1. Nemene la hna qaja hnei Iesu göne la itre ahnahna e hnengödrai?

 AME la itre xaa ahnahna, tre, tha ka mama kö. Itre ahnahna lai ka tru alameken. Ame ngöne la Cainöj Hune La Wetr, hnei Iesu hna qaja la itre ahnahna e hnengödrai, nge ka sisitria catre kö hune la itre mo ne fen. Celë hi matre, öni nyidrë: “Ame la göhne ne la trengamo i eö, tre göhne ne fe hi la hni eö.” (Mat. 6:19-21) Tro hë së e cili a catr matre troa kapa la itre ewekë ka tru alameken. Maine easa ajane troa kapa la “itre trengamo e hnengödrai,” loi e tro sa hlemu loi nge matre kepe së hnei Akötresie. Tune la hna qaja hnei Iesu, thatreine kö troa apatrene me atrekënö la itre trengamo cili.

2. (a) Nemene la ithuecatre hnei Paulo hna hamën ngöne 2 Korinito 4:17, 18? (b) Nemene la hne së hna troa ce wange ngöne la tane mekun celë?

² Hnei Paulo aposetolo hna ithuecatre koi së troa ‘goeëne hutine la itre ewekë ka tha mama kö.’ (E jë la 2 Korinito 4:17, 18.) Kola qaja la itre manathith hne së hna troa kapa ngöne la fene ka hnyipixe. Ngo ame ngöne la tane mekun celë, tro sa ce wange la 4 lao ahnahna ka tha mama kö, nge ka hetre eloin koi së enehila. Kola qaja la aqane imelekeu së me Akötresie, me thith, me uati hmitrötr, memine la ixatua i Iehova me Iesu me itre angela ngöne la hna cainöj. Tro fe sa ce wange la aqane tro sa wangatrune la itre ahnahna cili.

3. Nemene la ahnahna ka sisitria catre kö, nge nemene la ka aijijë së troa kapa la ahnahna cili?

³ Ame la ahnahna ka sisitria catre kö, tre, ene la aqane imelekeu së me Iehova. (Sal. 25:14) Pine nemene matre ijije hi tro Akötresieti a nyisineene la itre atr ka tha pexeje kö ngacama ka hmitrötre Nyidrë? Pine laka jëne la thupene mel, hnei Iesu hna “apatrene la ngazo ne la fen.” (Ioane 1:29) Atre hi Iehova laka, tro kö a hetre atr ka troa amelene la nöjei atr. Celë hi ka aijijëne la itre atr ka mel qëmekene tro Keriso a mec, troa hane nyisinee i Nyidrë.—Rom. 3:25.

4. Drei la itre sinee i Akötresie qëmekene tro Keriso a traqa e celë fen?

⁴ Tro sa pane ce wange la tulu ne la itre sinee i Akötresie, qëmekene tro Keriso a traqa e celë fen. Aberahama la ketre ka catre lapaun. Thupene la 1000 lao macatre ne nyidrëti a mec, hnei Iehova hna hë nyidrë ka hape, “hniminang.” (Is. 41:8) Eje hi, thatreine kö la mec troa iananyi Akötresie memine la itre sinee i Nyidrë. Ame koi Akötresie, ka mele palahi Aberahama. (Luka 20:37, 38) Tro fe sa wange la tulu i Iobu. Hnei Iehova hna qaja kowe la nöjei angela ka hape, Nyidrëti a mejiune koi Iobu. Öni Nyidrë: “Ka nyipi loi thina me meköt, nge ate qoue Akötesie me iananyi memine la ngazo.” (Iobu 1:6-8) Nemene fe la mekuna i Iehova göi Daniela, hlue i Nyidrëti ka mele nyipici koi 80 lao macatre ngöne la ketre nöj ka thili koi idrola? Hnene la ketre angela hna akönia qaja koi Daniela ka hape, ketre “ate hna hanyin” hnei Akötresie. (Dan. 9:23; 10:11, 19) Eje hi, ka tru koi Iehova la itre sinee i Nyidrë, nge aja i Nyidrë troa amele angatre hmaca.—Iobu 14:15.

