreng? Maine jë, ame koi së ke, pëkö xaa nyine kuca ngöne la easa dreng la ketre atr, ngo tro hi a goeën me drei angeic e ithanata. Ngo tha eje hmekuje kö lai. Hnei Elia hna qaja koi Iehova la itre akötr me xou i angeic, nge hnei Iehova hna drenge nyidrëti hnyawa. Trotrohnine hi Iehova la kepin, matre kola xou me hnehengazo la perofeta i Nyidrë. Öhne hi Iehova la hnei Elia hna lapa mekun laka, angeice caasi hi, nge ka gufa la huliwa i angeic. Ngo hnei Iehova hna xatua Elia troa lepetrij la itre mekun cili ka ngazo. Nyidrëti a amaman e celë ka hape, hnei Nyidrëti hna drei Elia hnyawa.—1 Ite jo. 19:9-11, 15-18.

¹⁶ Nemene la aqane tro sa dreng la ketre trejin, cememine la thiina ka menyik me wangatrunyi angeic? Ame itre xaa ijin, tro hi sa qaja la itre hnepe hnaewekë co, ngo ka keukawa  hnin me amadrinë angeic. Maine jë, tro sa qaja ka hape: “Ekölö hi ni hmunë! Ka pë hni la atr ka kuca la ewekë celë!” Maine pena, tro sa hnying koi angeic, ka hape: “Nemene la ka traqa koi hmunë, tha trotrohnine kö ni?” maine “Öni hmunë ka hape, . . . Eje hi lai?” Celë hi itre aqane tro sa ithanata, nge ka amamane la ihnimi së kowe la atr. Tro hë angeic a öhn laka, easa ajane troa trotrohni angeic.—1 Kor. 13:4, 7.

17. Pine nemene matre ka nyipiewekë troa xomihni ahoeany me “hmitre troa ithanata”?

¹⁷ Ngo nyipiewekë tro fe sa “hmitre ithanata.” Tha tro kö sa thupa la kola ithanata hnene la atr, matre tro pena a hamë eamo, maine amekötine la mekuna i angeic. Loi e tro sa xomihni ahoeany! Ame lo Elia a fe la hni nyidrë koi Iehova me qejepengöne la akötre i nyidrë, hnei nyidrëti hna qaja la itre trengewekë ka catr. Thupene la Iehova a acatrene la lapaune i Elia, Elia hmaca a qaja la aliene hni nyidrë. (1 Ite jo. 19:9, 10, 13, 14) Nemene la ini koi së? Ame la itre ka akötr ke, angatr a ajane troa fe la hni angatr. Celë hi matre, loi e tro sa nyitipu Iehova me drei angatre hnyawa. Tha tro kö sa canga thele troa nyinyine la jole i angatr. Loi e tro pe sa amamane koi angatr, la ihnim me utipine së.—1 Pet. 3:8.

18. Nemene la aqane tro la itre thithi së a xatuane la itre ka akötr?

¹⁸ Thithi jë memine la itre ka akötr. Ame la atr ka akötr ke, thatreine kö angeice thith. Maine jë, angeic a mekun ka hape, tha ijiji angeice kö troa easenyi koi Iehova. Maine easa ajane troa xatua angeic, loi e tro sa ce thithi me angeic me qaja la ëje i angeic. Ame la easa thith, loi e tro fe sa qaja la etrune la ihnimi së koi angeic, memine la aqane wangatrunyi angeic hnene la ekalesia. Ijije fe tro sa sipo Iehova troa hamë angeic la hni ka tingeting me ka lolo. Eje hi, nyipiewekë tro sa catre thithi sane la itre trejin ka akötr ke, celë hi ketre aqane tro sa akeukawane la hni angatr.—Iako. 5:16.

19. Nemene la ka troa xatua së troa atreine ithanata amenyikeny koi itre xan?

 ¹⁹ Qaja jë la itre trengewekë ka akeukawan me ameune la itre ka akötr. Loi e tro sa pane mekun qëmekene troa ithanata. Maine tro sa ithanata menu, tro hë sa akötrëne la atr. Ngo ka ameune la hni la itre trengewekë ka menyik. (Ite edomë 12:18) Haawe, loi e tro sa sipo Iehova troa xatua së troa ithanata amenyiken, me qaja palahi la itre hnaewekë ka iakeukawany. Ketre, tha tro kö sa thëthëhmin laka, tru catre kö la ixatua hna hamën e hnine la Tusi Hmitrötr.—Heb. 4:12.

20. Nemene la itre xaa aqane mekun hnene la itre hna angazon ekö, nge nemene la hne së hna troa amexej koi angatr?

²⁰ Ame kowe la itre hna angazon ekö lo kola co ke, ka ngazo nge pëkö eloi angatr, nge pëkö ka hane hnimi angatr. Ketre, angatr a mekun ka hape, thatreine kö angatr troa hnimi itre xan. Ngo tha ka nyipici kö lai! Celë hi kepin matre, jëne la Tusi Hmitrötr, loi e tro sa amekunë angatr la etrune la ihnimi Iehova koi angatr. (Wange ju la hna eköhagen hna hape, “Ixatua Qa Hnine La Tusi Hmitrötr.”) Pane mekune jë lo ijine Daniela a hleuhleu me akötr. Hnene la ketre angela hna aegöcatrenyi angeic. Iehova a ajane tro Daniela a atre laka, ka tru angeic koi Nyidrë. (Dan. 10:2, 11, 19) Ceitune hi lai memine la itre trejin ka treije me akötr. Ka sisitria angatre koi Iehova!

21. Nemene la pune kowe la itre atr ka ngazo, nge nemene la nyine tro sa kuca kowe la itre hna angazon?

²¹ Ame la easa xatuane la itre xan ke, easë hi lai a amamane la etrune la ihnimi Iehova koi angatr. Ketre, tha tro kö sa thëthëhmin laka, Akötresieti ka meköti Iehova. Pëkö ewekë ka sihngödri koi Nyidrë. Ngacama pëkö ka öhne la itre hna qanangazon, ngo öhne kö Iehova. Tro kö Nyidrëti elanyi a amekötin me nyithupene kowe la itre atr ka ngazo. (Num. 14:18) Haawe, catre jë së amamane la ihnimi së kowe la itre hna akötrën me hna angazon. Easa madrin ke, atre hi së laka, tro kö Iehova elanyi a nyihnyawane la mele ne la itre hna akötrën hnei Satana me fene i angeic! Easenyi hë matre patre pi la nöjei akötre cili qa ngöne la itre mekuna së me itre hni së.—Is. 65:17.