1. Nemene la hna nue së hnei Iehova troa kuca?

IEHOVA a nue së matre tro sa isa ië ewekë. Nyidrëti a ini së tro sa atreine axecië mekun. Nge ame la easa mele thenge la aja i Nyidrë, Nyidrëti a xatua së troa eatrëne la itre mekuna së. (Sal. 119:173) Celë hi matre, ame la easa trongëne la itre eamo qa hnine la Tusi Hmitrötr, lolo la aqane axecië mekune së.—Heb. 5:14.

2. Nemene la jol hne së hna cile kow, ngacama lolo la aqane axecië mekune së?

² Ngacama lolo ju hë la aqane axecië mekune së, ngo maine jë, troa jole koi së troa umuthe la itre huliwa hne së hna nyiqaane hë. Hanawang la itre ceitune celë. Kola mekune hnene la ketre trejin troa e asë la Tusi Hmitrötr. Ngo itre wiik ne e hi, tha umuthe ju kö. Ame la ketre, hnei eahlo hna mekun troa xome la huliwa ne pionie ka ixatua, ngo hnei eahlo hna uthe lapan. Ame pena la lapa ne la itre qatre thup, hnei angatr hna ce axeciën ka hape, tro palahi angatr a wange la itre trejin ne la ekalesia, matre troa ithuecatr. Ngo itre treu thupen, pëkö hna kuca. Eje hi laka, isapengöne kö la itre hna melën, ngo caasi hi la hna kuca. Tha hnei angatre kö hna kuca la hnei angatr hna qaja. Celë hi hna melën ekö hnene la itre pane Keresiano e Korinito. Tro sa pane ce wang la ka traqa koi angatr matre tro sa xomi ini qa ngön.

3. Nemene la hna ce axeciën hnei angetre Korinito, ngo nemene la ka traqa?

³ Ame lo 55 M.K., hetrenyi la ketre mekun ka sisitria catr hna xome hnei angetre Korinito. Hna thuemacanyi angatr ka hape, kola kuië ahnahna hnene la itre xaa ekalesia, matre troa xatuane la itre trejin e Ierusalema me Iudra. Hetrenyi la itre jol hnei angatr hna cile kow. Pine laka, ka loi thiina me ka ham la angetre Korinito, hnei angatr hna mekun troa hane xatuane la itre trejin. Hnei angatr hna sipo Paulo aposetolo troa ixatua. Celë hi matre, hnei nyidrëti hna iupi fë la itre hna amekötin kowe la ekalesia ne Korinito, me acili Tito matre troa hlem la itre hna  ithingë. (1 Kor. 16:1; 2 Kor. 8:6) Thupene la itre treu, kola thuemacanyi Paulo laka, pëkö manie hna kuiën hnei angetre Korinito. Tha hnei angatre kö hna canga ithingë, matre tha hna hane fe kö xom la itre manie i angatr a tro Ierusalema tune lo itre xaa ekalesia.—2 Kor. 9:4, 5.

4. Thenge la hna qaja ngöne 2 Korinito 8:7, 10, 11, nemene la hna qaja hnei Paulo koi angetre Korinito?

⁴ Lolo la aqane axecië mekune i angetre Korinito. Hnei Paulo hna qaja aloinyi angatr ke, ka catre la lapaune i angatr nge ka catre ham. Hnei Paulo fe hna ithuecatre koi angatr troa umuthe la huliwa hnei angatr hna mekun troa kuca. (E jë la 2 Korinito 8:7, 10, 11.) Hetre ini koi së. Nyipici laka, itre Keresiano ka mele nyipici së. Ngo ame itre xaa ijin, thatreine kö së troa umuthe la huliwa hna nyiqaane hë.