5. Nemene la nyine tro sa kuca matre troa acatrene la aqane imelekeu së me Iehova?

⁵ Ala ije la itre atr ka imelekeu hnyawa me Akötresie enehila, ngacama tha ka pexeje kö angatr? Traqa koi itre milio. Ame e cailo fen asë, alanyimu la itre atr, itre trahmany me itre föe me itre nekönatr, ka amamane laka, itre sinee i Akötresie angatr. Itre “nyipi sinee i [Iehova] la itre atr ka meköt.” (Ite Edomë 3:32, MN) Hnei angatr hna lapaune kowe la thupene mel, matre itre nyipi sinee i Akötresie angatr. Ketre, jëne la thupene mel, Iehova a aijijë së troa nue la mele së koi Nyidrë me xomi bapataiso, matre ce easë fe hë memine la itre milio lao nyipi sinee i Akötresie, lo Ka Draië Catr!

6. Tro sa amamane tune kaa ka hape, ka tru koi së la aqane imelekeu së me Iehova?

⁶ Tro sa amamane tune kaa ka hape, ka tru koi së la aqane imelekeu së me Iehova? Loi e tro sa mele nyipici tui Aberahama me Iobu, ngacama ka hekö catre hë së nyihlue i Iehova. Nyimu macatre ne mele nyipici nyidroti koi Iehova. Tro fe sa tui Daniela. Tro kö a tru koi së la aqane imelekeu së me Akötresie hune la itre sipu aja së. (Dan. 6:7, 10, 16, 22) Eje hi, jëne la ixatua i Iehova, ijije hi tro sa cile catr ngöne la nöjei itupath me lapa qale koi Nyidrë.—Fil. 4:13.

7. (a) Tune la hna qaja ngöne Ite Edomë 15:8, nemene la pengöi Iehova la easa thith? (b) Hnei Iehova hna sa tune kaa la itre thithi së?

⁷ Ame la ketre ahnahna ka tha mama kö, tre, ene la thith. Ame la itre nyipi sinee, angatr a iqajakeune la itre mekuna i angatr me ifekeune la itre aliene hni angatr. Hapeu, hne së kö hna tun me Iehova? Eje hi! Iehova a ithanata koi së  jëne la Tusi Hmitrötr. Nyidrëti a qaja la itre mekun me itre aliene hni Nyidrë. Nge easa ithanata koi Nyidrë jëne la thith, me qaja la itre mekun me itre aliene hni së. Tru la madrine i Iehova troa drenge la itre thithi së! (E jë la Ite Edomë 15:8.) Pine laka, itre sinee i Iehova së, Nyidrëti a drenge me sa la itre thithi së. Ame itre xaa ijin, canga sa hi Nyidrë. Ngo e tha canga sa kö Nyidrë, tro palahi sa thithi fë la itre jol ka traqa koi së. Ngo ame pe, ka xecie koi së laka, tro kö Iehova a sa la itre thithi së ngöne la nyipi ijin. Ame itre xaa ijin, hnei Iehova hna sa la itre thithi së, ngo tha celë kö la hne së hna mekun. Maine jë, tha hnei Nyidrëti kö hna apatrene la itre jol ka traqa, ngo hnei Iehova pe hna hamë së la trengecatr me inamacan matre atreine xomihni.—1 Kor. 10:13.

8. Nemene la aqane tro sa amamane laka, ahnahna ka sisitria la thith?

⁸ Nemene la aqane tro sa amamane laka, ahnahna ka sisitria la thith? Loi e tro sa trongëne la eamo i Akötresie lo kola hape: “The mano kö thith.” (1 Thes. 5:17) Tha ka imusinë kö Iehova tro sa thith. Isa qanyi së kö mekun. Ngo Nyidrëti pe a ithuecatre koi së troa ‘catre thith.’ (Rom. 12:12) Easa amamane ka hape, ka tru koi së la ahnahna cili, la easa thithi e nöjei drai. Haawe, the thëthëhmine kö olene me atrunyi Iehova ngöne la thith.—Sal. 145:2, 3.

9. Nemene la mekuna ne la ketre trejin göi thith, nge nemene fe la mekuna i epun?

⁹ Ame la easa nyihlue i Iehova, öhne ju hi së la Nyidrëti a sa la itre thithi së. Celë hi ka acatrene la hni ne ole së kowe la ahnahna cili. Hane hi la hna melën hnei Chris, ketre trejin ka huliwa i Akötresie ngöne la drai ka pexej a 47 hë lao macatre enehila. Öni angeic: “Hnenge hna majemine thithi koi Iehova e nöjei hmakany. Ketre madrin ka tru la troa ithanata koi Iehova ngöne la kola fetra la jö nyipine la xaxapo! Ka upi ni hi lai troa olene koi Nyidrëti la nöjei ahnahna, tune la thith. Ase mina jë ni thithi e hej, eni hi lai a meköle  hnyawa fë la mekuthetheung ka lolo!”

