1, 2. (a) Nemene la eisapengönene la hna mejiune kow hne së me itre xa atr? (b) Nemene la hne së hna troa ce ithanatane ngöne la tane mekune celë?

NYIMUTRE la itre manathith hnei Iehova hna hnëkëne thatraqai së, nge nyine tro sa mejiune kow. Hnei Nyidrëti hna axeciëne troa ahmitrötrëne la ëje i Nyidrë, me aejëne la aja i Nyidrë e koho hnengödrai me e celë fen. (Mataio 6:​9, 10) Itre ewekë lai ka sisitria nyine tro sa ajane catrën. Hnei Iehova fe hna axeciëne troa amanathithi së jëne la mel ka tha ase palua kö, e hnengödrai maine e celë fen. Ketre manathithi lai ka tru koi së elany! (Ioane 10:16; 2 Peteru 3:​13) Matre, tha luelue kö së laka tro Iehova a eatrongëne pala hi me xatuane la nöje i Nyidrë ngöne la itre drai tixenuë celë.

² Öni Tusi Hmitrötr, ame la lapaun, tre, “kola lapa qale” kowe la hne së hna mejiune kow. Kolo lai a hape, ka xecie hnyawa kowe la itre ka lapaun ka hape, troa eatre la nöjei ewekë hnei Iehova hna thingehnaean. (Heberu 11:1) Ame pena ha la itre ewekë hna mejiune kow hnene la itre atr enehila, tre, tha nyipi mama kö koi angatr ka hape, tro itre eje lai a eatr. Kola tune la atr ka mejiune troa kapa la mani hna elo loteri, ngo tha nyipi mama kö koi angeic troa uthe la nyipi numero. Ame ngöne la tane mekune celë, tro sa wange la nyine tro sa kuca matre troa acatrene la lapaune së kowe la itre hna thingehnaeane hnei Akötresie. Tro fe sa ce ithanatane la aqane troa xatua së hnene la hna lapaune enehila.

3. Pine nemene matre ka xecie koi së ka hape, troa eatre la itre hna thingehnaeane hnei Akötresie?

³ Tha hna hnaho së kö memine la lapaun. Matre, loi e tro sa thele jëne matre tro la uati hmitrötr a ketr la hni së me xatua së. (Galatia 5:​22) Uati hmitrötr la ka xatua së troa atrepengöi Iehova. Ame hë la easa trotrohnine ka hape, ka tru menen Nyidrë nge ka inamacan, easë fe hë lai a mejiune kowe la atreine i Nyidrë troa eatrëne asë la nöjei ewekë hnei Nyidrëti hna thingehnaean. Nge Iehova fe kö a qaja itre ej ceitu me itre ewekë ka eatre hë, öni Nyidrë: “Ase hë kuca.” (E jë Hna Amamane 21:​3-6.) Tha luelue kö së laka, ka aejëne pala hi Iehova la itre hnei Nyidrëti hna thingehnaean. “Akötesie ka nyipici” Nyidrë. Celë hi matre, easa mejiune kowe la nöjei ewekë asë hnei Nyidrëti hna qaja koi së göne la itre drai elany.​—Deuteronomi 7:9.

4. Nemene la hna lapaune kow hnene la itre hlue i Akötresie ekö?

⁴ Kola mama ngöne Heberu mekene 11 la ëjene la 16 lao trahmany me föe ka catre lapaune kowe la itre hna thingehnaeane hnei Iehova. Kolo fe a qaja la itre xane ju kö hna kapa hnei Iehova “hnene la lapaun” thei angatr. (Heberu 11:39) Hnei angatr asë hna treqene la ‘matran,’ lo hna thingehnaean hnei Iehova. Ka xecie hnyawa koi angatr ka hape, tro la ‘matrane’ cili a lepe apatrene asë la itre ithupëjia me Akötresie, me aparadraisone hmaca la ihnadro. (Genese 3:​15) Nge ketre, tha luelue kö angatr laka, tro Iehova a amele angatre hmaca. Tha angatre kö a mejiune troa mel e hnengödrai, ke, tha ase petre kö Iesu fe gojenyine lai. (Galatia 3:​16) Angatre pe a mejiune troa mele palua e celë fen, ngöne la paradraiso ka mingöming.​—Salamo 37:11; Isaia 26:19; Hosea 13:14.

