1. Pine nemene matre tha ini tusi kö la itre xan?

JOLE catr enehila troa huliwa matre hetre mele ka loi. Nyimutre la itre trejin ka catre huliwa, matre tro la hnepe lapa i angatr a hetrenyi la ka ijij. Ame itre xan, nanyi catre la hnë huliwa qa ngöne la hnalapa. Itre hawa ne tro angatr kowe la huliwa me bëeke hmaca. Ame pena itre xan, ngacama ka jole catre la huliwa, ngo angatre pe a kuca thatraqane la hnepe lapa i angatr. Celë hi matre, ame e jidr, kucakuca catre angatr! Göi pë fe trengecatre i angatr troa ini tus.

2. Eu la ijine epuni a ini tus?

² Loi e tro sa ami ijin, matre troa inine la Wesi Ula i Akötresie memine la itre itusi së. Ka nyipiewekë catr, e ajane së troa imelekeu hnyawa me Iehova me hetrenyi la mel ka tha ase palua kö! (1 Tim. 4:15) Ame itre xan, angatr a canga hlë e hmakany, matre troa ini tus ke, pëkö mejen e hnine la uma. Ketre, angatr a ase hlë, matre hmaloi troa mekun me ithel. Ame itre xan, angatr a xomi hnepe menetr e hej, matre troa ini tus me lapa mekun.

3-4. Nemene la ka saze göne la etrune la itre itus hna kuca, nge pine nemen?

³ Nyipiewekë troa nue ijin matre troa ini tusi caas. Ngo nemene la nyine tro sa inin? Öni itre xan, ‘Nyimutre palaha la itre nyine troa e. Nge thatreine kö ni e asë.’ Alanyimu la itre ka kepe thangane qa ngöne la hna ini tus caas. Ngo, jol kowe la itre xaa trejin troa ami ijine thatraqane lai. Atre hnyawa hi la Lapa Ne Xomi Meköt la jole cili. Celë hi matre, hnei angatr hna acone la etrune la itre itusi hna fejan maine ngöne Ëternet.

⁴ Tha tro hmaca kö sa kuca la itus, Annuaire des Témoins de Jéhovah ke, nyimutre hë la itre hna melën hna qaja ngöne  la sit jw.org^® me ngöne JW Télédiffusion. Ame ngöne la macatre, kolo ha fejane hi la köni Ita Ne Thup nyine tro fë me köni Hmeke Jë! Tha hna saze kö la itre ewekë cili, matre hetre ijine troa kuca la itre xaa jol. Hna saze pe me acone la etrune la itre itusi së, matre aijijë së troa amë panëne “la ka nyipiewekë.” (Fil. 1:10) Tro sa ce wang la aqane tro sa amë panëne la itre ewekë ka nyipiewekë, me aqane tro sa kepe thangane qa ngöne la hna ini tusi caas.

5-6. Nemene la itre itusi nyine tro sa inin?

⁵ Nemene la nyine tro sa pane inin? Nyipiewekë tro sa nue ijine matre troa inine la Wesi Ula i Akötresie. Hna acone la etrune la itre xötr nyine e ngöne la wiik, matre aijijë së troa lapa mekune la itre hne së hna e, me sine thel. Tha tro kö sa e hmekuje hi la itre xötr. Loi e tro fe sa thel matre troa ketr la hni së hnene la maca ne la Tusi Hmitrötr, me easenyi koi Iehova.—Sal. 19:14.

⁶ Nemene la itre xaa nyine tro sa inin? Eje hi laka, easa hnëkëne la Ita Ne Thup nyine inin memine la Ini Tusi Hmitrötr Ne La Ekalesia, memine fe la itre xaa icasikeu thatraqane la icasikeu ngöne la wiik. Ngo loi e tro fe sa majemine e la lue zonal, Ita Ne Thup nyine tro fë me Hmeke Jë!