5. Nemene la itre hnying hne së hna troa sa ngöne la tane mekun celë?

⁵ Tui angetre Korinito, maine jë, tha tro kö sa umuthe la itre hne së hna nyiqaane kuca ha. Pine nemen? Pine laka itre atr ka ngazo së, ijije hi tro sa uthe la itre nyine tro sa kuca. Maine pena hnene laka, hna traqa la ketre ewekë, matre jole koi së troa eatrëne la mekuna së. (Ate cai. 9:11; Rom. 7:18) Nemene la nyine tro sa kuca, ngöne la easa saze la mekun hne së hna axeciëne hë? Nge nemene la ka troa xatua së troa umuthe la huliwa hne së hna nyiqaane kuca ha?

6. Eu la easa saze la itre mekuna së?

⁶ Tha tro kö sa saze la itre mekun ka sisitria hne së hna xome hë. Ase hë së mekun troa nyihlue i Iehova me mele nyipici kowe la föi easë. (Mat. 16:24; 19:6) Ngo ijije hi tro sa saze la itre mekun hne së hna xom. Pine nemen? Pine laka, hetrenyi la itre ewekë ka saze ngöne la mele së. Nemene la ka troa xatua së troa atreine axecië mekun hnyawa?

7. Pine nemene matre nyipiewekë tro sa thith?

⁷ Loi e troa sipone la inamacan ngöne la thith. Hnei Iehova hna upi Iakobo troa cinyihan, ka hape: “Maine ketre thei nyipunie a aja inamacan, loi e tro pala hi angeic a sipo Akötresie, ke nyidrëti a hamën atrun koi nöjei atr.” (Iako. 1:5) Eje hi, ame itre xaa ijin, pëkö “inamacane” së. Celë hi matre, nyipiewekë tro sa sipo ixatua koi Iehova, ngöne la easa axecië mekun me ngöne la easa saze mekun. Tro kö Iehova a xatua së troa atreine axecië mekune hnyawa.

8. Nemene la itre ewekë nyine tro sa thel?

⁸ Loi e troa ithel hnyawa. Nyipiewekë tro sa e la Tusi Hmitrötr memine la itre itusi hna fejan hnene la organizasio i Iehova. Loi e tro fe sa sipone la itre eamo qaathene la itre atr ka inamacan. (Ite edomë 20:18) E cili, tro hë sa atreine axecië mekun hnyawa göne la aqane troa iën la ketre huliwa, maine troa saze uma. Kola xatua së fe troa sisedrëne la itre ini ka aijijë së troa xome la itre hnëqa së, nge easë palahi a catre nyihlue i Iehova.

9. Nemene la thangane e tro sa nyipici?

⁹ Loi e troa waipengöne hnyawa la itre hne së hna ajan. Iehova a ajane troa atre la kepin, matre easa kuca la ketre ewekë. (Ite edomë 16:2) Iehova a ajane tro sa nyipici ngöne la nöjei ewekë hne së hna kuca. Celë hi matre, loi e tro sa nyipici ngöne la easa axecië mekun. Tro sa pane nyiqane qaathei easë, nge tro hë së lai a hane nyipici koi itre xan. Maine tha tro kö sa nyipici, thatreine jë kö tro sa eatrën la hne së hna mekun. Maine jë, tro la ketre trejin a mekun troa xome la huliwa ne pionie ka ixatua. Ngo thupene la itre drai, thatreine hë angeic eatrëne la itre hawa. Tha tro hë angeice lai a cainöj. Eje hi, angeice lo a mekun ka hape, angeic a xome la huliwa ne pionie, matre troa amadrinë Iehova. Ngo maine jë, troa mama hnyawa la aja ka eje thei angeic. Angeic a thel troa amadrinëne la kem me thine i angeic maine ketre atr pena.

10. Nemene la ka xatua së matre tro sa saze la mele së?

 ¹⁰ Pane mekune jë la ketre atr ka ini tus ka mekun troa triji sixa. Maine jë tha tro kö angeice a ufi sixa koi caas maine lue wiik. Thupene lai, hnei angeic hmaca hna ufi sixa. Ngo pine laka angeic a hnimi Iehova me thel troa amadrinë Nyidrë, haawe, hnei angeic hna triji sixa.—Kol. 1:10; 3:23.

