AME la atre thup ekö, tre, angeic a nyidrawane la hnalapa ne la ketre atr me thupëne la itre ewekë i angeic. Hna ujëne la hnaewekë “ate thup” ngöne la qene Heberu me qene Geres ka hape, ketre ka thupë hnalapa maine ka thupëne la huliwa ne nyidrawa uma.

Ame Iosefa, lo nekö i Iakobo, tre, ketre hlu angeic ekö e Aigupito. Thupene lai, hna acili Iosefa troa atre thupëne la hnalapa ne la maseta i angeic, ketre atre Aigupito. Hnene la maseta i angeic hna “nue la nöjei ewekë asë i nyidë koi Iosefa.” (Gen. 39:2-6) Nge ame lo Iosefa a cilëne la ketre göhnë ka tru e Aigupito, hnei angeic hna acile la ketre atre thup ngöne la hnalapa i angeic.—Gen. 44:4.

Ame ngöne la hneijine i Iesu, itre trene hnadro a mel ngöne la itre traon, ka nany qa ngöne la itre hlapa i angatr. Celë hi matre, angatr a acile la itre atre thup, matre troa thupëne la huliwa hna kuca ngöne la itre hlapa i angatr.

Drei la ka ijije troa atre thup? Öni Columella, ketre atre cinyianyi qa Roma ka hape, hna “iëne la ketre hlu ka atreine kuca hnyawa la huliwa” matre troa atre thup. Ame la hnëqa i angeic, tre, troa “thupën matre troa kuca hnyawane la huliwa. Tro fe angeic a hetre thiina ka menyik.” Öni nyidrë: “Ame la ka nyipiewekë, tre, tha tro kö la atre thup a mekun laka, atre asë hë angeic la nöjei ewekë. Loi e tro palahi angeic a hetre aja troa ini.”

Tusi Hmitrötr a xome la ceitune la atre thup, matre troa qaja la itre huliwa hna kuca ngöne la ekalesia. Drei la ketre ceitun. Hnei Peteru aposetolo hna ithuecatr kowe la itre Keresiano ekö, troa huliwane la itre hnei angatr hna atrein “thatraqai ketre me ketre, tune la itre hlue ka lolo nge ka atreine huliwa, itre hlue ne la ihnimi gufa i Akötresie.”—1 Pet. 4:10.

Hnei Iesu hna qaja la ceitune la atre thup ngöne Luka 16:1-8. Nge ame ngöne lo hna perofetan göne la ijine nyidrëti a troa Joxu, hnei Iesu hna qaja kowe la itretre drei nyidrë laka, tro nyidrëti a acile la “hlue ka nyipici me ka inamacan” maine ketre “atre thupë hnalapa ka nyipici.” Ame la hnëqa ne la atre thup cili, tre, troa hamë göxeni kowe la itretre drei Keriso ngöne la itre drai ne la pun. (Mat. 24:45-47; Luka 12:42) Easa olene la nöjei jiane huliwa hna hnëkën hnene la atre thup ka nyipici, nge hna hamën koi së asë e cailo fen.