1, 2. (a) Pine nemene matre ketre mekune ka tru la troa xomi bapataiso? (b) Nemene la köni ewekë ka troa ej e kuhu hni eö qëmekene troa xomi bapataiso, nge pine nemen?

MAINE eö hi la ketre thöth ka ajane troa xomi bapataiso, celë hi ketre manathithi ka tru catre lai koi eö. Tune la hne së hna ce wange hë ngöne la tane mekune ka ase hë, ame la troa xomi bapataiso, tre, tha ewekë nyine tro kö a wang acon. Celë hi ka amamane kowe la nöjei atr ka hape, ase hë eö sa xepu koi Iehova me sisinyi troa mele nyipici koi Nyidrë epine palua. Nge hnei eö fe hna qaja ka hape, tro pë hë a tro pa la aja i Nyidrëti ngöne la mele i eö. Tha ketre mekune kö nyine troa wang acon la troa xomi bapataiso. Haawe, loi e ej e kuhu hni eö la köni ewekë celë e mekune jë eö troa xomi bapataiso: Tro eö a pane macaj, nge loi e sipu aja i eö kö, nge loi e tro eö a trotrohnine hnyawa la aliene la kola sa xepu koi Iehova.

² Ngo ame koi eö, tha ijiji eö pala kö troa xomi bapataiso. Maine pena eö hë a mekun troa xomi bapataiso, ngo ame koi kaka me nenë, loi e pane tru jë eö nge hetre hnei eö hna melën. Nemene  jë la nyine tro eö a kuca? The cile kö! Catre pi pe eö xome la ijine cili me huliwa catr matre ijiji eö jë troa xomi bapataiso. Pane thele jë troa huliwane la köni götrane celë: (1) itre ini hnei eö hna mejiune kow, (2) aqane mele i eö, nge (3) hni ne ole i eö.

3, 4. Nemene la ini nyine troa xom hnene la itre thöth qa ngöne la tulu i Timoteo?

³ Pane waipengöne jë la itre ini hnei eö hna lapaune kow, jëne la itre hnyinge celë: “Ka xecie kö koi ni laka, hetre Akötresie? Pine nemene matre xecie koi ni laka, qaathei Akötresieti la Tusi Hmitrötr? Pine nemene matre eni a trongëne la itre hnei Akötresieti hna qaja hune la troa xötrethenge la itre thiina ne fen? Tro la itre hnyinge celë a aijijë eö troa trongëne la eamo i Paulo aposetolo, kola hape, nyipi ewekë tro eö a pane ‘sipu atre la aja i Akötresie ka loi, me nyine amadrin, me ka meköt.’ (Roma 12:2) Pine nemene matre tro eö a sipu atre la aja i Akötresie?

⁴ Tro la tulu i Timoteo a amamane la enyipiewekëne lai. Atre hnyawa hi angeic la hna qaja ngöne la Itre Hna Cinyihan, ke tru jë hi angeic a inin ej qaathene la thin me qaaqa i angeic. Nge ketre, hnei Paulo hna thuecatre koi angeic ka hape: “Cile huti ju eö ngöne la nöjei ewekë hna ini’ö me hna kapa hnei ’ö.” (2 Timoteo 3:14, 15) Ame la qene Heleni la hna hape “kapa,” tre kola hape, “xecie e kuhu hni ne la atr laka, ka nyipici la ketre mekun.” Haawe, xecie hnyawa e kuhu hni Timoteo ka hape, nyipici hi la hna qaja ngöne la Itre Hna Cinyihan. Tha hnei angeic kö hna kapa la itre ini cili ke, qaathei thin me qaaqa hmunë, ngo hnene pe laka, hnei angeic hna ketre waipengöne hnyawa itre ej matre kapa jë angeic.—E jë la Heberu 5:14.

5, 6. Pine nemene matre loi e tro eö a majemine ‘huliwane la mekune me hni eö’?

⁵ Tune kaa fe eö? Maine hna hetru eö ngöne la nyipici, loi e tro fe eö a thele troa mekune hnyawa la itre kepin matre eö a kapa la itre ini qaathei Akötresie. Tro lai a acatrene la lapaune i eö nge tha tro kö eö a nue la itre sinee i eö, maine aqane wai ewekë i fen, maine itre sipu aja i eö pena, troa musinë eö me xomi mekune menu.

