Qaane ju hi la ijine cili, hnenge hna mekun troa saze la meleng me thele troa atre la Atre Xup. Ngo qëmekene tro ni a qaja la ka traqa ngöne la jidri cili, tro ni a pane qaja la itre ewekë ka traqa ngöne lo eni a co, nge ka thue ajang troa thele Akötresie.

Hna hnaho ni lo 1937 e Guesnain, ketre traon e Faras. Kaka a huliwa ngöne la itre mine, matre hnei nyidrëti hna ini ni troa huliwa catr me thiina ka meköt. Eje hi, hnei nyidrëti palahi hna xatuane la itre ka huliwa ngacama tha ka hmaloi kö. Ketre, nyidrëti a elëhni kowe la itre hene ne hmi ka huliwa thoi. Angatr palahi a sipo xen me manie kowe la itre ka pë ewekë me huliwa catr tui kaka, ngo ka loi hi la mele i angatr. Celë hi matre tha hnei kaka kö hna hane qeje Akötresieti koi ni.

Ame hë la eni a tru, hnenge hna nyiqane xele ma wang la itre ka huliwa thoi, tune la itre xaa atre Faras ka xöjetrije la itre trenyiwa. Eje hi, madrine catre ni troa fenibalo  memine la itre nekönatr ka traqa qa ngöne la itre xaa nöj. Ketre, atre Pologne nenë ngo tha atre Faras kö. Eni a ajane tro la itre atr a mele tingeting me caas, ngacama isa nöje i angatre kö.

Hna upi ni troa sooc lo 1957. Celë hi matre eni lo hune la wetr e Algérie. Thupene la eni a sue ka hape, “Akötresieti fe! Akötresieti fe!,” igoeë ju hi ni memine la ketre boliko ngo tha ketre ithupëjia kö. E cili, eni ha nyiqane thele la aliene la mel me hnying ka hape: “Pine nemene matre easa mel? Akötresieti kö a hane hnehengazo së? Tro kö a tingeting elanyi la fen?”

Thupene lai, hna aijijë ni troa pane wai kaka me nenë. E cili, hnenge hna iöhnyi memine la ketre Temoë Iehova, ka hamë ni la Tusi Hmitrötr hna hape, Bible du cardinal Liénart. Hnenge hna nyiqane e Tusi Hmitrötr ngöne lo eni a bëek e Algérie. Hna ketri ni hnene la hna qaja ngöne Hna Amamane 21:3, 4 lo kola hape: “Hanawang! thene la itre atr la uma maano i Akötresie; . . . Tro nyidrëti a köletrije la itre trenge timidra qa ngöne la itre lue meke i angatr, nge pë hmaca kö mec, me hleuhleu, me treij, me akötr.” Öning: “Tro kö a eatr la hna thingehnaeane celë?” Ame ngöne la ijine cili, pëkö hnenge hna atre göi Akötresie me Tusi Hmitrötr.

Thupene la eni a sooc lo 1959, eni a iöhnyi me François, ketre Temoë Iehova. Hnei angeic hna ini ni la itre xaa nyipici qa hnine la Tusi Hmitrötr, tune la ëje i Akötresie. (Sal. 83:18) Hnei François mina fe hna amamane ka hape, tro Iehova a apatrene la itre ewekë ka tha meköti kö qa la fen, me aparadraison la ihnadro. Nge troa eatr la hna qaja ngöne Hna Amaman 21:3, 4.

Canga trotrohnine hi ni la itre ini cili, ame hna ketr la hning. Ngo eni fe a elëhni kowe la itre hene ne hmi ka thoi, me qaja la itre ini ka tha ihmeku kö memine la Tusi Hmitrötr. Eni a pi qaja amamane la aqane huliwa thoi angatr. Tui kaka, eni a ajane troa canga apatrene la itre ewekë ka tha meköti kö.

