1-2. (a) Nemene la ka troa xatua së troa cile catr kowe la itre jol? Qejepengöne jë. (b) Nemene la hne së hna troa ce wang?

AME la easa cile kowe la ketre jol ka tru, maine jë easa mekun ka hape: “Thatreine kö ni troa xomihnine la jol celë hnene la sipu trengecatreng.” Alanyimu la itre ka mekun tun. Maine jë, hna tithi së hnei mec maine pena hna meci la ketre sinee së. Ame la easa mekun hmaca la jol cili, mama pi hi koi së laka, hnene la uati hmitrötre i Iehova hna hamë së la “men atraqatr,” matre atreine jë së xomihnine lai jol.—2 Kor. 4:7-9.

² Ketre, kola xatua së hnene la uati hmitrötr matre tro sa atreine cile catre kowe la iajojezi ne la fene celë ka ngazo. (1 Ioane 5:19) Easë mina fe a isi memine la “itre u ka ngazo.” (Efe. 6:12) Tro sa ce wang la lue aqane xatua së hnene la uati hmitrötr troa atreine cile kowe la itre jol. Tro fe sa ce wang la nyine tro sa kuca matre kepe thangane la mene ne la uati hmitrötr.

3. Nemene la aqane xatua së hnei Iehova matre troa atreine cile kowe la itre jol?

³ Kola hamë trengecatre së hnene la uati hmitrötr, matre troa kuca la nöjei huliwa së ngacama tru catre ju hë la itre jol. Atre hi Paulo aposetolo laka, ngacama nyimutre la itre jol, ngo atreine hi nyidrëti catre huliwa i Iehova ke, nyidrëti a mejiune kowe la “mene i Keriso.” (2 Kor. 12:9) Ame ngöne lo hnaaluene tronge i Paulo, hnei nyidrëti hna catre cainöj me huliwa thatraqane la mele i nyidrë. Hnei Paulo hna lapa e Korinito thei Akula me Perisila. Lue ka cai itat nyidro tui Paulo. Celë hi matre, hnei angatr hna ce huliwa e itre xaa  ijin. (Itre hu. 18:1-4) Hnene la uati hmitrötr hna hamë trengecatre koi Paulo, matre troa huliwa manie me catre cainöj.

4. Thenge la tusi 2 Korinito 12:7b-9, nemene la jol hna cile kow hnei Paulo?

⁴ E jë la 2 Korinito 12:7b-9. Nemene la aliene la itre trengewekë i Paulo ngöne lo nyidrëti a qaja ka hape, “hetre ka ithinyi ngöne la ngönetreing”? Maine hetre sine fenixele ngöne la iwanakoime së, tro hë së lai a akötr. Celë hi matre, Paulo a qaja ka hape, hetre jol hnei nyidrëti hna cile kow, nge ka akötrë nyidrë. Öni nyidrë ka hape, ame la jol cili ke, kösë ‘ketre angela i Satana ka xe nyidrëti lapa’ (maine “ka lep,” ftn.) Tha Satana kö me itre dremoni la qaane la itre akötre i Paulo, ene lo ka ithinyi ngöne la ngönetrei nyidrë. Ngo angatr a nyixane la akötre i nyidrë me huje catrëne la ka ithiny. Nemene la hna kuca hnei Paulo?

5. Nemene la aqane sa Iehova la itre thithi Paulo?

⁵ Ame ngöne lo xötrei, hnei Paulo hna sipo Iehova troa xometrije la “ka ithiny.” Öni nyidrë: “Akönia sipone ielene ni koi [Iehova] Joxu . . . troa xometrije qaatheng.” Ngacama hnei Paulo hna sipone ielen, ngo tha hna apatrene kö la ka ithiny. Hapeu, kolo kö lai a hape, tha hnei Iehova kö hna dreng la itre thithi Paulo? Ohea, hnei Nyidrëti pe hna sa la thith. Nyipici laka, tha hnei Iehova kö hna xometrije la akötr, ngo hnei Nyidrëti pe hna hamëne la trengecatr, matre tro Paulo a atreine xomihnin. Öni Iehova: “Kola pexeje la meneng ngöne la kucakuca.” (2 Kor. 12:8, 9) Hnene la ixatua i Iehova matre madrin me tingeting la mele i Paulo!—Fil. 4:4-7.