7. Tro kö sa hnehengazo e thatreine kö tro sa e me goeën asë la itre ka mama ngöne la sit së me ngöne JW Télédiffusion?

⁷ Maine jë, tro epuni a mekun ka hape, ‘Öö, ka loi. Ngo tune kaa la itre tane mekun me itre video ka mama ngöne la sit jw.org, me ngöne JW Télédiffusion? Tru palaha!’ Drei la ketre ceitun: Easë ngöne la ketre restaurant. Hna amë hune la laulau la nyimu pengöne xen, nge isa qanyi së kö iën. Thatreine kö tro sa xom asë la nöjei xen hna amë. E cili, easa iëne la hne së hna ajan. Ketre tune mina fe, tha tro kö sa hnehengazo, e thatreine kö së e maine inin la nöjei ewekë hna amë ngöne la sit së. Loi e tro pe sa e me goeëne la ka ijij. Tro sa ce wang la aqane tro sa inin, me aqane tro sa kepe thangane la hna ini tus.

8. Nemene la aqane tro sa hnëkëne la Ita Ne Thup së, matre tro sa hetre thangane qa ngön?

⁸ Ame la easa ini tus, ke, easa lapa mekune catrëne la itre hne së hna e, matre troa xomi ini qa ngön, maine troa atre pena la ketre ithuemacanyi ka nyipiewekë. Tha tro kö sa e nyimenyimëne hi lai itus, me sija la itre mekune ka sa la itre hnying. Pane mekune jë së la easa troa hnëkëne la Ita Ne Thup. Maine jë tro sa pane e la itre mekune ka tru ne lai tane mekun. Thupene lai, easa e la itre tane mekune ka tru me ka co, memine fe la itre hnyinge nyine amekunë së, göne lai tane mekun. Thupene jë hi lai, easë hë a e hnyawa lai tane mekun. Nyipiewekë troa e hnyawa la hnaewekë ka qajaqaja la aliene lai paragaraf, maine jë eje ngöne lai pane hnaewekë ne lai paragaraf. Eje hi la ka troa qajaqaja me xatua së troa atre a mekune hna qejepengöne hnene lai paragaraf. Ame fe la easa e la tane mekun, loi e tro sa pane mekune la aqane ihmeku la tane mekun ka co memine la tane mekun ka tru. Pane cinyanyine ju la itre hnëewekë me itre ini hne së hna thatre ekö, nge hne së hna ajane troa sine thel.

9. (a) Pine nemen matre tro sa lapa mekune hnyawa la itre xötr hna qaja e hnine la Ita Ne Thup? (b) Tune la hna qaja ngöne Iosua 1:8, nemene la nyine tro sa kuca, thupene la hna e la ketre xötr?

⁹ Ame la easa inine la Ita Ne Thup ke, easë fe hi lai a inine la Tusi Hmitrötr. Celë hi matre, loi e tro sa lapa mekune hnyawa la  itre xötr, ene mina fe la itre hna cinyihan atrun nge nyine troa e. Goeëne jë fe la aqane anyipicine la ketre xötr, la hna qaja ngöne la paragaraf. Ketre, loi e troa xomi ijin, matre troa lapa mekune la itre xötr hna e, me mekune la aqane tro sa isa trongën ngöne la mele së.—E jë la Iosua 1:8.

10. Thenge la tusi Heberu 5:14, pine nemene matre loi e tro la itre kem me thin a inine la itre nekönatr la aqane troa ini tusi caas?

