1. Nemene la hne së hna kapa qaathei Iehova?

ALA NYIMU la itre atr ka pë lapaun. (2 Thesalonika 3:2) Ngo Iehova a hamëne la lapaune kowe la itre ka nyihlue i Nyidrë. (Roma 12:3; Galatia 5:22) Tru la ole së koi Iehova la hne së hna kapa qaathei Nyidrë la lapaun!

2, 3. (a) Nemene la thangane koi së la hne së hna lapaun? (b) Nemene la itre mekune nyine tro sa ce wang enehila?

² Hnei Iehova hna nue Iesu, la nekö hnimë i Nyidrë matre tro la itre atr a lapaun koi Iesu, me aijijë Iehova troa seng la itre ngazo i angatr. Matre ijiji angatre hë troa hane nyi sinee i Iehova, me hetrenyi la mele ka tha ase palua kö. (Ioane 6:​44, 65; Roma 6:23) Mama hnyawa hi la ihnimi Iehova koi së! Ngacama itre atr ka tha pexeje kö së, nge itre ka hnëjin, ngo hnei Iehova hna öhne the së la itre ewekë ka loi. (Salamo 103:10) Hnei Nyidrëti hna aijiji së troa atre la maca ka loi göi Iesu memine la huuje i nyidrë. Ame hë la easa lapaune koi Iesu me xötrethenge nyidrë, easë hë lai a hane mejiune kowe la mele ka tha ase palua kö!​—E jë la 1 Ioane 4:9, 10.

³ Nemene la itre xa nyine tro sa atre göi lapaun? Nyipici laka, atre hë së la hnei Akötresie hna kuca koi së memine la hnei Nyidrë hna troa kuca koi së elany. Ngo hapeu, kolo kö lai a hape, ka lapaune hë së? Tro sa ce wang la itre xa nyine troa kuca.

4. Nemene la thangane la lapaune koi së?

⁴ Nyipici laka, easa lapaune koi Iehova me Iesu, ke atre hë së la hnei nyidroti hna kuca memine la hnei nyidro hna troa kuca elanyi thatraqai së. Ngo hetrenyi fe the së la aja ka catr troa mel thenge la hna ini së hnei nyidro. Ketre, tru la aja së troa xatuane la itre atr troa atre nyidro. Öni Paulo aposetolo: “Maine tro eö a qeje Iesu Joxu hnene la ukeineqe i ’ö, me lapaune e kuhu hni’ö, laka hnei Akötesieti hna amele nyidëti hmaca jë qa hna mec, hawe, tro hë eö a mel. Hni la ka upi së troa lapaune matre hetrenyi la thiina ka ­meköt, nge ukeineqë la atre qaja matre hetrenyi la mel.”​—Roma 10:9, 10, MN; 2 Korinito 4:13.

5. Pine nemene matre ka nyipi ewekë catr la troa lapaun? Nemene la nyine tro sa kuca matre tro pala hi a catre la lapaune së? Qaja jë la ketre ceitun.

⁵ Eje hi laka, e aja së troa mele palua ngöne la fen ka hnyipixe i Akötresie, nyipi ewekë tro sa lapaun me acatrene ej pala hi. Ceitune hi la lapaune memine la ketre feja. Loi e tro pala hi a fi lai feja matre tro ej a cia hnyawa me kökötre lolo. Ngo e tha fi lapane kö së, tro hë eje lai a fitr uti hë la mec. Ketre tune mina fe, nyipi ewekë tro sa thupëne hnyawa matre tro pala hi a “pë ethane” la lapaune së, nge tro pala hi ej a “cia,” maine kökötre lolo.​—Tito 2:2; 2 Thesalonika 1:3; Luka 22:32; Heberu 3:12.

6. Nemene la lue aqane qejepengöne Heberu 11:1 la lapaun?

⁶ Tusi Hmitrötr a qaja la aliene la lapaune ngöne Heberu 11:1 (E jë.) (1) “Ame la lapaun, te, kola lapa qale kowe la nöjei ewekë hna mejiune kow.” Ame la itre ewekë hne së “hna mejiune kow,” tre kola qaja fe la itre hna thingehnaean hnei Akötresie göne la itre drai elany. Easa mejiune laka, troa hetrenyi elanyi la fen ka hnyipixe, nge patre hë la iangazo. (2) Ame la lapaune tre, “nyine anyipicine la nöjei ewekë ka tha hna goeëne kö.” Ngacama tha öhnyi Iehova kö së, me Iesu Keriso, me itre angela, ngo ka xecie hnyawa koi së ka hape, angatr e koho hnengödrai, ketre tune mina fe la Baselaia. (Heberu 11:3) Nemene la aqane tro sa amamane ka hape, easa lapaune kowe la itre hna thingehnaean hnei Akötresie, memine la itre ewekë hne së hna tha öhn? Kola mama la lapaune së jëne la aqane mele së, me jëne la aqane ithanata së, me jëne la itre huliwa së.

