1. Nemene la hnying hne së hna lapa mekun?

 MAINE JË, easa hnehengazo göne la itre ewekë ka troa traqa elany, tune la kola troa apatrene la hmi ka thoi, me isi Gog atre Magog, me isi Amagedro. Maine jë, hne së hna isa hnying ka hape, ‘Tro kö ni a mele nyipici ngöne la itre jole cili?’ Hanawange la hna qaja hnei Iesu. Öni nyidrë: “The nue kö troa angazone la itre hni nyipunie. Ngo amamane jë pe la lapaune i nyipunie.” (Ioane 14:1) Haawe, maine tro sa acatrene la lapaune së, tro hë sa atreine cile catr ngöne la itre jol.

2. Nemene la nyine troa kuca matre acatrene la lapaune së, nge nemene la hne së hna troa ce wang?

² Nemene la nyine tro sa kuca matre acatrene la lapaune së? Loi e tro sa goeëne la aqane ujë së ngöne la itre jol enehila. E cili, tro hë sa öhne la itre götrane nyine tro sa huliwan matre acatrene la lapaune së. Eje hi, ame la easa cile catr ngöne la itupath ke, kola acatrene la lapaune së. Ketre, kolo fe a hnëkë së troa cile kowe la itre xaa jol elany. Tro sa ce wang la 4 lao jol hna cile kow hnene la itretre drei Iesu, nge ka amamane laka, nyipiewekë tro palakö angatr a acatrene la lapaune i angatr. Thupene lai, tro sa ce wang la aqane tro sa cile kowe la itre jole cili enehila, me hnëkë kowe la itre jol elany.

3. Thenge la Mataio 6:30, 33, nemene la qaja hnei Iesu göne la lapaun?

³ Ijije hi tro la kem a hnehengazo göi xen, me hna heetr, me hnalapa i angeic me fami angeic. Ngo tha ka hmaloi kö ngöne la itre drai ne la pun. Ame itre xaa trejin, pëhë  huliwa i angatr, nge jole troa öhnyi huliwa. Ame itre xan, hnei angatr hna thipën la ketre huliwa ke, ka isazikeu memine la hna qaja hnei Tusi Hmitrötr. Celë hi matre, loi e tro sa catre lapaune kowe la ixatua i Iehova thatraqane la fami së. Celë hi lai hna qaja hnei Iesu kowe la itretre drei nyidrë ngöne la Cainöj Hune La Wetr. (E jë la Mataio 6:30, 33.) Eje hi, maine xecie koi së laka, tha tro kö Iehova a nuaxöji së, tro hë sa amë panëne la Baselaia i Nyidrë ngöne la mele së. Nge ame la easa öhne la Iehova a hamë së la ka ijij, kola upi së troa acatrene la lapaune së me lapa qale koi Nyidrë.

4-5. Tune kaa la aqane xatuane Iehova la ketre fami ka pë ewekë?

⁴ Hanawang la hna melën hnene la fami Castro qa Vénézuéla. Hnei Iehova hna xatua angatr ngöne la kola traqa la itre jol göi manie. Ame ekö, hetre hlapa i angatr nge jëne mele i angatre hi lai. Ame la ketre drai, hnene la ketre gurup ka isi hna helë angatr qa cili. Öni Miguel: “Hnene la ketre atr hna hamë huni la ketre hnepadro, matre troa lapan me eëny. Ngo ame e nöjei hmakany, eni a sipo Iehova troa hamë huni la ka ijij kowe la drai.” Eje hi, tha ka hmaloi kö la mele i Miguel me fami angeic, ngo xecie koi angatr laka, tro kö Iehova a xatua angatr. Celë hi matre, angatr palahi a sine la itre icasikeu me catre cainöj. Angatr a amë panëne la Baselaia, nge Iehova a nyihnyawane la mele i angatr.

⁵ Ame ngöne la itre ijine jol, hnei Miguel me Yurai hna lapa mekun la aqane thupëne Iehova la mele i nyidro me itre nekö i nyidro. Hnei Iehova hna upe la itre trejin troa hamëne la ka ijij koi angatr, me xatua Miguel troa thele huliwa. Ame itre xaa ijin, hna hane ixatua hnene la Bethela. Eje hi, tha hnei Iehova kö hna nuaxöji angatr. Ame hë enehila, catrecatre la lapaune i Miguel me fami angeic. Öni Yoselin, nekö i Miguel jajiny: “Eni a haine la aqane xatua huni hnei Iehova. Ketre sineeng Nyidrë. Nge Nyidrëti la ka thupëne la mele hun. Hnene la itre jole cili hna hnëkë hun kowe la itre jol ka tru elany.”

