1-2. Thenge la hna qaja ngöne 1 Peteru 4:7, 8, nemene la ka xatua së troa cil kowe la itre jol?

CALEMI hë la pun ne la “itre drai ne la pun,” matre traqa pi la itre jol ka tru. (2 Tim. 3:1) Hanawang la ka traqa e Afrique occidentale. Thupene la itre élections, kola elë la etrune la itre ka isi. Nge thupene la sikisi lao treu, kola xou me akötr hnene la itre trejin ke, kolo palahi a isi hnene la itre atr. Nemene la ka xatua angatr troa cile catr? Ame itre xan, hnei angatr hna kötre mel kowe la itre nöje xötreith gaa pë isi, me lapa thene la itre trejin. Önine la ketre trejin trahmany: “Tru la madrineng ke, ce eni memine la itre sineeng, nge eahun palahi a itö ithuecatr.”

² Ame la kola troa nyiqane la “akötr atraqatr,” tro sa madrin e tro sa cememine la itre trejin ka hnimi së. (Hna ama. 7:14) Celë hi matre, enehila hi la ijine tro sa acatrene la aqane imelekeu së memine la itre trejin. (E jë la 1 Peteru 4:7, 8.) Nyimutre la itre ini hne së hna xom qa ngöne la hna melën hnei Ieremia. Hnene la itre nyipi sinee i angeic hna xatua angeic troa cile catr qëmekene troa apatrene la traon e Ierusalema. * Tro sa nyitipu Ieremia tune kaa?

3. (a) Pine nemene matre hnei Ieremia hna ananyine la itre xaa atr? (b) Nemene la hnei Ieremia hna qaja koi Baruka, seketere i nyidrë, nge nemene la thangane lai?

³ Ame ngöne la 40 lao macatre, hnei Ieremia hna mele nyipine la itre atr ka ngazo. Kola qaja la itre ka lapa easenyi  angeic, me itre sinee i angeic qa Anathoth. (Iere. 11:21; 12:6) Ngo, tha hnei angeice kö hna lapa caas. Hnei angeic hna qaja koi Baruka, seketere i angeic, la aliene hni angeic. Nge hnei angeice fe hna cinyihan la mekuna i angeic. (Iere. 8:21; 9:1; 20:14-18; 45:1) Ijije hi tro sa qaja ka hape, hnei Baruka me Ieremia hna thel troa ihnimikeu me imetrötrekeu ke, hnei Baruka hna hane cinyihan la ka traqa koi Ieremia.—Iere. 20:1, 2; 26:7-11.

4. Nemene la hnei Iehova hna upi Ieremia troa kuca, nge nemene la aqane acatrene la aqane imelekeu i Ieremia me Baruka hnene la huliwa cili?

⁴ Itre macatre ne hmekëne Ieremia la angetre Isaraela, göne la ewekë ka troa traqa e Ierusalema. (Iere. 25:3) Hnei Iehova fe hna ithuecatre kowe la nöj troa ietra, nge hnei Nyidrëti hna upi Ieremia troa cinyihan e hnine la tusi hna ewath. (Iere. 36:1-4) Maine jë, itre treu ne ce huliwa Ieremia me Baruka, matre hetre ijine koi nyidroti troa porotrik me acatrene la lapaune i nyidro.

5. Nemene la ka amamane ka hape, ketre sinee ka lolo Baruka koi Ieremia?

⁵ Ame la nyidroti a ase cinyihane la tusi hna ewath, hnei Ieremia hna mejiune koi Baruka troa tro fë la maca. (Iere. 36:5, 6) Hnei Baruka hna kuca hnyawane la huliwa i angeic. Atraqatr la madrine i Ieremia ngöne la Baruka a e la tusi cili qëmekene la nöjei atr. (Iere. 36:8-10) Hnene la itre joxu ne Iudra hna dreng la hna kuca hnei Baruka, nge hnei angatr hna sipo nyidrëti troa e koi angatr! (Iere. 36:14, 15) Aja i angatr troa qaja koi Iehoiakima joxu lo hna qaja hnei Ieremia. Matre hnei angatr hna drei Baruka hnyawa, me hape: “Trojë eö a za, eö me Ieremia, pëkö ate troa öhne la hne i nyipo.” (Iere. 36:16-19) Drei la ketre eamo ka lolo!