¹⁰ Eje hi laka, itre kem me thin a ajane tro la itre nekönatr a madrine troa kuca la Hmi Ne Hnepe Lapa. Celë hi matre, angatr a canga hnëkëne la nyine troa inin ngöne la ijine cili. Ngo ame pe, tha nyipiewekë kö troa hnëkëne la ketre ewekë ka tru maine ka jole pena. Ame ngöne la Hmi Ne Hnepe Lapa, ijije hi troa goeëne la itre video ka mama e nöjei treu ngöne JW Télédiffusion, maine kuca la ketre huliwa, tune la troa nyitipune la aka i Noa, maine inine pena la itre nekönatr troa ini tusi caas. Nyipiewekë tro nyudreni a inine la aqane troa hnëkëne la itre icasikeu, maine hnëkëne la nyine troa sa e kola icilekeu e koilo hnaini. (E jë la Heberu 5:14.) Maine tro nyudreni a ami ijine troa ini tusi e koilo hnalapa, tro ha hmaloi koi nyudren troa trotrohnine la hna qaja ngöne la hna icasikeu, me itre asabele, me itre asabele katru ka hetre video. Ngo, troa acone maine aqeane la hawa ne ini tus, thenge la macatre me pengöne la nekönatr.

11. Pine nemen matre nyipiewekë tro sa inine la itre hnainin la aqane troa ini tusi caas?

¹¹ Nyipiewekë fe tro sa inine la itre hnainin la aqane troa ini tusi caas. Ame la easa xötrei ini tusi me angatr, loi e tro sa amamai angatr la aqane troa hnëkëne la ini itusi angatr. Easa madrin la angatr a sija la itre mekun nyine sa, maine hnëkëne la itre icasikeu. Ngo nyipiewekë tro fe sa ini angatr la aqane troa ithel me ketre ini tusi caas. Ame hë la kola traqa la itre jol, tha tro kö angatr a canga thele ixatua thene la itre xaa trejin ne la ekalesia. Angatre pe a ketre sipu ithel la itre trepene meköt ka troa xatua angatr, ngöne la itre itus.

12. Nemene la itre xaa kepin matre easa ini tus?

¹² Maine jë, epuni a mekun laka, pëkö thangane la easa ini tus. Ngo tha ka nyipici kö lai. Ame ngöne la xötrei, tha tro kö a aqeane menune la ini tusi së. Ngo ame hë e thupen, ijije hi tro sa aqean. Loi e troa mekun la enyipiewekëne la ini tus. Ame la  pane kepin matre easa ini tus ke, easa ajane troa easenyi koi Iehova. Ketre, easa ajane troa sa la hnying ne la ketre atr, maine thele nyin pena la ketre jol.

13. (a) Qaja jë la itre aqane tro la itre thöth a qejepengöne la lapaune i nyudren ngöne la hna ini. (b) Nemene la aqane tro sa trongëne la hna qaja ngöne Kolose 4:6?

¹³ Pane mekune jë la ketre thöth e koilo hna ini. Ka mejiun asë hi la itre sine ini angeic, kowe la ini évolution. Angeic a ajane troa amamane la mekuna i Tusi Hmitrötr, ngo thatreine kö angeic la aqane troa kuca. Haawe, hane hi la nyine troa inin! Hane hi la lue kepin ka upi angeic troa ini tus: (1) troa acatrene la lapaune i angeic laka, Akötresieti hi la ka xup la nöjei ewekë asë, me (2) troa atreine qejepengöne la nyipici qa hnine la Tusi Hmitrötr. (Rom. 1:20; 1 Pet. 3:15) Eje hi, loi e tro angeic a pane mekun ka hape, ‘Nemene la hna qaja hnene la itre xaa nekönatr, matre troa qejepengöne la ini évolution?’ E cili, angeic a ithel me sine thel ngöne la itre itusi së. Maine celë hi la hnei angeic hna kuca, haawe, tro ha hmaloi koi angeic troa qejepengöne la lapaune i angeic. Ame itre xan, angatr a mejiune kowe la ini évolution ke, hna qaja koi angatr hnene la ketre atr ka cilë hnëqa ka tru. Maine tro sa öhne la caas maine lue mekun ka jelethoine la ini cili ke, ijije hi tro sa xatuane la itre atr ka thele la nyipici.—E jë la Kolose 4:6.