7. Nemene la hna amamane hnene la tulu i Noa göne la lapaun? (Wange ju la pane iatr.)

⁷ Nemene la hna amamane hnene la tulu i Noa göne la lapaun? Öni Paulo aposetolo, “Hnene la lapaune Noa a qou me cane la he nyine amelene la lapa i angeic, ke hnei Akötesie hna kuji angeice ngöne la nöjei ewekë ka tha hna goeëne pete kö ngöne la ijine cili.” (Heberu 11:7) Hnene laka hnei Noa hna lapaune kowe la hna qaja hnei Iehova, ame hnei angeic hna cane la Aka atraqatr. Eje hi laka, hnene la itre atr ka lapa easenyi angeic hna hnyingë angeic la kepine matre angeic a cane la Aka. Ngo atre hi së laka, tha hnei Noa kö hna lapa thaup ke, öni Tusi Hmitrötr göi angeic ka hape, “ate cainöjëne la thina ka meköt.” (2 Peteru 2:5) Angeic a ithuemacanyine la itre atr ka hape, tro Akötresie a axulune la Iwë Atraqatr matre troa apatrene la itre atr ka ngazo. Angeic a qaja hnyawane koi angatr la itre ithanata i Iehova lo hna qaja koi angeic, kola hape: “Xulu hë koi ni la pune la nöjei ate asëjëihë ; ke tiqa ha la fene hnei iangazo i angat, . . . Nge hana wang, tro ni a akaca trane la fene hnengödrai hnei iwë, mate troa humuthe la ite ka mele a mano asë e celë fen ; nge tro ha meci la nöjei ewekë asëjëihë e celë fen.” Hnei Noa fe hna qaja amamane kowe la itre atr la nyine tro angatr a kuca matre tro pe kö angatr a mel, ke ase hë Iehova ahnith koi angeic ka hape: “Tro eö a lö hnine la aka.”​—Genese 6:13, 17, 18.

8. Nemene la hna qaja hnei Iakobo göne la lapaun?

⁸ Hnei Iakobo fe hna qejepengöne la lapaun, tha qea kö thupene la hnei Paulo hna cinyihane koi angetre Heberu. Öni Iakobo: “Amamanejë koi ni la lapaune i ’ö ka pë huliwa ngön, nge tro ni a amamai ’ö la lapaunenge hnene la ite huliwang.” (Iakobo 2:18) Ame koi Iakobo, e ajane së troa hetrenyi la lapaun, tha tro hmekuje kö së a jele nyipicine la ketre ewekë. Ame itre dremoni, tre angatr fe a jele nyipicine ka hape, ka mel Akötresie, ngo tha lapaune kö angatr koi Nyidrë. Angatr pe a icilekeu catr me Nyidrë. (Iakobo 2:19, 20) Ame pena ha la atr ka lapaun, hna kepe angeic hnei Iehova, ke hna kuca la itre huliwa ka loi. Celë hi hna kuca hnei Aberahama. Öni Iakobo: “Hape, u, tha hna jele meköti Aberahama keme shë hnene la ite huliwa, ngöne la hnei nyidëti hna hujë Isaaka nekö i nyidëti hune la ita ? Ate hë eö laka hna ce huliwa la lapaune memine la ite huliwa i angeic, nge hna apexejene la lapaune hnene la ite huliwa.” Matre Iakobo a amamane hnyawa jë ka hape, ka gufa la lapaune e pëkö huliwa, öni angeic: “Meci hë la ngönetrei e pëhë mano ne mel ; ketre tune fe la lapaun, meci hë e pëkö huliwa.”​—Iakobo 2:21-23, 26, MN.

9, 10. Nemene la aliene la kola hape, troa lapaune kowe la Hupuna?

