1-2. (a) Thenge la tusi Efeso 6:16, pine nemene matre ka nyipiewekë la “petr ka tru ne la lapaun”? (b) Nemene la lue hnying hne së hna troa ce wang?

HAPEU, hetrenyi kö the së la “petr ka tru ne la lapaun”? (E jë la Efeso 6:16.) Eje hi. Tune la petr ka tru kola thupëne hnyawa la ngönetrei së, ketre tune fe, kola thupë së hnene la lapaune së, qa ngöne la itre huliwa ka sis me isi, me itre xaa ewekë ka ifeketh memine la itre hna amekötin hnei Akötresie.

² Ngo easa melëne la “itre drai ne la pun,” matre tro palakö a tupathe la lapaune së. (2 Tim. 3:1) Nemene la nyine tro sa kuca, matre tro sa atre laka, ka catre la lapaune së? Nemene la nyine tro sa kuca matre tro palahi sa catre lapaun? Tro la tane mekun celë a sa la lue hnying celë.

3. Nemene la hna kuca hnene la itre sooc kowe la itre petre i angatr, nge pine nemen?

³ Ame la petr ne la itre sooc ekö, tre, hna hakuthe hnei kupeine öni. Hnei angatr palahi hna köle hnei oel me nyihnyawane la itre götrane hna nyi faon. Maine kola öhn hnene la sooc laka, ngazo hë la petre i angeic, angeic a canga nyihnyawan, matre hnëkë hnyawa angeic kowe la isi. Nemene la ini hne së hna xom qa ngöne la ceitune celë göne la lapaun?

4. Pine nemene matre nyipiewekë troa waipengöne la petre ne la lapaune së, nge nemene la aqane tro sa kuca?

⁴ Tune la itre sooc ekö, loi e tro palahi sa waipengöne la  petre ka tru ne la lapaune së, matre hnëkë hnyawa së kowe la isi. Ame easë itre Keresiano, easa isi memine la itre u ka ngazo. (Efe. 6:10-12) Isa qanyi së kö xome la petre së. Hapeu, atreine jë kö së cile catr ngöne la itupath? Ame la hnapan, tro sa sipo ixatua koi Akötresie jëne la thith. Thupene lai, tro sa e Tusi Hmitrötr matre atreine jë së waiewekë tui Iehova. (Heb. 4:12) Öni Tusi Hmitrötr: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.” (Ite edomë 3:5, 6) Pane mekune jë la itre mekun hne së hna isa axeciën. Maine jë, hne së hna cile kowe la ketre jol göi manie. Qëmekene troa thele nyine lai jol, hne së kö hna lapa mekune lo hna qaja hnei Iehova ngöne Heberu 13:5: “Tha tro jë kö ni a triji eö, nge tha tro jë kö ni a nuaxöji eö”? Hapeu la xötre celë, eje kö a acatrene la lapaune së koi Iehova? Maine eje hi, kolo lai a amamane laka, ka lolo la petre ne la lapaune së.

5. Nemene la itre hne së hna öhn ngöne la easa waipengöne la lapaune së?

⁵ Tro sa sesëkötre ngöne la easa waipengöne la lapaune së. Maine jë, hetre ewekë ka ngazo nyine tro sa saze, tune la kola nanazije la lapaune së pine laka, easa hnengazo menu, maine pena hna sili trengathoi së, nge easë fe a kucakuca. Celë hi matre easa hnying ka hape, nemene la aqane tro sa thupën matre tro palahi a catre la lapaune së?

6. Nemene la itre ceitun ka amamane laka, easa hnehengazo?

⁶ Loi e tro sa hnehengazone la itre xaa ewekë. Maine jë tro sa hnehengazo pine laka, easë palahi a ajane troa amadrinëne la hni Iehova me Iesu. (1 Kor. 7:32) Maine jë hne së hna kuca la ketre ewekë ka ngazo. E cili, easa hnehengazo me thele la nyine troa kuca, matre lolo hmaca la aqane imelekeu së me Iehova Akötresie. (Sal. 38:18) Ketre, easa hnehengazo pine laka, easa ajane troa amadrinëne la föi easë, me thupëne la fami së memine la itre xaa trejin.—1 Kor. 7:33; 2 Kor. 11:28.

7. Thenge la hna qaja ngöne Ite Edomë 29:25, pine nemen matre tha tro pi kö sa xoue atr?

⁷ Ngo nyipici laka, hetre ethane fe kowe la lapaune së e tro sa hnehengazo menu. Maine jë tro sa hnehengazo thatraqane la xen me heetr. (Mat. 6:31, 32) Pine laka, easa thele jën matre troa tingetinge la hni së, matre easa huliwa göi troa kepe manie atrun. Ame pe, ijije hi tro sa hni koi manie. Ketre, tro ha nanazije la lapaune së koi Iehova me thë la aqane imelekeu së me Iehova. (Mar. 4:19; 1 Tim. 6:10) Maine jë tro fe sa hnehengazo pine laka, easa wangatrune la mekuna ne la itre xan. Easa xou wanga troa ahmahmanyi së me akötrë së hnei angatr. E cili, tha easë hmaca kö a thele troa amadrinë Iehova. Celë hi matre, nyipiewekë tro sa sipo Iehova troa acatrene la lapaune së me hamë së la trengecatr, matre troa atreine cile kowe la itre jole cili.—E jë la Ite Edomë 29:25, Luka 17:5.