5, 6. Nemene la hna trengeneune hnei Aberahama me hnepe lapa i angeic? Nemene la hna kuca hnei angatr matre tro pala hi a catre la lapaune i angatr? (Wange ju la pane iatr.)

⁵ Öni Heberu 11:13 göne la itre hlue i Iehova cili: “Meci asë hë angate lai ngöne la lapaun, nge tha hetenyi kö la ite hna thinge hnaean, ngo angat’ a goeën’ it’ eje nge nanyi pete kö, me kapa madin.” Angatr ekö a trengeneune la fene ka hnyipixe, me mekune la mele i angatr e cili. Aberahama la ketre e angatr. Öni Iesu, “aciacinë hë [maine, madrine atraqatr] Aberahama . . . troa goeëne” la ijine cili. (Ioane 8:​56) Hnei Sara fe, me Isaaka, me Iakobo, me itre xane ju kö hna trengeneune la ijin tro la Baselaia a mus hune la fen asë. Nge “ame la ate acile [la Baselaia] me huliwan, te, Akötesie.”​—Heberu 11:​8-​11.

⁶ Nemene la hna kuca hnei Aberahama me hnepe lapa i angeic matre tro pala hi a catre la lapaune i angatr? Hnei angatre pala hi hna thele troa atrepengöi Iehova. Ame itre xa ijin, Akötresieti a ithanata koi angatr jëne la itre angela, maine jëne la hna iamamany, maine jëne la itre ewekë hna meköle goeën. Hnei angatre fe hna xomi ini qaathene la itre xa hlue i Iehova ka tro pa hui angatr, memine fe la itre hna cinyihane hë ekö. Tha thëthëhmine kö Aberahama me hnepe lapa i angeic la itre hna thingehnaeane hnei Akötresie, matre angatr pala hi a wange atrun itre ej. Ame la thangane lai, xecie hnyawa koi angatr laka, tro kö Iehova a aeatrëne la itre hnei Nyidrëti hna thingehnaean. Celë hi la ka xatua angatre troa mele nyipici koi Nyidrë ngacama traqa ju hë koi angatr la itre jol, me iakötrë.

7. Nemene la itre ewekë ka aijijë së troa acatrene la lapaune së, nge nemene la nyine tro sa kuca?

⁷ Nemene la itre ewekë ka aijijë së troa acatrene la lapaune së? Hne së hna kapa qaathei Iehova la Tusi Hmitrötr matre troa amamane koi së la itre hnei Nyidrëti hna thingehnaeane göi elany. Nyidrëti e cili fe a amamane la nyine tro sa kuca matre tro sa mele madrin. Celë hi matre, loi e tro sa e la Tusi Hmitrötr o drai, me trongëne la hnene ej hna qaja. (Salamo 1:​1-3; e jë la Ite Huliwa 17:11.) Hne së fe hna kapa qaathei Iehova la “xen . . . ngöne la nyipi ijin” jëne la “hlue ka nyipici me ka inamacan.” (Mataio 24:45) Tune la itre hlue i Akötresie ekö, nyipi ewekë tro pala hi sa thele troa atrepengöne hnyawa la itre hna thingehnaeane hnei Akötresie, me lapa mekune itre ej. Celë hi aqane tro së lai a mele nyipici koi Iehova, me trengeneune pala hi la ijine tro la Baselaia i Nyidrë a mus e cailo fen asë.