⁹ Thötre lao macatre thupene lai, Ioane a cinyihane la tusi angeic me köni xa tusi hmaca kö. Trotrohnine hnyawa angeic la aliene la lapaun. Anyimua mama la hnëewekë “lapaune” qene Heleni ngöne la itre tusi angeic.

¹⁰ Öni Ioane: “Hetenyi hë la mele ka tha ase palua kö hnene la ate lapaune kowe la Hupuna ; ngo tha tro kö a öhne la mele hnene la ate tha lapaune kö kowe la Hupuna ; ngo tro pala kö a të hui angeice la elëhni Akötesie.” (Ioane 3:36) Maine easa ajane troa lapaune kowe la Hupuna, ene Iesu, nyipi ewekë tro sa drengethenge nyidrë. Anyimua amexeje Iesu ngöne la itre tusi Ioane ka hape, maine easa ajan troa hetrenyi la mel ka tha ase palua kö, nyipi ewekë tro sa lapaune koi nyidrë me kowe la Keme i nyidrë.​—Ioane 3:16; 6:29, 40; 11:25, 26; 14:1, 12.

11. Tro sa amamane tune kaa la hni ne ole së koi Iehova?

¹¹ Iehova a aijiji së troa atrepengöi Nyidrë me Hupuna i Nyidrë jëne la uati hmitrötr. Nyidrëti fe a aijiji së troa lapaune koi nyidro. (E jë la Luka 10:21.) Tro sa amamane tune kaa la hni ne ole së koi Iehova pine la nöjei ewekë asë hnei Nyidrë hna kuca? Tha tro pi kö sa hmaca troa ole koi Nyidrë hnene la hna aijiji së troa imelekeu hnyawa me Nyidrë jëne Iesu “ate nyi qane me apexejene la lapaun.” (Heberu 12:2) Ketre, loi e tro pala hi sa thithi koi Iehova me inine la Wesi Ula i Nyidrë matre tro pala hi a catr la lapaune së.​—Efeso 6:18; 1 Peteru 2:2.

12. Maine ka catre la lapaune së, tro lai a mama tune kaa?

¹² Maine ka catre la lapaune së kowe la itre hna thingehnaean hnei Iehova, tro lai a mama jëne la itre huliwa së. Tro pala hi së lai a cainöjëne la Baselaia i Akötresie kowe la itre atr, me xatua angatr troa nyihlue i Iehova. Ketre, tro pala hi së lai a kuca “la loi kowe la nöjei ate asëjëihë . . . ngo sisitia [kö] kowe la nöjei ate ne la lapa i angete lapaun.” (Galatia 6:10) Nge tro fe sa isine troa “una tije la ate ka hekö memine la ite thina i nyën” ke, tha ajane kö së troa nue la ketre ewekë troa angazone la imelekeu i së me Iehova.​—Kolose 3:5, 8-10.

13. Pine nemene matre ka nyipi ewekë catre la troa “lapaune koi Akötesie”? Nemene la aqane hëne lai hnei Tusi Hmitrötr, nge pine nemen?

¹³ Öni Tusi Hmitrötr: “Tha’teine kö troa amadi nyidë e pëkö lapaun ; ke ijije la ate tro koi Akötesie troa kapa, ka hape, eje kö nyidë, nge nyidëti la ate nyi june koi angete thele catë nyidë.” (Heberu 11:6.) Öni Tusi Hmitrötre fe, “lapaune koi Akötesie” la ketre ewekë ka sisitria nyine tro la keresiano a hetreny. Ketre, kola aceitunën la lapaun memine la trepene la hna xupi uma. (Heberu 6:1) Ngo, hetrenyi la itre xa thiina ka sisitria koi së matre tro pala hi a imelekeu hnyawa me Iehova.​—E jë la 2 Peteru 1:5-7; Iuda 20, 21.

14, 15. Pine nemene matre nyipi ewekë catre kö la troa ihnim hune la tro hi a lapaun?

¹⁴ Tru catre kö la hna qeje lapaun hnene la itre ka cinyihane la Tusi Hmitrötr hune la itre xa thiina ka lolo. Kolo kö lai a hape, lapaune hi la thiina ka sisitria hune la itre xa thiina ka lolo?