6. Nemene la hnei Ieremia me Baruka hna kuca ngöne la kola icilekeu?

 ⁶ Ame la Iehoiakima joxu a drenge la tusi Ieremia, hnei nyidrëti hna elëhni, me iupi troa dreuthetrij la tus me akalabusi Ieremia me Baruka. Ngo tha hnei Ieremia kö hna xou. Hnei angeice pe hna hamë Baruka la ketre tusi hna ewath, me qaja koi angeic la maca i Iehova. Nge hnei Baruka hna cinyihane “la nöjei wesi ula asë ne la tusi lo hnei Iehoiakima joxu ne Iuda hna deuthe tije ngöne la eë.”—Iere. 36:26-28, 32.

7. Nemene la ka traqa lo Ieremia me Baruka a ce huliwa?

⁷ Ame la itre atr ka ce cile kowe la itre jol, tre, itre treme sineene hë angatr e thupen. Celë hi ka traqa koi Ieremia me Baruka, ngöne lo nyidroti a nyihnane la tusi hna ewath, hna dreuthetrij hnei Iehoiakima joxu. Nemene la ini hne së hna xom qa ngöne la tulu i nyidro?

8. Nemene la ka sewe së troa hetre sinee, nge pine nemene matre loi e tro sa catr?

⁸ Maine jë, jole koi së troa fe la hni së koi itre xan ke, hnene la ketre atr ekö hna akötrë së. (Ite edomë 18:19, 24) Maine pena, easa mekun laka, pëkö traem me trengecatre së troa thele sinee. Ngo catre pi. Maine easa ajane tro la itre trejin a ceme easë ngöne la itre ijine jol, loi e tro sa canga acatrene la aqane imelekeu së me angatr. Ame la ketre aqane tro sa kuca, tre, troa fe la hni së koi angatr, me qaja la aliene hni së me mekuna së.—1 Pet. 1:22.

9. (a) Nemene la aqane amamane Iesu laka, nyidrëti a mejiune kowe la itre sinee i nyidrë? (b) Pine nemene matre nyipiewekë tro sa fe la itre hni së? Qaja jë la ketre ceitun.

⁹ Hnei Iesu hna amamane laka, nyidrëti a mejiune kowe la itre sinee i nyidrë. Hnei nyidrëti hna qaja la nyipici koi angatr, nge pëkö hnei nyidrëti hna juetrën. (Ioane 15:15) Loi e tro sa nyitipu Iesu me qaja kowe la itre sinee së la itre ewekë ka amadrinë së me ka aelëhni së, me itre hne së hna hnehengazon. Loi e tro sa drenge hnyawa ngöne la kola ithanata hnene la ketre atr. Tro hë sa öhn laka, caasi hi la itre mekuna së, me aliene hni së, me aja së. Hanawang la tulu i Cindy, ketre trejine föe ka 29 lao macatre. Hnei angeic hna nyi treme sinee me Marie-Louise, ketre trejine föe ka 67 lao macatre. Cindy me Marie-Louise a ce cainöj e nöjei hmakany ne Draikaco, matre hetre ijine i nyidroti troa porotrik. Öni Cindy: “Eni a madrine  troa porotrikëne la itre mekun ka nyipiewekë memine la itre sineeng ke, kola xatua ni troa atre me trotrohnine la mekuna i angatr.” Loi e tro sa fe la itre hni së kowe la itre sinee së, me drenge hnyawa la angatr a ithanata. Tui Cindy, maine tro sa tro kowe la itre atr me porotrik me angatr, tro ha acatrene la aqane imelekeu së me angatr.—Ite edomë 27:9.

10. Thenge la tusi Ite Edomë 27:17, nemene la thangan e tro sa ce huliwa memine la itre trejin?

¹⁰ Tui Ieremia me Baruka, ame la easa ce huliwa memine la itre xaa trejin, easa öhne la itre thiina ka lolo i angatr, me xomi ini qa ngöne la tulu i angatr, me easenyi catr koi angatr. (E jë la Ite Edomë 27:17.) Nemene la mekuna së ngöne la ketre trejin a qaja la lapaune i angeic ngöne la hna cainöj? Nge tune kaa la angeic a qaja la mejiune i angeic koi Iehova me itre aja i Nyidrë? Kola acatrene la ihnimi së koi angeic.

