Öni Sara, * “Ame ni ke, ka lapa pe hi. Celë hi matre, xounge troa porotrik memine la itre ka catr hna ithanata me ka calogitr. Ngo tha xounge kö la eni a ce lapa memine la ketre atr ka thiina ka menyik me ka hni ka ipië. Eni a qaja koi angeice la itre aliene la hning me itre jol ka traqa koi ni. Celë hi lai itre nyipi sineeng.”

Kola amaman hnene la hna melën hnei Sara laka, easa ajane troa nyisineene la itre atr ka thiina ka menyik. Ketre thiina lai hna wangatrune hnei Iehova. Celë hi matre, Tusi Hmitrötr a ithuecatre koi së ka hape: “Hetrëne jë . . . la hni ka menyik.” (Kol. 3:12) Nemene la hna hape, troa hni ka menyik? Nemene la aqane amamane Iesu laka, ka hni ka menyike nyidrë? Nge nemene la aqane troa sa mele madrin jëne la thiina cili?

Ame la atr ka hni ka menyik, ke ka tingetinge la mele i angeic. Angeic a wangatrune la itre xan, me thiina ka loi me lapa thaup. Nge atreine hi angeic troa xomehnöthe la elëhni angeic ngöne la kola akötrë angeic.

Kola mekun hnei itre xan, ka hape, ketre atr ka xou maine ka kucakuca la ketre atr ka hni ka menyik. Ame ngöne la qene Geres ne la hnaewekë “hni ka menyik”, tre, kola qaja la kola amemëne la hoos ka wael. Ngacama ka waele lai hoos, ngo ijije hi troa amemëne ej. Ketre huliwa lai ka jole troa kuca, pine laka, tha tro kö ej a canga atreine xomehnöthe la trengecatre ne ej, ngo tro ej a pane inin. Ka ceitu hi lai me easë, laka, itre atr ka ngazo së ngo ijije hi tro sa inine troa nuetrije la itre thiina ka ngazo, matre troa mele tingetinge me itre xan.

Maine jë hne së hna qaja, ka hape, “Tha ka hni ka menyike kö ni?” Eje hi, easa mel ngöne la fen ka tru hnei itre atr ka calogitr me ka thatreine xomihni. Celë hi matre, jole koi së troa hetre hni ka menyik. (Rom. 7:19) Nyipici laka, nyipiewekë tro sa nue trengecatr, matre troa eënyine la thiina ka lolo cili. Ngo jëne la uati hmitrötr, tro Iehova a xatua së troa hni ka menyik. (Gal. 5:22, 23) Pine nemen matre nyipiewekë tro sa hni ka menyik?

Ame la easa hni ka menyik, ke kola easenyi së hnei itre xan. Ketre tui Sara, lo hna qaja e caha hun, aja i  easë asë hi troa nyisineene la ketre atr ka hni ka menyik me loi thiina. Hnei Iesu hna amamai tulu koi së, göne la thiina ka lolo cili! (2 Kor. 10:1) Ngacama thatre Iesu hnyawa kö hnene la itre nekönatr, ngo tha xou i nyudreni kö troa easenyi koi nyidrë.—Mar. 10:13-16.

Ame la easa hni ka menyik, ke ka hetre thangane ka loi koi së me kowe la itre ka lapa easenyi së. Maine tro sa hni ka menyik, tha tro kö sa canga elëhni. Tro pe sa atreine xomihni. (Ite edomë 16:32) Eje hi, tha tro hë sa akötrëne la ketre atr, tune la atr hne së hna hnim. Ketre, hetre thangane ka loi koi xan, e tro sa atreine xomihnin me thupene la aqane ithanata së me aqane ujë së.

Ngacama tru la huliwa i Iesu, ngo hnei nyidrëti palahi hna hni ka menyik kowe la nöjei atr asë. Alanyimu la itre ka hace fë la itre jol ka eje thei angatr. Celë hi matre, angatr a aja ixatua. Drei la madrine ka tru thei angatr, ngöne la Iesu a qaja koi angatr, ka hape: “Trohemi koi ni, . . . menyike ni, nge ipië la hning!”—Mat. 11:28, 29.