8. Nemene la aqane tro sa goeëne la itre trengathoi hna sil?

⁸ Ame Satana, tre, “keme ne la thoi.” Celë hi matre, angeic a upe la itre atr ka drei angeic troa qaja la itre trengathoi göi Iehova memine la itre trejin. (Ioane 8:44) Ka ceitu memine la itre ka iamenumenu laka, angatr a sili trengathoi me iaöne la itre atr, göne la organizasio i Iehova.  Angatr a fejane la itre trengathoi cili ngöne la itre itus me zonal maine pena angatr a qaja ngöne radio me televizio. Ame la itre trengathoi cili, ke kösë “itre ewekë hna hna” hnei Satana. (Efe. 6:16) Nemene la nyine tro sa kuca e tro ketre a hane qaja la itre trengathoi cili? Tha tro kö sa drei angeic! Pine nemen? Pine laka, ka catre la lapaune së koi Iehova nge easa mejiune kowe la itre trejin. Eje hi, tha easë kö a ithanata memine la itre ka iamenumenu, ngacama easa ajane troa atre la itre hnei angatr hna qaja.

9. Nemene la ethan e tro sa kucakuca?

⁹ Maine tro sa kucakuca, tro ha nanazije la lapaune së. Ame itre xaa ijin, easa kucakuca ke, nyimutre la itre jol. Eje hi laka, tha easë kö a wangacone itre ej. Ngo tha easë pe a lapa mekune itre ej o drai, wanga tro sa thëthëhmine la itre hna thingehnaean hnei Iehova. (Hna ama. 21:3, 4) Ame itre xaa ijin, kucakuca catre palaha së, matre pëhë aja së troa nyihlue i Iehova. (Ite edomë 24:10) Ngo loi e tro sa thupën matre tha tro kö a traqa lai koi së.

10. Nemene la ini hne së hna xom qa ngöne la tusi hna cinyanyin hnene la ketre trejine föe?

¹⁰ Hanawang la aqane acatren hnene la ketre trejin föe ne Etazini la lapaune i eahlo, ngacama kola hace catre la meci ne la föi eahlo. Hnei eahlo hna cinyanyi kowe la hnalapa ne xomi meköti e Warwick (Neweyok), me hape: “Ngacama akötre la mele hun, ngo hetre mejiun hun, matre eahuni a catr. Tru la hni ne oleng koi Iehova ke, hnei Nyidrëti hna hamëne la nöjei ewekë, matre troa acatrene la lapaune nyio me aegöcatrenyi nyio. Ka nyipiewekë catre koi nyio la itre eamo hna hamën. Kola xatua nyio troa atreine cile kowe la itre jol qaathei Satana, me catre nyihlue i Iehova.” Ijije hi tro sa cile catr ngacama easa kucakuca! Tune kaa? The thëthëhmine kö laka, qaathei Satana la itre jole së. Loi e tro palahi sa mejiun laka, tro kö Iehova a aegöcatrenyi së. Ketre, wangatrune jë la itre göxeni qaathei Iehova.

11. Nemene la itre hnying nyine tro sa isa mekun, matre troa wang laka, ka catre hi la lapaune së?

 ¹¹ Hapeu, ka nyipiewekë kö tro sa acatrene la lapaune së? Ame ngöne la itre treu ka ase hë, hne së kö hna cile kowe la itre jol? Hne së kö hna thipetrije la itre trengathoi qaathene la itre ka iamenumenu? Ame ngöne la easa kucakuca, atreine kö së xomihnin? Maine eje hi, kolo lai a hape, ka catre la lapaune së. Ngo nyimutre la itre aqane nyinyithiina i Satana ka troa tupathi së. Celë hi matre loi e tro sa hmek. Tro sa ce wang la ketre aqan.

12. Nemene la pune koi së e tro palahi sa aja mo?

¹² Maine tro sa aja mo, tro ha nanazije la lapaune së, nge tro hë sa wangacone la huliwa i Iehova. Öni Paulo aposetolo: “Pëkö atr ka sooc nge ka xomi ketre huliwa nyine mele koi angeic, ke aja i angeic troa amadrinëne la atre alö angeic.” (2 Tim. 2:4) Hna wathebone la itre sooce i angetre i Roma troa xome hmaca la ketre huliwa. Nemene la pun kowe la itre ka tha idrei?