Hnei François me itre xaa sineeng ka hnimi Iehova hna xatua ni troa xomihni. Hnei angatr hna amamane la hnëqa ne la itre Keresiano laka, tha tro kö sa upezö itre xan, ngo tro pe sa hamë mejiune jëne la maca ne la Baselaia i Akötresie. Celë hi lai ithuecatre i Iesu kowe la itretre dreng. (Mat. 24:14; Luka 4:43) E cili, hnenge hna inine troa ithanata menyiken kowe la itre atr, ngacama hetre hmi angatre hë. Öni Tusi Hmitrötr: “Tha ka isi kö la hlue i Joxu, ngo ka menyike pe koi nöjei atr.”—2 Tim. 2:24.

Ame hë lo 1959, hnenge hna saze aqane mel me xomi bapataiso ngöne la asabele ne sirkoskripsio. E cili hi lo eni a xötrei iöhnyi me Angèle. Hnenge hna nyiqane sine la itre icasikeu ne la ekalesia i Angèle, uti hë la nyio a faipoipo lo 1960. Ketre föe ka loi  thiina Angèle nge ahnahna qaathei Iehova.—Ite edomë 19:14.

Itre macatre thupen, hnenge hna xomi ini qaathene la itre xaa trejin trahmany ka macaj me ka inamacan. Hane hi la ketre: Maine easa ajane troa eatrëne la hnëqa së ngacama tha ka hmaloi kö, loi e tro sa hetre hni ne ipië, me trongëne la hna qaja ngöne Ite Edomë 15:22: “Tha nyipi ewekë la ite mekun’ e tha hna ithanatan . . . hnene la itete ithanata ka ala nyimu.”

Eni a jelenyipicine la itre trengewekë celë lo 1964, ngöne la kola acili ni troa atre thupëne la sirkoskripsio. Eni a iwai trootro ngöne la itre ekalesia me ithuecatre kowe la itre trejin. Kolo petre hi a 27 lao macatreng, matre tha maca hnyawa palakö ni, nge hetre itre ewekë hnenge hna thatreine kuca. Ngo hnenge hna xomi ini me thele eamo me ixatua thene la “itete ithanata” ka inamacan.

Eni a mekun lo eni a xötrei xome la hnëqang. Eni a iwai trootro ngöne la ketre ekalesia e Paris. E cili, hnene la ketre qatre thup hna sipone troa ithanata me eni.

Öni nyidrë: “Louis, ame la droketre a traqa kowe la hnalapa, drei la hnei nyidrëti hna pane wang?”

Öning: “Kolo ka wezipo.”

Öni nyidrë: “Eje hi lai. Ngo eö palahi memine la itre trejin ka egöcatr, tune la atre thupëne la ekalesia. Ngo hetre itre xane fe ngöne la ekalesia ka aja ixatua, tune la itre ka xötrei xomi bapataiso, itre ka lapa pe hi, me itre ka kucakuca. Angatre fe a ajane troa porotrik maine ce xeni pena.”

Ketre eamo lai ka xatua ni catr. Hna ketri la hning hnene la etrune la ihnimi nyidrë kowe la itre mamoe i Iehova. E cili, hnenge hna ipië me trongëne la eamo hna hamën. Eni a olene koi Iehova ke, hnei Nyidrëti hna aijijëne la itre trejin troa xatua ni.

Ame lo 1969 me 1973, hna upi ni troa xomiujine la huliwa ne kuci xen ngöne la itre Asabele Katru e Colombes (Paris). Ame lo 1973, hna upi huni troa kuci xen kowe la 60 000 lao trejin ka sine la faifi lao drai ne asabele. E cili, hnenge hna hnehengazo.  Ngo hna xatua ni la Ite Edomë 15:22 ka hape, troa ce huliwa me itre ka macaj. Hnenge hna sipo ixatua kowe la itre trejin ka maca, tune la itre ka xötre mitr, itre ka salemë xen, itre ka kuci xen me itre ka itö. Lolo la aqane ce huliwa hun.

Ame fe lo 1973, hna hë ni me Angèle troa huliwa ngöne la Bethela e Faras. Ame la hnëqang, tre, troa iupi fë itusi e Cameroun, ketre nöj hna wathebone qaane lo 1970 koi 1993. Tha ka hmaloi kö la huliwa cili, matre hnenge hna hnehengazo, nge öhne hi hnene la trejin ka elemekene la huliwa. Hnei nyidrëti hna ithuecatre koi ni me hape: “Nyipiewekë catr kowe la itre trejin e Cameroun la göxen qaathei Iehova, matre loi e troa thua i angatr.” E cili, hne huni hna canga iupi fë la itre itus.