6. Nemene la aqane tro sa acatrene la lapaune së ngöne la itre ijine jol göi manie?

⁶ Hapeu, epuni kö a cile kowe la itre jol göi manie? Maine eje hi, ijije hi tro epuni a catre lapaun. Nemene la nyine troa kuca? Loi e troa catre thith koi Iehova. Loi e tro fe a e me lapa mekun la hna qaja hnei Iesu ngöne Mataio 6:25-34. Ketre, loi e troa xomi ini qa ngöne la aqane xatuane Iehova la itre hlue i Nyidrë. Eje hi, hnei Iehova hna thupë angatr ke, hnei angatr hna catre nyihlue i Nyidrë. (1 Kor. 15:58) E cili, tro ha xecie koi epun laka, tro Iehova a xatua epun, tune lo aqane xatua angatr hnei Nyidrë. Atre hi Nyidrë  la ka nyipiewekë kowe la mele i epun. Ame la epuni a öhne la ixatua i Iehova ngöne la mele i epun, kola acatrene la lapaune i epun. Nge tro hë epuni lai a atreine cile catr kowe la itre jol elany.—Hab. 3:17, 18.

7. Thenge la Mataio 8:23-26, tune kaa la aqane tupathe la lapaunene la itretre drei Iesu hnene “la janacas”?

⁷ Ame lo Iesu e kuhu hnagejë me itretre drei nyidrë, hna traqa la ketre janacas. E cili, hnei Iesu hna amamane koi angatr laka, nyipiewekë tro palakö angatr a acatrene la lapaune i angatr. (E jë la Mataio 8:23-26.) Ngacama kola enyi catr, ngo Iesu a meköle hnyawa e hnine la he. Ame pe, kola xou hnene la itretre dreng, matre hnei angatr hna ahlë nyidrë me sipo nyidrë troa amele angatr. E cili, hnei Iesu hna ameköti angatr me hape: “Hnauëne la nyipunie a xou, itretre lapaune acon?” Maine ju, tro angatr a mekun laka, ijiji Iehova hi troa amele Iesu me itre sinee i nyidrë. Nemene la ini koi së? Maine tro sa acatrene la lapaune së, tro hë sa atreine cile kowe la itre “janacas” ka traqa ngöne la mele së.

8-9. Tune kaa la aqane tupathe la lapaune i Anel, nge nemene la ka xatua angeic?

⁸ Hanawang la tulu i Anel, ketre trejine föe qa Porto Rico. Hnei angeic hna cile kowe la ketre “janacas.” Ame lo 2017, hna feje la uma i eahlo hnei udreli, nge ketre pëhë huliwa i angeic. Öni Anel: “Hleuhleu me akötr la meleng ngöne la ijine cili. Ngo hnenge hna catre thith me lapaune koi Iehova. Nge hnenge hna elë hune la xoung me catre xomihni.”

⁹ Ame la ketre ewekë ka xatua Anel ke, ene la troa idrengethenge. Öni angeic: “Hnenge hna drengethenge la itre hna amekötin hnene la organizasio i Iehova, matre tha hnehengazo menu kö ni. Ketre, hnei Iehova hna nyihnyawane la meleng. Hnei Nyidrëti hna upe la itre trejin troa ithuecatre jëne la Tusi Hmitrötr me hamëne la ka ijij thatraqane la meleng. Eje hi, hnei Iehova hna hamën atrun hune la itre hnenge hna sipon, nge celë hi lai ka acatrene la lapauneng.”

10. Nemene la nyine tro sa kuca ngöne la easa cile kowe la ketre “janacas”?

¹⁰ Hapeu, epuni kö a cile kowe la ketre “janacas” ka tru? Maine jë, hna lepe la nöje i epun hnene la ketre hulö. Maine pena, hna tithi epuni hnei mec, matre akötre catr la mele i epun. Ngacama thatre kö epuni la nyine troa kuca, ngo catre jë lapaune koi Iehova. Loi e troa easenyi koi Nyidrë ngöne la thith, me lapa mekun lo itre aqane xatua epuni hnei Nyidrëti ekö. (Sal. 77:11, 12) E cili, tro ha xecie koi epun laka, tha tro kö Iehova a nuaxöji epun enehila me elany.

