1. Nemene la ka mama ngöne la itre huliwa i Akötresie qaane lo qaan?

KA CASI pala hi Iehova me Iesu qaan ekö. Iesu lo pane hna xupe hnei Iehova. Thupene lai, hnei Iesu hna ce huliwa me Nyidrë matre tro pë hë a xupe la nöjei ewekë asë. (Ite Edomë 8:30) Ketre tune mina fe, hnene la itre hlue i Iehova hna ce huliwa matre troa eatrëne la hnëqa hna ahnithe koi angatr. Hnei Noa me hnepe lapa i angeic hna ce huliwa matre troa cane la aka. Ame hë e thupen, hnene la angetre Isaraela hna ce kuca la ketre uma maano ka hmaloi hi troa fej, me ajöne trongëne ngöne la nöjei götrane jë i angatr. Ame pë hë ngöne la ēnē, angatr a ce nyima me elo miuzik göi troa atrunyi Iehova. Hnene laka, itre ka ce huliwa la itre hlue i Iehova, celë hi ka aijijë angatr troa kuca la nöjei ewekë cili.—Genese 6:14-16, 22; Numera 4:4-32; 1 Aqane lapa ite Joxu 25:1-8.

2. (a) Nemene la ewekë ka mama thene la itre pane keresiano ekö? (b) Nemene la itre mekun nyine tro sa ce ithanatan?

² Hnene fe lo itre pane Keresiano ekö hna hane ce huliwa.  Öni Paulo, maine nyipici laka, isa hetre hnei angatr hna atreine kuca me itre götrane qa i angatr, ngo itre ka casi angatr. Angatre asë hi a xötrethenge Iesu Keriso, Tane i angatr. Hnei Paulo hna aceitunë angatr me ca ngönetrei ka nyimu igötranen nge kola ce huliwa asë. (E jë la 1 Korinito 12:4-6, 12.) Ngo tune kaa fe së enehila? Nemene la aqane tro sa ce huliwa ngöne la hna cainöje trootro, e hnine la ekalesia me e hnine la hnepe lapa?

3. Nemene la hna meköle goeëne hnei Ioane?

³ Hnei Ioane aposetolo ekö hna meköle goeëne la 7 lao angela, angatr a ufi trutru. Ame la kola ufi trutru hnene la hnaafaifine angela, Ioane a öhne e cili la “kete wëtesiji [a] mala qa hnengödrai kowe la fen.” Hnene lai wëtresij hna xome la ca kii matre troa fe la hnaope ka thatrehmekun, nge gaa melöhlem. Hna pane lö pi la haje ka tru qa hnine la hnaop, ame hna xulu pi la nöjei sipa qa ngöne la haj. Tha hnene kö la itre sipa hna angazone la itre sinöe me feja, ngo hnei angatre pe hna lepe la itre ka “tha hetenyi kö la hnapelehatene i Akötesie hune la nöjei göpadi angat.” (Hna Amamane 9:1-4) Tha sihngödri kö koi Ioane la etrune la ngazo hna atreine kuca hnene la iume sipa, tune lo ewekë ka traqa e Aigupito lo hneijine i Mose. (Esodo 10:12-15) Ame la itre sipa hna goeëne hnei Ioane, tre, kola qajaqaja la itre keresiano hna iën, itre ka cainöjëne la maca ne hnëjin göi hmi ka thoi. Nge itre milio la itre xa keresiano, itre ka mejiune troa mel e celë fen a ce huliwa me angatr. Hnene la huliwa cili hna aijijëne la ka ala nyimu troa trotrije la hmi ka thoi, me thepe angatr qa ngöne la musi Satana.

4. Nemene la huliwa ka tru nyine troa eatrëne hnene la itre hlue i Iehova enehila? Nemene la ka troa aijijë angatre troa traqa kow?

⁴ Qa së troa cainöjëne la “maca ka loi” kowe la nöjei atr e cailo fen qëmekene troa traqa la pun. Ketre huliwa lai ka tru catr! (Mataio 24:14; 28:19, 20) Nyipi ewekë tro sa könëne la nöjei “ate pi iji” troa iji la “timi [ne] mel.” Kola hape, tro sa tro fë kowe la nöjei atr ka ajan la itre nyipici qa hnine la Tusi Hmitrötr. (Hna Amamane 22:17) Ngo tro së lai a traqa kow, e hne së hna ce huliwa e hnine la ekalesia tune la ketre ngönetrei hna “itratraunekeune hnyawa.”—Efeso 4:16.