10. Pine nemene matre loi e tro sa wangatrune la uati hmitrötr?

¹⁰ Ketre ahnahna ka tha mama kö la uati hmitrötr, ene la mene i Akötresie. Loi e tro fe sa wangatrune la ahnahna cili. Hnei Iesu hna ithuecatre koi së tro palahi a sipo Iehova la uati hmitrötr ngöne la thith. (Luka 11:9, 13) Jëne la uati hmitrötr, Iehova a aegöcatrenyi së me hamë së la “men atraqatr.” (2 Kor. 4:7; Itre hu. 1:8) Ketre, ej a xatua së troa cile kowe la nöjei pengöne jol.

11. Nemene la aqane xatua së hnene la uati hmitrötr?

¹¹ Uati hmitrötr a xatua së troa xome hnyawa la itre hnëqa së ngöne la huliwa i Akötresie. Eje fe a xatua së troa macaj me atreine huliwa. Celë hi ka aijijë së troa kuca hnyawa la itre huliwa ngöne la ekalesia. Haawe, hetre thangane la huliwa së ke, hnene la ixatua ne la uati hmitrötr.

12. Tune la hna qaja ngöne Salamo 139:23, 24, nemene la aqane tro la uati hmitrötr a xatua së?

¹² Ame la easa sipo Iehova la uati hmitrötr, matre troa saze la itre mekun me itre aja ka ngazo, easë hi lai a wangatrune la ahnahna cili. (E jë la Salamo 139:23, 24.) Jëne la uati hmitrötr, Iehova a amamane la itre mekuna së me itre aqane ujë së ka ngazo. Celë hi matre, nyipiewekë troa thith me sipone la uati hmitrötr matre xatua së troa saze. Easë hi lai a amamane laka, aja së tro Iehova a xatua së jëne la uati hmitrötr.—Efe. 4:30.

13. Nemene la aqane tro sa wangatrune la ixatua ne la uati hmitrötr?

¹³ Tro sa wangatrune la ixatua ne la uati hmitrötr, e hne së hna lapa mekun la itre eloine hne së hna kapa enehila. Pane mekune jë la hna qaja hnei Iesu kowe la itretre dreng qëmekene troa elë e hnengödrai. Öni nyidrë: “Tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni . . . ngöne la nöjei götrane gaa nany  ne la fene hnengödrai.” (Itre hu. 1:8) Celë hi hne së hna öhn enehila. Traqa koi 8,5 milio lao hlue i Iehova ka qa ngöne la nöjei nöj asë. Eje hi, hetre thangane la uati hmitrötr. Ketre, easa sine la nöje i Akötresie ka mele tingeting me caas. Uati hmitrötr a xatua së troa ihnim, me madrin, me tingeting, me atreine itreqe, me loi hni, me lolo thiina, me lapaun, me menyik, me xomehnöth. Itre igötranene hi la “wene ne la ua.” (Gal. 5:22, 23) Ketre ahnahna ka sisitria catr la uati hmitrötr!

14. Nemene la ixatua ka tha mama kö hne së hna kapa ngöne la huliwa ne cainöj?

¹⁴ Hane hi la hnaafoane ahnahna ka tha mama kö. Easa madrine troa “ce huliwa” me Iehova memine la organizasio i Nyidrë e hnengödrai. (2 Kor. 6:1) Easa ce huliwa me angatr ngöne la easa catre cainöj. Öni Paulo göne la itre ka cainöj ka hape: “Easë la itre ka ce huliwa me Akötresie.” (1 Kor. 3:9) Ketre, easë fe a ce huliwa me Iesu. Thupene la nyidrëti a upe la itretre dreng troa inine la itre atr qa ngöne la nöjei nöj, öni nyidrë: “Tro pala hi ni a ce me nyipunie.” (Mat. 28:19, 20) Nge tune kaa la itre angela? Angatr a xatua së troa tro fë la “maca ka loi nge ka epine palua . . . kowe la itre ka lapa e celë fen.”—Hna ama. 14:6.

