1-2. Nemene la itre jol hna cile kow hnene la itre hlue i Iehova?

 HNEI Paulo aposetolo hna ithuecatr koi Timoteo me itre xaa Keresiano troa catre cainöj. (2 Tim. 4:5) Celë hi matre, easa ajane troa kuca la hne së hna atreine troa catre nyihlue i Akötresie. Ngo tha ka hmaloi kö e itre xaa ijin. Celë hi lai ka traqa kowe la itre xaa trejin. (2 Tim. 4:2) Pane mekune jë së la itre trejin ka mel ngöne la itre nöj hna wathebone la huliwa ne cainöj. Angatr palahi a cainöj ngacama atre hi angatr laka, troa akalabusi angatr!

² Ame itre xaa ijin, kola kucakuca hnene la itre hlue i Iehova ke, nyimutre la itre jol hnei angatr hna cile kow. Angatr a catre huliwa thatraqane la fami angatr. Maine jë, angatr a ajane troa cainöj atrun, ngo pëhë trengecatre i angatr e pune wiik. Ame itre xan, hna tithi angatr hnei mec nge angatr a uti ipië trootro. Ame pena itre xan, angatr a lapa umë ngöne la itre hnalapa i angatr. Nge itre xan a mekun laka, tha ka nyipiewekë kö angatr. Celë hi lai hna melën hnei Mary * ketre trejin e Moyen-Orient. Öni angeic: “Eni a kucakuca ke, tru la itre mekun ka ngazo. Kolo fe a huliwa la mekuthetheung. Pëhë traemeng me trengecatreng troa cainöj.”

3. Nemene la hne së hna troa ce wang?

³ Ijije hi tro Iehova a thue trengecatre së troa xomihnine la nöjei pengöne jol, me xatua së troa catre nyihlue i Nyidrë. Tro sa ce wang la aqane thue trengecatre i Paulo me Timoteo hnei Iehova, troa catre cainöj ngöne la itre jol. Thupene lai, tro sa ce wang la aqane xatua së enehila hnei Iehova.

4. Nemene la itre jol hna cile kow hnei Paulo?

⁴ Nyimutre la itre jol hna cile kow hnei Paulo aposetolo. Hna lepi nyidrë me tranyi nyidrëti hnei etë me akalabusi nyidrë. (2 Kor. 11:23-25) Hnei nyidrëti hna kucakuca pine la itre mekun ka ngazo. (Rom. 7:18, 19, 24) Ketre, “hetre ka ithinyi ngöne la ngönetrei nyidrë,” nge aja i nyidrë tro Akötresie a xometrij ej.—2 Kor. 12:7, 8.

5. Nemene la hna kuca hnei Paulo ngacama nyimutre la itre jol?

⁵ Hnei Iehova hna thue trengecatr koi Paulo troa cainöj ngöne la itre jol. Ngacama hna umë Paulo ngöne la ketre uma e Roma, ngo hnei nyidrëti hna cilëgöline la maca ka loi qëmekene la itretre Iudra me itre ka huliwa i mus. (Itre hu. 28:17; Fil. 4:21, 22) Hnei Paulo fe hna cainöj kowe la itretre thup ne la joxu i angetre Roma, me itre ka traqa troa wai nyidrë. (Itre hu. 28:30, 31; Fil. 1:13) Ketre, hnei Paulo hna cinyianyi tus thatraqane la itre Keresiano ekö me easë fe enehila. Hnene la tulu i Paulo hna thue trengecatr kowe la ekalesia ne Roma, matre “tha xou i angatre fe hë troa catre cainöjëne la trengewekë i Akötresie.” (Fil. 1:14) Ngacama hna nyi ifegone hi la hna atreine kuca hnei Paulo, ngo hnei nyidrëti hna catre nyihlue i Iehova, me “ixatua kowe la huliwa ne tro fë maca ka loi.”—Fil. 1:12.