8. Nemene la aqane tro la thith a acatrene la lapaune së?

⁸ Nemene la ketre ewekë hna kuca hnene la itre hlue i Iehova ekö matre tro pala hi a catre la lapaune i angatr? Hnei angatre hna sipo ixatua thei Iehova jëne la thith. Matre, ame la angatr a öhne la aqane sa i Nyidrë la itre thithi angatr, kola acatrene catrëne la lapaune i angatr. (Nehemia 1:​4, 11; Salamo 34:​4, 15, 17; Daniela 9:​19-​21) Ketre tune mina fe, ame la easa öhne laka, Iehova a drenge la itre thithi së, me hamë së la hne së hna ajan ngöne la nyipi ijin, kola acatrene catrëne la lapaune së koi Nyidrë. (E jë la 1 Ioane 5:​14, 15.) Ketre, nyipi ewekë tro sa catre “sipone” koi Iehova la uati hmitrötre i Nyidrë matre troa akökötrene the së la lapaun.​—Luka 11:​9, 13.

9. Nemene la itre xa ewekë nyine tro sa thithi fë?

⁹ Ame ngöne la easa thith, tha loi kö e troa sipo Nyidrëti hmekuje hi la ewekë hne së hna ajan. Ngo, loi e tro fe sa ole koi Nyidrë, me atrunyi Nyidrë o drai, ke qaathei Nyidrëti la nöjei ewekë ka lolo! (Salamo 40:5) Easë fe a thithi sane la itre trejine me easë e cailo fen, ene “la ite hna oth,” kola qaja la itre hna akalabusin. Nge easë fe a thithi sane la itre ka elemeken la huliwa. Ame la easa öhne la aqane sa Iehova la itre thithi së, kola acatrene catrëne la lapaune së, nge easa easenyi catre koi Nyidrë.​—Heberu 13:​3, 7.

10. Nemene la ka xatuane la ka ala nyimu troa catre mele nyipici koi Akötresie?

¹⁰ Öni Paulo ngöne Heberu mekene 11, ka hape: “Hnei ite föe hna kapa la ite meci angate hna amelene hmaca ; nge hna axösisin’ ite xan, tha kolo kö a kapa la troa amelen ; mate hetenyi angate la mele hmaca ka sisitia.” ­(Heberu 11:35) Ala nyimu la itre ka cile catr ngöne la itre itupath, me mele nyipici koi Akötresie ke, ka catre la lapaune i angatr kowe la mele hmaca hna thingehnaean hnei Nyidrë. Xecie hnyawa koi angatr laka, ame ngöne la itre drai elany, tro Iehova a amele angatr hmaca, nge tro angatr a mel epine palua e celë fen. Pane mekune ju la pengöi Nabotha me Zakaria, hna tran ameci nyidro pine nyidroti nyipici pala hi koi Akötresie. (1 Ite joxu 21:​3, 15; 2 Aqane lapa ite joxu 24:​20, 21) Ame Daniela, hna kuië angeic nyipine la itre liona ka mecijin, nge hna kuiëne la itre sinee i angeic ngöne la hna dreufao hna acatrehnine catrën. Ame koi angatr, ketre ka loi kö la tro angatr a mec hune la troa nuetriji Iehova. Tha luelue kö angatr laka, tro kö Iehova a nue koi angatr la uati hmitrötre i Nyidrë matre tro angatr a cile hut ngöne la itre iakötrë celë.​—Daniela 3:​16-​18, 20, 28; 6:​13, 16, 21-​23; Heberu 11:​33, 34.

11. Nemene la itre itupath hna cile kow hnene la itre perofeta ekö?

¹¹ Ala nyimu la itre perofeta ekö tui Mika me Ieremia hna hnyima fë maine hna akalabusin. Ame itre xan, tui Elia, hnei angatre hna trongëne “la ite hnapapa, me ite wet, me ite ngönemeny, me ite hnauji ne la fene hnengödrai.” Hnei angatr asë hi hna cile catr ngöne la itre itupath me mele nyipici koi Iehova ke, angatr a “lapa qale kowe la nöjei ewekë hna mejiune kow.”​—Heberu 11:​1, 36-​38; 1 Ite joxu 18:13; 22:​24-​27; Ieremia 20:​1, 2; 28:​10, 11; 32:2.