5, 6. Nemene la itre huliwa hne së hna ce kuca?

⁵ Maine easa ajane troa ketr la ka ala nyim, nyipi ewekë tro sa atreine ce huliwa ngöne la hna cainöje trootro. Hetre ixatua hne së hna kapa jëne la ekalesia göi troa eatrëne la huliwa së. Thupene la icasikeu së göi cainöje trootro, easa ha isa ije troa ce thawa la maca ka loi me itre atr. Easë fe a tro fë koi angatr la itre itusi së ka qeje pengöne la Tusi Hmitrötr; itre milio la itre itusi së hna tro fë e cailo fen. Nge hetre itre ijin kola  upi së troa cainöj atrun. Ame la easë a hane cainöj trootro, easë hi lai a ce huliwa me casi memine la itre milio lao trejin e cailo fen ka cainöjëne fe la maca ka cas! Easë fe hi lai a ce huliwa memine la itre angela, ite ka xatuane la itre hlue i Iehova troa cainöjëne la maca ka loi.—Hna Amamane 14:6.

⁶ Nyine haine la itre thangane la hna cainöj e cailo fen, kola mama lai ngöne la itus, Annuaire. Pane mekune jë fe la aqane casi së e cailo fen, la easa könëne la itre atr kowe la itre asabele së. Ame e cili, casi hi la itre ithuemacanyi hne së hna kapa. Kola xatua së jëne la itre cainöj, me itre hna elon, me itre iamacany, troa hamëne koi Iehova la ka sisitria. Kolo fe a mama la aqane casi së me itre trejine e cailo fen, la easa sine la Drai Ne Amekunën e nöjei macatre. (1 Korinito 11:23-26) Ame ngöne lai drai cili, 14 Nisan thupene la kola lö la jö, easa ce icasikeu troa amamane la hni ne ole së kowe la hnei Iehova hna kuca thatraqai së. Ka tru koi së la drai cili, matre easë fe a itronyi la ijine cili ke easë a trongëne lo hna ahnithe hnei Iesu. Nge ame lo itre wiik qëmekene la drai cili, easa ce huliwa troa könëne la ka ala nyimu troa hane ce sine me easë la drai cili.

7. Nemene la thangane la hna ce huliwa?

⁷ Tha tru kö la ngazo hna troa kuca hnene hi la ca sipa. Ketre tu së mina fe, thatreine kö troa cainöje kowe la nöjei atr asë hnene hi la ala cas. Ngo hnene laka itre ka ce huliwa së, ene pe, tha jole kö koi së troa qeje Iehova kowe la itre milio lao atr, me aijijë angatr troa hane atrunyi Nyidrë.

8, 9. (a) Hnei Paulo hna amamane tune kaa la enyipiewekëne la troa cas? (b) Nemene la aqane tro sa ce huliwa e hnine la ekalesia?

⁸ Hnei Paulo hna amamane kowe la angetre Efeso la aqane eköthe la ekalesia, me qaja la enyipiewekëne kowe la nöjei atrene la ekalesia troa isa ‘kökötre ngöne la nöjei ewekë asë koi Keriso.’ (E jë la Efeso 4:15, 16.) Hnei Paulo hna xome la ngönetrei göi troa amamane la ixatua hna troa hamëne hnene la itre keresiano, angatr isa ala cas, matre tro pala hi la ekalesia a casi me xötrethenge Iesu, Tane la ekalesia. Öni angeic, kola ce huliwa la nöjei igötranene la ngönetrei “hnene la nöjei enone itön’ asë, thenge la huliwa ngöne la tulu.” Haawe, maine ketre thöth epuni maine ka tru hë, ka egöcatr maine ka sine wezipo pena, nemene la nyine tro epuni a kuca?

⁹ Hnei Iesu hna acile la itre qatre thup matre troa elemekene la ekalesia, nge aja i nyidrë tro sa metrötrë angatr, me drengethenge la itre hna amekötin hnei angatr. (Heberu 13:7, 17) Tha ka hmaloi kö, ngo loi e tro sa sipo ixatua koi Iehova. Tro la uati hmitrötre i Nyidrë a xatua së troa drengethenge la nöjei hna amekötine hne së hna kapa qaathene la itre qatre thup. Nge the qaja kö la etrune la ixatua së kowe la ekalesia, e hne së  hna ipië me ce huliwa memine la itre qatre thup. Eje hi laka, tro ha casi la ekalesia nge tro fe lai a acatrene catrëne la ihnimikeu së.