6. Thenge la 2 Korinito 12:9, 10, nemene la ka xatua Paulo troa catre cainöj?

⁶ Atre hi Paulo laka, tha hnene kö la sipu trengecatre i nyidrë matre nyidrëti a catre cainöj. Ngo hnene la trengecatre qaathei Iehova. Öni Paulo ka hape, hnene la mene i Akötresie matre “pexeje la mene i nyidrë ngöne la kucakuca.” (E jë la 2 Korinito 12:9, 10.) Jëne la uati hmitrötre i Iehova, hnei Paulo hna catre cainöj ngacama hna qanangazo nyidrë me akalabusi nyidrë.

7. Nemene la itre jol hna cile kow hnei Timoteo?

⁷ Ngacama ketre nekötrahmanyi Timoteo, ngo hnei angeice fe hna sipo ixatua koi Iehova göne la huliwa ne cainöj. Hnei Timoteo hna ce tro me Paulo ngöne la huliwa ne mesinare. Nge hnei Paulo hna  upi Timoteo troa wang la itre ekalesia me ithuecatre koi angatr. (1 Kor. 4:17) Ame itre xaa ijin, Timoteo a mekun laka, thatreine kö angeic troa eatrëne la hnëqa cili. Ngo öni Paulo: “The nue ketre kö troa wangaconyi eö pine hi laka, thöth eö.” (1 Tim. 4:12) Ketre, hetre ka ithinyi fe ngöne la ngönetrei Timoteo, ene la “itre sine meci ka traqa lapa.” (1 Tim. 5:23) Ame pe, xecie koi Timoteo laka, jëne la ixatua ne la uati hmitrötr, tro hë angeic a catre cainöj me huliwa kowe la itre trejin.—2 Tim. 1:7.

8. Nemene la hnei Iehova hna hnëkën matre troa thue trengecatr kowe la itre hlue i Nyidrëti enehila?

⁸ Ame enehila, Iehova a hamëne la “men atraqatr” kowe la itre hlue i Nyidrë, matre tro palahi angatr a catre nyihlue i Nyidrë. (2 Kor. 4:7) Tro sa ce wang la foa lao ewekë hna hnëkën hnei Iehova, matre thue trengecatre së me xatua së troa mele nyipici. Kola qaja la thith, la Tusi Hmitrötr, la itre trejin memine la huliwa ne cainöj.

9. Nemene la aqane xatua së hnene la thith?

⁹ Kola thue trengecatr jëne la thith. Ame ngöne Efeso 6:18, hnei Paulo hna ithuecatre koi së troa thith “ngöne la nöjei ijin.” Xecie koi së laka, tro Iehova a aegöcatrenyi së. Celë hi lai hna melën hnei Jonnie, ketre trejin e Bolivie. Hna tithi hnei mec la kem me thine i Jonnie me föe i angeic, nge tha ka hmaloi kö koi angeic troa thupë angatr alakön. Thupene lai, hna meci la thine i Jonnie, nge hmiitre troa nyinyine la meci ne la föe i angeic me keme i angeic. Öni Jonnie: “Hace me jole la meleng, ngo hna xatua ni hnene la thith.” Eje hi, hnei Iehova hna thue trengecatre koi Jonnie troa xomihnine la itre jol. Ame pena Ronald, ketre qatre thup e Bolivi ke, hna tithi hnei mec la thine i angeic, nge ketre meci ka pë nyin. Caa treu thupen, eahlo a mec. Nemene la ka xatua Ronald? Öni angeic: “Hnenge hna fe la hning koi Iehova ngöne la thith. Xecie koi ni laka, atrepengö ni hnyawa hi hnei Nyidrë.” Eje hi, ame la kola traqa itrai la itre jol, thatre kö së la nyine troa qaja ngöne la thith. Ame pe, Iehova a ithuecatre koi së troa catre thith ngöne la easa akötr.—Rom. 8:26, 27.