11. Pine nemene matre loi e tro sa drengethenge la itre trejin ka elemeken?

 ¹¹ Nemene la ka troa xatua së troa xomihnine la itre jol? Tune la hna qaja hnei Anel, tro sa idrengethenge. Celë hi matre, nyipiewekë tro sa mejiune kowe la itre hna acile hnei Iehova me Iesu. Ame itre xaa ijin, tha trotrohnine kö së la itre hnei angatr hna amekötin. Ame pe, Iehova a amanathithine la itre ka idrengethenge. Tusi Hmitrötr a qaja ka hape, jëne mele la troa idrengethenge. Nge celë hi lai hna anyipicine hnene la hna melën hnene la itre xaa trejin. (Eso. 14:1-4; 2 A. l. ite jo. 20:17) Loi e tro sa lapa mekun la itre tulu i angatr. Tro hë lai a thue aja së troa drengethenge la itre hna amekötin hnene la organizasio i Iehova enehila me elany. (Heb. 13:17) Haawe, the xouene kö la janacas ka troa traqa elany.—Ite Edomë 3:25.

12. Thenge la Luka 18:1-8, tune kaa la aqane tro sa lapaune ngöne la kola kuca koi së la ketre ewekë ka tha meköti kö?

¹² Atre hi Iesu laka, troa tupathe la lapaunene la itretre drei nyidrë me qanangazo angatr nge pëkö kepin. Celë hi matre hnei nyidrëti hna hamën la ketre ceitune ngöne la tusi Luka, matre xatua angatr. Hnei Iesu hna qaja la ketre sine föe ka anyimua tro troa wang la ketre atre amekötin ka ngazo thiina. Xecie koi eahlo laka, troa hetre thangane la aqane xomihni eahlo. Ame e thupen, hna kapa la sipo i eahlo hnene la atre amekötin. Nemene la ini koi së? Akötresie ka meköti Iehova. Öni Iesu: “Hapeu, tha tro kö Akötresieti lai a hane isenyine thatraqane la itre hnei nyidrëti hna iën, itretre treije koi nyidrë e lai me jidr?” (E jë la Luka 18:1-8.) Nge öni Iesu hmaca jë hi: “Hapeu e traqa pi elanyi la Nekö i Atr, tro kö nyidrëti a öhne la ketre atr ka hane lapaune tun e celë fen?” Ame la kola kuca koi së la ketre ewekë ka tha meköti kö, loi e tro sa lapaune tune la sine föe, me xomihni aqeany, me cile catr. Loi e xecie koi së laka, tro kö Iehova a xatua së. Ketre, loi e tro fe sa mejiune kowe la menene la thith. Tro hë sa öhne la aqane sa Iehova la itre thithi së.

13. Nemene la thangane la hna thithi hnene la nekö i Vero jajiny?

¹³ Hanawang la ka traqa koi Vero, ketre trejine föe qa Congo-Kinshasa. Tha ka hmi kö la föi Vero, nge hetre nekö i nyidroti jajiny ka 15 lao macatre. Ame la ketre drai, hna traqa hnene la ketre gurup ka isi me ihumuth ngöne la tribu, matre hnei angatr hna kötre mel. E cili, hna acilë angatr hnene la ketre trahmanyi ka cile fë ikuqa, me axouenyi angatr, me thele troa humuthi angatr. Hnei Vero hna treij, matre hnene la nekö i eahlo hna thithi  me anyimua qaja la ëje i Iehova. Hnene la tane isi hna hnyingëne la neköjajiny ka hape, “Drei la ka ini hmunë troa thith?” Öni angeic, “Hnei nenë hna ini ni jëne la tulu ne thith hna qaja ngöne Mataio 6:9-13.” Önine la tane isi, “Tro jë hmunë, me keme me thine i hmunë. Nge epi tro Iehova Akötresi epuni a thupë epun!”

14. Nemene la ka troa tupathe la lapaune së, nge nemene la ka troa xatua së troa catre xomihni?

¹⁴ Tune la hna melën hnene la fami i Vero, tha tro kö sa wangacone la menene la thith. Ngo tune kaa e tha canga sa kö Iehova la itre thithi së? Tune lo sine föe hna qaja hnei Iesu, loi e tro palahi sa catre thith, me mejiune laka, tha tro jë kö a nuaxöji së hnei Akötresie, ngo tro kö Nyidrëti a sa la itre thithi së. Ketre, loi e tro fe sa sipone ielene la uati hmitrötre i Nyidrë. (Fil. 4:13) Eje hi, calemi hë la ijine tro sa kapa la itre manathith ka tru, me thëthëhmine la itre akötre së enehila. Haawe, catre jë së xomihnine la itre jol me mejiune koi Iehova. Tro hë sa atreine cile kowe la itre jole ka tru elany.—1 Pet. 1:6, 7.