⁶ Maine ka majemine hë eö ‘huliwane la mekun me hni eö,’ tro hë eö lai a atreine sa la itre hnying ka tune la: ‘Nemene la ka anyipicine ka hape, hetre Akötresie? Nge maine Akötresie ka ihnimi Nyidrë, hnauëne kö laka, Nyidrëti a nue la itre ewekë ka ngazo troa traqa? Nemene la ka anyipicine koi eö laka, pëkö qaane nge pëkö pune i Akötresie?’ E ka hnëkë hnyawa eö, tha tro pi kö la itre hnyinge celë a aciane thei eö la luelu, ngo tro pe itre ej a aciane thei eö la aja troa inine catrëne la Tusi Hmitrötr.

7-9. Qaja jë la aqane troa xatua eö hnene la itre fiches, “qu’enseigne réellement la bible?”

⁷ Maine tro eö a sipu inine hnyawane la Tusi Hmitrötr, tro hë eö lai a atreine sa la itre hnying ka tune e caha hun, me apatrene la itre hnepe ewekë hnei eö pala kö hna lueluën. Ketre, tro fe lai a acatrene catrëne la mejiune i eö kowe la itre ini hnei eö hna kapa ha.  (Ite Huliwa 17:11) Nyimutre la itre ixatua hna hnëkëne thatraqai eö ngöne la itre itusi së. Ala nyimu la itre hna xatuane hnene la boroshür, Cinq questions à se poser sur l’origine de la vie, me hnene la itus, Y a-t-il un Créateur qui se soucie de vous ? Ketre, ala nyimu fe la itre thöthi hna xatuan hnene la itre fiches hna hape, “Qu’enseigne réellement la Bible ?” Hna amë la itre fiches celë ngöne la sit jw.org qene Wiwi, ngöne la hna hape, LA BIBLE ET VOUS. Hna hnëkëne hnyawane la itre fiches matre troa acatrene la mejiune i eö kowe la itre ini qa hnine la Tusi Hmitrötr.

⁸ Eje hi laka, hetre itre hnying e cili hnei eö hna atreine canga sa, pine laka, ekö hë eö inine la Tusi Hmitrötr, ngo hapeu, xecie hnyawa kö koi eö ka hape nyipici lai? Tro la itre fiches celë a upi eö troa waipengöne hnyawa la itre xa xötre ne la Tusi Hmitrötr, me upi eö fe troa fejane la itre kepin matre eö a lapaune kow. Tro lai a xatua eö troa atreine qejepengöne hnyawa koi itre xan la hnei eö hna lapaune kow. Maine hetre ëternet i eö, ijiji eö hi troa xome la itre fiches celë, matre tro eö a ketre sipu inine la Tusi Hmitrötr. Celë hi lai ka troa acatrene la lapaune i eö kowe la itre ini hnei eö hna kapa.

⁹ Nyipi ewekë tro eö a ketre sipu waipengöne la itre hnei eö hna lapaune kow. Aqane tro hi eö lai a hnëkë kowe la bapataiso. Önine la ketre thöth hna bapataisone hë: “Qëmekene tro ni a xomi bapataiso, hnenge hna pane inine la Tusi Hmitrötr, matre xecie jë hi koi ni ka hape, nyipi hmi hi lai. Nge kola tro la itre drai, nge kolo pala hi a acatrene catrëne la mekunang.”

10. Pine nemene matre loi e tro la atr ka ajane troa xomi bapataiso a hane huliwa thenge la lapaune i angeic?

¹⁰ Öni Tusi Hmitrötr göne la lapaun: “E tha ce eje kö me ite huliwa, te, meci hë ej, ke eje cas.” (Iakobo 2:17) Maine ka catre la lapaune i eö, tro ha mama jëne la itre huliwa i eö. Tro ha mama laka, hetrenyi thei eö la hna qaja hnei Tusi Hmitrötr ka hape, “thina ka hmitöte me thina ka ijiji Akötesie.” —E jë la 2 Peteru 3:11.

11. Nemene la aliene la kola hape, troa “thina ka hmitötr”?

 ¹¹ Maine aja i eö troa “thina ka hmitötr,” loi e troa pë ethane la aqane mele i eö. Tro lai a mama tune kaa? Pane mekune jë lo itre itupathi ka traqa koi eö ngöne lo 6 lao treu ka ase hë. Hapeu, hnei eö kö e cili hna wangatrehmekune la loi qa ngöne la ngazo? (Heberu 5:14) Mekune pala kö eö la ketre ijin eö a cile catr ngöne la kola tupathi eö, maine kola uku eö pena troa kuca la ngazo? Tune kaa ngöne la hna ini, eö kö a amamai tulu ka loi koi itre xan? Eö kö a isine troa mele nyipici koi Iehova, maine eö pena a ixomi thiina wanga nyimasai eö jë? (1 Peteru 4:3, 4) Nyipici laka, pëkö atr ka pexej. Matre ame itre xa ijin, kolo fe a hane hmahma me xou troa cainöj hnene la itre xa hlue i Iehova, ngacama ka hekö hë angatr nyihlue i Nyidrë. Ngo ame la atr ka sa xepu koi Iehova me xomi bapataiso, loi e tro pala hi angeic a madrine troa anyipici Iehova. Nge loi e tro fe angeic a amamane lai, jëne la aqane ujë i angeic ka pë ethan.