10. Nemene la hna kuca hnene la itre drikona matre tro pala hi a casi la ekalesia? (Wange ju la pane iatr.)

¹⁰ Tru la huliwa hna kuca hnene la itre drikona matre tro pala hi a casi la ekalesia. Angatre a xatuane la itre qatre thup matre easa olene koi angatr asë. Itre drikona a thupëne matre tro pala hi a hetre itusi nyine tro fë ngöne la hna cainöje trootro. Angatre fe a ikep ngöne la hna icasikeu. Ketre, angatre a nyihnyawane me nyidrawane la Uma Ne Baselaia. E tro sa ce huliwa me angatr, tro së lai a casi me ce huliwa me Iehova thenge la hna amekötin.—Wange ju fe la Ite Huliwa 6:3-6.

11. Nemene la aqane tro la thupëtresij me thöthi a ixatua e hnine la ekalesia?

¹¹ Hetre itre qatre thup ka catre huliwa e hnine la ekalesia koi nyimu macatre hë enehila. Qatre hë angatr matre tha kuca ha angatre la itre huliwa hna majemine kuca ekö. Loi e troa hnëkëne me inine la xötre ka co matre tro angatr a ixatua e hnine la ekalesia, me xome la itre xa hnëqa. Ketre, e hna catre ixatua hnene la itre drikona, tro angatr elanyi lai a hane xome la hnëqa ne qatre thup. (1 Timoteo 3:1, 10) Ame la itre xa qatre thup ka thupëtresije petre kö, tre, hnei angatre hna huliwa catr, matre ijiji angatre fe hë troa hane wange trongëne la itre ekalesia me xatuane la itre trejin. Tru la madrine së la kola thele hnene la itre thupëtresij me thöth troa ce huliwa memine la itre trejin.—E jë la Salamo 110:3; Ate Cainöj 12:1.

12, 13. Nemene la aqane tro la lue trefën a ce huliwa?

¹² Nemene la aqane tro la lue trefën a ce huliwa? Troa kuca la Hmi Hnepe Lapa e nöjei wiik hnene la itre atren asë la hnepe lapa. Tro lai a aijijë angatr troa atrepengö i Iehova hnyawa, me acatrene la ihnimikeu i angatr. Ame ngöne la ijine cili, angatre a amacane la nyine troa qaja ngöne la hna cainöje trootro, matre tha tro kö a jole koi angatr troa ithanata. Ketre, ame la angatre a drenge la aqane trotrohnine la nyipici hnei ketre, me goeëne la aqane isa hnimi Iehova me pi amadrinë Nyidrë, kolo hi lai a acatrene la aqane imelekeu i angatr.

¹³ Aja i Iehova fe tro la trahmanyi me föe a ce huliwa. (Mataio 19:6) E hna hnimi Iehova me ce nyihlue i Nyidrë, tro ha mele madrine me casi hnei nyidro hnine la faipoipo. Loi e tro fe nyidroti a isa amamane la ihnimi ketre koi ketre, tune lo hna kuca hnei Aberahama me Sara, Isaaka me Rebeka, Elekana me Hana. (Genese 26:8; 1 Samuela 1:5, 8; 1 Peteru 3:5, 6) E tro la trahmanyi me föe a ujë tune lai, tro nyidroti lai a cas, nge tro fe lai a aeasenyi nyidroti catre koi Iehova.—E jë la Ate Cainöj 4:12.