14-16. (a) Nemene la ka xatua së, troa trotrohnine la ketre tusi ne la Tusi Hmitrötr, hne së hna thatre hnyawa kö? (b) Nemene la aqane tro la itre xötr hna amë ngöne la paragaraf, a xatua së troa trotrohnine hnyawa la tusi Amosa. (Wange ju la hna eköhagen, “Loi e Troa Wangatrune La Tusi Hmitrötr!”)

¹⁴ Pane mekune jë laka, ame e ketre wiik, kola sipone koi easë troa inine la ketre tusi hna cinyihane hnene la itre perofeta, ngo hne së hna thatre. Ame la pane ewekë hne së hna troa kuca, tre, troa akökötrene la aja së göne la tusi cili. Nemene la aqane tro sa kuca?

¹⁵ Ame la hnapan, troa isa hnying ka hape: ‘Drei la ka cinyihane lai tus? Ka tune kaa nyidrë? Ekaa la nöje i nyidrë? Nemene la huliwa i nyidrëti ekö?’ Loi e tro sa pane thel la pengöne la mele ne la atre cinyihan. E cili, tro hë sa trotrohnine la kepin la itre hnaewekë me itre ceitune hnei nyidrëti hna qaja. Ame la easa e Tusi Hmitrötr, loi e tro sa thel la itre xötre hnaewekë ka hamë ithuemacany göne la atre cinyihan.

¹⁶ E cili, tro ha hmaloi koi së troa atre la ijine kola cinyihane lai tus. Hna qaja la itre ijine cili ngöne la “Table des livres de la Bible” hutrö ne la Tusi Hmitrötr, La Bible. Traduction du monde nouveau. Ketre, loi e troa goeëne la Appendice A6, kola hape, Prophètes et rois de Juda et d’Israël. Maine easa inine la ketre tusi ne perofeta, loi e tro sa thel la itre ewekë ka traqa ngöne la ijine kola cinyihane lai tus. Nemene la itre tria me itre aqane ujë ka ngazo hna amekötin hnene la perofeta? Drei la ka mele ngöne la hneijine i angeic? Maine easa ajane troa trotrohnine hnyawa la itre xötr, loi e tro fe sa ithel ngöne la itre xaa xötre ne la Tusi Hmitrötr. Drei la ketre ceitun. Maine easa ajane troa trotrohnine la itre ewekë ka traqa ngöne la hneijine i Amosa perofeta, loi e tro fe sa e la 2 Ite Joxu me 2 Aqane Lapa Ite Joxu, lue tusi lai hna amë ngöne la ithuemacanyi ne la xötr ne Amosa 1:1. Ketre, loi e tro fe sa e la tusi Hosea ke, caasi hi la hneijine i angeic me Amosa. Tro asë hi la itre xötre celë a xatua së troa trotrohnine hnyawa la mel  me hneijine i Amosa.—2 Ite jo. 14:25-28; 2 A. l. ite jo. 26:1-15; Hos. 1:1-11; Amosa 1:1.

17-18. Jëne la itre ceitun hna qaja e hnine la paragaraf maine itre xaa ceitun pena, amamane jë la enyipiewekëne la itre hnepe ithuemacany göne la ini tusi së.