11. Pine nemene matre loi e tro sa eköthe la itre mekuna së?

¹¹ Loi e troa eköthe hnyawa la itre mekuna së. Tro hë së lai a atreine eatrëne itre ej. Maine jë tro sa mekun troa e lapane la Tusi Hmitrötr. Ngo maine tha hne së kö hna eköthe la ketre porogaram, haawe, thatreine kö tro sa e asë la Tusi Hmitrötr. * Maine jë hnene la itre qatre thup ne la ekalesia hna mekun troa wang me eatrongëne hnyawa la itre mamoe i Iehova. Ngo thupene la itre drai, pëkö hnei angatr hna kuca. Maine aja i angatr troa eatrën la mekuna i angatr, loi e tro angatr a hnying ka hape: “Hapeu, hne së kö hna sija la ëjen ne la itre trejin nyine troa wang? Hne së kö hna amë la drai me hawa, matre troa wai angatr?”

12. Nemene la nyine tro sa kuca, nge pine nemen?

¹² Loi e tro sa atreine waiewekë. Pëkö ala caasi the së ka hetrenyi la traem me mo me trengecatr, matre troa kuca asë la itre hne së hna ajan. Celë hi matre, loi e tro sa atreine waiewekë me inamacan. Maine jë tro sa saze la itre mekuna së, pine laka, thatreine kö së troa eatrëne la mekuna së. (Ate cai. 3:6) Maine pena, ame la easa mekune hmaca la itre hne së hna ajan troa kuca, easa saze me thele troa eatrën itre ej. Hane hi la faifi lao ewekë ka troa xatua së matre tro sa umuthe la huliwa hne së hna nyiqaane kuca ha.

13. Nemene la nyine tro sa kuca matre hetre trengecatre së troa eatrëne la itre mekuna së?

¹³ Loi e tro sa catre thith matre troa hetre trengecatr. Akötresieti hmekuje hi la ka troa hamë së la “trengecatre” matre troa kuca la itre mekuna së. (Fil. 2:13) Celë hi matre, loi e tro sa catr thith me sipo Iehova la uati hmitrötr, matre tro sa hetrenyi la trengecatr ka ijij. Eje hi, catre jë së thith ngacama tha hna eatrëne palakö la sipo së. Öni Iesu: “Sipo jë the mano kö, nge tro ha hamëne koi nyipunie [la uati hmitrötr].”—Luka 11:9, 13.

14. Nemene la aqane troa xatua së, hnene la hna qaja ngöne Ite Edomë 21:5, matre troa eatrëne la itre mekuna së?

¹⁴ Loi e tro sa eköthe hnyawa la itre mekun hna ajan troa eatrën. (E jë la Ite Edomë 21:5.) Eje hi, loi e tro sa eköthe hnyawa la itre mekuna së, matre tro sa atreine umuthe la huliwa hne së hna ajan troa kuca. Thupene lai, loi e tro sa thele troa trongëne hnyawa la itre hne së hna mekun troa kuca. Maine jole troa eatrën asë itre ej, tha tro kö sa aca tro kuca. Loi e tro sa eköthe trootro la mekuna së, matre hmaloi koi së troa eatrën. Tro hë sa madrin ke, hetre hne së hna kuca. Hnei Paulo hna ithuecatre koi angetre Korinito troa pane isa ami mani acon thenge la hnei angatr hna hetreny, “ngöne la itre pane drai ne la wiik.” E cili, tha tro hmaca kö angatr a ithingë mani ngöne la nyidrëti a traqa. (1 Kor. 16:2) Tha tro kö sa thel troa aca tro kuca la itre hne së hna mekun. Loi e tro sa nango kuca la ketre nge ase jë hi ketre. E cili, tro hë sa madrin. Ijije hi tro sa kuca asë itre ej.