15. Qaja jë la ketre ceitune ka amamane la ixatua i Iehova ngöne la huliwa ne cainöj.

¹⁵ Nemene la huliwa hna eatrëne jëne la ixatua i Iehova, me Iesu memine la itre angela? Ame la easa jume la itre itine ne la maca ne la Baselaia ke, kola mala me cia ngöne la itre hni ne la itre ka kapa lai maca. (Mat. 13:18, 23) Drei la ka aciane la itre itine cili matre troa wa wen? Öni Iesu, pëkö atr ka ijije troa xötrethenge nyidrë, “e tha hna pane ee angeice kö hnei Kaka.” (Ioane 6:44) Celë hi ka traqa koi Paulo lo nyidrëti a cainöj koi Lidia me itre xaa föe, tröne la traon e Filipi. Öni Tusi Hmitrötr: “Iehova a fe la hni eahlo matre kapa hnei eahlo la hna qaja hnei Paulo.” (Itre hu. 16:13-15) Tui Lidia, Iehova a ea koi Nyidrë la itre milio lao atr.

16. Drei la nyine tro sa atrune ngöne la kola hetre thangane la huliwa ne cainöje së?

¹⁶ Drei la nyine atrune ngöne la kola hetre thangane la huliwa ne cainöje së? Hnei Paulo hna sa la hnying celë ngöne la nyidrëti a qaja kowe la ekalesia ne Korinito, ka hape: “Hnenge hna traan, nge hnei Apolo hna fi, ngo Akötresie la ka acian. Celë hi matre tha tro kö a atrune la atre traan, maine atre fi, ngo Akötresieti pe, atre acian.” (1 Kor. 3:6, 7) Haawe, tui Paulo, tro palahi sa atrunyi Iehova e kola hetre thangane la huliwa ne cainöje së.

17. Nemene la aqane tro sa wangatrune la ahnahna, ene la troa ce huliwa me Iehova, me Iesu memine la itre angela?

¹⁷ Nemene la aqane tro sa wangatrune la ahnahna, ene la troa ce huliwa me Iehova, me Iesu memine la itre angela? Loi e tro palahi sa catre cainöj “ngöne la gaa tru atr, me ngöne itre hnalapa trootro.” (Itre hu. 20:20) Ame itre xan, angatr a cainöj e cahu gojeny. Angatr a pane ibozu memine la ketre atr me nyiqaane ithanata koi angeic. Maine hetre aja ne lai atr troa ithanata, angatr a qaja la maca ne la Baselaia.

18-19. (a) Nemene la aqane tro sa fi la itre itine nyipici? (b) Qaja jë la tulu ne la ketre atr hna xatuane hnei Iehova.

¹⁸ Easa “ce huliwa me Akötresie” ngöne la easa fi la itre itine nyipici hne së hna  jum. Ame la ketre atr a kapa la maca ne la Tusi Hmitrötr, easa canga bëeke troa wai angeic me nyiqane ini tus. Ame itre xaa ijin, loi e tro sa sipone kowe la ketre trejin troa iwai hmaca. Ketre manathith ka tru troa öhne la aqane saze Iehova la hni me mekuna ne la ketre atr ka ini tus!

¹⁹ Hane hi la tulu i Raphalalani ka mel e Afrique du Sud. Hetre madrine i nyidrë troa ini tus. Ngo jole catre koi nyidrë troa kapa la hna qaja hnei Tusi Hmitrötr göne la troa ithanata memine la itre ka mec ke, ketre guérisseur nyidrë. (Deu. 18:10-12) Ngo hnei nyidrëti hna nue Akötresie troa saze la aqane waiewekë i nyidrë. Hnei nyidrëti hna nuetrije la huliwa ne guérisseur, ngacama jë ne manie i nyidrë. Ame hë enehila, 60 lao macatre i Raphalalani. Öni nyidrë: “Eni a olene kowe la itre Temoë Iehova la nöjei ewekë hnei angatr hna kuca koi ni. Hnei angatr hna xatua ni troa öhnyi huliwa. Ngo eni a olene catrëne koi Iehova ke, hnei Nyidrëti hna saze la meleng. Ketre trejine hë ni enehila, nge eni fe ha cainöje trootro.

20. Nemene la nyine tro sa kuca?

²⁰ Ame ngöne la tane mekun celë, hne së hna ce wange la 4 lao ahnahna ka tha mama kö. Ame la ahnahna ka sisitria, tre, ene la troa nyisinee i Iehova. Celë hi ka aijijë së troa kapa la köni xaa ahnahna: ene la troa thith, me kapa la ixatua qaathene la uati hmitrötr, me kepe ixatua qaathei Akötresie ngöne la hna cainöj. Haawe, loi e tro palahi sa wangatrune la itre ahnahna cili ka tha mama kö. Catre jë së olene koi Iehova ke, Nyidrëti palahi a hnimi së, itre sinee i Nyidrë!