¹⁵ Öni Paulo e qeje lapaune me ihnim ka hape: “Maine hetenyi ni la lapaune mate ateine ni troa fejane la ite wet, ngo pëkö ihniming hawe, tha nyipi ewekë kö ni.” (1 Korinito 13:2) Öni Iesu, ame la “wathebo ka tru ne la nöjei wathebo,” tre, ene la troa hnimi Akötresie. (Mataio 22:35-40) Ihnim la ka xatua së troa hetreny la itre xa thiina hna ajane hnei Akötresie. Öni Tusi Hmitrötr, ame la ihnim, tre, “ate kapa la nöjei ewekë asë.” Haawe, tro la ihnim a xatua së troa kapa, maine lapaune kowe la nöjei ewekë hna qaja hnei Akötresie hnine la Tusi Hmitrötr.​—1 Korinito 13:4, 7.

16, 17. Nemene la hna qaja hnei Tusi Hmitrötr göi lapaun, me ihnim? Nemene la thiina ka sisitria e lue ej, nge pine nemen?

¹⁶ Ka nyipi ewekë catre la lapaun me ihnim, ke, lue thiina lai hna majemine ce xome hnene la itre ka cinyihane la Tusi Hmitrötr. Hnei Paulo hna upe la itre trejine troa “xetëne la ixete ne mano ne la lapaune me ihnim.” (1 Thesalonika 5:8) Hnei Peteru hna qeje Iesu ka hape: “Lo hnei nyipunie hna tha öhne ngo hna hni kow [maine, hna hnim]; tha goeë nyidëti kö enehila hnei nyipunie, ngo lapaune pe koi nyidë.” (1 Peteru 1:8) Öni Iakobo kowe la itre trejin hna iën: “Hape u, tha hnei Akötesieti hna iëne la nöjei ate ka pë ewekë e celë fene troa tene ewekë ngöne la lapaun, me troa hetenyi la baselaia lo hna thinge hnaeane koi angete hni koi nyidë [maine, koi angetre hnimi nyidrë]?” (Iakobo 2:5) Öni Ioane, ame la wathebo i Akötresie, tre ene la “ tro sha lapaune kowe la [ëje] ne la Hupuna i nyidë Iesu Keriso, me ihnimikeu.”​—1 Ioane 3:23.

¹⁷ Ngo öni Paulo fe: “Nge enehila cile huti la lapaun, me mejiun, me ihnim ; könite lai ; ngo ame la ka sisitia, te, ihnim.” (1 Korinito 13:13) Ame hë elany, tha nyipi ewekë hmaca kö tro sa lapaune kowe la itre hna thingehnaeane hnei Akötresie göne la fene ka hnyipixe, ke, eatre hë itre ej. Easë hë lai a melëne la mele ka lolo hna qaja hnei Tusi Hmitrötr. Ngo, ka nyipi ewekë pala kö elanyi la tro sa hnimi Akötresie, me itre atr. Ame la ihnimi së koi angatr, tre ka tro pala hi eje lai a kökötre uti hë epine palua.

18, 19. Nemene la thangane enehila qa ngöne la hna lapaune hnene la itre hlue i Akötresie? Drei la nyine atrune pine lai?

¹⁸ Ame ngöne la hneijine së, itre hlue i Iehova a lapaune kowe la Baselaia i Akötresie me sajuëne ej. Angatre fe a ihnimikeu. Angatr a atreine troa ujë tune lai ke, hnei angatre hna thele jëne matre tro la uati hmitrötr a eatrongë angatre ngöne la mele i angatr. (Galatia 5:22, 23) Nemene la thangane lai? Ase hë sasaith la 8 milio lao trejin e cailo fen ka mele tingeting, nge ka cas ngöne la itre ekalesia i angatr. Mama hnyawa hi laka, ka hetre menene catre la lue thiina celë, ene la lapaun me ihnim.

¹⁹ Hnene hmekuje hi la ixatua i Akötresie matre hetrenyi jë la casi thene la itre trejin. Haawe, Nyidrëti la nyine tro sa atrune pine lai. (Isaia 55:13) Ketre, easa olene catrëne koi Iehova ke, “melë hë [së] . . . hnene la lapaun.” (Efeso 2:8) Nge tro pala kö Nyidrëti a xatuane la itre ka ala nyimu troa lapaune koi Nyidrë. Nge ame hë elany, tro ha tiqa la ihnadro hnene la itre atr ka pexej me ka meköt, me ka madrin. Nge tro angatr e cili a atrunyi Iehova epine palua!