6. (a) Tro Iehova a sa tune kaa la itre thithi së? (b) Nemene la aqane thue trengecatre së hnene la itre xötr hna qaja ngöne la paragaraf?

⁶ Hapeu, hne së kö hna hane sipo Iehova troa thepe së qa ngöne la itre jol? Ngacama hne së hna anyimua thith, ngo maine jë, kola jole catr. E cili, tro hë sa mekun ka hape, tha madrine kö Iehova koi së. Loi e tro sa mekun la tulu i Paulo. Hnei Iehova hna sa la itre thithi Paulo ekö, nge tro fe Nyidrëti a hane kuca tun enehila! Maine jë, tha tro kö Iehova a apatrene la itre jole së. Ngo jëne la uati hmitrötr, tro Nyidrëti a hamë së la trengecatr ka ijij, matre tro sa atreine xomihnin. (Sal. 61:3, 4) Maine jë tro sa “kei,” ngo tha tro jë kö Iehova a nuaxöji së.—2 Kor. 4:8, 9; Fil. 4:13.

7-8. (a) Pine nemene matre kola aceitunëne la uati hmitrötr memine la eny? (b) Nemene la aqane qejepengöne Peteru la mene ne la uati hmitrötr?

⁷ Nemene la ketre aqane troa xatua së hnene la uati hmitrötr? Ceitune hi la uati hmitrötr memine la eny. Ngacama kola ngazo drai, ngo tro la eny a eatrongëne la he utihë la hna ie. Ketre tune mina fe, ngacama nyimutre la itre jol hne së hna cile kow, ngo tro la uati hmitrötr a xatua së troa catre nyihlue i Iehova, utihë la fene ka hnyipixe.

⁸ Peteru aposetolo la ketre ka nyi ie ekö, matre atre hi nyidrëti la huliwa hune la he. Celë hi matre, nyidrëti a aceitunëne la uati hmitrötr memine la aqane ufe enyine la he. Öni nyidrë: “Nyipici, tha xulu kö la itre hna perofetan hnene la aja i atr, ngo itre atr a ithanata jëne la uati hmitrötre i Akötresie.” Ame la aliene la hnaewekë qene Geres, “ithanata jëne” tre, kola hape “hna ukun maine hna up.”—2 Pet. 1:21; ftn.

9. Nemene la hnei Peteru hna pi amamane ngöne lo nyidrëti a qaja ka hape, “hna up” la itre atr hnei uati hmitrötr?

⁹ Nemene la hnei Peteru hna pi amamane ngöne lo nyidrëti a qaja ka hape, “hna  up” la itre atr hnei uati hmitrötr? Hnei Luka, atre cinyihane la tusi Itre Huliwa, hna qaja la ketre hnaewekë qene Geres ka ceitu memine la hna qaja hnei Peteru. Hnei nyidrëti hna qaja la he hna “ufe” hnei eny. (Itre hu. 27:15) Önine la ketre ka inamacan: “Ame la Peteru a qaja ka hape, itre atre cinyihane la Tusi Hmitrötr a ‘ithanata jëne la uati hmitrötr’ ke, hnei nyidrëti hna xome la hnaewekë ka ihmeku memine la itre ka ea hune la he. Öni Peteru ka hape, tune la eny a ufe trongëne la he utihë la hna ie, hnene la uati hmitrötr hna upe la itre ka cinyihane la Tusi Hmitrötr, troa kuca hnyawane la hnëqa i angatr. Önine lo ka inamacan: “Ame la itre ka cinyihane la Tusi Hmitrötr, tre, angatr a fekëne la itre sinyeu. Kola qaja ka hape, ka hnëkë hë angatr troa kuca la hna upi angatr hnei uati hmitrötr.” Hnei Iehova hna hamëne “la eny,” ene la uati hmitrötr. Nge hnene la itre ka cinyihane la Tusi Hmitrötr hna eatrën hnyawa la hnëqa i angatr. Hnei angatr hna nue la uati hmitrötr troa eatrongë angatr.