Nemene la aqane tro sa hni ka menyik tui Iesu? Nyipiewekë tro sa inin e hnine la Tusi Hmitrötr, la itre aqane ujë i nyidrë koi itre xan me itre hnei nyidrëti hna kuca matre troa nyinyine la itre jol. Ketre, loi e tro sa hni ka menyik tui Iesu, ngöne la kola tupathi së me akötrë së. (1 Pet. 2:21) Hanawange la köni ewekë ka troa xatua së troa nyitipu Iesu.

Ka hni ka ipië Iesu. Hnei nyidrëti hna qaja ka hape, “menyike ni, nge ipië la hning.” (Mat. 11:29) Tusi Hmitrötr a qaja la lue thiina cili ke, ka ce tro palahi lue ej. (Efe. 4:1-3) Pine nemen?

Eje hi, maine tro sa hni ka ipië, tha tro kö sa canga drenge akötrëne la itre hna qaja maine kuca pena hnei itre xan. Nemene lo aqane ujë i Iesu ngöne la kola qeje nyidrë ka hape, “tru hna xen, me tru hna iji waina”? Hnei nyidrëti hna amamane ngöne la aqane ujë i nyidrë laka, itre trengathoi la itre hna qaja. Nge hnei nyidrëti hna qaja cememine la hni ke menyik, ka hape, “kola mama la inamacan hnei huliwa.”—Mat. 11:19.

Maine kola qaja koi së la itre trengewekë ka akötr me qaja angazone la nöje së me aqane mele së, loi e troa sa cememine la hni ka menyik. Öni Peter, ketre qatre thup ka mel e Afrique du Sud: “Ame la eni a elëhni pine la hna qaja hnei ketre, ke eni a canga hnying ka hape, ‘Nemene jë la aqane tro Iesu a sa?’ ” Öni angeice hmaca jë hi: “Tha hnenge kö hna wangatrune la itre hna qaja me dreng akötrën itre ej.”

Trotrohnine hi Iesu laka, ka tha pexeje kö la atr. Hnene la itretre drei Iesu hna thele troa kuca la itre ewekë ka loi, ngo thatreine kö angatr e itre xaa ijin, pine laka, itre atr ka tha pexeje kö. Ame ngöne lo jidri qëmekene tro Iesu a mec, tha hnei Peteru kö me Iakobo me Ioane hna ce hlë me Iesu, tune lo aja i nyidrë. Ngo atre hnyawa hi Iesu laka, itre atr ka tha pexeje kö angatr, matre “canga ajane hi la hni, ngo kucakuca pe la ngönetrei.” (Mat. 26:40, 41) Celë hi kepin matre tha hnei nyidrëti kö hna canga elëhni kowe la itre aposetolo.

Ame Mandy tre, ketre trejin ka canga elëhni nge tha ka hane kö trotrohni itre xan. Ngo ame hë enehila, angeic a nyitipune la aqane ujë i Iesu ka hni ka menyik. Öni angeic, “Eni a thele troa trotrohni itre xan ngacama ngazo la aqane ujë i angatr. Eni a catre goeëne la itre thiina ka loi thei itre xan, tui Iehova.” Maine tro sa nyitipu Iesu me thiina ka menyik koi itre xan, tro hë sa trotrohni angatr pine laka, itre atr ka tha pexeje kö.

Hnei Iesu hna catre lapaune koi Iehova ngöne la mele i nyidrë. Ame lo nyidrëti e celë fen, hna qanangazo nyidrë. Ketre, hna qeje gele Iesu me akötrë nyidrë me axösisi nyidrë. Ngo hnei nyidrëti palahi hna hni ka menyik, pine laka, nyidrëti a “mejiune kowe la Atre Iameköti ka meköt.” (1 Pet. 2:23) Eje hi, atre hnyawa hi Iesu laka, tro kö la Keme i nyidrëti e koho hnengödrai a thupë nyidrë me amekötine la itre ka qanangazo nyidrë ngöne la nyipi ijin.

Maine kola qanangazo së me kuca la ketre ewekë ka tha meköti kö, tro hë së lai a canga elëhni me kuca la ketre ewekë ka ngazo. Celë hi matre, kola amexeje koi së hnei Tusi Hmitrötr ka hape: “Ame la elëhni ne la atr, tha eje kö a eatrëne la meköti Akötresie.” (Iako. 1:20) Ngacama meköti e tro sa elëhni, ngo tro hë sa kuca la ketre ewekë ka ngazo, pine laka, itre atr ka tha pexeje kö së.