11-12. Qaja jë la ketre ceitune ka amamane laka, nyipiewekë troa ce cainöj memine la itre trejin, matre acatrene la aqane imelekeu së me angatr.

¹¹ Hanawang la lue ceitun ka amamane la aqane tro la huliwa ne cainöj a acatrene la ihnim. Hnei Adeline, ketre trejine föe ka 23 lao macatre, hna sipone koi Candice, ketre sinee i angeic, troa fek kowe la ketre teritoar ka aja ixatua. Öni angeic: “Aja i nyio troa catre cainöj me madrin ngöne la hna cainöj. Nyipiewekë tro nyio a ithuecatrekeu matre tro palahi a catre huliwa i Iehova.” Nemene la thangane la hnei nyidroti hna ce huliwa? Öni Adeline, “Ame e nöjei hej, nyio a qaja la aliene hni nyio memine la aqane ketri nyio hnene la hna ithanata memine la ketre atr. Nyio fe a qaja la aqane eatrongë nyio hnei Iehova. Madrine catre nyio troa porotrik me acatrene la aqane imelekeu i nyio.”

¹² Hnei Laïla me Marianne, lue trejine föe qa Faras, hna tro troa cainöj koi faifi lao wiik e Bangui, traone ka tru e République d’Afrique Central. Öni Laïla: “Tru  catre la itre jol ka traqa koi ni me Marianne. Ngo hnene laka, hnei nyio hna majemine porotrik me ihnim, matre kolo palahi a acatrene la aqane imelekeu i nyio. Eni a hain la eni a öhn laka, atreine hi Marianne troa kapa la itre ewekë ka saze, me ihnimi angeic kowe la itre atr, me aqane catre cainöje i angeic.” Tha kolo kö lai a qaja ka hape, troa tro kowe la ketre nöj matre troa kapa la itre manathith cili. Ame la easa ce cainöj memine la ketre trejin ne la teritoare së, ijije hi tro sa atrepengöi angeic hnyawa me acatrene la aqane imelekeu së me angeic.

13. Nemene la ka traqa ngöne la easa ce cainöj memine la itre trejin?

¹³ Ame la easa ce cainöj memine la itre trejin, öhne hi së la itre thiina ka lolo i angatr. Ngo öhne fe hi së la itre tria i angatr. Nemene la ka troa xatua së tro palahi a nyisinee i angatr? Pane mekune hmaca jë la tulu i Ieremia. Nemene la ka xatua angeic troa öhne la loi thene la itre xan, me nue la ngazo i angatr?

14. Nemene la hnei Ieremia hna inine göi Iehova, nge nemene la aqane xatua angeic hnene la tulu i Nyidrë?

¹⁴ Hnei Ieremia hna cinyihane la tusi Ieremia, memine fe la lue tusi 1 me 2 Ite Joxu. Hnene la huliwa celë hna xatua angeic troa öhne la aqane utipine Iehova la itre atr ka ngazo. Drei la ketre ceitun. Ame lo Ahaba joxu a ietra ke, tha hnei Iehova kö hna humuthe la itre sinee i angeic qëmeke i angeic. (1 Ite jo. 21:27-29) Atre fe hi Ieremia laka, tru catre kö la itre tria i Manase qëmeke i Iehova hui Ahaba. Ame pe, hnei Iehova hna nue la ngazo i Manase ngöne la angeic a ietra. (2 Ite jo. 21:16, 17; 2 A. l. ite jo. 33:10-13) Hnene la itre ceitune celë hna xatua Ieremia troa nyitipune la aqane xomihni ahoeany me aqane utipine i Akötresie, memine la itre sinee i angeic.—Sal. 103:8, 9.