12. Nemene la aliene la kola hape, “thina ka ijiji Akötesie”? Tune kaa la aqane tro eö a goeëne lai?

¹² Nemene la aliene la kola hape, “thina ka ijiji Akötesie”? Kola qaja la itre huliwa hna kuca hnene la ekalesia, tune la troa sine la itre icasikeu me cainöje trootro. Ngo kolo fe a qaja la troa thithi koi Iehova me ini Tusi cas. Ame la atr ka mele koi Iehova, tha angeice kö a mekune laka, ketre ehnefe la troa kuca la itre huliwa cili. Angeice pe a mekune tui Davita Joxu, lo kola hape: “Akötesingöti fe, madine ni troa kuca la aja i cilie, nge e kuhu hninge la wathebo i cilie.”—Salamo 40:8.

13, 14. Nemene la ka troa xatua eö troa hetrenyi la “thina ka ijiji Akötesie”? Qaja jë la itre hna melën.

¹³ Hetre itre hnyinge nyine tro eö a pane mekune hnyawa, nge loi e tro eö a cinyihane la itre mekune i eö ka sa la itre hnyinge cili. Tro lai a xatua eö troa eköthe amë la itre hnei eö hna mekune troa eatrën. Hanawange la itre hnying: “Ame la eö a thith, eö kö a qaja hnyawane koi Iehova la ka ej e kuhu hni eö? Nge mama kö jëne la itre thithi eö la etrune la ihnimi eö koi Iehova?” “Nemene la itre ini hnei eö hna wange hmaca ngöne la eö a ini Tusi cas?” “Eö kö a hane cainöje trootro ngacama tha hane kö sine la huliwa cili hnene la keme me thine i eö?” Loi e tro fe eö a cinyihane la itre hnei eö hna ajane troa eatrën thatraqai eö kö göi thith, me ini Tusi cas, me cainöj trootro.

¹⁴ Ala nyimu la itre thöth ka bapataiso hë nge ka öhne laka, ixatua ka tru koi angatr la kola cinyihane la itre aja i angatre nyine troa eatrën. Öni Tilda ketre thöth: “Hnenge hna majemine cinyihane la itre ajang nyine troa eatrën. Hnenge hna thele troa eatrën trongëne itre ej, nge celë hi lai ka aijijë ni troa xomi bapataiso lo macatre hnapan.” Ceitune hi lai memine la hna melëne hnei Patrick, öni angeic: “Atre hë ni la itre huliwa hnenge hna pi kuca koi Akötresie, ngo ame la eni a sija itre ej, tre kösë kola uku ni catr troa eatrëne la itre mekune cili.”

15. Pine nemene matre troa isa sipu axeciëne la troa sa xepu?

¹⁵ Drei la ketre hnying hna amë hnine la itre fiches, kola hape: “Tro pala kö eö elanyi a  nyihlue i Iehova e traqa ju trotriji Nyidrë hnei kakati me nenë, maine ketre sinee i eö pena?” The thëthëhmine kö laka, ame la eö a sa xepu koi Iehova me xomi bapataiso, ketre sinee i Iehova ha eö. Matre, ame la hnei eö hna mekune troa kuca koi Iehova, ke tha thenge kö la mekuna i keme me thin maine ketre atre pena. Matre, e hetrenyi thei eö la “thina ka hmitöte” me “thina ka ijiji Akötesie,” eö hi lai a amamane ka hape, ka xecie hnyawa koi eö laka nyipici hi la, nge aja i eö troa mele thenge la itre hna amekötin hnei Iehova. Maine aqane ujë i eö hi lai, tre, tha hmitre pe kö matre bapataiso eö jë!

16, 17. (a) Nemene la kepin matre tro la ketre atr a xomi bapataiso? (b) Pine nemene matre tro eö a wangatrune la thupene mel? Qaja jë la ketre ceitun.