10-11. Nemene la lue ewekë nyine tro sa kuca matre troa xatua së hnei uati hmitrötr? Qaja jë la ketre ceitun.

¹⁰ Eje hi laka, tha Iehova hmaca kö a upe la uati hmitrötr matre aijijëne la itre atr troa cinyihane la itre tusi ne la Tusi Hmitrötr. Ngo Nyidrëti palahi a huliwan ej, matre troa eatrongëne la itre hlue i Nyidrë. Iehova a kuca la hnëqa i Nyidrë. Tro sa atre tune kaa ka hape, kola eatrongë së hnei uati hmitrötr? Nyipiewekë tro sa kuca la hnëqa së. Tune kaa?

¹¹ Hanawang la ketre ceitun. Lue ewekë nyine troa kuca hnene la atre xomiujine la he, matre troa ufe enyine la he. Ame la hnapan, loi e tro angeic a thele gaa hetre eny, wanga tha tro kö la he a kötr hune la hnagejë. Ame la hnaaluen, nyipiewekë tro angeic a seluthe la itre sinyeu. Maine tha tro kö angeic a fe la itre sinyeu, tha tro jë  kö a enije la he. Ketre tune mina fe, tro sa cile hut ngöne la huliwa i Iehova, e hna xatua së hnei uati hmitrötr. Ngo lue ewekë mina fe nyine tro sa kuca. Ame la hnapan, tro sa kuca la itre ewekë hna upi së hnei uati hmitrötr. Ame la hnaaluen, loi e tro sa kuca hnyawane itre ej. (Sal. 119:32) Maine tro sa trongëne la lue hna amekötin cili, tro la uati hmitrötr a hamë trengecatre së troa catre huliwa i Iehova utihë la pune la fene celë.

12. Nemene la hne së hna troa ce wang enehila?

¹² Hne së hna ce wang la lue aqane xatua së hnei uati hmitrötr. Ej a thue trengecatre së me xatua së troa mele nyipici ngöne la itre jol. Eje fe a xatua së matre tro sa eatrëne hnyawa la huliwa hnei Iehova hna ahnithe koi së, me kapa elany la mel ka tha ase palua kö. Ame enehila, tro sa ce wang la foa lao ewekë ka troa xatua së troa kepe thangane qaathene la uati hmitrötr.

13. Thenge la 2 Timoteo 3:16, 17, nemene la aqane troa xatua së hnei Tusi Hmitrötr, ngo nemene la nyine tro sa pane kuca?

¹³ Ame la hnapan, troa inine la Wesi Ula i Akötresie. (E jë la 2 Timoteo 3:16, 17.) Jëne la uati hmitrötr, hnei Iehova hna amë la itre mekuna i Nyidrë ngöne la he ne la itre ka cinyihane la Tusi Hmitrötr. Ame la easa e me lapa mekune la hna qaja hnei Tusi Hmitrötr, kola lapa ngöne la he së me ketr la hni së hnene la itre hna amekötin hnei Iehova. E cili, easa saze aqane mel matre troa amadrinë Iehova. (Heb. 4:12) Ngo maine easa ajane troa kepe thangane qaathene la uati hmitrötr, loi e tro sa xomi ijin troa inine la Tusi Hmitrötr me lapa mekun. Tro hë lai a hetre thangane ngöne la aqane ithanata së me itre huliwa së.

14. (a) Pine nemene matre easa kapa la uati hmitrötr ngöne la hna icasikeu? (b) Nemene la aqane tro sa kepe thangane qaathene la uati hmitrötr ngöne la itre icasikeu?

¹⁴ Ame la hnaaluen, troa ce atrunyi Akötresie. (Sal. 22:22) Easa kapa la uati hmitrötr ngöne la hna icasikeu. (Hna ama. 2:29) Pine nemen? Pine laka easa sipo uati hmitrötr ngöne la thith, me thinge la itre nyima hna nyitrepen hnei Tusi Hmitrötr, nge easa kepe ini qaathene la itre trejin hna acile hnei uati hmitrötr. Ketre, uati hmitrötr a xatuane la itre trejine föe troa hnëkën me kuca la hnëqa i nyudren. Ngo maine easa ajane troa kepe thangane qaathene la uati hmitrötr, loi tro sa hnëkëne hnyawa la itre icasikeu me hamë mekun. Tro hë sa tune la itre he ka kötr ke, hna ufe hnei eny la itre isihnyeun.