12. Drei la tulu ka sisitria nyine tro sa xötrethenge? Nemene la ka xatua nyidrë troa cile catre ngöne la itre itupath?

¹² Iesu Keriso la ka cile catr ngöne la ketre itupathi ka tru catre hmaca kö, nge ka mele nyipici koi Iehova. Nemene la ka xatua nyidrë troa cile hut? Öni Paulo göi Iesu: “Hnene la madrine hna amë qëmeke i nyidrë, ame hnei nyidrëti hna xomihnine la sinöe ne iaxösisi, me methinëne la hmahma. Matre, hnei nyidrëti hna lapa ngöne la götrane maca ne la therone i Akötesie.” (Heberu 12:​2, MN ) Paulo a xatuane jë la itre keresiano troa ‘mekune’ catrëne la tulu i Iesu. (E jë la Heberu 12:3.) Tui Iesu, ala nyimu la itre pane keresiano ekö ka mec pine angatr nyipici koi Iehova, Anetipa la ketre. (Hna Amamane 2:​13) Hetrenyi hë la itre keresiano cili, itre hna iën, la edrö i angatr. Thupene hë la hna acili joxu Iesu lo 1914, hna amele angatr hmaca kowe la mel e hnengödrai, matre troa ce musi me nyidrë kowe la fen, nge tha tro hmaca kö angatr a mec. (Hna Amamane 20:4) Ngo ame lo itre hlue i Akötresie ka mel qëmekene la hneijine i angatr tre, itre ka mejiune angatr troa mel e celë fen.​—Heberu 11:35

13, 14. Nemene la itre itupath hnei Rudolf Graichen hna cile kow, nge nemene la ka xatua angeic troa mele nyipici koi Akötresie?

¹³ Itre milio lao hlue i Akötresie a xötrethenge la tulu i Iesu. Angatr a mekune catrëne la itre hna thingehnaean hnei Akötresie me mele nyipici koi Nyidrë ngöne la itre itupath. Rudolf Graichen la ketre e angatr; hna hnaho angeic e Alema lo macatre 1925. Ame lo angeic a nekönatr, hnene la keme me thine i angeic hna afedren amamane la itre iatr, nge ka amamane la itre hna melën e hnine la Tusi Hmitrötr. Öni angeic: “Ame la ketre iatr, kola mama la luko (kuli wael ka ihej) memine la neköi mamoe, me nekönatr memine la lepad (kösë ibus ka tru, nge ka ihej), me neköi kau memine la liona​—angatr asë hi a mele tingeting, nge nekönatr la ka elemeken la tronge i nyudren.” (Isaia 11:​6-9) Celë hi ka xatua Rudolf troa mekune catrëne la Paradraiso e celë fen, me acatrene la lapaune i angeic kowe lai. Ame hnei angeic hna mele nyipici koi Iehova, ngacama hna akötrë angeic koi nyimu macatre hnene la itre Nazi, nge thupene lai hnene la itre communiste ne Alema (götrane kohië).