15. Nemene la nyine troa kuca thupene la hna eköth la itre mekun hne së hna ajan troa kuca?

¹⁵ Maine tro sa cinyanyine la itre mekun hne së hna ajan troa kuca, tro hë sa atreine eatrëne itre ej. (1 Kor. 14:40) Maine jë, hnene la lapa ne la itre qatre thup hna iëne la  ketre matre troa cinyihane la itre mekun me ëj ne la ka troa kuca, memine la drai ne troa afenesin la huliwa. (1 Kor. 9:26) Ijije hi tro sa kuca lai kowe la itre xaa huliwa së ngöne la mele së, tune la itre hne së hna ajan troa kuca ngöne la drai. Ijije hi tro sa cinyanyine la itre nyine tro sa pane kuca. Maine tro palahi sa kuca tune lai, tro hë sa atreine umuthe la itre huliwa hne së hna nyiqaan me itre xane ju kö.

16. Nemene la nyine tro sa kuca, nge nemene la aqane xatua së hnene la hna qaja ngöne Roma 12:11?

¹⁶ Loi e tro sa thele troa eatrëne ej. Nyipiewekë tro sa nue trengecatr, matre troa eatrëne la itre mekuna së, me umuthe la itre huliwa hne së hna nyiqaane kuca ha. (E jë la Roma 12:11.) Celë hi ithuecatre hna hamëne koi Timoteo hnei Paulo. Hnei nyidrëti hna qaja koi angeic ka hape, “isine jë” nge “catre jë” matre troa maca troa hamë ini. Ijije hi tro sa hane trongëne la itre eamo i Paulo, ngöne la nöjei hne së hna ajan troa kuca koi Iehova.—1 Tim. 4:13, 16.

17. Nemene la aqane xatua së hnene la hna qaja ngöne Efeso 5:15, 16, matre troa kuca la itre hne së hna mekun?

¹⁷ Nyipiewekë troa huliwane hnyawa la traem. (E jë la Efeso 5:15, 16.) Loi e tro sa canga ami traem göne la itre huliwa hne së hna ajan troa kuca, nge tha tro pi kö sa saze. Tha tro kö sa treqene la ijine loi, matre troa nyiqaane kuca la huliwa së. Maine jë pëkö troa hetre ijine loi. (Ate cai. 11:4) Ketre, tha tro pi kö sa nue la itre huliwa ka tha nyipiewekë kö troa xome la traeme së me trengecatre së. (Fil. 1:10) Nyipiewekë tro sa iëne hnyawa la nyipi ijin, matre tha tro kö a sewe së troa kuca hnyawa la huliwa së. Loi e tro fe sa qaja koi itre xan ka hape, tha tro kö a ajolë së. Loi e tro sa thing la telefone së me wange la itre mail së e thupen. *

18-19. Ngacama tha ka hmaloi kö, ngo drei la ka troa xatua së troa umuthe la itre huliwa hne së hna nyiqaane hë?

¹⁸ Loi e tro sa mekun la itre eloin e thupen. Ame la thangan la huliwa së, tre, hna aceitunëne memine la ketre götran hna traqa kow ngöne la easa ihamë. Maine easa ajan troa traqa, nyipiewekë tro sa xome la nöjei gojenyi ka troa tro sai së a tro e cili. Eje hi, maine tro sa pane lapa mekun la itre eloin la hne së hna axecië mekun, tha tro hë sa kucakuca ngöne la itre ijine jol.—Gal. 6:9.

¹⁹ Nyipici laka, tha ka hmaloi kö koi së troa axecië mekun hnyawa. Ketre, jole fe koi së troa eatrën hnyawa la itre mekuna së. Ngo ame pe, tro kö Iehova a ainamacanë së me thue trengecatre së, matre tro sa umuthe la itre huliwa hne së hna nyiqane kuca ha.