Hnenge hna anyimua tro kowe la itre nöj ezin e Cameroun, matre troa wang la itre qatre thup. Itre trejin ka inamacan me ka catr angatr. Hnei angatr hna xatua ni troa thele jë ne troa iupi fë la itre itus kowe la itre trejin e Cameroun. Hnei Iehova hna amanathithine la huliwa ke, traqa koi 20 lao macatre ne iupi fë huni la itre itus, tune la Ita Ne Thup me Le service du Royaume.

Ame lo eni a nyiqane iatre me Angèle, eni a öhne la itre thiina ka lolo i angeic. Nge mama hnyawa la itre thiina cili thupene la nyio a faipoipo. Ame lo jidri thupene la faipoipo, hnei angeic hna upi ni troa thithi koi Iehova me qaja la aja i nyio troa catre huliwa koi Nyidrë. Nge hnei Iehova hna kapa la aja i nyio.

Hnei Angèle hna xatua ni troa catre mejiune koi Iehova. Ame lo 1973, hna hë nyio troa huliwa ngöne la Bethela. Eni a luelu ke,  eni a ajane troa huliwa ngöne la sirkoskripsio. Ngo öni Angèle ka hape, hnei nyio hna nue la mele i nyio koi Iehova, matre nyipiewekë troa kapa la ihë ne la organizasio i Nyidrë. (Heb. 13:17) E cili, hnei nyio hna tro kowe la Bethela. Lolo la mele ne trefëne i nyio ke, ka inamacan me atreine waiewekë hnyawa Angèle. Ketre, tru la ihnimi angeice koi Iehova matre lolo la aqane imelekeu i nyio me aqane axecië mekun.

Ngacama nyio a uti ipië trootro, ngo hnei Angèle palahi hna xatua ni. Pine laka, kola qene Papale ngöne la itre Ini Thatraqane La Huliwa i Akötresie, matre hnei nyio hna thele troa inine la qene hlapa cili. Hnei nyio hna sine la ketre ekalesia ka qene Papale, ngacama ase hë nyio sasaithe la 70 lao macatre. Pine laka ketre atrene la filial ni, matre tru la huliwang nge pëkö ijine tro ni a inine la ketre qene hlapa. Ame pe, hna xatua ni hnei Angèle. Traqa ha enehila koi 80 nge hetre munën lao macatre i nyio, ngo nyio palahi a hnëkëne la itre icasikeu ngöne la qene Papale me qene Wiwi. Ketre, nyio a icasikeu me cainöj memine la ekalesia i nyio. Eje hi, hnei Iehova hna amanathithine la itre trengecatre i nyio troa qene Papale.

Atraqatr la madrine i nyio lo 2017 ke, hna könë nyio troa sine la Ini Thatraqane La Itre Atre Ne La Komite Ne Filial Me Itre Föi Angatr e Patterson (Neweyok).

Iehova la Atre Ini Ka Tru. (Is. 30:20) Qatre ju hë maine nekötrahmany me neköjajiny, ngo Iehova a inine hnyawa la itre hlue i Nyidrë. (Deu. 4:5-8) Hnenge hna öhne laka, e tro la itre nekötrahmany me neköjajiny a drengethenge Iehova me itre trejin ka macaj, tro ha lolo la aqane axecië mekune i angatr. Tune la hna qaja ngöne Ite Edomë 9:9: “Ininejë la ate ka inamacan, nge tro pala kö angeic’ a inamacan; ininejë la ate ka meköt, nge tro angeic’ a inamacane trotro.”

Ame itre xaa ijin, eni a mekun lo jidr eni hune la itre wetr e Algérie laka, 60 hë lao macatre enehila. Tha mekune kö ni laka, tro ni a hane mele madrin. Nyimutre la itre ini hnenge hna xom qaathei itre xan! Jëne la ixatua i Iehova, lolo me madrin la meleng me Angèle. Nyio palahi a ajane troa atrepengöi Iehova hnyawa, me thele ixatua thene la itre trejin ka macaj, ka ihnim, nge ka catre nyihlue i Nyidrë.