10. Thenge la Heberu 4:12, pine nemene matre nyipiewekë troa e me lapa mekun la Tusi Hmitrötr?

¹⁰ Kola thue trengecatr jëne la Tusi Hmitrötr. Tui Paulo, ijije fe tro la Tusi Hmitrötr a thue trengecatre koi së me akeukawanyi së. (Rom. 15:4) Loi e tro sa e me lapa mekun la Tusi Hmitrötr. Jëne la uati hmitrötr, tro Iehova a xatua së troa öhne la itre xötr ka ihmeku memine la jol hne së hna melën. (E jë la Heberu 4:12.) Öni Ronald: “Eloine pe, eni a e Tusi Hmitrötr e nöjei hej. Eni fe a lapa mekun la itre thiina i Iehova, memine la aqane thupëne Nyidrë la itre hlue i Nyidrë. Celë hi ka thue trengecatreng.”

11. Nemene la aqane xatuane la ketre trejine föe hnei Tusi Hmitrötr?

¹¹ Maine tro sa lapa mekun la Trengewekë i Akötresie, tro hë lai a xatua së troa atreine waiewekë hnyawa ngöne la itre jol. Celë hi ka traqa kowe la ketre trejine föe ngöne la kola meci la föi eahlo. Hnene la ketre qatre thup hna ithuecatr koi eahlo troa e la tusi Iobu. E cili, hnei eahlo hna xöjetriji Iobu me hape:  “Iobu, ngazo catre la aqane waiewekë i ö!” Ngo eahlo a trotrohnin e thupen laka, caasi hi la aqane waiewekë i nyidro. Celë hi ka xatua eahlo troa saze aqane mekun, me xomihnine la itre akötr.

12. Tune kaa la aqane thue trengecatre së hnei Iehova jëne la itre trejin?

¹² Kola thue trengecatr jëne la itre trejin. Celë hi lai ketre ixatua qaathei Iehova. Hnei Paulo hna cinyihane la aja i nyidrë troa cememine la itre trejin matre “troa itö ithuecatrekeu.” (Rom. 1:11, 12) Hanawang la hna qaja hnei Mary. Öni angeic: “Iehova a thue trengecatre koi ni jëne la itre trejin. Ngacama thatre kö angatr la itre hnenge hna melën, ngo angatr a cinyanyi koi ni ngöne la nyipi ijin. Eni fe a porotrik memine la itre xaa trejine föe ka melën la itre jol ka traqa koi ni. Ketre, eni a madrin ngöne la itre qatre thup a qaja ka hape, ka nyipiewekë eni e hnine la ekalesia.”

13. Tune kaa la aqane tro sa thue trengecatre koi itre xan ngöne la hna icasikeu?

¹³ Ijije hi tro sa itö ithuecatre ngöne la itre ijine icasikeu. Eje hi, loi e tro sa qaja aloine la itre trejin me qaja amamane koi angatr la ihnimi së. Celë hi lai hna kuca hnei Peter, ketre qatre thup, qëmekene troa nyiqane la itre icasikeu. Öni angeic kowe la ketre thine ka hetrune caasine la itre nekö i eahlo: “Madrine catre ni troa öhnyi nyipo ngöne la hna icasikeu. Eni a madrin troa öhne la sikisi lao nekö i nyipo ka heetre hnyawa me hane qeje mekun.” E cili, hnei eahlo hna treij koi Peter me hape: “Oleti la hna wangatrunyi ni.”

14. Tune kaa la aqane xatua së hnene la huliwa ne cainöj?

¹⁴ Kola thue trengecatr jëne la huliwa ne cainöj. Ame la easa qaja koi itre xan la itre nyipici qa hnine la Tusi Hmitrötr, kola thue trengecatr koi së ngacama tha kepe së kö hnei angatr. (Ite edomë 11:25) Hane hi la hna melën hnei Stacy. Hleuhleu me akötr la mele i Stacy ngöne la kola upetröneë la ketre sinee i eahlo. Öni Stacy: ‘Maine ju tro ni a kuca la ketre ewekë matre troa xatua angeic.’ Ngo nemene la ka xatua Stacy? Hnene la huliwa ne cainöj! Eahlo a pane mekun la itre atr me thele la aqane troa xatua angatr. Öni Stacy: “Jëne la ixatua i Iehova, hnenge hna ini tus memine la ketre jajinyi ka canga trongëne la ini tus. Hnene la huliwa ne cainöj hna thue trengecatr koi ni ngöne la itre ijine jol.”