¹⁴ Nyimutre la itre itupath hnei Rudolf hna cile kow. Hna tithe la thine i angeic hnene la ketre mec (typhus) ngöne la uma ne iaxösisi uti hë la mec eahlo. Nge ame keme i angeic, hnei nyidrë hna sija la pepa kola hape, tha atre Anyipici Iehova hmaca kö nyidrë. Ngo ka catr pala hi la lapaune i Rudolf. Ame hë la kola lö qa hnine la kalabus, angeic a xome la huliwa ne atre thupëne la sirkoskripsio. Thupene lai, hna hë angeic troa hane sine la Ini Ne Gileada, ame hna upi angeic jë a tro Chili. Nge e cili, angeic pala hi a xome la huliwa ne atre thupëne la sirkoskripsio. Angeic a faipoipo jë me Patsy, ketre mesinare. Ngo ca macatre thupene lai, kola meci la nekö i nyidro, medreng. Nge tha qea ju kö thupene lai, kolo fe hi a meci hnei Patsy; nge 43 petre hi lao macatre i angeic. Ngacama kola traqa koi Rudolf la itre itupathi celë, ngo hnei angeic pala hi hna nyihlue i Iehova. Qatre hë nyidrë me kucakuca, ngo ka pionie lapa nyidrë me qatre thup. Kola mama la mele i nyidrë ngöne la Ita Ne Thup ne 1 Ogas 1997, götrane 20-​25. ^[1] (Wange ju la ithuemacanyi e kuhu pun.)

15. Qaja jë la itre hna melëne enehila hnene la itre trejin.

¹⁵ Ala nyimu la itre trejin enehila ka madrine ngöne la huliwa i Iehova ngacama kola akötrë angatr. Ame itre xan e angatr tre, hna akalabusin e Érythrée, Singapour, me Corée du Sud, ke xele kö angatr ma “xome la taua.” (Mataio 26:52) Traqa koi 20 lao macatre ne akalabusi Isaac, Negede, me Paulos e Érythrée. Hna qanangazo angatr e cili. Ame ngöne la itre macatre cili, tha hane pë hë angatr faipoipo, nge tha hane pë hë angatr thupëne la itre keme me thine i angatr. Ngo, hnei angatr pala hi hna nyipici koi Iehova, nge ka catre pala hi la lapaune i angatr. Goi metrötrë angatr fe enehila hnene la itre ka thup ngöne la kalabus. Kola mama la ifoto i angatr ngöne la sit së jw.org. Angatr a hnyimahnyima, ngacama angatr a mele ngöne la akötr.

16. Nemene la hna kuca hnene la itre trejin qa ngöne la hna catre lapaun?

¹⁶ Xalaithe hi la itre hlue i Iehova hna akalabusine me qanangazone tune la itre trejin celë. Ngo ala nyimu la itre ka mel ngöne la akötr ke, itre ka puafala angatr, maine hna traqa la hulö koi angatr, maine ga isi la nöje i angatr. Ame itre xan, hnei angatr hna xötrethenge la tulu i Aberahama, Isaaka, Iakobo, me Mose. Hnei angatr hna nue pe la itre mo i angatr, me hnëqa i angatr ngöne la nöj matre troa huliwa i Akötresie. Nemene la ka xatuane la itre trejin troa nyihlue i Iehova cememine la madrin? Hnene la ihnimi angatr koi Iehova, me lapaune ka catre i angatr kowe la itre hnei Nyidrëti hna thingehnaean. Tha luelu kö angatr laka, tro kö Nyidrëti a nyijune kowe la itre ka ­nyihlue nyipici koi Nyidrë. Tro Nyidrëti a aijijë angatr troa mele epine palua ngöne la fen ka hnyipixe, nge ame e cili, patre hë la thiina ka tha meköti kö.​—E jë la Salamo 37:​5, 7, 9, 29.

17. Nemene la nyine tro sa kuca matre tro pala hi a catre la lapaune së, nge nemene la hne së hna troa ithanatane ngöne la tane mekune ka troa xulu?

¹⁷ Hne së hna ithanatane ngöne la tane mekune celë laka, ame la lapaune tre, kola “lapa qale kowe la nöjei ewekë hna mejiune kow.” E ajane së troa hetrenyi la lapaune cili, nyipi ewekë tro sa thithi koi Iehova me lapa mekune la itre hnei Nyidrëti hna thingehnaean. Tro hë së e cili a atreine cile catr ngöne la nöjei itupath ka traqa koi së. Tro la tane mekune ka troa xulu a ithanatane la itre xa ithuemacanyi göne la lapaun.