15. Nemene la aqane nyitipu Iehova hnei Ieremia ngöne lo Baruka a nue la huliwa i angeic?

¹⁵ Hanawang la aqane xatua Baruka hnei Ieremia ngöne lo angeic a nue la huliwa i angeic. Tha hnei Ieremia kö hna mekun laka, tha tro kö Baruka a saze. Hnei angeice pe hna xatua Baruka, me qaja mekötine koi angeic la maca i Akötresie ka menyik. (Iere. 45:1-5) Nemene la ini hne së hna xom qa ngöne la ceitune celë?

16. Thenge la tusi Ite Edomë 17:9, nemene la nyine tro sa kuca matre troa acatrene la aqane imelekeu së me itre xan?

¹⁶ Tro sa mekun laka, tha ka pexeje kö la itre trejin. Loi e tro sa thel matre tro palahi a catre la aqane imelekeu së me angatr. Maine hna tria hnene la ketre sinee së, loi e tro sa hamë eamo koi angeic jëne la Tusi Hmitrötr, ngo cememine la menyik. (Sal. 141:5) Nge maine hnei angeic hna akötrë së, loi e tro sa nue la ngazo i angeic, nge tha tro kö sa amexeje la itre hnei angeic hna kuca. (E jë la Ite Edomë 17:9.) Ame ngöne la itre drai ne la pun, nyipiewekë tro sa goeëne la itre trengecatr hna kuca hnene la itre trejin, ngo tha itre tria i angatre kö! Aqane tro hi së lai a acatrene la aqane imelekeu së me angatr, nge nyipiewekë troa hetre nyipi sinee ngöne la akötr atraqatr.

17. Nemene la aqane amamane Ieremia laka, ketre sinee ka lolo angeic ngöne la itre ijine jol?

¹⁷ Hnei Ieremia perofeta hna amamane laka, ketre sinee ka lolo angeic ngöne la itre ijine jol. Hnei Ebede-melek hna amele  Ieremia qa hnine la ketre hnaop. Ame pe, Ebede-melek a xou e troa humuthi angeic hnene la itre joxu. Ame lo Ieremia a drenge la ka traqa, tha hnei angeice kö hna lapa thaup me mejiune laka, tro Ebede-Melek a xomihnine la jol celë. Ngacama hna akalabusi Ieremia, ngo hnei angeic hna kuca la hnei angeic hna atrein, matre troa ithuecatre koi Ebede-melek, me qaja la maca ka iakeukawany qaathei Iehova.—Iere. 38:7-13; 39:15-18.

18. Thenge la tusi Ite Edomë 17:17, nemene la nyine tro sa kuca ngöne la kola traqa la ketre jol kowe la ketre sinee së?

¹⁸ Ame enehila, nyimutre la itre jol hna cile kow hnene la itre trejin. Alanyimu la itre hna lepe hnei hulö me itre ka mel ngöne la itre nöj gaa hetre isi. Ijije hi tro sa hë angatr troa ce lapa me easë. Itre xan a xatua angatr göi manie. Nge ijiji së asë hi troa sipo Iehova troa xatua angatr. Ame la kola kucakuca hnene la ketre trejin, maine jë, thatre kö së la nyine troa qaja maine kuca. Ngo ijiji së asë hi troa hane ixatua. Maine jë, tro sa nango ce lapa me angeic me drei angeice hnyawa. Nge loi e tro fe sa hamë angeic la ketre xötr ka ithuecatr. (Is. 50:4) Ame la ka sisitria, tre, tro sa xatuane la itre sinee së ngöne la angatr a aja ixatua.—E jë la Ite Edomë 17:17.

19. Pine nemene matre nyipiewekë troa canga acatrene la aqane imelekeu së memine la itre trejin?

¹⁹ Loi e tro sa canga acatrene la aqane imelekeu së memine la itre trejin. Pine nemen? Pine laka, itre ithupëjia me easë a silitrengathoi së me iaö së, matre thë la aqane caasi së. Ame la aja i angatr, tre, tro sa mekuhnin me nuetrije la itre trejin me easë. Ngo tha tro kö angatr a hun. Thatreine kö angatr troa sewe së troa hnime la itre trejin me easë, me thë la aqane imelekeu së. Eje hi, troa cile hut la aqane imelekeu së memine la itre trejin utihë la pune la fene celë, nge utihë epine palua!