15. Nemene la ini hne së hna xom qa ngöne la hna melën hnei Mary?

¹⁵ Itre xaa trejine fe a kucakuca me hnehengazo ke, tha tru kö la hnei angatr hna kuca ngöne la huliwa ne cainöj. Maine easë fe a hane mekun tun, tha tro pi kö sa thëthëhmine laka, madrine catre Iehova ngöne la easa kuca la hne së hna atrein. Hane hi la hna melën hnei Mary. Hnei angeic hna fek kowe la ketre nöj ka qaja la ketre qene hlapa. Ame lo xötrei, hnei angeic hna mekun laka, tha ka nyipiewekë kö la hnei angeic hna kuca. Öni angeic: “Ame hi la hnenge hna atrein, tre, troa hamën la ketre mekun ka co, maine e la caa xötr, maine hamëne la ketre tarak.” Ame koi angeic, co hi la hnei angeic hna kuca hune la itre ka qaja hnyawa la qene hlapa. Ngo hnei angeic hna saze aqane waiewekë. Trotrohnine hë angeic laka, sisitria catre koi Iehova la itre hnei angeic hna kuca ngöne la hna cainöj. Öni angeic: “Ka lualai la  itre nyipici qa hnine la Tusi Hmitrötr, nge ijije hi troa saze la mele ne la itre atr.”

16. Nemene la ka troa xatuane la itre hna umën ngöne la itre hnalapa?

¹⁶ Ngacama easa umë ngöne la hnalapa së, ngo madrine catre Iehova ngöne la easa nue trengecatr troa cainöj. Nyidrëti a xatua së troa cainöj kowe la itre ka nyinyin la itre sine meci së, me itre xaa ka huliwa ngöne pital. Eje hi, maine tro sa mekun lo itre hne së hna kuca ekö, tro hë sa kucakuca me akötr. Tha tro pi kö sa thëthëhmine laka, Iehova la Atre Xatua së. E cili, tro hë sa madrin me atreine xomihnine la nöjei akötr.

17. Thenge la Ate Cainöj 11:6, pine nemene matre loi e tro sa catre cainöj ngacama tha canga mama kö la thangane la huliwa së?

¹⁷ Nyipici laka, easa jume la itre itine nyipici e kuhu hni ne la itre atr, ngo thatre kö së la itre ka troa cia. (E jë la Ate Cainöj 11:6.) Hane hi la ka traqa koi Barbara, ketre trejine föe ka 80 lao macatre, nge ka majemine cainöj jëne telefon me cinyanyi tus. Hnei eahlo hna cinyanyi tus me ce iupi fë memine la Ita Ne Thup ne 1 Maac 2014. Hetrenyi lo tane mekun hna hape, “Ce que Dieu a fait pour vous.” Thatre kö eahlo laka, lue trefën hna upetröneë la ka kapa la tusi eahlo. Hnei nyidroti hna alua e lai zonal. Ame kowe la trahmany, Iehova a ithanata meköti koi nyidrë. Thupene la 27 lao macatre, hnei nyidroti hna bëek koi Iehova. Drei la madrin ka tru koi Barbara troa öhne la thangane la hnei eahlo hna catre cainöj!

18. Nemene la aqane thue trengecatre së hnei Iehova?

¹⁸ Nyimutre la itre aqane thue trengecatre së hnei Iehova. Nyidrëti a xatua së jëne la thith, me Tusi Hmitrötr, me itre trejin, memine la huliwa ne cainöj. Eje hi, Iehova a hnimi së nge aja i Nyidrëti troa xatua së. Celë hi matre loi e tro sa huliwane la foa lao ewekë celë. Ketre, catre jë së lapa qale koi Iehova ke, Nyidrëti a madrin “troa xomexatuane la ite ka meköti hni koi Nyidrë.”—2 A. l. ite jo. 16:9.