15. Nemene la aqane xatua së hnei uati hmitrötr ngöne la hna cainöj?

¹⁵ Ame la hnaakönin, troa catre cainöj. Ame la easa cainöj me hamë ini, easa nue la uati hmitrötr troa xatua së. (Rom. 15:18, 19) Troa hetre thangane la uati hmitrötr, e hne së hna catre cainöj me catre huliwane la Tusi Hmitrötr. Loi e tro mina fe sa huliwane la itre aqane nyiqane ithanata, hna amë e hnine la Mel Me Huliwa Ne Cainöj Pepa Nyine Huliwan. Tro hë lai a hetre thangane la huliwa ne cainöje së.

16. Nemene la ketre aqane tro sa kapa la uati hmitrötr?

¹⁶ Ame la hnaafoan, troa thithi koi Iehova. (Mat. 7:7-11; Luka 11:13) Tro sa kapa la uati hmitrötr, e hne së hna sipone koi Iehova jëne la thith. Pëkö ewekë ka atreine troa sewe së troa thithi koi Iehova. Thatreine kö Satana troa sewe së troa kapa la uati hmitrötr, ngacama hna akalabusi së. (Iako. 1:17) Nemene la aqane tro sa thith matre troa kepe thangane la uati hmitrötr? Tro sa pane ce wang la thith  hna xome qa ngöne la ceitun ne la Evangelia i Luka. *

17. Nemene la ini hne së hna xom göne la thith, qa ngöne la ceitune i Iesu ngöne Luka 11:5-9, 13?

¹⁷ E jë la Luka 11:5-9, 13. Kola amamane hnene la ceitune i Iesu la aqane tro sa thith matre troa kapa la uati hmitrötr. Ame ngöne la ceitune celë, kola amamane laka, hnene la trahmany hna kapa la hnei angeic hna ajan “pine la aqane ielene.” Tha xoue i angeice kö troa sipo ixatua kowe la sinee i angeic, ngacama hnenyipajidri hë. (Wange ju la mwb18 Julai.) Nemene la hna ini së hnei Iesu göne la thith? Öni nyidrë: “Sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie.” Haawe, nemene la ini koi së? Maine easa ajan troa kapa la uati hmitrötr, loi e tro sa catre thith me sipo Iehova.

18. Thenge la ceitune i Iesu, pine nemene matre tha tro kö sa luelu laka, tro kö Iehova a hamë uati hmitrötre koi së?

¹⁸ Kolo fe a xatua së hnene la ceitune i Iesu troa trotrohnine la kepin matre Iehova a hamë së la uati hmitrötr. Ame ngöne lo ceitun, aja ne lai trahmany troa kapa hnyawa la atr ka traqa. Ajane lai trahmany troa hamë nyine xen koi angeic, ngo ame pe pëkö xen. Öni Iesu ka hape, hna hamëne la xen koi angeic ke, tha mano kö angeic sipone ielene kowe la sinee i angeic. Nemene la ini hna hamën hnei Iesu? Maine aja ne la atr ka tha pexeje kö troa xatuane la ketre atr ka sipo ixatua, the qeje Iehova palaha, Keme së e koho hnengödrai! Haawe, tha tro kö sa luelu laka, tro kö Iehova a sa la itre thithi së me hamë uati hmitrötre koi së.—Sal. 10:17; 66:19.

19. Pine nemene matre ijije hi tro sa xomihnine la itre jol enehila?

¹⁹ Xecie hnyawa koi së laka, ijije hi tro sa mele nyipici ngacama Satana palahi a qanangazo së. Pine nemen? Pine laka lue aqane xatua së hnene la uati hmitrötr. Ame la hnapan, ej a hamë trengecatre së matre tro sa atreine xomihnine la itre jol. Ame la hnaaluen, ej a xatua së troa catre nyihlue i Iehova utihë la fene ka hnyipixe. Haawe, catre pi së sipone la uati hmitrötre i Iehova!