14. Maine epuni a nyihlue i Iehova cas, nemene la nyine tro epuni a kuca göi troa acatrene la faipoipo i epun?

 ¹⁴ Tusi Hmitrötr a qaja hnyawane ka hape, loi e tro sa faipoipo memine la ketre hlue i Iehova. (2 Korinito 6:14) Ngo, hetre itre trejin ka faipoipo memine la ketre atr ka tha nyihlue i Iehova kö. Ame itre xan, hnei angatre pë hë hna atre la nyipici nge faipoipo hë angatr, matre tha hane fe kö ce hmi me angatre hnene la föi angatr. Nge, ame itre xa hlue i Iehova, tre, ka faipoipo hë angatr, ngo hnene la föi angatr hna nue Iehova. Ame ngöne la itre hna melëne asë celë, hnene la itre keresiano hna isine troa acatrene pala hi la faipoipo i angatr, jëne la hna trongëne la itre eamo qa hnine la Tusi Hmitrötr. Eje hi laka, tha ka hmaloi kö. Mary me David föi angeic, la lue trefën ka ce nyihlue i Iehova. Ame hë e thupen, tha sine hë David la itre icasikeu. Ngo, hnei Mary pala hi hna thele troa eatrëne la hnëqa i angeic ngöne la hnepe lapa i angeic, me melëne la itre thiina ka lolo. Hnei angeic fe hna xatuane la sikis lao nekö i angeic troa atrepengöi Iehova, me tro lapa koi itre hna icasikeu me itre hna asabele. Itre macatre hë e thupen, tru hë la itre nekönatre nge isa tro hë angatr, nge Mary pala hi a nyihlue i Iehova ngacama tha ka hmaloi kö. Ngo ame hë e thupen, hnei David hna nyiqaane e la itre zonal hnei Mary hna majemine amë pe. Kola tro la itre drai nge David hmaca ha a hane traqa kowe la hna icasikeu. Tro pala hi la neköi api David ka sikis lao macatre a hnëkëne amë la icea i nyidrë. Nge e tha traqa kö David, nekönatr a hape, “Paapaa, tru la hnenge hna meku nyipë enehila ngöne la hna icasikeu.” Ame hnei David hna bëeke hmaca koi Iehova thupene la 25 lao macatre, matre tru la madrine i lue trefën troa ce nyihlue i Iehova hmaca.

15. Tro la itre trefën ka qatre hë a xatuane tune kaa la itre xötre ka co?

¹⁵ Tru la hnei Satana hna akötrëne la itre hnepe lapa enehila. Celë hi matre,  nyipi ewekë tro la lue trefën ka nyihlue i Iehova a ce huliwa. Ngacama ka hekö hë epon faipoipo, ngo pane mekune ju la nyine tro epon a qaja me kuca göi troa acatrene la faipoipo i epon. Maine lue trefën epon ka qatre hë, tro epon lai a amamai tulu ka loi kowe la itre xötre ka co. Maine jë, tro epon a könëne la lue trefën ka co troa hane sine la hmi hnepe lapa i epon. Tro nyidroti lai a öhne laka, ngacama ka hekö hë faipoipo la lue trefën, ngo nyipi ewekë pala hi troa isa amamane la ihnimi ketre koi ketre me troa cas.—Tito 2:3-7.

16, 17. Nemene la hna lapa treqene hnene la itre hlue i Iehova enehila?

¹⁶ Ame lo angetre Isaraela ekö a tro kowe la itre pui ne xen e Ierusalema, hnei angatre hna majemine ce huliwa. Angatr a hnëkën asë la nöjei ewekë hna ajane thatraqane la tronge i angatr. Nge, angatre pë hë a ce trongëne jë la itre gojenyi me itö ixatua. Ame hë ngöne la ēnē, angatr asë a ce atrunyi Iehova. (Luka 2:41-44) Easë enehila a troa lö kowe la fen ka hnyipixe, matre nyipi ewekë tro sa casi me catre ce huliwa. Hane kö epuni mekune la aqane tro epuni a thele troa casi me ce huliwa enehila?

¹⁷ Nyimu kepine matre kola gomegome me ihmöhnyinyi la itre atr e celë fen, goi isi fe angatr. Matre, easa olene koi Iehova laka, hnei Nyidrë hna xatua së troa hetrenyi la tingeting me hane atre la nyipici! Kola ce huliwa koi Iehova hnene la itre hlue i Nyidrë e cailo fen, thenge la aja i Nyidrë. Matre, ame ngöne la itre ijine ka akötre celë, itre hlue i Iehova a thele troa acatrene catrëne hmaca kö la casi thei angatr. Tune lo hna perofetane hë hnei Isaia me Mika, easa ce elë kowe “la wete i Iehova.” (Isaia 2:2-4; E jë la Mika 4:2-4.) Drei la madrine së elanyi la kola ce nyihlue i Iehova hnene la nöjei atr e celë fen, tune la ketre ngönetrei hna “itratraunekeune hnyawa”!