Ame Cathy ke, ketre trejin ka mel e Alema. Öni angeic, ‘Maine tha tro kö ni a cilëgöli ni ngöne la kola kuca la ketre ewekë ka tha meköti kö koi ni, pëkö ka troa xatua ni.’ Ngo ame hë e thupen, hnei angeice hna saze me inine troa lapaune koi Iehova. Öni angeic, “Tha eni hmaca kö a canga elëhni me thel troa itëkeun.  Eni a hni ka menyik, me mejiun laka, tro kö Iehova a amekötine hnyawa la itre ewekë.” Eje hi, ngacama hetre ewekë ka tha meköti kö hna kuca koi së, ngo loi e tro palahi sa nyitipu Iesu, me catre mejiune koi Iehova Akötresie. Tro hë së lai a hni ka menyik.

Hnei Iesu hna qaja ka hape, maine easa ajane troa madrin, loi e tro sa hni ka menyik. Öni nyidrë, “Madrine la itre ka hni ka menyik.” (Mat. 5:5) Hanawange la thangane ka loi, e tro sa hni ka menyik.

Maine tro sa hni ka menyik, tro ha lolo la faipoipo së. Öni Robert, ketre trejin ka mel e Australie, “Tru catre la hnenge hna akötrëne la föeng hnene la itre trengewekë ka catr. Ame itre xaa ijin, eni a elëhni matre tha eni hmaca kö a thupëne la aqane ithanatang. Ngo eni a öhn e thupen laka, hnenge hna akötrëne la föeng. Hace catre koi ni, la eni a akötrën la föeng.”

Pine laka, “itre ka tria pala hi së,” ijije hi tro sa tria ngöne la aqane ithanata së. Celë hi matre, ame la kola qaja la itre trengewekë ka akötr hnene la lue trefën, tro ha gomegom e hnin e la faipoipo. (Iako. 3:2) Maine troa traqa lai koi së, loi e tro sa hni ka menyik matre troa xatua së troa atreine xomihni me xomehnöthe la thineme së.—Ite edomë 17:27.

Tru la itre trengecatre hna kuca hnei Robert. Hnei angeice hna atreine xomihni me hni ka menyik. Nemene hë la thangan? Öni angeic, “Ame enehila, ame la kola traqa la ketre jol koi eni me föeng nge isa mekuna i nyio kö, eni a pane drei angeice hnyawa me ithanata amenyikeny, matre tha tro kö ni a elëhni. Lolo hë la faipoipo i nyio.”

Tro la hni ka menyik a xatua së troa mele ka loi me itre xan. Ame la itre ka saqe elëhni ke, itre ka pë sinee. Ngo maine tro sa hni ka menyik, tro lai a xatua së, troa “mele tingetinge me itre xan . . . me acatrene la cas.” (Efe. 4:2, 3) Öni Cathy, lo hne së hna qaja e caha hun, “Hnene la hni ka menyik, matre atreine ni troa lapa me itre xan, ngacama tha ka hmaloi kö.”

Maine tro sa hni ka menyik, tro ha tingetinge la hni së. Kola qaja hnei Tusi Hmitrötr ka hape, ka ce tro la thiina ka menyik me tingetinge memine la “inamacan qaa hnengödrai.” (Iako. 3:13, 17) Celë hi matre, ame la atr ka hni ka menyik ke, ka hetre “wenethëhmi ka egöcat.” (Ite edomë 14:30) Hnei Martin hna catre amamane la hni ka menyik, me qaja ka hape, “Ame enehila, tha eni hmaca kö a canga elëhni, nge eni a thel troa trotrohni itre xan. Tingetinge me madrin la hning.”

Nyipici laka, nyipiewekë tro sa nue trengecatr matre troa hni ka menyik. Önine la ketre trejin, “Ame itre xaa ijin, eni a elëhni.” Ngo Iehova a ithuecatre koi së, troa ‘catre thiina ka menyik’ matre tro sa atreine xomihnine la elëhni së. (Is. 41:10; 1 Tim. 6:11) Tro hë Nyidrëti a ‘apexejene la ini së’ me ‘aegöcatrenyi së.’ (1 Pet. 5:10) Tui Paulo aposetolo, tro hë sa “nyitipu Keriso, atre ipië me menyik.”—2 Kor. 10:1.