15. Thenge la Mataio 17:19, 20, nemene la jol hna cile kowe hnene la itretre drei Iesu?

¹⁵ Hnei Iesu hna inine la itretre drei nyidrë laka, nyipiewekë troa acatrene la lapaune së matre atreine cile kowe la itre jol. (E jë la Mataio 17:19, 20.) Ame la ketre ijin, thatreine kö la itretre dreng troa helëne la ketre dremoni, ngacama hnei angatre hë hna kuca ekö. Pine nemen? Öni Iesu ka hape, tha catrecatre kö la lapaune i angatr. Hnei nyidrëti hna ithuecatre koi angatr troa acatrene la lapaune i angatr, matre atreine cile kowe la itre jol ka tru ceitu me itre wetr! Ame enehila, tro fe a hane traqa koi së la itre jole ka tru.

16. Tune kaa la aqane xatua Geydi hnene la lapaune i eahlo troa xomihnine la ketre jole ka tru?

¹⁶ Hanawang la ka traqa koi Geydi, trejine föe qa Guatémala. Hna humuthi Edi, föi eahlo qëmekei eahlo ngöne lo nyidroti a traqa qa hna icasikeu. Tune kaa la aqane xatua Geydi hnene la lapaune i eahlo? Öni eahlo: “Hnenge hna catre thith me nue koi Iehova la ehnefeng, matre tingetinge la hning. Hnei Iehova fe hna hnimi ni me akeukawane la hning, jëne la itre sineeng me itre trejin. Ame la ketre ewekë ka xatua ni ke, ene la troa huliwa koi Iehova o drai. Tha eni kö a hnehengazo menu, göne la itre drai elany. Atre hi ni laka, jëne la ixatua i Iehova me Iesu, memine la organizasio, ijije hi tro ni a cile catr.”

17. Nemene la ketre nyine tro sa kuca matre atreine cile kowe la ketre jol ka tru ceitu me itre wetr?

¹⁷ Hapeu, hna meci la ketre sinee i epun? Haawe, loi e tro epuni a e la itre  xötr ka troa acatrene la lapaune i epun kowe la melehmaca. Hapeu, hna upetröneë la ketre sinee i epun? Maine eje hi, loi e tro epuni a ini Tusi Hmitrötr matre xecie koi epun laka, ka meköti la ihaji Iehova. Eje hi, nyipiewekë tro sa acatrene la lapaune së ngöne la easa cile kowe la itre jol. Loi e tro fe sa qaja koi Iehova la itre aliene hni së. Nge tha tro pi kö sa lapa caas, ngo loi e tro palahi sa ce tro memine la itre trejin. (Ite Edomë 18:1) Ngacama akötre catre la hni epun, ngo kuca jë la itre huliwa me itre xaa ewekë ka amadrinë epun me xatua epun. (Sal. 126:5, 6) Nyipiewekë mina fe troa catre sine la itre icasikeu, me cainöj, me e la Tusi Hmitrötr. Ketre, the thëthëhmine kö la itre manathith hne së hna troa kapa elany qaathei Iehova. Ame la epuni a öhne la ixatua i Iehova, kola acatrene la lapaune i epun.

18. Nemene la nyine tro sa kuca ngöne la kola nanazije la lapaune së?

¹⁸ Maine easa öhne laka, kola nanazije la lapaune së ngöne la easa cile kowe la ketre jol, tha tro kö sa hnehengazo menu. Loi e tro pe sa acatrene la lapaune së me thith tune la itre aposetolo ka hape: “Nyixane jë la lapaune hun.” (Luka 17:5) Ketre, loi e tro sa lapa mekun la tulu ne la itre trejin. Eje hi, tui Miguel me Yurai, tha tro kö sa thëthëhmine la aqane xatua së hnei Iehova. Tune la nekö i Vero jajiny me Anel, loi e tro sa thith me xëwe koi Iehova ngöne la itre ijine akötr. Nge tui Geydi, tha tro kö sa thëthëhmine laka, Iehova a upe la itre sinee së me itre trejin troa xatua së. Haawe, maine tro sa acatrene enehila la lapaune së koi Iehova ngöne la itre jol, tro fe hë sa cile catr me atreine xomihnine la itre jol elany.

19. Nemene la ka xecie koi Iesu, nge nemene la mejiune së elany?

¹⁹ Hnei Iesu hna qaja kowe la itretre drei nyidrë ka hape, kola nanazije la lapaune i angatr. Ame pe, xecie koi nyidrë laka, jëne la ixatua i Iehova, tro kö angatr a atreine cile kowe la itre jol. (Ioane 14:1; 16:33) Ketre, atre hi Iesu laka, hnene la lapaun matre alanyimu la itre ka troa mele pe qa ngöne la akötr atraqatr. (Hna ama. 7:9, 14) Hapeu, tro fe kö epuni a sine la ka alanyimu atraqatr? Jëne la ihnimi gufa i Iehova, ijije hi tro sa mele qa ngöne la akötr atraqatr. Ngo nyipiewekë tro sa acatrene la lapaune së enehila!—Heb. 10:39.