13. Pine nemene matre hna wathebone la itre sooc troa xome la ketre huliwa?

¹³ Pane mekune jë laka, itre sooc a inine troa isi ngo patre pëhë la ketre. Angeic a salemë xen ngöne la hna maketr. Ame ngöne la jidr, itre sooc a hnëkëne la itre petr me itre taua i angatr. Ngo ame lo ketre, angeic pe kö a hnëkëne la itre xen nyine troa salemën. Ame hë e hmakany, traqa pi hi la ithupëjia. Drei la sooc ka hmek nge ka drengethenge la tane isi angeic? Maine easë ju ngöne la hna isi, tro kö sa ce cil memine la itre sooc ka hmek, maine ce cile pena memine la sooc ka thatreine isi?

14. Nemene la ka nyipiewekë catre koi së?

¹⁴ Ceitu së hi memine la itre sooc ka hmek. Easa ajane troa amadrinëne la itre tane isi së, ene Iehova me Iesu Keriso. Ka nyipiewekë catre kö lai hune la nöjei ewekë ne la fene i Satana. Celë hi matre, easa nue la traeme së me trengecatre së, troa catre nyihlue i Iehova me  thupën matre tro palahi a lolo la petre ne la lapaune së.

15. Nemene la hna qaja hnei Paulo aposetolo, nge pine nemen?

¹⁵ Loi e tro palahi sa hmek! Pine nemen? Öni Paulo aposetolo, “ame la itre ka isine troa trenamo” ke, angatr a “nanyi qa ngöne la lapaun.” (1 Tim. 6:9, 10) Ame la hnaewekë “nany,” tre, kola qaja la troa thel la itre ewekë ka tha nyipiewekë kö ngöne la mel. E cili, troa cia e kuhu hni së la “itre aja ka hmo nge ka iakötrë.” Ngo tha tro kö sa thëthëhmine laka, itre aqane nyinyithiina i Satana hi lai matre troa ananazijë së.

16. Thenge la Mareko 10:17-22, nemene la itre nyine tro sa isa hnying?

¹⁶ Maine jë, hetre manie së hi troa itöne la itre xaa ewekë. Hapeu, ka ngazo kö troa itöne la itre hne së hna ajan, nge tha nyipiewekë pe? Ohea. Ngo loi e tro sa isa hnying ka hape: Maine ijiji së hi troa itöne la ketre ewekë, ngo hapeu, hetre traeme së kö me trengecatre së troa nyihnyawane la ewekë cili? Tha easë kö lai a nyiqaane kei kowe la aja mo? Tha tro kö së lai a tune lo thöth ka thipetrije la eamo i Iesu ka hape, troa catre huliwa i Akötresie? (E jë la Mareko 10:17-22.) Epi tro palahi sa ahmaloeëne la mele së, me nue la  traem me trengecatre së, matre troa kuca la aja i Akötresie!

17. Nemene la nyine tro palahi sa mekun?

¹⁷ Tha tro pi kö sa thëthëhmine laka, easa isi. Celë hi matre, nyipiewekë tro sa hnëkë me hmek e nöjei drai. (Hna ama. 12:17) Ketre, tha qanyine kö la ketre trejin troa xome la petre ne la lapaune së. Isa qanyi së kö acatrene la lapaune së.

18. Pine nemene matre hnene palahi la itre sooc hna ea catrëne la itre petre i angatr?

¹⁸ Ame ekö, hna wangatrune la sooce ka catre isi. Ngo maine patre pëhë la petre i angeic, tro hë angeic a hmahma troa bëeke kowe la hnalapa. Hnei Tacitus, ketre atre Roma, hna cinyiany ka hape: “Ketre nyine hmahmane ka tru kowe la sooc, e troa nuetrije la petre i angeic ngöne la hna isi.” Celë hi kepin matre hnene palahi la itre sooc hna ea catrëne la petre i angatr.

19. Nemene la aqane tro sa ea catrëne la petre ne la lapaune së?

¹⁹ Easë fe a ea catrëne la petr ne la lapaune së, ngöne la easa sine la itre icasikeu, me qeje Iehova memine la Baselaia i Nyidrë. (Heb. 10:23-25) Ketre, easa e la Wesi Ula i Akötresie e nöjei drai me catre thith, matre tro Nyidrëti a xatua së troa trongëne la itre hne së hna e. (2 Tim. 3:16, 17) E cili, tha tro kö a hun hnei Satana. (Is. 54:17) Tro ha thupë së hnene la “petr ka tru ne la lapaun.” Tro fe sa catre huliwa memine la itre trejin. Nyipici tro sa hun ngöne la isi ke, hne së palahi hna acatrene la lapaune së o drai. Ngo ame la ka sisitria ke, ce easë me Iesu ngöne la nyidrëti a troa ngaa Satana memine la itre sine xöle i angeic.—Hna ama. 17:14; 20:10.