¹⁶ Hnene la ketre atre inine la wathebo hna hnyingë Iesu ka hape: “E ka la wathebo ka tru ne la nöjei wathebo?” Öni Iesu e sa: “Tro eö a aja Joxu Akötesi ’ö hnene la hni’ö ka pexej, me u i ’ö ka pexej, me mekune i ’ö ka pexej.” (Mataio 22:35-37) Iesu hi lai a amamane laka, ihnimi hi la kepin matre tro ketre atr a hane xomi bapataiso. Ame la ewekë ka troa acatrene catrëne la ihnimi së koi Iehova tre, ene la troa mekune hnyawa la thupene mel, ahnahna  ka sisitria qaathei Akötresie. (E jë la 2 Korinito 5:14, 15; 1 Ioane 4:9, 19.) Maine tro eö a kuca tune lai, tro eö lai a pi amamane la hni ne ole i eö kowe la ahnahna ka tru cili. Kolo lai a hapeu?

¹⁷ Pane mekune jë laka, eö a nyiqaane nunucil, nge ketre atr a traqa troa ajë eö. Tro kö eö a bëeke koi hnalapa me nango saa ju, me thëthëhmine la hna kuca koi eö? Ohea! Eje hi laka, tro pala pë eö lai a hetre hni ne ole kowe lai atre cili, ke hnei angeice hna amele eö! Ketre tune mina fe, nyipi ewekë tro sa hetre hni ne ole koi Iehova me Iesu, ke ase hë nyidroti hamëne la thupene mel. Mele hë së hnei nyidro, ke hnei nyidroti hna thepe së qa ngöne la ngazo me mec. Hnene la ihnimi nyidroti koi së, matre hetrenyi mina fe hë së la mejiune troa mele epine palua ngöne la Paradraiso e celë fen!

18, 19. (a) Pine nemene matre tha tro pi kö eö a cile hnö troa nyihlue i Iehova? (b) Hnei nemene matre jëne mele madrine la tro eö a nyihlue i Iehova?

¹⁸ Hapeu, hetre hni ne ole i eö kö pine la nöjei lolo qaathei Iehova? Maine eje hi, mekune ka lolo catr la troa sa xepu me xomi bapataiso. Ame la eö a sa xepu koi Iehova, eö hi lai a sisinyi troa kuca la aja i Nyidrë epine palua. Hapeu, eö kö a cile hnö ke eö a xou wanga tha nyipici ju eö kowe la hna sisiny? The xou kö! Atre kö Nyidrëti la nyine loi koi eö, nge tro kö Nyidrëti lai a amanathithine la itre ka kuca la aja i Nyidrë. (Heberu 11:6) Haawe, ame la eö a sa xepu koi Iehova me xomi bapataiso, tre tha kolo kö lai a hape, tro ha pë madrine la mele i eö. Kolo jë petre hi lai ka hape, lolo catre jë! Celë hi hna melëne hnene la ketre thupëtresij ka 24 lao macatre, nge ka xomi bapataiso lo thöthi petre kö angeic. Öni angeic, “Maine nyipici laka eni petre hi a trotrohnine hnyawa la aliene la troa sa xepu me xomi bapataiso, ngo tha ka gufa kö la mekun hnenge hna xome ekö, ke hnene eje hna thupë ni qa ngöne la troa nyenyape thele la itre aja ne fen.”

¹⁹ Iehova a ajane tro eö a mele madrin. Nge ame Satana, ka imethinë angeic, nge pëkö ca ihnimi angeice koi eö. Ketre, thatreine kö angeice hamëne la itre ewekë ka lolo kowe la itre ka xötrethenge angeic. Nga tro angeic a hamëne tune kaa la ka loi, nge pë pe thei angeic? Pë fe kö ca maca ka loi qaathei Satana, nge pë fe kö mele ka ijije koi angeic elany. Matre, meci hi la hnei angeic hna atreine troa hamën, ke celë hi lai pune hna hnëkëne thatraqai angeic!—Hna Amamane 20:10.

20. Nemene la nyine tro eö a kuca matre ijiji eö jë troa sa xepu me xomi bapataiso? (Wange ju la itre mekune hna eköhagen, “Ixatua Thatraqai Eö.”)

²⁰ Ame la tro eö a sa xepu koi Iehova me xomi bapataiso, tre, celë hi mekun ka sisitria lai nyine tro eö a xom. Hapeu, ijiji eö hë? Maine eje hi, the cile hnö kö troa sisinyi koi Iehova. Ngo, maine ame koi eö, loi e troa pane itreqe, the mano kö eö huliwane la itre ixatua hne së hna ce wange ngöne la tane mekune celë. Catre pi pe eö! Hna hane fe thuecatrene la angetre Filipi hnei Paulo, ke nyipi ewekë tro pala hi angatr a catre huliwa koi Iehova. (Filipi 3:16) Haawe, maine tro eö a catre trongëne hnyawa la hna qaja e celë, canga tro hi eö lai a sa xepu me xomi bapataiso.