¹⁷ Ame la easa e Tusi Hmitrötr, ka loi e tro sa ajane troa trotrohnine la hne së hna e. Pane mekune jë laka, easa e la mekene 12 ne la tusi Zakaria, lo kola perofetane la meci ne la Mesia. (Zaka. 12:10) Ame la easa traqa kowe la xötre 12, easa e ka hape, tro la “lapa i Nathana” a treije pine la Mesia. E cili, epuni a pane cil me isa hnying ka hape: ‘Ka ihmeku kö la Mesia memine la lapa i Nathana? Ijije kö troa pane ithel?’ E cili, easë ha ithel, ceitu me ketre polis. Hnene la ithuemacany hna amë ngöne la xötr, hna upi së troa e la 2 Samuela 5:13, 14. Kola qaja ka hape, ame Nathana, tre, ketre nekö i Dravita Joxu hi angeic. Hnene la ketre ithuemacanyi hna upi së troa e la Luka 3:23, 31, ka amamane laka, jëne Maria, ketre matra i Nathana hi Iesu. (Wange ju la Itre Itus Ka Nyitrepene La Mel Me Huliwa Ne Cainöj, Juun 2018, g. 5 Drei la keme i Iosefa?) Kolo ha huliwa la mekuna së! Ase hë perofetane ka hape, Iesu la ketre matra i Dravita. (Mat. 22:42) Ngo kola traqa koi 20 la itre nekö i Dravita trahmany. E cili, Zakaria a amamane la kepin matre, itre lapa i Nathana a treije la meci Iesu. Easa madrine la easa trotrohnine lai!

¹⁸ Hanawang la ketre ceitun. Ame ngöne Luka mekene 1, easa e laka, hnei Gaberiela hna tro troa wai Maria me hape göne la nekönatr hnei eahlo hna troa hnahon: “Tro nyën a atre ka tru, nge troa hë  nyën ka hape, Nekö ne la Akötresie ka Draië Catr, nge tro Iehova Akötresie a hamë nyëne la therone i Dravita, keme i nyën. Nge tro nyën a mus me Joxu hune la hnalapa i Iakobo epine palua.” (Luka 1:32, 33) Maine jë, tro hi sa lapa mekun la pane ithuemacany hna qaja hnei Gaberiela. Hnei angeic hna qaja, ka hape, troa hë Iesu, “Nekö Ne La Akötresie Ka Draië Catr.” Ngo hnei Gaberiela mina fe hna perofetan ka hape, tro Iesu a “mus me Joxu.” Maine jë, easa pane thel la mekuna i Maria göne la hna qaja hnei Gaberiela. Hapeu, hnei Maria kö hna mekun laka, tro Iesu a nyihna i Heroda Joxu, maine musi e Isaraela? Maine Iesu hi la joxu, tre, kolo hi lai a hape, Maria la thine la joxu, matre tro asë hi la hnepe lapa i eahlo a mel e hnine la hnanyijoxu. Ngo, pëkö ka amamane e hnine la Tusi Hmitrötr laka, hnei Maria hna qaja la itre mekun cili koi Gaberiela; ketre, pëkö ka qaja ka hape, hnei Maria hna sipo göhnë ka tru e hnine la Baselaia, tune lo lue atre drei Iesu. (Mat. 20:20-23) Celë hi itre ithuemacany lai ka amamane laka, ka hetre hni ne ipië Maria!

19-20. Tune la hna qaja ngöne Iakobo 1:22-25 me 4:8, nemene la hne së hna ajan ngöne la easa ini tus?

¹⁹ Tha tro pi kö sa thëthëhmin, laka, ame la pane kepin matre easa inine la Wesi Ula i Akötresie memine la itre xaa itusi së, tre, kola easenyi së koi Iehova. Ketre, easë fe a ajane troa atre “la pengö” së me itre nyine tro sa saze matre troa amadrinë Akötresie. (E jë la Iakobo 1:22-25; 4:8.) Qëmekene tro sa nyiqane ini tus, loi e tro sa pane sipone la uati hmitrötr koi Iehova, matre troa xatua së. Loi e tro sa sipo iele koi Iehova, matre troa xatua së troa kepe thangane qa ngöne la ini tusi së, me atrehmekune la itre nyine tro sa saze.

²⁰ Epi tro asë hi sa tune la atre nyihlue i Akötresie! Önine la atre cinyihane la Salamo göi angeic: “Angeic’ a madine la wathebo i Iehova, me lapa mekune la wathebo i nyidëti e lai me jid. . . . troa loi xölen’ asë la hnei angeice hna kuca.”—Sal. 1:2, 3.